مشكلة خطيرة

[مشكلتي]

هناك شاب يحاول داءما الاتصال بي رغم اني لا احب ذلك فيقول لي حاب نخطب،وكل مرة نقلو روح للدارنا ولكنه يتلاعب بكلمتي،ويتلاعب بمشاعري،فاحاول تجنبه ولكنه يصر على الوقوف امامي ،فهمتو مليار مرة يروح يخطيني لكنه لايفعل،عطيتو كلمتي وقلتلو اءا تحب الحلال كاين دارنا واقصد عايلتي،لكنه فقط يحب سماع الموافقة ثم يكذب عليا ويخذلني ويتلاعب بمشاعري،تجنبته مرارا وتكرارا ولكنه يصر على مضايقتي،اريد وضع حد لتصرفاته بدون علم عاءلتي،لانهم سيقتلونه لو علمو انه يتبعني اينما اذهب ويتلاعب بي،اريد الاتصال بالشرطة من الانترنات دون ذكر اسمي وابلغ عنه واعطيهم اسم المكان الذي يضايقني فيه،ليوقفوه عند حده لان هذا التصرف يسمى تحرش ،كيف اتصل بالشرطة من النات،ارجوكم ساعدوني

[زبدة ذايبة]

أي تحرش تتحدثين عنه؟؟؟؟؟؟

أنت عطيتيلو رقم الهاتف تاعك.

وقلتيلو يجي يخطبك.

وداركم ماعندهم حتى خبر على الموضوع.

ولما ماجاش يخطب تحاولي تتهميه بالتحرش!!!!!!!

منين جاب رقم الهاتف تاعك؟؟؟؟؟

وين يعرفك في الطريق حتى يتبعك؟؟؟؟؟

كان الخطأ منك

وكنتي تظني انه يجي يخطبك.

لكن هيهات هيهات الشباب اللي من هذ النوع مايعرفوش أبواب البيوت.

لهذا حتى ماتتورطيش اكثر من الأحسن تقولي لأهلك.

على الأقل يتوقف من مضايقتك في الشارع.

وإذا اتصل ماترديش عليه.

وهذ لحكاية تاع يتلاعب بمشاعرك أنت المتسببة فيها.

للأسف هذا الشاب لقاك ساهلة وساذجة.

ماتزيديش تجاوبيه.

وإذا اضطر الامر بدلي رقم الهاتف تاعك.

وبخصوص الشرطة وما الشرطة بدون مايعرفو

إسمك أو شخصيتك فهذا والله عين الخطأ.

ولن يكون للشكوى تاعك أي معنى.

يعني ماتعبيش روحك من هذ الجانب



عاودي أضبطي أمورك وكوني حازمة.

في تصرفاتك وفي كل ما له علاقة او صلة

بالجنس الآخر.

فليس كل مايلمع ذهبا.

[محارب الحمق]

أكبر خطئ اقترفته هو مطاوعته بالكلام. قولك اذهب الى دارنا معناه أنا أريدك. فتحت النافدة لكنها ضيقة هو الان في مرحلة التوسيع (المرحلة 2). يجب أن لا تتركي فرصة للذئاب مهما كانت. يعني ماقادرش يتبعك للدار ويعرف وين تسكني؟ أرى ان لا تكلميه مطلقا وتجتنبيه كلية وتكوني حاسمة معه. ان لم يرتدع أخبري أباك.

[نجاة^^]

السلام عليكم
حسب ما فهمت ما يجيك ما يخطبك ،حب يتسلى فقط ،انا نقولك حطي النقاط على الحروف ووقفيه عند حدو،ولكن لازم اهلك يدخلو في هاذ لحكاية ،كيفاه خفتي عليه هوا منهم ومخفتيش على روحك منو ومنهم ،لا خبري اهلك احسن خاصة الاب ،وربي يفرج عليك .

[سيرين راجي]

لا شرطة لا والوا لمي عليه الغاشي فالطريق وبهدليه مايزيدش يقرب لطريقك

[وشاح الحنين]

بدلي رقم الهاتف
و حاولي ما تخرجي وحدك
تبليغ الشرطة ما يجيب لك غير الهدرة الزايدة

طبعا دون الدخول في حيثيات معرفتك به و رقم هاتفك الذي بحوزته
ربي يصلح احوالك

[مرام 2001]

قولي لابيك بلي كين واحد راه يدصرني ويتفاهم معاه
انا مرة كان وحد الرجل كبير يتبعني للثانوية ويعمل حركات في وجهه تخوف قلت لابي راح ليه وحكا معاه وقالو مرةى اخرى نكسرلك راسك ولا ندفنك فبلاصتك او شرطة وانت خير وليت نخرج فقط مع ابي وماما ومازدتش شفتو من هذاك النهار

[من قسنطينة]

السلام عليكم
وش فيه خطير هذا الأمر ؟ حبيت نفهم برك
الرجل إذا عطيتيه اهتمام سيتمادى في " الصماطة " تاعه. و أرجو أن تفهمي أن " الصماطة " تموت بالتجاهل
افهمي يالفحله انك انت شرطة نفسك
ربي يسهلك امورك ويهديك ويهدينا اجمعين

[soz soz]

خبري اهلك يحطولو حد.

[noursm]

ساهلة ما تزيديش ديري عليه
تجاهليه تماما و كانه غير موجود كي يجيك في الشارع
و بالنسبة للهاتف ما تزيديش تردي عليه( و ماشي تقفلي في وجهو لان هذا يعتبر اهتماما) سما ما ديريش اصلا على اتصالاته

يعاود مرة ، زوج ، ثلاثة ما يلقاش تفاعل منك يكره و يخطيك .

ساهلة ماهلة انتي برك اللي مكبرة الموضوع

[عادل عبد الله]

أنصحك من الأحسن أن تبلغي عنه الشرطة كي لا يتمادى معك لأن هذا النوع من الشباب ذئاب بشرية ، أو أن تغيري شريحة هاتفك .

[أبوإبراهيــم]

أنت تعطيه رقم الهاتف وتقول تحرش !!!!!!!!!

إنا لله وإنا إليه راجعون