ماعنديش خطاب

[مشكلتي]

سلام عليكم
اريد من الاخت زبدة دايبة ان تساعدني لان نصائحها مفيدة . انا بنت عمري 28 سنة ماكثة في البيت حبست قراية من بكري ومدرتش ستاج قعدت فدار ونستعرف بلي فنيانة وكي وصلت 20 سنة كان كل همي زواج لانني خفت نولي عانس كيما بنات عمي وامي ديما تدعيلي وخايفة نولي عانس بصح ماعنديش زهر مخطبونيش وكلما يزيد عام نخاف كثر حتى ولا عندي وسواس انا دركا 28 سنة حتى واحد ماخطبني من نهار لزدت من بطن امي مجاليش عريس ديما نسمع من بنات الجيران والاقارب انهم يجيلهم خطاب وانا لالا كنت نحسدهم ماشي بغرضي بصح نحسدهم نحسد اي واحدة يجيلها خطاب علبالي ماشي مليح بصح الله غالب نتمنى نتزوج وندير دار بصح ماشكيتش وحابة نفرح امي وكتاه نفرحها خايفة نبقى بلا زواج للابد ديما نخمم علبالي ماعنديش زهر مع العلم انني بنت مطيعة للوالدين وديما بابا يدعيلي دعوة الخير بصح ماشي على زواج لاني نحشم نقوله دعيلي نتزوج ويما ديما تدعيلي نتزوج ونتهنى ديما نتسال علاش بنات اخرين يتزوجوا وانا لالا برغم انه انا عاقلة ورزينة عليهم مكثت البيت ونخرج لضرورة برك ونخدم شغل دار وشاطرة بزاف في شغل دار وكل صبع بصنعة واش يزيدو كثر من هكدا مفهمتش رجال على واش يحوسوا نظن يحوسو على زين انا صح صح مرانيش شابة ومرانيش بشعة يعني نورمال كيما بزاف البنات مخصوصة فزين صح بصح شاطرة في امور دار وحادقة وزيد رزينة نعرف المسؤولية ليشوفني يمدلي كثر من عمري اما امور دين راني نصلي بصح مرانيش محجبة وماعنديش اعتراض نلبسه يعني لو كان برك يجيني خاطب غادي اي شي يقوله نديره حتى لو كان نقاب ونحوس على وليد الحلال يكون خدام هدا مكان وقبل سمانة جات جارتنا قالت بلي كاين واحد يحب يزوج وهو 52 سنة مطلق بزوج دراري صغار وهي كانت تحكي على بنات عمي يعني جابته لبنات عمي وانا قلتلها قولي له عليا بصح هي قالتلي كبير عليك وامي مقبلتش قالتلي بزاف كبير زيد مطلق وعنده دراري وانا عزبة انا خايفة لو كان يروح عليا مايجي حتى واحد واش ندير دركا حنا مزال مقلناش لبنات عمي شكون لتقبل بيه وسيد هدا ماشفناهش وجارتي وامي حابو يردوه لبنات عمي وانا حابة نحكمو انا واش نتصرف خايفة نعنس لو كان يروح عليا نفترض حتى واحد مجالي واش ندير ؟

[مراد سابقا10]

كلش شيء محدد في هذا الكون قبل ان نخلق والأرزاق يوزعها الله سبحانه وتعالى على عباده ولا يحق لك ان تقولي لماذا فلانة تاتي عندها الخطاب ام لا ؟؟؟؟؟؟

المهم العنوسة ازمة وطنية ماشي غير انت لي راكي في المشكل هذا .

وثانيا انصحك ان تخرجي وتشاركي في النشاطات الإجتماعية شاركي في حفظ القران في المساجد في الجمعيات الدعوية اذهبي للأعراس لربما يعجب بك شخص معين

ان تعجبك احداهن فتخطبك لأخيها او ابن عمها .............الخ

[ع.عيسى]

الزواج رزق مكتوب ما تديه عليك حتى وحدة .....لا توجد قاعدة للزواج ليس شرط ان تكون الفتاة جميلة حتى يتهافت عليها الخطاب ....النصيحة هي الاكثار من الدعاء ..والنصيحة الاخرى هي ان تتحجبي ، ربي يجيبلك بن الحلال .

[*** عبق الزهور ***]

السلام عليكم
اولا وقبل كل شيء مرانيش محجبة وماعنديش اعتراض نلبسه يعني لو كان برك يجيني خاطب غادي اي شي يقوله نديره

الحجاب يا اختي فرض ترضي بيه خالقك اولا قبل اي بشر في هذا الوجود يعني حاولي تتقربي من ربي اكثر تحجبي اخية فهو ستر للمراة انخرطي في جمعيات لحفظ القران فصدقيني في ذلك راحة ومتعة لا يعلمها الا من جربها وصدقيني ستجدين الكثير من الاشياء في حياتك بدات بالتغيير اكثري من قيام الليل والدعاء والاستغفار


رزقك المولى الزوج الصالح عاجلا غير اجل

[نجاة^^]

السلام عليكم
ننصحك اختي تكثري الاستغفار ،راح تتحلك جميع الابواب .
زيدي ديري خطوة مليحة واتحجبي بلاك ربي سبحانه يبعثلك وليد حلال
28 مزال ان شاء الله يكونو عندك فرص ملاح.
اتوقفي على حسد غيرك ،لانو متنالي والو ،لانو الارزاق بيد الله .
اما بالنسبة للجمال ،متخافيش من هاذ الناحية كيما كاين ناس معجبتيهمش كاين اللي راح تعجبيهم ، كاين بنات قليلات جمال تزوجن وانجبنا اجمل اطفال ،متوسوسيش من روحك ،لازم تقيمي روحك باه يقيموك الناس ،واللي خلق ما يضيع يعني الخلاصة الزواج ماشي غير للجميلات ،لم تذكر ولا في اي كتاب ،
كثري الدعاء وقومي الليل وادعي ربي خاصة في الثلث الاخير ،واعيد الاستغفار عن تجربة راهو يتحققلك واش بغيتي وان شاء الله تعاودي تكتبي موضوع بانك تزوجتي .

[زبدة ذايبة]

يقول الله عزوحل:{ومن يتق الله يجعل له مخرجا ويرزقه من حيث لايحتسب}

هذ الآية قاعدة أو قانون رباني

إذا طبقنا الشرط الأول يتحقق الثاني.

يعني نتقي الله يجي الرزق.

نقطة إلى السطر.

يعني لازم ياأختي تتقي الله وطيعيه فيما أمر.

خاصة أنه أمرنا سبحانه وتعالى بالحجاب.

بالإضافة إلى عدم اعتراضنا على مايعطيه للناس من رزق.

كل واحد وش عطالو.

كاين اللي نجح في لقراية

كاين في الخدمة

كاين في المال

كاين في الذرية.

بالتالي

هذه أرزاق يقسمها الله كيف يشاء.

ماعندها حتى قاعدة.

سوى اننا نطلبها الله برفع أيادينا إليه.

فلانتمنى زوال النعمة من أحد.

كما أننا لانستطيع أن نعطي أو نمنع الرزق عن أنفسنا.

لهذا يا أختي

توقفي عن حسد الناس لأنه من الممكن أنه يتسبب بتأخر زواجك.

وألبسي الحجاب الشرعي

وثقي في الله لأنه هو الرازق.

وبالنسبة للخاطب

52 سنة كبير بزاف

أصبري يجيبلك ربي خير منه

ومثل ماقال احد الأعضاء أشغلي نفسك بالنشاطات الاجتماعية.

كتعليم البنات في الجمعيات

أو تتعلمي ماينفعك من أمور دينك ودنياك.

ربي يسهل أمورك ويوفقك

[سيرين راجي]

يظهر من كلامك بلي حابة تتزوجي وخلاص بلي جاء المهم ماتبقايش وحدك
هذا خطا ماتتسرعيش 28 ماكيش كبيرة بزاف انا اختي تزوجت على 32 ودات واحد عازب وماشاء الله
يحبها لكن انت تعرفي ضرك اذا عجبك هذا الراجل عادي بصح لازم تكوني مقتنعة انا عندي بنت خالي كيما انت ازوجت بواحد كبير هاربة من مشاكل دارهم وضرك راها تبكي ليل ونهار ندمت وقالت علاه ما نصحتونيش انت اسعاي لكن فكري بعقلك ثاني ولا تنساي الزواج مكتوب
"رفعت الاقلام وجفت الصحف" لا داعي للقلق

[محارب الحمق]

الكارثة انك مستعدة لإرضاء انسان بلبس الحجاب ولست مستعدة لأرضاء الخالق بلبسه وهذه طامة كبرى. هنا مكمن الخلل. صححي علاقتك بربك يصلح ربك حالك. ولما نقول حجاب موش معناه حجاب الخرطي الذي تلبسه الغتلبية العظمة من النساء اليوم, كاسيات عاريات. حجاب يظهر المفاتن اكثر مما يحجبها حتى حق له ان يسمى كاشفا لا حجابا. هي حقيقة أن الرجال يحبون الجمال بل يعشقونه. لكن الجمال أمر نسبي فقد يراك شخص ما جميلة رغم كل شيء. 52 وله أولاد يبدوا لي غير مناسب لك. الأولوية الان ليست للزواج بل لتصحيح علاقتك مع الله والتفقه في دينك

[نبض قلبي]

كل شي بيد ربي
انت قاعدة قاعدة قبل كل شي كملي قرايتك على الاقل تكون عندك شهادة
و ربي يجيبلك مكتوبك ان شاء الله

[قدور بن عاشور]

أولا 28 سنة مازلت صغيرة و مازالت بعيدة على شبح العنوسة.
ثانيا، الجمال أمر نسبي، ما يعجب شخصا قد لا يعجب آخر.
ثالثا، قبل سن 35 سنة ما ترميش روحك على مطلق أو أرمل بأولاد أو بدونهم.
رابعا، كما قال الإخوة شاركي في نشاطات اجتماعية نسوية في المسجد أو في دار الشباب و كوني اجتماعية شوية.
خامسا و هو الأهم حسني علاقتك بربك و ابدئي بالقيام بما فرضه عليك عسى أن يرزقك زوجا صالحا تقر به عينك.

[يسمينة الزهور]

السلام عليكم أختي
الزواج قسمة ونصيب وكل واحد ومكتوبو
ومتقوليش معنديش الزهر يكفيك أنك خلقت مسلمة
ويا أختي خفتي تقعدي عانس ومخفتيش تموتي وإنتي مزال متححبتيش كيفاش رايحة تقابلي ربي سبحانو وكي يسألك وعلاش مدرتيش الحجاب كيفاش رايحة جاوبيه تقولي أنو إذا جا الخاطب وشرطلك الحجاب ديريه ومام النقاب وربي العزيز لي فرض الحجاب من فوق سبع سماوات عصيتيه ومحبتيش ديري حجاب ويلك من عقاب اللَّه وسخطه
إتقي اللَّه يا أختي ترضين الناس ولاترضين خالقك
الدنيا فانية والأخرة هي دار الخلود
كيف ترجين توفيق اللَّه ورضاه عنك وأنت لم تتبعي أوامره في حين لو جاءك خاطب وشرط لك الحجاب لفعلته
أختي تحجبي وإلبسي الحجاب الشرعي وحافظي على صلاتك وتقربي من اللَّه ليحبك فإذا أحبك اللَّه أحبك كل خلقه وأكثري من الإستغفار بنية الزواج
أسئل اللَّه العظيم رب العرش العظيم أن يرزقك الزوج الصالح

[om_hadil]

اسأل العلي القدير ان يرزقك زوجا صالحا تقيا يخاف الله فيك،،،،، اطلبي من رب العباد،،،، و ليس من العباد

[imene_meriem]

السلام عليكم
أ,لا يا اختي نحي كلمة عانس من راسك و28سنة معناها لازلت فتاة شابة والدنيا قدامك ان شاء الله، نحي الخوف من العنوسة، ثانيا، باش ماتحسيش بالفراغ كوني قريبة لله تعالى، وحاولي تتعلمي تصلي الفجر يوميا وقراءة القرآن لكن بشرط مشي ديري هاذي الامور فقط من اجل ان يرزقك الله بزوج، لالا اول خطوة هي ابعدي كل المخاوف من ذهنك واجعلي الله هو محور حياتك، بعد اسابيع وشهور تحسي نفسك خفيفة وتشعرين بالسكينة (وكما قلت لا تنتظري دائما ان تتزوجي بل هدفك هو قربك من الله)

وثالثا ورغم ان كل شيء بقدر، ابذلي الاسباب، اخرجي للمناسبات العائلية، لربما يشوفوك ويهدرو عليك، وصّي صديقاتك المتزوّجات يشوفولك من جهة ازواجهم... لا أ‘رف المهم تكون أسبابك غير خارجة عن الشرع، وأهم حاجة ادعي ربي بإخلاص، وربي يرزق كل فتاة برنوس الستر

[أم رقية نسرين]

السلام عليكم
اولا ربي يرزقك بزوج صالح يخاف ربي فيك
ثانيا يا ختي العزيزة الحجاب منيروهش لإرضاء العباد بل لإرضاء رب العباد لأنو هو سبحانه و تعالى لأمرنا بيه صححي نيتك مليح مالا كون يخطبك واحد و يقولك متتحجبيش خلاص تاخدي رايو ؟؟؟؟ لالا ختي في الآخرة كل واحد يتحاسب وحدو
الرزق قسمة من عند الله يرزق من يشاء بغير حساب الدعاء الدعاء الدعاء و إخلاص النية فيه انو ربي سبحانه يستجيب لدعائنا ومتيأسيش منو الله تعالى ارحم و اعلم بينا من أنفسنا
ربي يرزقك و يهنيك

[malikdz01]

كون جيتي دكتورة وبمنصبك او استاذة يجوك ولو كنتي غير محجبة ولو ما تصليش ..وقت مادة تحبو ولا تكرهو*

[toulay]

وعليكم السلام ورحمة الله وبركاته
يا اختي الزواج راهو رزق من عند ربي سبحانه وكيما يقولوا الرجل المناسب في الوقت المناسب ميهمش العمر
capable يجيك رجل وتتزوج وانت في سن العشرين وتتمرمد تمرميدة كحلة وتكبر قبل الوقت
نهار يجي le temps ربي سبحانه راح يبعثلك سيد الرجال ان شاء الله وكل عطلة فيها خير وفيها حكمة مايعلمها غير الله
وملاحظة اخرى واش العقلية هاذي تاع هات برك يجيني راجل وليقولي نديره غير الخير هبلتي واقيلا انت حايبة تتزوج وفرات ليسمعك تحسب عمرك قرن ولا منعرف شحال
مزال صغيرة وتتزوج ان شاء الله وتجيب دراري وتكون عائلة امين يارب العالمين
اصبر وخلاص
ياك راك في داركم وعلاش عليك حابة غير تقيس روحك لمن جاء والسيد هذاك لحكات عليه جارتكم غير اخطيك منو راهو قد جدك كبير ماعندك مادير بيه علاش تقطع في رحمة ربي
دير ربي في قلبك
بالتوفيق وان شاء الله ربي يلاقيك بالرجل الصالح امين يارب العالمين

[kacimo.samy]

السلام عليكم
من كلامك راح تطيشي روحك في حضن اي شخص
كون يجيك واحد تاع شراب ودعاوي شر ؟؟
كون يجيك واحد تاع ضرب وكل يوم فلاقة ؟؟
الخاسر انتي فقط على اقل سقسي على لي يجيك موش تتلاحي ومبعد تندمي ؟
ومازالك صغيرة

ونعرف نسا وصلو حتى 40 وتزوجوا...
يا اختي شدي في ربي برك

[mrmilano1984]

نصيحة لك اعملي فورماسيون او تربص ستاج ولو ماوصلتيش لمستوي يسمح لك بالدخول لمراكز تكوينات دولة cfpa او معاهد الخ روحي اعملي تربصات في مدارس خاصة راهم بكثرة كبيرة تاع الحلاقة والديكور و البيزيريا او الباتيسري والحلويات يعني عدة تكوينات عند خواص تدي ولو اتيستاسيون ولو عند خواص مهم ربما بها تخرجي تخدمي في محل خاص راهم شفت بزاف بنات يعملو عند محلات وهم ماقراوش او خرجو مبكر ويعملو ويخرجو برا يجيبو مصاريف ويزدو يتعلمو احسن احسن وراهم بعمل وتزوجو ثاني هكدا في دار قاعدة تاع دار لاقراية كما قلتي لاتربصات وشهادات ولو خاصة يعني غلقتي علي روحك تماما وصعيب جدا جدا يجو ليك الخطابة طبعا شكون يسمع او يشوفك او يعرفك اللهم لي قراب بزاف ليكم او جيران الخ او حومة فقط
حاولي تبدلي من روحك اخرجي عملي تكوينات فورماسيون نصيحة ليك من دهب في مدارس الخ وخدمة بعدها ان حبيتي او علي اقل خرجي فورماسيون بعدها يشوفوك رجال الخ

[visa uk]

اختي كاين بزاف رجال يحبو وحدة قاعدة في الدار وحتي ماقراتش كيفك يعني مش قارية كامل فهمتي لدا ماتتقلقيش راح يجوك خطاب كما كاين ناس دات نسا قاريات وجامعيات الخ كاين لي يتزوجو نسا قاعدات في دار +غير متعلمات وقاريات كاين حتي داو نساء ماقراوش كامل نتي قال خرجتي وقريتي

[blanche rose]

نحي الموضوع هذا من راسك وتعلمي حرفة فالمركز..واخدمي حرفة ولو فالدار
اشغلي روحك..
اذا درتي الزواج محور حياتك ما رايحاش تتزوجي
لان القاعدة
ان الحاجة اللي تجري موراها تهرب منك..
واذا هبلتي تزوجي بهذاك الرجل..
راهو قد باباك
والزواج مش ساهل اختي..
مادام هانية مع والديك علاش متشطنة عليه؟!!!
اكرر
انساي الموضوع تتزوجي
تفكري فيه بزاف تقعدي بلا زواج
اشغلي روحك باعمال خيرية
ديري هدف في حياتك واكسبي الاجر
ربي يرزقك الزوج الصالح والذرية الصالحة

[فاصلة]

في الحقيقة الأعضاء كفاوا ووفاوا في النصائح برك نديعلك ربي يرزقك الزوج الصالح عاجلا غير آجل