مقلشة في دارنا ورح نعيش مع اهل زوجي

[مشكلتي]

عمري24متعلمه..مشكلتي بل الان اعتبرها.كارثه انه امي ديما كي نجي نعاونها تقولي خلي عليك.يعني في دارنا مندير والو للاسف .انا نعرف نطيب لكن مش متعوده بقالي شهر بادن الله ونروح دار راجليوعلابالكم متخيله لو قالولي ديري شغل دار راح نبكي والله تغيضني عمري منعرف علاه.نحس روحي نخدم في دار ناس.وثاني منحبش نتعب ...م:dj_17:ومشكلتي جابده شوي مش اي احد نداصره يقولي عني متكبره واعوذ بالله من الكبر لكني صعب اندمج مع اي احد ساعدوني

[زبدة ذايبة]

زيدي حصليها في ميمتك!!!!!!!

ماكفاش ماعاونتيهاش تزيدي تكتبي أنها كانت السبب في جهلك.


24سنة راكي كبيرة

كيفاش ماتعرفيش ديري شغل؟؟؟؟؟


لو كان تربيتي على الخادمة في داركم ممكن.

لكن البيوت الجزائرية متشابهة.

عري على يديك واجتهدي وتعلمي ماينفغك.

وهذي تاع يقولولي ديري الشغل غير انسايها.

وهذاك التقلاش خليه في داركم.

راكي رايحة لعند رجل حتى تخدميه.

طيبي وتسيقي وتغسلي ودبري شؤون بيتك و... ...

ولا بديتي بطريقة ساذجة تثير السخرية ماتتوقعيش أن أهل زوجك رايحين يحطوك فوق راسهم.

لهذا شدي حيلك وتعلمي وش ماتعرفيش.

ومع الزمن هذا. كاين في النت حتى طرق فسل الصحون.

لهذا انساي دلالك ودلعك وخليه في داركم.

دار الناس مافيهاش الرحمة ومافيهاش الحب.

تغلطي تخلصي.

[النجمة القطبية]

عجبتني تع تغيضني عمري كي نخدم هههههه
انت حلك تسكني في بيت وحدك احسنلك وراح تتبدلي 180 درجة لان باختصار راح تحبي بيتك ووحدك تلقاي روحك كل يوم ترتبي وتزيني
واكيد ادا حبيتي راجلك راح تعملي المستحيل باش ترضيه بالطبخ والنظافة وهو نفس الشئ مرة على مرة ينقص عليك
بشوية بشوية اتعلمي امور البيت وبدلي تفكيرك متفكريش انك تخدمي على الناس بل فكري انك صاحبة البيت وصاحبة مسؤولية ونظافة بيتك وزوجك واولادك مسؤوليتك امام الله والناس وكل شئ يجي بالتعلم
وادا كان نصيبك تعيشي مع العايلة ابداي درجة درجة واستغلي الوقت تتعلمي الان واقنعي الوالدة رب يحفظها انه لمصلحتك لانك مقبلة على مسؤولية ونصيحة صارحي زوجك من الان باش يوقف معاك ومتلقايش مشاكل لما تتزوجي يكون احسن
مبروووك مسبقا

[amoulette]

و علاش لوكان رايحة تسكني وحدك تخلي دارك معفنة !! اذا ما راكيش حابة تسكني معاهم علاش ما شرطتيش من البداية سكن خاص بيك ولا راكي حابة ترقدي و هوما يخدموك
و شغل الدار مشي علم كبير تسيقي و تغسلي الماعين و تمسحي الغبرة و اكيد مراحش تقومي بيهم وحدك راح تتعاونوا
و حكاية ما تحبيش تتعبي تدل على الكسل و الخمول اللي راكي عايشاته
حاولي تتنشطي و تساعدي امك او ديري حركات رياضية في غرفتك هكذا تتنشطي و الحركة مليحة اما النوم طوال اليوم لا يجلب الا الامراض

[أم عبد الكريم]

بقالك شهر حاولي تخدمي شغل الدار توالفي



يخي جييييل غير لماكلة و الرقاد و التلفون

[نجاة^^]

هاذي كنتي تخممي فيها قبل ما تتخطبي المهم كي فات الحال ثركا لازم عليك تخدمي وتتعلمي شغل الدار وتبكري لانو بما انك رايحة تسكني مع اهلو النوم ماشي كيما دار باباك وربي يعينك

[عثمان الجزائري.]

الحمد لله أنك ستسكنين مع أهل زوجك لأن زوجك المسكين لو أسكنك في بيت منفصل تشبعيه فريت أوملات و سوندويتش، هكذا على الأقل تخافي من التعايير و البهادل مع أهل زوجك و تولي ناشطة...

[رَكان]

السلام عليكم
جميلة هي صراحتك يا صاحبة المشكلة ..
قلت لنا أنه لما تريدي التدخل في اشغال البيت والدتك سامحها الله تقول لك العبارة المشهورة ( خلي عليك )
نعم هي تلك الطامة الكبرى فيم يخص بعض الأمهات ..طبعهن ديناميكي لايحببن السكون ..فتقضي احداهن مايقا رب أو يزيد عن الثلاثين عاما مع اشغال البيت فتكبر ابنتها الى جوارها فتصل العشرين الثلاثين وعلى الدوام تراها لازالت تلك البنت الصغيرة التي لاتحسن الشغل او التي يرهقها الشغل فتشفق عليها مشقته ..
نعم وهنا يأتي الأب ليوجه الأم الى ما فيه مصلحتك ..أذكر أن والدي رحمة الله عليه كان يأمر والدتي بإدخال البنات عالم شغل البيت وهن لم يبلغن العاشرة ..
يحسب لك تعقلك بالتفكير بالأمر فهو قد شغلك مما يدل على طيبة قلبك وشعورك بالمسؤولية ..
نصيحتي .
اغتنمي فرصة هدوء أمك وعدم انشغالها واطرحي لها المشكلة واخبريها أنك لن تكوني معها حين تكونين في بيت الزوجية ..اخبريها أنك ممتنة لها بحكم شفقتها عليك من شغل البيت ولكن ذلك يسيء الى وضعها يوم تغادرينها ..
أقنعيها بكل طريقة ولو استدعى الأمر تدخل والدك أن تأخذ عطلة لمدة شهر كامل لتتحملي كامل اعباء البيت ..
أنت اخبرتنا أنك تعرفين كيف تطبخين وكيف تمارسين الأعمال المنزلية لكن ما فهمته من عباراتك هو أنه ينقصك التطبيق والممارسة فقط .إحمدي الله انك كذلك فغيرك والله ما لمست يدها يوما المقلاة لقلي بيضة..
بخصوص حالتك فمثلك يكفيه شهر واحد لتنطلق يداك بسلاسة في عالم شغل البيت ..

[سيرين راجي]

لازم توثقي بنفسك هذي الدار رايحة تولي دارك يعني مشي لازم تحسي روحك غريبة
ايامات وتوالفي وتولي كي شغل داركم ما تخليش الخوف والتردد يسيطر عليك باه مايقولوش جايحة
تصرفي طبيعي كلي موالفة تديري شغل ومع الايام تولي عادة فيك
بالتوفيق

[sohaibdz]

شهر هي مدة طويلة جدا صارحي امك و قوليها تديرو برنامج كل يوم تعلمك طبخة و عمل من اعمال المنزل فقط عليكي بالارادة و ترك الكسل
و بالتوفيق

[ايمان4]

عادي ديري ف راسك بلي هادي المسؤولية نتاعك متفهميهاش حقرة ايا تتوالفي و بالنسبة للشغل ساهل مشي علم ههه حنا منذ نعومة اظافرنا و حنا بيه و نفس الروتين يتعاود مش علم عادي منهارك تتعلمي اما بالنسبة للطبخ الله يجازيلنا الاخوات ام وليد و ام اسيل علة اللولة تخرجلك الطياب كيفاش داير يعني عادي من غدوة تجبري روحك خير من هديك لي تحسب على روحها

[سَامِيَة]

مادامك طرحتي المشكلة يعني كاين أمل كاين لي ما تعرفش وما تستعرفش بلي راها غالطة ومادام علابالك بلي المشكل راه فيك عادي حاولي تمشي امورك شوية شوية حكمي قناة طبخ وقناة تنظيف وتنظيم تبعيهم وادمنيهم إذا قدرتي وطبقي معاهم راهم يحكو على كلش حتى الحاجة وكيفاش تنقيها..

تهلاي برك كي يلوموك قوليلهم ماما هي لي بيا يوليو يعايروك ويعايرو ماماك لا قدر الله ضحية واحدة تكفي.. نتي حاولي وبذلي جهد وربي ما يخيبكش..

مكاش لي تكمل معاها من كل النواحي كاين وحدة تخدم كلش الطايرة والنازلة وهاملة روحها عاجبا دار راجلها ولكن مهيش عاجبا راجلها!!
ملازمش تكوني صاروخ يكفي إنك تتحركي فوق الأرض مبدئيا وتبيني بلي ماكيش عاطلة..

أما قضية جابدة روحك ركزي مع زوجك سواء جابدة ولا متكبرة والباقي مع الوقت تبان الأمور يستحقون أن تذوبي كالسكر فيهم ولا من الأحسن تبقاي مثل الزيت معاهم نتي عامليهم بالحسنى وتجنبي الظلم والشر..

بالتوفيق

[رندة.]

مادام تعرفي الطياب هاذي حاجة مليحة يبقالك التطبيق برك ، أمالا تشجعّي وأدخلي للمطبخ وكل يوم طيبِي حاجة وخلي أهلك يعطوك رأيهم فيها، وبإذن الله مع الوقت راح تتقني كل شيء. أما شغل الدار كيما قالولك ماهوش علم كبير، بصح يتطلب تكوني صبورة وتكبّري بالك وبالشوي راح تتعلمّي كل شيء. ربي يوفقك إن شاء الله.

[ابو سليمان10]

اكبر غلطة هي ان تترك الفتاه في صغرها لتلعب و تتفرج التلفاز و امها او اخواتها يقمن بكل شىء.....انا لاحظت انه التي تربت على العمل في البيت يصبح الامر لديها تلقائي...تجي فايتة تشوف شىء في غير مكانه تقوم بتصحيحه دون تفكير بردة فعل....احيانا تكون تاكل و قدامك صحن خاوي تقريبا تديه تغسله و انت لم تنتهي منه بعد

اما الاخريات التي لم يعتدن على الامر فهن مثلنا نحن الشباب نقيم الدنيا و نخطط كثيرا لكي نحضر بيض مقلي فقط...و احيانا نفضل الجوع على التعب

[نبض قلبي]

عادي توالفي ان شاء الله وشنو غلطتك انت نورمالكون انت اللي تتلاحي و ديري الشغل موش حتى تقولك ماماك
المهم تكوني تعرفي ديري الأساسيات و النظافة حاجة باينة
منو الهيه هاكي تخزي من دار راجلك من اهلو و خلاص.
ضرك الشهر هذا حاولي كشما تعدلي اموراتك و تهزي اللي لازم تهزيه و تخدمي اللي لازم يتخدم
ربي يهنيك ان شاء للله

[محارب الحمق]

خدمة الدار ماشية في جينات المرأة. في دار راجلك ونسابك راح تتحتم عليك تخدمي, ولاكان ماوالفتيش وماقدرتيش ماشكيتش رايحا الطولي انتم

[أمة الرحمان رقيّة]

سلام اختي
لازم تكوني مهتمة بشؤون بيتك مستقبلا وهذا راهو واجب على كل امرة تحب تكون فحلة
والخدمة والنظافة والطياب لازم تخدمي وانتي قانعة وراغبة ماشي من اجل اهل زوجك
انا كنت في دار بابا عندي لي اكثر مني وماما تحب هي لي تطبخ بحكم ان بابا يفضل طعام الوالدة
وكنت نخاف من الكوزينة لكن الخدمة الاخرى كيما الميناج والمواعن انا لي نخدم

قبل زواجي بفترة خصصت دفتر كتبت فيه اهم الوصفات وتاني راني نتبع التدابير المنزلية

الحمد لله الان راني قريب عام زواج نخدم كل شيء في الكوزينة

ورمضان هذا عجوزتي نحيت عليها تعب الطبخ
لازمك الكوراج والارادة ولازم تعرفي ان الزواج مسؤولية مش من ناحية الطبخ والتنظيف فقط
لازم توني ربة بيت ناجحة حتى لو ماكش حا تسكني مع اهل زوجك
لان البيت المنظم والنظيف هو صورة لشخصيتك وفحالتك
ربي يوفقك ومبارك العرس مسبقا

[قطرة ندى حنونة]

حليلي راجل وش راح يدي ربي معاه