هل أعتبرها مشكلة؟ -ج2-

[مشكلتي]

السلام عليكم ورحمة الله
أنا صاحبة هذه المشكلة
https://www.djelfa.info/vb/showthread.php?t=2126909

مر زمن منذ ان طرحت موضوعي
بصراحة شكرا لكم من القلب ساعدتموني حقا
بعد اقتراحاتكم قررت ان البس ملابس طويلة رغم انه لبسي في العادة
واضيف خمارا على الراس ..(نعصب بيه والجيهات الباقيين نلفهم على رقبتي ..علابالي مهوش سواسوة بصح بالشوي حتى يوالفو)
المهم انا عندي واحد وليد خالتي هو الاقرب الينا ،عايش معنا في نفس البيت من لي نشفى على روحي على هذيك كانو اخي ..تزوج مؤخرا
هو الوحيد لي ما تقبلش الفكرة بادئ الامر وان كل ما يشوفني هكاك ينحيهولي رغم تحذيراتي الكثيرة له وديما يمعني
لكن الحمد لله والف وماعادش يخلط فيا هداه ربي
هذاك الوقت كنا في الشتا..يعني دايرة الخمار h24 منها من البرد ومنها حجاب ..على هذيك ماكنت مواجهة حتى مشكلة
لكن حاليا رانا في الصيف
وباش نوضح نقطة انا ما عنديش ابناء اخوالي كبار لكن المشكل في خالاتي
ويجو مع ابنائهم دون سابق انذار..مش كل يوم اكيد لكن مرااات في الشهرين ولا اقل
المهم في الصيف ما نقدرش نلتزم بالطويل والخمار طول الوقت ..السخانة بزاف كيما تعرفو الصيييف
على هذيك شحال من مرة وحد ال3مرات شافوني بدون حجاب ا..اوووف حررررررت وحرررت ونروح نجري لجهة اخرى
كي نسمعهم جاو وانا في شومبرة اخرى عادي ثم ثم نلبس ومكاش مشكل
لكن نهار نكون في الكوزينة؟..في الكولوار؟..في اي بلاصة ويدخلوا فجأة كيفاش ندييير؟؟؟
معناه كاين حل انو نولي طول العام دايرة حجاب وخمار ولا كيفاش؟؟؟
ما لقيتش حل ..واش تقتارحو عليا
ربي يجازيكم وفضلا ما تجرحونيش بتعليقاتكم..اعتبروني اختكم الصغرى وانصحوني

[صُبح الأندلس]

بارك الله فيك و واصلي على هذا المنوال من الحشمة و التقرب من الله و اعملي أن أي شيء في البداية يستنكره الناس و خاصة المقربون و طبعا من هنا يدخل الشيطان ليجعلك تتراجعين و لكن اثبتي فهذا خير لدينك و دنياك.
بالنسبة للضيوف يفترض أن يستأذنوا يعني كاين جرس ولا الباب مفتوح على طول؟يعني لما تسمعي دق أو جرس لازم تكوني موجدة لباس طويل كلباس الصلاة مثلا و خمار و ترتدينه بسرعة والله يعينك.في ديننا مكانش حاجة اسمها كي خويا،خوك ابن أبيك و أمك او أحدهما فقط.

[نجاة^^]

السلام عليكم
نفس مشكلتي انا خاصة مع المصافحة ولكن الاختلاف ولاد اخوالي يسكنوا بعاد علينا (ماش في نفس البيت) شوفي في البداية عانييت كنت كي نروح ليهم كي يدخل ولد خالي يصافح الجميع (اللي في الصالة) كي يلحق ليا نقولو السلام برك وهو يمد يدو والله نتحرج ونحرجو معايا لاني منصافحوش ولانو حاجة جديدة مكنتش نديرها من قبل وهذا اللي زاد عليا ولكن كنت متمسكة بقراري اني منصافحش ونبقى بحجابي ،حتان والفو ثرك كي يجي للدار يقولهم نجاة كاينة (ههه وليت نخوف) ،وكي يجيو كي انا كي خواتاتي منخرجوش ليهم ونروح غير لخوالي اللي معندهمش اولاد (او ولادهم صغار) لانو حتى الاحراج امر صعب ،الله غالب كان لازم هوما يحبسوا هاد الامر ولكن ..
ربي يوفقك ويسهلك ان شاء الله

[بـــيِسَة]

الحجاب ماشي الانسان الي طلبوا بل هو الله
ربي معاك الاخت و ربي يهدينا و شكرا

[محارب الحمق]

داركم كوري؟ اللي يجي يدخل؟ معندكمش باب؟ الحل واضح. أغلقوا الباب. إذا جاء الضياف أعلم أهل الدار ليأخذوا حذرهم. أمر بسيط للغاية. الناس ربي يهديها ماتعرف والو على دينها. يخلي بنتوا مع ولد أختو أو ولد خوه وتجيه عادية. يكبرو ويوالفو وتبانلهم عادي. زعما هذا ولد ختو ولا ولد خوه كون يخطب بنت عمو/عمتو ولا بنت خالو/خالتو مايقدرش؟ ربي يهدينا

[نبض قلبي]

ربي يكون معاك

[زبدة ذايبة]

الأعضاء كفوا ووفوا فجزاهم الله كل خير.

كل مالدي بعض الإضافات البسيطة جدا
تحتاجين لضبط بعض الأمور للمحافظة على حجابك.

أولا: تغلقي باب البيت بالمفتاح لإجبار الداخل على الاستئذان.

ثانيا تحري أوقات الزيارات بحيث يكون حجابك( غطاء الرأس ولباس ساتر) جاهز للبس.

فرض مافرضه الله على المسلمات من عدم المصافحة.

ماتتحرجي ماتحشمي.

وديري في بالك أنك لست الوحيدة في هذا الأمر.

سواء ما تعلق بالمصافحة أو لبس الخمار في الصيف.

وتأكدي أن ما فرضه الله فيه من الخير الكثير.

[يسمينة الزهور]

السلام عليكم أختي
ماشاء اللَّه
ربي يحفظك من كل شر ويثبتك على الطريق المستقيم
بالنسبة للحر قلتي أنك متقدريش تلبسيه في الحر نشفا كي كنت نقرا في الثانوية
كنت منعرفش بلي رجل المرأة عورة وملازمش تبينهم كي تخرج برا ورحت عند خويا قتلو بصح السخانة دوك نموت انا كي نلبس حاشاك تقاشر ولا ليبا قالي كلمة وحدة قعدتلي في راسي قالي بصح (جهنم أشد حرا )
لذلك أختي هاذا جهاد وأنتي مأجورة عليه بإذن اللَّه سبحانه تعالى وفي ميزان حسناتك بإذن اللَّه كاين بزاف بنات يقولو واش راكو حبينا نموتو بصح هاذو أوامر اللَّه سبحانه وتعالى والجنة باش ندخلولها لازم نصبرو ونجاهدو أنفسنا باش ندخلوها بإذن اللَّه
وأنتي متخممي في إرضاء هاذا أو هاذا خممي فقط في إرضاء اللَّه عزَّ وجل وبذلك تفتح لك جميع الأبواب
وكيما قالو الإخوة لازم يكون عندك لباس موجد وقريب منك وإذا لزم الأمر قولي لأمك أو خالتك تطلب منهم كي يدخلو يسعلو أو يطبطبو قبل مايدخلو مابيت تلبسي خيمارك وتشرحلهم بليك كبرتي ولازم تتحجبي عليهم وميجوزلهمش يشوفوك بلا حيجاب
وربي يوفقك ويسرلك أمرك