أكيف للمنقبة ان تعيش مع اهل زوجها أشيروا علي

[مشكلتي]

سلام عليكم بادئ لبدأ أنا فتاة معقود علي ( قبل عام) وكنت أرتدي النقاب قبل خطبتي منذ (2014) إقتناعا مني أنه واجب وفرض (على رأي الشيخين ابن باز وابن العثيمين) مع أنه يوجد خلاف في انه مستحب او فرض لكن قلبي يطمئن للفرض ولا تحايل مع الله، المهم زوجي ضروفوا المادية صعبة كثير مرات دراهم النقل معندوش ، وعندو أخ وحيد عايش معاه (عندو 19 سنة) وبيئتهم صراحة متدينين شوي مش بزاف مثلا تلفزيون عادي عندهم لكنهم ميسمعوش الموسيقى هذا شي مليح، سألت زوجي أمس قلت له شانلبس في داركم قالي البسي عادي كيما تلبسي في داركم استغربت (مع انه اخ سلفي) قلت له وأخوك؟ قال لي اخي سأعلمه الإستأذان وأخي حشام اصلا مش من نوع لي يزدم برك، قلت له لكن فرضا حدث خطأ ولا شافني قال لي انت معندكش فكرة اصلا على بيت تاعنا وراكي تحكمي بسرعة حسيتو زعف ، قلت له انانلبس كيما جميع السلفيات نقاب وجلباب كيما برا قالي الامر فيه سعة، غاضني الحال صراحة قلت له سما متغيرش علي قالي والله نغير بزاف قالي ( شوفي ختي متزوجة ومهيش متدينة بزاف بصح خو راجلها معلمينوا يستأذن قبل ميدخل مكانش مشاكل معاهم ) بصح ما اقتنعتش انا حابة بيت مستقل وفي نفس الوقت عارفة ظروف زوجي صعبة اشيروا علي فضلا لا أمرا راني غير نفكر في الامر

[نجاة^^]

السلام عليكم
بين() قصتك راهي معاودة تقريباااا كيما تاع وحدة نفس المشكل كاين نصائح جيدة من طرف بعض الاعضاء لذا ننصحك تشوفي هاد الموضوع
https://www.djelfa.info/vb/showthread.php?t=2144678
ربي يفرج عليك

[محمد جديدي التبسي]

يعني راك في اربع سنوات مخطوبة وهدا وين فقت؟؟
المفروض هذي الامور تتفاهموا عليها اول الخطبة
مادام وقع الفأس في الراس فاقبلي بالأمر الواقع اصلا سوق الزواج كاسد هذه الأيام
قولي لهذا الرجل يديرلك مطبخ مستقل ع الاقل وربي يتمم على خير

[آسيا 25]

السلام عليكم
يا أختي أنت إذا عاجبك هذا الخاطب أو الزوج و مقتنعة بيه أصبري على جالو و عيشي في بيت العائلة حتى يفرج ربي و أنت متدينة و تفهمي مليح قوله تعالى"و من يتق الله يجعل له مخرجا و يرزقه من حيث لا يحتسب" خصوصا أنو السيد ما كذبش عليك من الأول صارحك بضروفه إذا أتوكلي على ربي سبحانو و ما تقلقيش روحك قادربمجرد ما تتزوجو يعطيوه سكن إجتماعي كمثال يعني, أو ممكن يفتح ربي على زوجك بعمل بعيد و يعطيوه الوظيفي و تصبحي في نهارك بدارك زيني نيتك برك و ادعي ربي سبحانو و الله ما يخيبك,و بالتوفيق أختي الكريمة و رمضان كريم.

[sohaibdz]

نعندكش ثقة في زوجك ؟قالك يلقالك حل مع خوه يعني مكانش مشكل غير اذا حبيتي انت تصعبي الامور

[النجمة القطبية]

يا اختي تحبي الصراحة انتي ماللخر حابة دارك وحدك وخلاص والا كنتي فكرتي في الموضوع قبل ما تقبلي بالخطبة اصلا يعني درك انا نحير كيفاه تخلي لاخر لحظة ثم تحسسي الراجل بالعجز واش حبيتيه يدير منين يجيبلك ولا يحاوز خوه من الدار !! ردوا متوقع وطبيعي
انا منقولكش ماشي حقك تتمناي دار وحدك اصلا هادي امنية كل واحد بصح الله غالب زوجك زوالي احسني العون وعيشي بالموجود وخيطي جلباب خاص للبيت يشبه تع الخروج ومشي امورك في البيت عادي اخدمي شغلك طبيعي جدااا اهم شئ ما تداصريش صباح الخير مساء الخير وخلاص
واخ الزوج مراحش يبوانتي نهار كامل في المطبخ اغلب وقتوا تلقايه في الشارع او في شمبرتوا وانتي تجنبي اوقات وجودوا في البيت او اتفقي مع راجلك في هدا الامر
سهليها تسهال اصلا اغلب الشعب الجزائري عايشين مع الوالدين راكي تشوفي في الحالة الاقتصادية
وزيدي شوفي ارسلي طلب للفتوى اكيد راح تلقاي جواب احسن
اما ادا انتى خلاص مستحيل تعيشي بالموجود واش نقولك اصبري يجيك نصيب ما خير غني لاباس عليه وخلاص
ربي يفرج عليك

[نبض قلبي]

قالك البسي عادي قلتي مايغيرش عليا
يقولك البسي الجلباب في الدار راجلي مزير
فهمي روحك اختي
زيد بالزيادة عينك في دارك وحدك من النهار اللول قال يا ولد الناس داري وحدي نقطة انتهى و تكون عندك كلمة
موش تكملي معاه من بعد في ليلة و نهار يخلقك دارك وحدك
على كل ، مادام النهار اللول قبلتي بدار العايلة إلبسي كيما قاتلك الاخت ديري جلباب خاص للدار و خلاص هذا هو حلك
ربي يعين ان شاء الله

[رَكان]

السلام عليكم
المتتبع لمايطرحه صاحب المشكلة .يتناهى الى ذهنه أن هذه العائلة منزلها يتكون من غرفة واسعة ومطبخ لاأكثر ..
غريب الأمر ..
السيدة هل تخرج للشارع ويراها الناس ؟؟؟ طبعا ..
السيدة لما تخرج الى الشارع ستكون مستترة بما تختاره .
جيد
أليس عليها أن تعتبر أخا زوجها بمثابة الأجنبي وهي طبعا تعتبره كذلك ..فلتستتر وهي تتحرك داخل البيت كما تكون متحركة في الشارع ..وحينما تكون في غرفتها تغلق عليها بابها وترتدي ما تشاء لاأطن أن أخا الزوج يكون لديه من الجرأة ليدخل الغرفة ..
فأين المشكلة إذن الآن ؟؟؟؟؟؟؟؟؟؟؟
آباؤنا وأجدادنا قضوا أغلب حياتهم يعيشون دار واحدة تجمع الإخوة وأزواجهم والأخوات .والإخوة كبارا وصغارا ..وممنوع مجرد التفكير في الإنفصال ..وكانت الأمور تماما التمام ..وكانت التقاليد والأعراف التي تحكم أفراد تلك الأسرة أشد وقعا على النفوس حتى من الوازع الديني في ذلك الوقت ..
أنصح السيدة أن تهدأ وتبعد الوساوس عن نفسها وتنسجم مع الوضع الى أم ييسر الله للزوج طريقا للإنفصال ...

[صُبح الأندلس]

لا تجعلي من النقاب حجة لطلب بيت مستقل
يعني لو لبست لباسا فضفاضا و خمار داخل البيت مع استئذان الأخ عند الدخول فليست نهاية العالم.

[فافا مينوشة]

ههههههههه انتي طرحتي مشكلة ديالك فيما سبق وقلنالك بلي 4 سنين خطوبة مجاتكش الفكرة في راسك ودرك راهي فكرة دور في راسك البسي جبة وخمار وشمن نقاب فدار وين عايشا انتي وزيد باينة راكي مكرهة حياة الراجل من رايي كاش نهار يقولك الله يربح ظروفو متسمحش وفقير وتزيدي تزيري عليه خوه راح ياكلك وش فيها كيتلبسي جبة وخمار وش راح يصرالك؟؟؟ بركاونا من تفلسيف وكي نعودو فصح قع بلاك قع بانلك كاش واحد رافد روحو شويا حابة ترمي الما على الزوالي بحجة نقاب بتوفيق

[سيرين راجي]

كيفاه تلبسي نقاب فالدار؟ الحجاب هو ما لا يصف ولا يشف وزاد راكي فالدار ماشي برة ديري خيمار والبسي العريض هذا مكان وكي تخرجي ديري نقاب الاسلام لا يعني الانغلاق على الناس حتى فالبيت ما تصعبوش الحالة باه مايولوش النساء الباقيين يشوفوا رواحهم كفار

[أمة الرحمان رقيّة]

ديري خمار دائري طويل شوية ومعاه نقاب

حاولي كي يكون سلفك مكانش تخدمي الشغل الكبير كيما التسياق والميناج

وكي يون سلفك في الدار ريحي في شمبرتك

ثقي بزوجك مادام قال انه راح يوصي خوه بالاستئذان

و نقولك: الراجل لكان كان عندو هيبة وسط اهله رايحين يحترموك كيما يحترموه

صدقيني الامر ساهل كي ديريه على جال ربي
مادام اعتقادك في النقاب انه واجب اذن لازم تحافظي عليه

ربي حنين كريم

كثري الدعاء باه يرزقك ربي بسكن

ربي يهنيكم مع بعض