لم اجد عنوا استسلمت وفقط :'(

[Méé R@l]

انا انسانة فاشلة وغير طموحة لا املك قرارات صارمة ولا التزم طالما وعدتنفسي مانفشلش لكن في آخر الدقائق استس..
درت برنامج مشيت بيه يومين على اتمم وجه لكن آمس مقدرتش بقيت راقدة 12 ساعة نضت قلت عادي بالاك مش مالفة نتعب وكي تعبت شوي ماقدرتش نكمل عودت البارح رقدت بكري باه انوض بكري ونكمل برنامجي انشاء الله يعني اليوم رقدت حولي 8 ساعات نضت درك ومش قادرة نكمل تعبانة وكسولة الناس فالمراجعة النهائية وانا نعرف غير شوي دوال الاختبار كان سهل تاع الرياضيات ديت فيه 12 العلوم كان ساهل وماديتش المعدل الفيزياء كيف كيف الفرنسية والانجليزية لا علاقة الادب خلي مانحكيش الالتزام لي يعرفوه الناس كامل انا ما نعرفوش العلوم شرعية ابسط مادة والله ماراني حافضتها الاجتماعيات جامي ديت فيها المعدل وجامي راح ندي فيها وش بقالي كيفماه رح ننجح علاه نكذب على روحي ونقول برنامج ونقول راني قادرة نجيب معدل مليح ونقرا الحاجة لي باغيتها علاه عليا ملي كنت نحوس على التميز وليت نحوس على النجاح فقط ونقول نزيد نعاودو العام الجاي علاه عليا نكذب على والديا ونقلهم بلي انا نقدر نكون اطارة من اطارلت الدولة اضن اني لن اصل ابدا لطموحاتي واحلامي ومش راح نروح يوم الباك خلي يقصيوني وننسحب بشرف احسن ليا والعام الجاي يشوف ليها ربي حل
انا نقلكم في امان الله وفقكم الله وسدد خطاكم والهمكم الدرجات العلى في الدنيا والآخرة سامحوني مرة اخرى مالقيتش وين نحكي بقالي قلت نفرغو عندكم في امآآآآآآن الله

[jë suîs comçà]

أأأأأأأأأأأحقا هذه انتي؟؟؟؟؟؟؟؟؟؟؟؟
استسلمتي بسهولة لامتحان تافه ؟؟؟؟؟؟؟؟؟؟؟
طوال عمرك و انكي تحلمين بأن تكوني ناجحة في مسيرتك الدراسية
و في بعض ايام استسلمتي؟؟؟؟
لييييس هكذا اختاه
انها ايام و تمر
نعود للدارجة خير باش نحكي مليح
شوفي عام كاملو انتي تتعبي باه في اللخر تنسحبي؟؟؟
هاذو راهم جيست أفكار الشيطان يوسلك سيتو
بلي راكي متنجحيش عام جاي و عاوديه صحاباتك كملو و انتي مزال
شوفي توكلي على ربي و هو يعينك
كيما يقولو اسعى ياعبدي و ان نعينك
اذا على الرقاد رانا كامل نعانيو منو وشنو نعوضو الوقت خلاص نسيفو على رواااحتينا سيتو
ماااالا نقولك روحي ريحي راسك من التخمام المعوج هذا
و نوضي الدالة الأسية راني تعيطلك المكتب ديالك حفراته ب les appels
هيااااااااااا هيااااااااااااااااااااااااااا
لا للإنسحاب

[~ هبة الله ~]

لا حبيبتي ماتقوليش هاكا ، هذا هو الوقت المناسب و الأنسب للمراجعة و تدارك كل النقائص و هنا يبان الصح لي يقدرلها
" لا يصل الناس إلى حديقة النجاح دون المرور بمحطات التعب و الفشل و اليأس و صاحب الارادة القوية لا يطيل الوقوف في هذه المحطات "
تأمليها مليح درك تفهمي وين باغية نوصلك
و تأكدي صديقتي واحد مراه واصل في المراجعة شوفي أنا ماشي باه نطلعلك المورال ولا بصح صدقيني راني متأخرة بزاف الفيزياء مازلت ماراجعت الكهرباء و الميكانيك و الأسترة و الاهتزازات و العلوم بقاتلي أعصاب و تنفس و حيولوجيا و الرياضيات احتمالات و دوال أصلية و مزال نقائص كبيرة في المحاور الأخرى ، الشريعة تصدقيني حرف مازال ماقريته و الاجتماعيات عاد كي بديت بصح دايرة ثقة في نفسي و ندير لي عليا
بقاتلك 15 يوم تكفيك باه تصنعي المعجزات ، ماتخليش أحلامك و طموحاتك تشوفيها مع غيرك و انت تتفرجي و والديك ؟ راكي طمعتيهم و يستناو منك تفرحيهم تخيلي فرحتهم بيك لا توصف حتى فرحتك انت و الله عن تجربة فرحة نيل البكالوريا لا تعوض يكذب عليك لي يقولك عادي و مااازال الحال من اليوم شوي كوراج شوي ارادة و غير بالشوي درك تلحقي و كي تشوفي روحك فشلتي لا مزيد من التذمرات روحي صلي ركعتين و دعي ربي فيها يوفقك سبحانه ماغاديش يفوت جهدك
نتمنى تكوني فهمتيني حبيبة ماتزيديش تهدري هاك نحيها ديك الكلمات من القاموس

[dreamer17]

Drama Queen ����
ختي نصيحة مترشح حرة . علابالك اوكان متقرايش و نهار تروحي تعقبي حق الله تحكمك وحد الندااامةة تقولي لوكان غيير يولي الوقت نقرا 2 سوايع برك تالمون الباك يكون ساهل ؛؛ و الهدرة هادي حاجة نورمال جاتك م لو ستراس و الخوف الوغ وش نشيخ عليك انا : شوفيلك المواد لي راكي ناقصة فيهم كامل و سيزيهم في ورقة ممبعد ارفدي ورقة و ديري بروقرام تع سمانة هادي نقولو حتي لو 10 جوان ف هاد ليامات سيي لحقي روحك فالمواد الاساسية .. شوفي لي فيديو الاسئلة الشائعة الملخصات كللشش اضافة زيدي الادب العربي ... و من 10 جوان حتى ل 19 معللييش ديرييها حفاظة و حلي فيها لي سوجي لغات و ربي يوفقك و يوفقنا كاامل ان شاء الله
~~~~~~~~~~~~~~~~~~~~~~~~~
Bac 2018 yes WE CAN
~~~~~~~~~~~~~~~~~~~~~~~~~~

[djoumana rayen]

فكري معايا اسكو الحاجة لي راكي تخمي فيها راح تقربك مالهدف ديالك ولا تبعدك عليه في الايام الاخيرة ؟
فكري بهذي الطريقة و شوفي وش راح يتبدل في طريقة تفكيرك
شوفي التوقيع ديالي اقرايه وافهميه مليييييييييح ملييييييييييييييح