مللت من هذه العلاقة

[مشكلتي]

السلام عليكم
أرجوا من رواد الصفحة إعطائئ حل و ليس المعاتبة
المهم أنا شاب 24 سنة أدرس ماستر 2 ...تعرفت هذا العام على شابة تقرى في نفس الجامعة ..المهم في البداية كان التعارف بالصدفة عن طريق الفيسبوك و بعد ذلك تلاقينا و صرنا أصدقاء و مع الوقت ولينا نحطو بالفيبر و لكن طول هذه المدة ما بينتلها أي شعور التاعي إتجاهها ..و لكن في المقابل هي وحدها في الاونة الأخيرة ولات تقلي كلام ك(نحبك) (عمري) ...و أنا منبادلهاش نقللها غير واش حبيتي ...المهم من ذيومين قالتلي نتلاقو فالجامعة ..الشيرة جات متزينة و لابسة بيان تاع زعمة أنا راني مدامتك و نتا تخرج معايا ..المهم ريحنا حكينا و قاع ....و لكن البارح خممت غايا قلت لازم نقطع هاذ العلاقة و لكن بطريقة ماتظرهاش بزاف باسكو ندمت لأن هاذ الشيرة عاقلة بزاف و نية و مارانيش باغي تضرها أكتر ..
أريد حل مناسب ..و ماتقولوليش قوللها أيا سمحيلي أنا منبغيش و مانيشعارف واش ...
و السلام

[زبدة ذايبة]

تخيلها ختك

وراهي في علاقة مع شاب بنفس طريقتك

شوف أي الطرق أنسب

يعني

أنت وش تحب؟؟؟؟؟

هل تحب مثلا أختك صاحبها هذا يعاملخا بكل حب وحنان ويراعي مشاعرها

ويروح معاها حبة حبة باش مايصدمهاش

أو أنه من الأحسن أن يواجهها مباشرة ويقطع علاقته بها

في رأيك ماهو الأفضل لأختك؟؟؟؟؟؟

أنا عن نفسي لو كان تكون أختك من الأفضل يقطع علاقته بها مباشرة

لأنه كلما حسسها بأنه سينسحب تزيد تشد فيه وماتخليهش يروح

وحتى مايضيعش شرف البنت ولمصلحتها

خلي بنت الناس

وحرام عليك هذا الشيء

عندك أخوات وفي المستقبل بنات

خاف على عرضك

[khawla_eleulma]

مباشرة يا بنت الناس ماعندي حتى مشاعر تجاهك وكل واحد في طريقو وربي يهديكم وإن شاء الله تفيق مع عمرها

[أم رقية نسرين]

طفلة عاقلة و نية
واش راح يصرا فيها كي تقطع علاقتك بيها ؟؟؟؟ راح تتنتحر ؟ يا أخي فكر في نفسك هادا ذنب توب منو و خاف من ربي الموت يجي في اي لحظة ميستأذن حتى واحد و حط في راسك كما تدين تدان

[عثمان الجزائري.]

هل تعلم عزيزي صاحب المشكل أن المرأة لا تحب بهذه السهولة؟ و هل تعلم أن المرأة لا تنكسر كما تتخيل بعد قطع أي علاقة و مهما كان نوعها، هل تعلم أنها عندما تتزوج ستعمل فورمات لكل ما مضى...علمونا أن الزمن كالسيف إن لم تقطعه قطعك و أنا أقول لك أن علاقتك مع المرأة في الحرام كالسيف إن لم تقطعها قطعتك، مما سبق قد علمت أنك تتكلم بالعاطفة و لهذا تجد الخطوة التالية و هي قطع العلاقة مباشرة صعبة و قد تؤثر عليها و و و و ....أخطيك صديقي من النساء فأنت في سن ذهبي يمكنك من خلاله التفكير جيدا فيما سيأتي خصوصا و أنت تعيش في إفريقيا.

[مراد سابقا10]

ساهلة ماهلة قال يا بنت الناس نحن في علاقة محرمة ولازم ننهي الأمر وكل واحد يروح لطريقوا انتهى .

[ع.عيسى]

لا حول ولا قوة الا بالله ....في علاقة محرمة وخايف ليصدمها ؟؟؟.

[الدرر البهية]

انت هكدا في ترددك راك تلعب بالبنت و هي اصلا ادا عرفت متزيدش تشوف فيك
اضافة الى هدا رضا الرحمان اسبق من كل هدا انت الان في معصية توب لله فهو الغفور الرحيم
متحبهاش صاي قللهالها بكل بساطة لما الخوف ؟!!!
لا تتحجج بها لانها والله ككل البنات ما تسمعش بيك ادا عرفت
و خطيك من التعرف على البنات بين مواقع الاتصال و العلاقات الجامعية
عيش حياتك و رضي ربك احسنلك
لو كانت اختك او بنتك او اي من بنات اسرتك اتقبل لها هدا الموقف
ربي يهديك هدا ما عندي

[هـــدوء]

ماتخافش عليها قطة بسبع ارواح.خاف على روحك .

[قدور بن عاشور]

ما عجباتكش و ما عندك حتى مشاعر تجاهها، علاش قاعد معها و زعما الصداقة و الفايبر و الفايسبوك.
هذا دون الحديث عن حرام و عيب (أظن ما ولاتش عيب ضرك)

الحمد لله الذي عافانا في وقتنا لا فايسبوك لا هاتف جوال لا والو.

[sohaibdz]

روح الله يهديك

[toulay]

وعليكم السلام ورحمة الله وبركاته
مين عدتي متبادلهاش نفس الشعور كون مين قاتلك نحبك ولا منعرف واش كون تماك وقفتيها عند حدها وحطيتلها les points sur les i وقلتيها واش المناسبة باش تقولي هكذا ياك ماوعدتك بوالو مشي بقيتي ساكت زعمة عاجبك الحال
من الاحسن تقولها انا درك مانقدر نوعدك بوالو مزال مصروفي معنديش ومنجمش نكمل بالعقلية هاذي ومن الاحسن كل واحد ربي يسهل عليه وان شاء الله ربي يعوضك
هاذي هي
متبقاش حاكمها معاك ضيعلها فالوقت وهي ضيع فرص على جالك
بالتوفيق

[بنت الرّحّل]

الأربعاء30 شعبان 1439من الهجرة النّبويّة

وعليكم السّلام ورحمة الله وبركاته


هل يا ترى بعد هذه العلاقـة سوف تتعرّف على أخرى ولا تصارحها بما تشعر فإذا قالت لك عمري و وأحبك و و...آه ستـتذكر يجب أن تتخلص من هذه العلاقة !
أنت لم تندم وهي ليست "نية وعاقلة بزاف" في أعماق قلبك بل هي مجرد مغفلـــة ذهب جمالها وبريقها بعد أن أصبحت ملك يديك وكفى دليلا على هذا تعبيرك بالملل " مللت"
هكذا بعض الناس يرون كل شيء ليس في متناول أيديهم ذا قيمة لكن قيمته تتلاشى بمجرد حصولهم عليه
هذه الصداقات في المواقع وفي غيرها صداقات لا معنى لها المقصود منها في الغالب الفضول والتسلية وإشباع الرغبات ولكن الناس في غفلة عظيمة جدا
ثم اقرأ عن حقيقة الندم وكيف يسعى العاقل لتصحيح الخطأ والاعتراف به متحمّلا نتائج ما اقترفت يداه ..لا يجلس جلوس الزعماء ويضع شروطا لما يحب أن يسمع وما لا يحب ،بالله عليك متى كانت النصيحة ثوبا يُطلب على المقاس؟

ويالك من طيّب القلب إذ لا تريد إحداث ضرر ؟ أو لا تدري أنّ الضرر قد وقع فعلا ..

الضرر يبدأ بالعبث في هذه العلاقات والتهاون فيها وتسميتها صداقة او معرفة أو دردشة ، لا بل بمجرد التفكير بجوازها، إذ لا يوجد شيء كهذا لا شرعا ولا واقعا فهو في الشّرع محرّم وفي الواقع يكفي دليلا حالك ومللـــك منها.

فعليك بتصحيح أفكارك أولا واعتقاد أن هذه الصداقات بين الرجال والنساء محرّمة شرعا وأن الله لا يرضى عن مثل هذه المراسلات والمحادثاث وهي طريق موحلــة موحشة شائكة ومن خرج منها سالما لا يدري أنه أصابته سهام المعصية وهو دين في ذمته كما كان يلعب بأعراض النّاس ليأتينّ من يلعب بعرضه وهو يرى ملأ عينيه

فاقطع علاقتك بها وبغيرها هداك الله وإياها.

أتمنّى لك التّوفيق

[abdelka22]

الخطأ ندار و فات الحال درك لازم تخمم كيفاش تصلح الأحوال و ننصحك متزيدش افونصي معاها و قعد تتجاهلها حتى تولو ماتحكوش كامل . هادا رمضان راه جاي لازم يكون أكبر حجة لذلك حتى توالف وحدها و تنساك
ربي معاك و الله يهدينا

[ايمان4]

شوف نحكي معاكمن القلب للقلب .... درك هاد الفتاة راها في سن الزواج و راه عندها تصورات انك تكمل الماستر و تجي تخطبها و تتزوجوا و و و ...و انت في الحقيقة مصروف جيبك معندكش رانا كامل اولاد الدزاير و علابالنا امالا اجبد روحك مع جات العطلة قلها كما تفضلت الاخت تولاي ... انا منيش نخمم درك ف الزواج و مزال عندي اهداف و مشاريع لازم نحققهم قبل باش متبقاش تضيع في فرص الزواج على جالك كونك راجل و خمم فيها و ف عرضك مستقبلا .... و لمرا متخممش عليها تحزن ممكن حتى شهر و ممبعد تنساك لكن لكان تقعها لياس مشي تعاود منين تجبر شوية فراغ ترجعلها تلف بيها الوقت لا كونك راجل على قد كلمتك و رانا على ابواب شهر الرحمة و الغفران توبوا و الله يهدينا اجمعين

[رندة.]

مادام البنت هاذي ماراكش ناويها للزواج وما عندك حتى مشاعر اتجاهها، أقطع علاقتك بيها الآن ماتزيدش تضيعلها وقتها، وزيد سُمعتها بين الناس أنها كانت تمشي معاك وأمبعد خليتها، خمّم مليح ودير أختك في بلاصتها هل ترضالها يتمسخرو بيها هكا؟؟
ماتخافش عليها من الصدمة تاع الفراق مع الوقت تنساك وتقطع الأمل من جيهتك ويجيها مكتوبها وتتزوج، المهم أنت تكون شجااااع وتقطع علاقتك بيها من ذرك ماتزيدش تخليّها تتعلق بيك أكثر.
ربي ينورلك بصيرتك ان شاء الله.

[محمد جديدي التبسي]

البعض هنا حيروني زعما ادا كان ناويها للحلال يبقى معاها معليش اه من المسلسلات واش دير !!
يا أخي مش لازم تصارحها بدل رقمك ونحي عليك الفايس وقولها تروح تلعب بعيد زعما هي ما علابالهاش بالحرام وانت ربي يهديك ما تزيدش تلعب بالبنات

[walcot46]

أخي العزيز إن كنت ترضى هذه العلاقة لأختك فاستمر في هذه العلاقة المحرمة وإن كنت لا ترضها لها فابتعد و لا تنسى الحديث كما تدين تدان

[توحيد الجزائرية]

اسلوب في الحديث غير مناسب وغير لائق
مللت من علاقة انت نسجت خيوطها

كما تدين تدان ..

[سفير الأيام]

اوقع الله في مشكل نفسه الدي واجهته سنة 4 جامعي لم اكن صاحب عقلية تخلاط لكن الابتلاء قد ياتيك

فلا تتعجب قدر الله ان ........... بي وهي سنة ثانية ومن جامعة اخرى كان لها طموح كبير في الدراسة وناس ملاح بزاف لكن موقفي كان ثابثا على ان اجعلها تزيل فكرة انني ساتخد عقلية الصحوبية بالرغم من بكائها وتالمي الا انني استطعت ان ابعدها عني والحمد لله


اخي قبل ان تفكر في مصاحبة طفلة عليك ان تفكر في ابنتك وزوجتك مستقبلا

ربي يهديكم

[*** عبق الزهور ***]

السلام عليكم
عذرا لكن كلما قرات هذه المواضيع ادركت ان معضم شباب جيلي هذا لهم تفكير تاااااااااااافه وعذرا على المصطلح
يعني حياتكم كامل تعتمد على علاقات مبنية على باطل شوف رح نقولك حاجة اذا كنت ترضى لاختك واش راك دير مع بنت الناس كمل في لي راك فيه هذا من جهة
ومن جهة اخرى لربي يهدي هذه البنت ويغفرلها على واش راهي دير في روحها وفي سمعتها وفي شرفها

[رَكان]

السلام عليكم
العنوان يا صاحب من تعتبرها مشكلة وهي ليست بمشكلة في الحقيقة ..
العنوان يحمل بين ثناياه ما يثير الرعب يا أخي ..الإشارة تحديدا التي استخدمتها ..ــ هذه ــ وكأنه الأمر ليس مبدأ وقناعة لديك أنه لاجدوى من وراء هذه الممارسات سوى الضياع ..وإنما هو مللك من هذه العلاقة تحديدا ..واضح الأمر وليس لأي منا حاجة للقراءة بين السطور أنك مللت العلاقة مع هذه الفتاة ..وليس من داع لذلك غير سبب وحيد..أنها اعربت لك وبصراحة عن شدة تعلقها بك ..ولو كانت من المتمنعات الحاذقات لفن استعباد الرجال لما كنت بيننا اليوم يا صاحبنا تطرح ما تراه مشكلة وهو لايمت للمشكلة بأية صلة .
لقد فهم البعض أنك نادم على ما حصل وترغب التصحيح ..ولكنني فهمت غير ذلك ..فهمت أنك وجدت أنك تورطت في علاقة لاتحبذها مع هذه البنت المملة ..
أرجو أن فهمي هو الخاطئ وأن فهوم غيري هي ماكان على الصواب ..