هل هذا الامر عادي

[مشكلتي]

تقدم لخطيبتي شاب وبعد سؤال عنه تبين انه متخلق وجميع الشروط مناسبة
فقبلت وعرسي بعد رمضان
مع العلم انا ديرنا غير العقد الشرعي
جاء لمنزلنا لمناقشة بعض تحضيرات للعرس ووضع هاتفه فوق المائدة فحلته مازحة قتلو نشفو
فغضب وقالي معلاه تشفوه وما خلنيش نشوفي علما انه هاتف عادي يعني ليس ذكي
حقيقة توسوست وقلت بالك كشما مخبي علي حاجة لان ما خلنيش نشفوا
فما رايكم

[sousou 5]

لالا اختي صفي نية و لازم تكوون ثيقة بيناتكم ممكن هو من نوع لي ميحبش شكون يشوفلو حوايجو كي تزوجو ان شاء الله كي تزوجوو يووالف بيك ربي يهنيكم ولعقووبة لي مزالوا

[مراد سابقا10]

ماهوش من حقك تطلعي على هاتفه بصراحة

زيد نقولك اذا شاك في اخلاقوا اعرفي بلي كاينة ناس مدايرة كوراث والناس تشوف فيهم ائمة

انت سقسيتي على اخلاقوا قالوا لاباس يكفي والباقي على الله .

[محمد جديدي التبسي]

أي جرأة تجعلك تلمسين هاتفه وهو مازال غريب عنكم؟؟ سبحان الله وقت وصلنالو كاين نساء تزوجو ومازال ما لمسوش هاتف ازواجهم
مادام سألتو عليه لا داعي للتوسويس فغاية الشيطان زرع الشكوك والتفريق بين الزوجين.

[سيرين راجي]

تصرف غريب في الحقيقة علاه ماتشوفيش الهاتف اذا ما فيه والوا
انا هاتفي محطوط لبل نهار نعطيه لخاوتي يشوفوه
زيدي سقسي عليه مليح بلاك عندوا ماضي مخيف
ونقولوا عندوا نوامر بنات كون كي عقد عليك حذفهم
فالحق صلي استخارة عليه اذا مافيهش خير ربي يبعدوا

[عثمان الجزائري.]

هذا راه يزير فيك من الأول ماوش حاب يحلك العين، أنقلي له تحياتي الخالصة

[أم عبد الكريم]

الحقيقة تصرفك هو الغير عادي .......واش كنتي تستناي يقولك تفضلي يا لالة فتشي بعقلك و شوفي .......متقلقيش روحك و متخميش في لحكاية هذي لانك صراحة نتي لي غالطة بنصرفك هذا .

[noursm]

أولا كلشي مبروك اختي ربي يكملك ان شاء الله بالهناء و السعادة

ما نقدرش ندخل في نيتو

بالصح انتي حاولي تفهميها انه مازلتو برك ماش موالفين على بعضاكم ،كي شغل حشم برك منك

ولا كيما قالك الاخ بالاك حاب برك يزير عليك زعما زعما

و الله أعلم ...

[فطيمة 03]

فهم من تصرفك هذا انه عدم ثقة ونوع من المراقبة و تدخل في الخصوصيات

[طالبة لها هدف]

وش حبيتيه يقلك تفضلي و شوفي شبر شبر ولا واش نتي لضرك ماراكيش معاه تحت سقف واحد وجاية ترفدي في تيليفون باي حق
بففف يا زمان لحقنا ليه

[سآجدْ للهْ]

لوكان هو هز تلفونك يغيضك الحال
لوكان سقساك على تلفونك يغيضك الحال
كي هزيتي تلفونو محبش غاضك الحال
آآآآه يا النسا

[زبدة ذايبة]

يافتاح يارزاق!!!!!!!!

وش رح يكون مخبي فيه

حنَش !!!!!!!

تلفون كيما تاع الناس كامل

هذا مازال مارحتيش وبديتي تتطفلي على حياته الخاصة.

وش رايحة تلقاي في التلفون؟؟؟؟؟

أرقام أصدقاؤه من الرجال.

ورسائل من أصدقائه.

جا في بالك تلقاي صور نساء ؟؟؟؟؟

ولا جا في بالك تقوليلو نشوف التلفون

يقولك : ياسلااااااام سنوات وأنا نستنى في هذ اللحظة لما نخطب تجي خطيبتي تفركت في التلفون.

لا لا زيدي فركتي لجيوب وشوفي كوارطو ولا هو صح هو ولا راه منتحل شخصية؟؟؟؟؟؟

اللي فتحلك باب التفتيش يفتحلك أبواب أخرى.

وش داك ليه؟؟؟؟؟

ماتعرفيه

ماتعرفي عقليتو.

غير عقدتي بديتي شغل البلويس.

والتحقيق والاتهام.

لو كان هو يعاود يفكر مليح رح يوصل لنتيجة أنه يجب أن يعيد النظر في الارتباط بك.

لأن تصرفك هذا عنده معاني كثيرة جدا.

ينتهي التفكير فيها بفسخ الخطوبة.

من المفروض تعتذري وماتزيديش تعاودي.

ولا بقى زعفان تحلليه حتى يرضى.

ماخص تفتحي باب الشك وأنت تصرفك كله يفتح باب الشك والتساؤل.

مانزيدش عليك.

رب يهديك

[النجمة القطبية]

بصراحة معلاباليش علاه كبرتوا الحكاية لهده الدرجة
منشوفكش ارتكبتي جريمة خاصة انك زوجتوا == عاقدة شرعا ==
وبالنسبة اللي يقول باش ميحلكش العين ومنعرف اصلا راهوا باين انوا فاتحلك العين من الاول والا مكنتيش تجراتي وتبانلي مكانش كلفة بيناتكم
لاني شخصيا حتى قبل زفافي بايام كان الخجل سيد الموقف فما بالك بالجراة
فقط يبانلي زوجك من النوع اللي يحب يحط حواجز بينوا وبين زوجتوا ويحبها متدخلش بزاف في اموراتوا والا علاه الزعاف وعلاه يفسرها انها تجسس
ويكدب عليك اللي يقولك الازواج يخبوا على بعضاهم هواتفهم بعضهم نعم وليس الكل
عموما صحيح ردة فعله محيرة ومبالغة لكن منشوفهاش سبب لانك تحيري وتوسوسي ايام قبل الزواج
وكلي امرك لله وصلي صلاة استخارة مرة اخرى باه ترتاحي
وربي يهنيك في حياتك

[*أم سجى*]

ان شاءالله رب يهنيك اختي مشكلتك طريفة هههه فوتيها واغفلي وكملي حياتك

[الواثق]

خاف تكتشفي ان الشارجور تاعو يطيح على نتاعك مما يجعلك لا تحضرين شارجورا يوم العرس ههههه.................اخطونا من التوسويس ......ويسر الله امركم

[الفتاة السعيدة]

يا.اختي.صفي.نيتك