أبي ......

[مشكلتي]

السلام عليكم ، في الحقيق انا اقول هذا الكلام بكل صراحة انا مراهقة ادرس في الثانوية
ابي ان صح القول "امعة"و "نية" لدرجة كبيرة بزاف صحاب الحوانت كي يزيدو في الميزان
و يقولو معليش جات هكدا يقلهم ايه نورمال و يشري الصوالح الغاليين نورمال في عمرو 55-56
لا اعلم ان كان سخي ام انا اراه هكذا لدرجة انني ورثت هذه الصفة منه اصبحت اتبع اي رأي كأنني لا املك عقل
و اصبحت اشتري الاشياء الغالية على اساس ابي يعرف لماذا يفعل هذا معهم ، لكن ابي نية بزاف و الناس تدير
غلطات في حقو بزاف و يسامحهم و بالاك ينسى تماما واش صرا اصبحت اتبعه و اغلب ما يقال اصدقه مثلما يفعل هو
و ندير على هدرة الناس مباشرة هل هي وراثة و هل هذا طبيعي ام علي ان انبه ابي ان يكون نية للناس
اتمنى الافادة و التفهم و شكرا

[*أم سجى*]

وعليكم السلام ورحمة الله والله رق قلبي كثيرا وأحسست بهذا الوالد ان شاء الله رب يحفظو ويديمو على رؤوسكم.....بالنسبة لمشكلتك فأنا في نظري اذا عندك اخوة ذكور فهميهم ينبهوه ويفطنوه....أما اذا معندكش اخوة ذكور معندك متديري ادعي ربي يحفظ لوالدك صحتو ويباركلو في أموالو ومتحاوليش تهدري معاه في الامر ....أما بالنسبة ليك الأمر يختلف تماما ملازمش تقعدي نية وتبرري أفعالك أنها وراثة او ماشبه ذلك انتي راكي صغيرة وجاية لدنيتك لازم عليك تنفضي الغبار على روحك وتنحي عليك النية والطيبة الزايدة لي تضر بالعبد وتأذيه أشد إيذاء....وفقك الله اختي

[الثلج الأبيض]

ما تخافيش مول النيه دايمااا يربح
ربي يحفظو ان شا الله

[بلال88]

أظن أنك أعطيت الأمر أكثر من حجمه
الشغلة تاع الحوانت معظم الناس يديروها وما عندهمش مشكل
المشكل اذا كان هذا الامر يأثر على جيبو ومصروفه ومن الحكاية تاعك يظهر ماكاين حتى تأثير
اذا كان يصرف على العائلة وراضيين عليه وما يحصلش روحو في الديون، يشري الاشياء الغالية او الرخيصة ما يهمش
مسامحة الناس ونسيان كل شيء كأن لم يكن شيء عظيم راه يهني روحو من المشاكل ويريح قلبو من الاحقاد والتخمام
تبقى مسألة تبعي واش يقولوك الناس مباشرة هنا لازم تفكري فيه مليح
انت بنفسك حاسة بان الامر هذا غالط
اذن ماشي اي حاجة يقولوهاك ديريها ومن بعد تندمي عليها
قبل ما ديري اي حاجة فكري فيها وفي العواقب لي تجي من بعد
راك عندك عقل خمي بيه ماش بعقل الناس
وباباك راه كبير جرب الحياة ما راهش صغير ما يعرف والو حتى تنبهيه
تبانلي حياتو كاملة عاشها هكذا وما عندوش مشكل

[سيرين راجي]

ابوك انسان طيب وليس نية والناس الي راها تغش فيه ناس مغفلين وهم الخاسرون
هو راه يمشي صادق مع الناس ومش حاب يدير المشاكل وانت الله يبارك راكي تعرفي ضرك الصح من الغلط
اذا كنت شايفة هديك الشخصية تعبك ما تقلديهاش واحترمي ابوك مهما كان

[زبدة ذايبة]

ماعندك حتى دليل على الكلام اللي قلتيه على باباك.

يعني انت نهار كامل معاه

عند الخضار عند الخباز عند البوشي

عند الكانكيري

عند .........

مستحيل وين ماراح انت معاه.

بالتالي حكمك عليه سطحي

مجرد شكوك وظنون.

ومجرد إنطباع أولي على والدك عممتيه واستنتجت منه الأحكام.

باباك شاب راسو من مواقف الحياة.

وانت اليوم جاية تقولي نية ومايعرفش صلاحو؟؟؟؟؟

لوكان جا نية ولا جايح كيما راكي تتخيلي.

لو كان كل يوم بابكم يدقدق من الناس.

ليس حبا فيه.

بل طمعا في استغلاله.

ماكان مادخلك فيه.

أنت بنتو وهو باباك.

هو اللي يوريلك ويعلملك

وينبهك ويوجهك

وليس العكس.

التهاي بقرايتك وماتعمريش راسك بيه.

وماتعطيش للموضوع أكبر من الحجم الذي يستحق.

رب يوفقك ويهديك سواء السبيل.

[عثمان الجزائري.]

سؤال بسيط الوالد تاعك عمره 56 سنة لو كانت طيبة قلبه و نيته كما تقولين هي عيب فيه لما عاش كل هذه السنين مرتاح البال،أخطيك بنيتي و عيشي حياتك و تعلمي منها الدروس

[المكارم]

بدل تتبع تصرفات والدك ومعاملاته مع الناس أنصحك بأن تلتفتي لنفسك وتركزي على دراستك
خصوصا وأنك في مرحلة تكوين الشخصية التي ستخوضين بها غمار حياتك المستقبلية
والدك بلغ 55 سنة من عمره ولحد اليوم مازال يتحمل مسؤولية أسرته ويقوم بكل واجباته نحوكم
ما يعني أن تجربته في الحياة في غنى عن نصائح وتنبيهات من شخص لم يخرج بعد من مرحلة المراهقة
عندما يشتد عودك وينضج عقلك ستعرفين أنك تملكين أبا طيبا يعز أمثاله في زمننا هذا

[رندة.]

أبوك انسان طيب ومتسامح . ربي يكثر من أمثاله ان شاء الله، أما التجار الي قلتي أنهم يخدعوه في الميزان في الاخير هوما خدعو أنفسهم وياكلو في الحرام.
ركزي في قرايتك وربي يوفقك ان شاء الله