اريد الطلاق

[مشكلتي]

السلام عليكم متزوجة مند 5 سنوات عندي طفل عمره سنه جاء بعد تناول أدوية و عداب كبير مشكلتي زوجي شفت الهاتف تاعو لقيت صور خليعه صدمت زدت بحتت في الرسائل لقيتو زنا مع وحده و تلاقا بنسا بزاف بصح ما نعرف ادا صرا بينهم شي راني مصدومه و من الصدمه ما قدرتش نواجهو خاطرش ما لقيتلو حتى مبرر راني و يشهد عليا ربي ما منقصه عليه والو حتى مرات نفضلو هو على ابني راني نفكر فطلاق بصح خايفه ولدي يتربى بدون اب و في نفس الوقت خايفه يزيد يجيبلنا مرض من هادو العلاقات تصرفاتو معي محيره يحبني يحب ولدو ما يبخل عليا فوالو الحمد لله انا جميله يعني ما قدرتش نفهم السبب
عمل زوجي يفرض عليه يتنقل في الولايات مره كل شهر يقعد اسبوع و الله كرهتو ما رانيش طايقاتو نصحوني نطلق و لا نواجهو بصح علابالي راه ينكر و راح ياخد احتياطاتو المرات الجايه و حاجه اخرى راه واعد وحده يتلاقا بيها المره الجايه و من الحديث معول يزني معاها و العياذ بالله ما عرفتش كيفاه نعبر راني منكسره و بانلي الطلاق هو الحل مع الزوج الزاني

[nihal159]

ربي يفرّج عليك أختي. مالقيت مانقولك غير ندعيلك.

[خالد عنابي]

تكلمي معه بكل هدوء واخبريه انه خانك ولا مستقبل بينكما و يطلقكي ويعطيك حقك وانتهى


وخليه يكمل في حياتو


هذا شخص خائن وهكذا هو طبعه ولن يتبدل .

[kacimo.samy]

سلام
مشكلة حقا
هذا انسان الم يفكر ان الرجم حتى الموت هي عقوبته ؟؟؟
مجتمعنا ممتلئ بأمثالهم لستي وحدك فقط
المهم ذكريه بعقوبته واسئلي اهل ذكر ....
توجد واحدة بعد ما انجبت 5 او 4 اولاد حتى علمت ان زوجها يهودي
وبعدها هو حس انها عرفت هرب وتركها لحد اليوم

[الأصيــل]

الطللاق آخر حل تفكرين به
أختي الكريمة ::
عليكي أن تواجهيه بمايفعل و اتخذي قرار بأن تحرميه الفراش إلى أن يتوب عن افعاله .. فربما لا قدر الله يجلب لكي المرض
إن كان رده هو العناد فعليكي ان تلجئي لأهلك إن كان باستطاعتك ذالك ولا ترجعي له إلا اذا التزم بالدين وتخلى عن هاته المعاصي
كما أنصحك بالحفاظ على الاسرار الزوجية فعليكي أن لا تفضحيه مهما حدث .. طبعا كل هذا مع الدعاء
ربي يستر عليك اختى ويوفقك

[ROMMEL]

خايفه يزيد يجيبلنا مرض من هادو العلاقات ركزي على هاذ النقطة علابالك لي يزني يهز امراض بزاف بلا ما يكون يعرف اصلا و انتي مادامك عرفتي لازم قرار حازم من جيهتك واش ذنبك يمرضك معاه

[زبدة ذايبة]

على كل حال بالنسبة ليك تبقاي معاه ولا تتطلقي غير كيفكيف.

لأنه ماراحش يتوقف.

ولو كان تواجههيه رايح يتهمك انت بأنك غير طبيعية.

على خلفية المسلسلات والأفلام البوليسية.

ماعليك سوى القبض عليه متلبسا بالجرم.

هنا تكوني خرجت المشكلة من الظلام إلى النور.

ومن خلال ماكتبت تباني ماشي حابة تتطلقي.

ومازال عندك الاسنعداد للعيش معه.

ومازال ما راكيش قادرة تفارقيه رغم النجاسات والقذارات اللي يجيبهالك معاه.

لذا كملي معاه على الحال اللي راكي فيه معاه وعيشي معاه إلى أن تكرهي منو وتقتنعي أنه مايصلحش نهائيا.

هذاك النهار الطلاق يجيك ساهل أو ممكن يلتقي بوحدة اللي تقدر تاخذ مكانك.

وفي كل الأحوال انت ماعندكش زوج.

عندك واحد يصرف عليك فقط.


حتى من حيث الشريعة الإسلامية هو رجل مقتول رجما.

حتى ولا كان على قيد الحياة.

في كل الأحوال راكي بدون زوج

قال تعالى :{ الزاني لاينكح إلا زانية أو مشركة. والزانية لاينكحها إلا زان أو مشرك} الآية

القرار بين يديك. وزيدي إسألي أهل العلم والفتوى يعطولك رأي تهتدي بيه.

أكثري من الدعاء لعل الله يستجيبلك.

رب يصلح حالك.

[مراد سابقا10]

لا حل سوى المواجهة

ان اقتنع بالتوقف فاللهم بارك الله مقتنعش يعطيك حقوقك وانتهى الأمر

ونقولك حاجة الرجال كيما النوع هذو الخلاطين ميتوقفوش على هذه التصرافت للمات

[النجمة القطبية]

طيب يا اختي وانتي كيف كان حالك مع هدا الزوج طوال هده الخمس سنوات
خمس سنوات راهي عمر ماشي نهار او ليلة تعطيك فكرة جيدة عن الشخص اللي راكي عايشة معاه
هل كان يعرف ربي
يتقي الله في معاملاته
يصلي ويصوم ويقوم بالواجبات الدينية
ام انه كان عكس دلك تماما
لاني مستحيل ان اصدق انك كنتى عايشة مع شخص بعيد عن الله وراضية وفجاة فطنتي لما وجدتي دليل على خيانته
لكل شئ مقدمات واكيد كانت هناك مقدمات للوضع اللي راكي عايشاتوا الان
الان بالنسبة لمشكلتك
فاول شئ ان تسالي اهل الفتوى في امرك وحكم بقاءك مع شخص مثله حتى تكوني على بينة
ثانيا لازم تتكدي جيدا انه حقا انسان زاني وتكوني على بينة فالرسائل في البورتابل وحدها لا تكفي كدليل قاطع على الفعل يعني انتي باختصار محتاجة تاخدي وقتك وتراقبي جيدا وتتبيني الامر
ثم مباشرة بعد ما تتاكدي تواجهي هدا الرجل بالفعل وتشوفي استعداداتوا للتوبة وان كان على الاغلب من لا يخاف الله ولا يتقيه لن يخاف منك فلا تتوقعي معجزات قد يكون طبع فيه
في النهاية ان كان حقا كما وصفتي عاصي ومصر على المعصية فلا انصحك بالمواصلة معه فليس لمصلحتك لا من الناحية النفسية ولا الصحية ولا الدينية
الا في حالة ما ادا قررتي انتي البقاء فقط من اجل ابنك حتى لا يضيع وتضيع حقوقه وان كنت لا اميل الى هدا الحل
في النهاية مشكلتك صعبة فلا تتاخري في طلب العون من الله فصدقيني البشر راح تنصدمي فيهم بزاف وفي افكارهم لكن ادا تمسكتي بربي سبحانوا مستحيل يخيبك
واسفة اختي اني مقدرتش نساعدك اكثر من هدا لكن ندعيلك تتخدي احسن قرار ويفرج عليك ربي سبحانوا

[قدور بن عاشور]

إذا كان الشرع يحكم عليه بالقتل شر قتلة، و بالتالي ييتم ابنك.
و لا أظنك أحرص على ابنك من الله عزوجل
لذا أنصحك بالهروب من هذا الحيوان و خذي هاتفه معك و استعمليه كدليل إثبات.
الناس لي كيما هو عندهم هوس و إدمان لا يمكنهم التوقف.
إن واجهتيه فسيدعي التوبة و سيحتاط جيدا بعدها.

[بناتي نور العين]

السلام عليكم


عليك بمواجهته فان حلف لك على المصحف بانو لم يزني فعليك ان لا تتسرعي بطلب الطلاق

وحافظي على عائلتك فكلنا خطاؤون وخير الخطاؤون التوابون

ربي يفرج عليك وان شاء الله الزوج تاعك موصلش للزنى و ربي يهديه لك و يهنيك آآمين

[visa uk]

سمحيلي هدا الرجل فري خامج سمحيلي علي كلمة نعرف امثالو بزاف حياتو كامل يتبع الخامجات واماكن وسخة مند صغرو لدا مستحيل يتبدل عاد جدا لكن غلطة في نساء لي يتزوجو برجال عاهرين وجنسيين وخامجين يتبعو الخامجات والفاسقات الخ

[visa uk]

خامج وعاهر في جسده يروح يرمي احضانو للخامجات المتسكعات

[----------]

الله يفرج عليك يا اختي
الدنيا كيفاش ولات
الله يجيب الخير وخلاص

يا ختي شدي في ربي و سقسي أهل العلم يعاونوك أكثر منا نحن العوام

[FATIHA131]

لاحول ولاقوة الآ بالله
ربي يفرج عليك

[مسرورة بحياتي]

انت تعرفي زوجك اكثر منا ، هو زاني وخائن ، ولكن هل لديه القابلية للتوبة والرجوع الى الطريق الصواب ؟ .الاجابة على هذا السؤال انت تعرفيه فقد عشتي معاه 5 سنين ولك منه ولد ، اذا كان انسان صالح في جوانب ومشكلته هو ان زاني فلربما ربي يهديه ، ولكن عليك بمواجهته بالامر ، وادعي ربي ان يفرج عليك .

[FELLA BIO]

ربي يفرج عليك يا رب و يوجهك للقرار الصائب في الدنيا و الآخرة ..اللهم نسألك العفو والعافية

[رودينة19]

السلام عليكم
أختي الله يفرج عليكم ونورلك طريقك، شدي في ربي، ممكن تصلي صلاة الاستخارة فالله خير أن تستشيريه وهو ينورك طريقك
وحنا عندنا مثل يقول مول الطبع ما ينطبع يعني إذا كان هذا طبعو مستحيل يتغير إلا إذا هداه ربي.

[amran6688]

الطلاق ليس حلا

يقول العلماء يجوز الكذب اذا كان الهداف هو الاصلاح بين الزوجين


اذا كنت خائفة من المواجهة قولي له أني رأيت في المنام شيئا أنا خائفة مما رأيت

قولي له لقد رأيتك مع إمرأة وهي تضحك علي وعليك ثم رأيتك مع إمرأة أخرى وهي

تأخذك مني وأنا أبكي .

وإبني يبكي على أبيه ويقول يا بابا لاتتركنا .

ثم رأيتك مريضابسبب هذه العلاقات وأنت أخذت تطلب مني أن أسامحك ورفضت وقلت

لك ماذا أفعل بك وقد مرضت .


هكذا تدخليه في حالة الشك وربما قد يبتعد ويتوب خوفا من الفضيحة ويقول ماذا لوعلمت

بأن مارأته في المنام هو الحقيقة .

وثانيا لماتكرري فكرة المرض ربما هذه النقطة تتركيه يوسوس ويقول في نفسه ماذا

يحدث لو أمرض ويفضحني الطبيب.

لايهمك لو تظاهر بأن مارأيتيه مجرد منام ولكن رأقبي تصرفاته بعد ذلك هل يوجد مايدل

على التوبة والخوف .

وابقي كرري أنك خائفة علية مما رأيته في المنام وتظاهري وكأنك موسوسة عليه

وخاصة من فكرة المرض .

[Brahim 9]

ربي يفرج يا اخية بصح انا نحير من شي ناس ربي يرزقو زوجة صالحة ولا ازكي احدا تلقه يتبع نساء ربي يهدي ولا يدي
واحد نعرفو كما هذا الصنف متزوج معه اولاد يعشق النساء لدرجة نقولك واش قالي قوتلو مراكش تبطل هذ العقلية تع تبع النساء خوفني واش قالي والله قالي الا شوفتني راهم يدو فيا للجبنانة اعرف بلي راني بطلت لا حول ولا قوة الا بالله

انا منيش نقنط فيك من رحمت ربي بصح والله مني عارف ... ربي يهديه