مشاهدة النسخة كاملة : تحدي بطلات الخردة ............... زُخْرُفَةٌ
zokhrofa
2018-01-04, 08:08
السلام عليكم و رحمة الله و بركاته
ان شاء الله تكونو كامل بخير
و طبعا من العنوان راه باين موضوعنا
الكل يعرف شحل المنازل الجزائرية و العربية او الغير عربية تحتفظ بالخردة لمدة طويلة جدا
https://up.djelfa.info/uploads/15150497067581.jpg
لكن الذي لا تعرفه هذه المنازل هو انو الخردة تمنع الرزق و تبعد البركة من المنزل
كيف ذلك ؟
اذا انتي احتفظتي بغطاء مثلا و ما استعملتيهش لا الشتاء الماضي و لا الشتاء تاع هذا العام
بيناتنا ؟ ربي ما يحاسبكش عليه و هو كاين آلاف الناس راهي تبات بردانة و ما تتغطاش و انتي مخبيا هذاك الفراش ؟
راح تقوليلي خليتو للضياف حسنا خلينا من الفراش
اللبسة لي راكي مخبيتها ؟ و ربما عمرك ماراح تزيدي تلبسيها لسبب او لغيره تان خبيتيه للضياف ؟
حسنا الأمر اضن راه واضح
نزيدو مثال تلفاز قديم او هاتف قديم مرمي في الدرج
لماذا تحتفظي به ؟
هدية ؟
حسنا لكن ما نفعها في الدرج ؟
راح نتعلمو فيها التخلص من الخردة لي في المنزل
باش ننجحو في التخلص منها لازم تكون عندك عزيمة و همّة كبيرة
لأنّو راح تضطري للتخلص من اشياء عزيزة عليك بزاف
لكن عند ربي ستأجرين ان شاء الله
و خزانات في البالكون و خزانات تحت السرير و فوق الخزانة كل هذي الامور علاش مخبيتها ؟
ديري في بالك انو الحاجة لي تقعد عندك اكثر من عام راح تدور عليك
كيما يقولو ناس زمان : "تبعد عليك الخير "
و احنا واش نديرو ؟
راح نفرزو امورنا و نشوفو الحاجة لي تترمى نرميها و لي تتصدق نصدقوها و لي تنفع نهدوها نهديها
تهادو تحابو
على الاقل تفرحي ناس خير من راهي في الخزانة مرمية او في بلاكار مخبية
و اهّم حاجة انك راح تفتحي الباب لحاجات جديدة
لأنّو معروف :
''التخلص من القديم يأتيك الجديد "
- كل انسان عندو حاجة قديمة في دارو او خاسرة يقدر يشارك معانا
في الأخير نقول هيا نتعاونو على التخلص من الطاقة السلبية لي في منازلنا
لحن الحياة.
2018-01-04, 10:46
اناااااااااااااااااااااااا نشارككككككككككككككك اذا امكن
عندي اشياء حابة نتخلص منهم
السلام عليكم ورحمة الله فيك
فكرة رااااائعة زخرفة والله عندك افكار اكثر من رائعة
يااختي دارنا نعنىة خردة واش نحكيلك لدرجة محال تتخيليها و لكن الوالدين ربي يهديهم مايسمحولنا نمسو حتى فحاجة
هاذ المرة باذن الله راح نكون معام و راح ندفعهم يغيرو عاداتهم و على الاقل تندوس الدار هاذي ويبان وجهها ههههههه
بارك الله فيك على الفكرة
zokhrofa
2018-01-04, 13:04
أهلييييييييييين لحن الحياة و أثيلة و بارك الله فيكما على الترحيب بالفكرة فرحت
شوفو باذن الله راح ننجحو ديرو في بالكم انا تان راني معاكم هههههههههه
أوّل حاجة راح نتخلص منها هي الماطلا تاع زوج بلايص كنت راح نخليها نقسمها على زوج لكن قررت نعطيها للافريقيين ربما يحتاجوها اكثر مني
و نتوما واش هي اوّل خطوة ؟
يازخرفة فكرتك مليحة و انا عندنا خزانة فالبالكون تاع الحطب من العصر الحجري فيها كتب و كراريس تاعي انا وهواتاتي من الابتدائي وجيب قولولي كيف نقنع الوالدين انو نتخلص منها لانو البالكو رجع اشبه بقبو و غير ندخل ليه نديق
zokhrofa
2018-01-04, 13:55
هههههههههههههه مشكلة كبيرة حتى انا عندي برميل في البالكون مضيق عليا لازم نقنع زوجي نحيه من تمتيك
انا راح ندير نهار ما يكونش هنا و نفرغو من الماء و نعطيه لشيخي يديه
انتي من رايي كل مرة خرجي منها شوية بلا ما يفيقو حتى تكملي كلش الكراريس و الخردة
من بعد نهار ما يكونوش قولي لخوك يجيب تاع القش القديم يديها او اقنعيهم تصبغيها و ترجعيها شابة
تقدري تصوريهالي ؟ باش نعطيك افكار اكثر
هههههههههههههه مشكلة كبيرة حتى انا عندي برميل في البالكون مضيق عليا لازم نقنع زوجي نحيه من تمتيك
انا راح ندير نهار ما يكونش هنا و نفرغو من الماء و نعطيه لشيخي يديه
انتي من رايي كل مرة خرجي منها شوية بلا ما يفيقو حتى تكملي كلش الكراريس و الخردة
من بعد نهار ما يكونوش قولي لخوك يجيب تاع القش القديم يديها او اقنعيهم تصبغيها و ترجعيها شابة
تقدري تصوريهالي ؟ باش نعطيك افكار اكثر
اكيد نقدر نصورهالك اصبري عليا برك نكمل شغلي فالكوزينة راني نجرب فلاباط فيثي نخدم الكوكا بيها لانو موالفة نخدم الكوكا بالعجين تاع لمطلوع برك وغير نكنل نصورهالك
zokhrofa
2018-01-04, 15:26
حسنا اوكي ربي يكون معاك
zokhrofa
2018-01-04, 20:45
وين راكم ؟؟؟؟؟؟؟؟؟؟؟؟؟؟؟؟؟؟؟؟ظظ
النجمة القطبية
2018-01-05, 00:41
شوفي باش نكون صريحة معاك اختي زخرفة
فكرة الموضوع من ناحية انه صدقة ومساعدة الاخرين اوافقك واشجعك عليه
من حيث ترتيب البيت اوافقك
من حيث النظافة اوافقك
لانها كلها امور تدخل الخير والبركة للبيت كمنطق الملائكة لا تدخل بيت وسخ
اما فكرة تراكم الاشياء في البيت تمنع الرزق ولا ادري فهي كفكرة مستمدة من علوم الطاقة او ما يسمى طاقة المكان وهي علوم فارغة شركية لا اصدقها ويقولك مثلا ان الاشياء اللي تاخد حيز من الفراغ واستخدامها قليل تجلب الفقر والنكد ووو
ونزيدك ان بيوت الاغنياء هي اشد البيوت اللي فيها فائض من كل شئ ومعمرة بالتحف والاشياء القديمة وحتى الكراكيب احيانا !
قريبتي ثرية جداا وفي بيتها طابق كامل للكراكيب لا تدخله ! مثال فقط
لدا لنجعل الامر لوجه الله يكون احسن بكثير ولان النظام اجمل وكلما كان هناك مساحات فارغة في البيت يشعر الانسان بالارتياح ويصفى الدهن احسن من فكرة الرزق
فالصدقة نعم تجلب الرزق لان في الامر وعد رباني وليس التخلص من الكراكيب
مجرد راي ومتاكدة اننا سنتفق
بالنسبة لبيتي الكراكيب بمعناها الحقيقي معنديش لاني متزوجة حديثا
دايما نشري بعض الاشياء الجديدة في البيت للطوارئ كمثال كي يجي الضيف نحب نفرش الجديد كنوع من اكرام الضيف وعندي فراش مخصص للضيوف
بالنسبة للملابس الفكرة جيدة لكن انا من طبعي نحب نعطي للناس الجديد فقط
الحاجة اللي نشوفها زايدة نقدمها كهدية غالبا
مي درك نشوف واش نقدر نرتب ونقولك
zokhrofa
2018-01-05, 09:37
اهلييين نجمة
نعم نعم انا معك في هذا الأمر انا شفتها هذيك المصرية لي تحكي على النكد و القلق و التوتر بسبب الكراكيب
صحيح انو كلامها فيه الكثير من الصح و الكثير من الخطأ و من بينها النكد لي حكيتي عليه انتي
و اذا لاحظتي انا ما تكلمتش على هذا الجانب انا تكلمت كمسلمة نأمن بالطاقة الايجابية تاع الدين الاسلامي و ليس البلا بلا تاع العلماء لي ما يستعرفوش بواش قال ربي و يحسابلهم هوما جبدو هذاك العلم
انا تكلمت على الصدقة و الاحسان و الهدية كلها امور تمد الانسان بالفرحة سواء المتصدق او المتصدق اليه
صح ؟
لذلك انا تكلمت على الطاقة الايجابية من حيث التصدق
و الطاقة السلبية من حيث الاحتفاظ بالاشياء لي ما تفيدنا ما نخلوها تفيد غيرنا
و نعطيك حاجة تولي تعرفيني مليح بيها انا نشوف بزااااااااااااااف علماء سواء عرب او ماشي عرب، مسلمين او غير مسلمين لكن عمرهم ماراح يأثرو فيا من الناحية الدينية
نقدر نقول انّه على حق في بعض الامور المنطقية لي ما جابهاش من عندو فقط حنا نسيناها او ما نتبهنالهاش
لكن في امور لي تخلي القادر انسان او شيء آخر غير الله فهذا يبوسو عينهم هههههههههههههههه
لذلك عزيزتي ما تخافيش هذا الموضوع باش نطهرو بيوتنا من البخل و الشح او عدم المسؤولية
لأنّه بمجرد اننا نخبي حاجة ما نستعملوهاش و ناس وحدوخرين محتاجينها انا أعدّه مع عدم المسؤولية
شكرا جزيلا على التفاتتك الطيّبة
ام سراج وملاك
2018-01-05, 15:13
السلام عليكم ورحمة الله تعالى وبركاته
فكرة المسابقة راقت لي
جزاكي الله خيرا على المسابقه الرائعهة
وبالتوفيق للجميع
زهرة جوري
2018-01-05, 15:19
المسابقة راااااااااااائعة سأشارك معكم
النجمة القطبية
2018-01-05, 23:11
صحا زخرفة هكا اتفقنا
درك خلينا نتفقوا ما هي الكراكيب المقصودة
لان كلمة كراكيب تعني حجات محطوطة فوق بعضاها لا تستعمل بتاتا مثلا تلفاز قديم ثلاجة محطوطة جانبا او كراريس او ملابس اووو
المهم لا تستخدم بتاتا فقط تاخد حيز من الفراغ
ولا تدخل فيها الاشياء اللي نستخدموها في مناسبات خاصة كبعض الافرشة والالبسة او المستحضرات او ملابس المناسبات ...الخ لانها امور نحتاجوها في اوقات معينة
درك مسالة الكراكيب كمثال واحد عندو روبوا من عدة سنوات مستحيل يستخدموا وغيروا يحتاجوا كمثال
لكن واحد عندوا جهاز يستخدمو للطوارئ لا تعتبر كراكيب
هل اتفقنا
فهميني الدرس لاني ادا مفهمتش مليح راح نفرغ داري اللي تعب عليها راجلي وتخلاص عليا بطريحة معاه ههههه
خلينا نتافقوا اولا ش مندوش الطرايح نجوا نكحلوها نعموها :d
المهم راني معاكم واول حاجة نبدا بيها نرمي اي حاجة مشقوقة او فيها خدش او متعجبنيش :1:
حلاتلي زخرفة شحال نحب نبدل نموووت على الجديد خخ
hodayena
2018-01-06, 21:27
انا جهازي حت واش ندير بيه
محبيتش نمدو يقولو حوايج مطلقه راه قاعد في الفاليزات منحبش نلبس حوايج نشري ونلسق في حاجه ومنلبسش من جهازي
حرت كيفاه ندير ومكانش لمن نمد
zokhrofa
2018-01-07, 13:06
اختي نجمة لا انا قتلك حاجة انتي متأكدة ماتزيديش تستعمليها برك تغيضك تمديها ههههه
اختي هدى تحبي نحطك مع جمعية كافل اليتيم تمديهم ليتيمة ؟
zokhrofa
2018-01-07, 13:07
تمت المهمة بنجاح
البارح خرجت الماطلة من الدار
و نتوما واش درتو ؟
إنسانة بسيطة
2018-01-07, 13:16
المسابقة غير مفهومة الافضل يكون هنالك شروط مثلا كانجاز موضوع مستقل لكل مشاركة تتحدث فيه عن الكراكيب و صور مرافقة قبل و بعد و كيف قامت بالعمل وفي النهاية بماذا شعرت او ما الفائدة التي جنتها ، اظن الامر بحاجة لبعض التنظيم ثم بامكانك التواصل مع مشرفات القسم ليتم الاعلان اعلى واجهة المنتدى هكذا لتجذبي الجميع و كل مشاركة ملزمة بوضع رابط الموضوع في توقيعها
ذكرتني بايام المسابقات :d:1:
zokhrofa
2018-01-07, 13:24
اهلا اختي
ما حبيتش نصعب الامر و هذه المسابقة في النهاية هي انجاز لكل شخص و هو لي راح يستفيد يعني لا المنتدى و لا انا هههههههههه
لذلك لي حابة تحكي اهلا وسهلا و تشارك هنا
و الحمد لله مواضيعي ليست بحاجة للاعلان يشوفوها ما تخافيش كيما شفتيها انتي
ام لجين و فيصل
2018-01-07, 13:40
السلام عليكم
يا زخرفة واش نقول واش نخلي
راكي طليتي على قلبي بهذا الموضوع
نهار الخميس كي شفتو قررت نفرز خزانتي و نليكيدي الحوايج لي ما رانيش نلبسهم و مارانيش معولة نزيد نلبسهم
بعد عام من ولادة ابني الثاني زدت في الميزان و بزاف حاجات صغارو عليا
عجبتني حالة الخزانة كي بان فيها الضو هههههههههههههههههههه
كثر خيرك يا زخرفة المنتدى
على فكرة راني نقرا في موضوع التقشف و عجبني بالبزاف
إنسانة بسيطة
2018-01-07, 13:50
اهلا اختي
ما حبيتش نصعب الامر و هذه المسابقة في النهاية هي انجاز لكل شخص و هو لي راح يستفيد يعني لا المنتدى و لا انا هههههههههه
لذلك لي حابة تحكي اهلا وسهلا و تشارك هنا
و الحمد لله مواضيعي ليست بحاجة للاعلان يشوفوها ما تخافيش كيما شفتيها انتي
زيارتي للقسم من قادتني للموضوع :d ثم نسب الردود و المشاهدة لا تعكس ما قلتِ :1:
عمومًا كنت أريد تقديم المساعدة لكن بما أنك ( قادرة على شقاك) موفقة .
آه قبل أن أنسى الكراكيب و الصدقة و النكد لا تتوافق ومعنى الديكور هذا كفكرة مسابقة للقسم :cool: { قسم المنزل و متطلباته (https://www.djelfa.info/vb/forumdisplay.php?f=387)}
اضافة : دخلت لملفك ووجدت هذا : مسابقة .... من تشارك ؟ (https://www.djelfa.info/vb/showthread.php?t=2120679)
ليس عيبا الترويج للمسابقة أليس كذلك :rolleyes::rolleyes:
ام لجين و فيصل
2018-01-07, 13:50
مازالت الخردة نتاع راجلي هبلنييييييييييييي بيييييييييييها
كاين حاجات ما يستعملهمش ولا حوايج ما يلبسهمش لا في الشتا ولا في الصيف و ما يحبش يمدهم بحجة انو يحتاجهم ولا راح ينقص في الميزان و يولي يستعملهم
مي انا منين داك و نليكيدي شوية بلا ما يفيق خخخخخخخخخخخخ سينون تخلا عليا ههههههههههههههه
zokhrofa
2018-01-07, 16:45
ههههههههههه اختي اثنو انا تخلصت منهم فالرحلة مديت كامل حوايجو بقا سروال واحد راح نمدو هذي المرة فكرتيني فيه
اوكي اذا انا وياك عندنا هدف الان حوايج ازواجنا هههههههههه
الى الحرب
zokhrofa
2018-01-07, 16:55
اختي انسانة بسيطة اهلا بيك في كل وقت و النقطة لي تكلمتي عليها راني شرحتها في مشاركة سابقة في حق اختي العزيزة نجمة قطبية
انتي واش عندك حاجات حابة تتخلصي منهم ؟
zokhrofa
2018-01-08, 07:52
صباح الخيييييييييير كيف الحال ؟
صباح الخير عليكم
مليحة فكرة التخلص من الخردة.
وعن تجربة كل ما تخلصتي من حاجة قديمة ما استعملتيهاش لمدة طويلة، تحسي بالراحة والاتساع في بيتك.
الطريقة العمليّة للتخلص من تلك الخردة في بيوتنا بدايتها تكون بعملية الفرز..... وللقيام بهاذي العملية لازمنا نقسمو اعمالنا ما تكونش عشوائية..... يعني تدخلي للمطبخ وتفرزي كاش اواني قديمة، طقم كيسان ماهمش كاملين، طنجرة محروقة، روبو مكسّر او قديم، كيسان وصحون وسكرفاج عندك منهم بالدوبل صحون مشقوقة... الخ، راكي كي تدخلي للكوزينة وتبداي تفرزي تلقاي أشياء تاريخية وغير مستعملة، بعد ما تفرزي الاواني تقسميهم على ثلاث فئات.....
الفئة الاولى إعادة حفظ يعني ممكن تحتاجيها مستقبلا وما تقدريش تستغناي عليها هاذوك ديريلهم بلاصة و خبيهم.
الفئة الثانية تكون بحالة جيدة وصالحة للاستعمال مجددا لكن انتي ماتحتاجيهمش او تكوني كرهتي منهم تصدقي بيها كاين ناس يحتاجوها علاه راهي مخبية في البلاكار.
الفئة الثالثة تكون غير صالحة للاستعمال أرميها مباشرة بلا ما تخممي.
نفس الشي قومي بيه في غرفة النوم، افرزي خزانتك وشوفي الملابس تاعك وتاع اولادك، كاش حاجة ضياقت عليك او اولادك كبرو عليها، جورب ماعندوش خوه، حذاء قديم، فيزوات، سراول، خمارات عندك بالدوبل، ملابس داخلية، فستان كرهتي منو، ماكياج قديم او مكسّر، ..... ومعروف علينا احنا النساء نظلو نشرو في اللبسة ونبدلو وتتعمر الخزانة.... قومي بعملية الفرز
قسميهم الى 3 أجزاء: جزء لإعادة الحفظ، جزء للصدقة، وجزء للرمي
أما الاشياء الأخرى الي تكلمتو عليها بطبيعة الحال تكون في البالكون او القاراج مثلا تلفاز قديم، ديمو. غسالة فاسدة، فرن كهربائي محروق، روبو مكسّر ، مجفف الشعر محروق، احذية قديمة، أفرشة غير مستعملة.... وغيرها كي تبداي تفرزي تتلخعي.
قومي بنفس العملية السابقة تربحي راحتك ونفسيتك واتساع في بيتك.
zokhrofa
2018-01-08, 09:11
عن جد برااااااااااااااافو رندة قلتي حاجات هايليييييييييييييين و صراحة عطيتيني افكار
انا الى حد الان في داري الجديدة مازال ما درتش خزانتي مونطيتها نهار نجي نحط فيها الملابس راح ندير نفس الشي
صراحة انا درت نصو كي كنت حانرحل نحيت بزااااااااااااف حاجات ما كنتش نستعملهم وكيما قلتي لي تصدق و لي ترمى و الحمد لله نقست بزاف على الرحلة والا كان جبت زوج كوامن ويا ربي هههههههههههه
مرحبا زخرفة
أولا مبروك عليك الدار الجديدة.... وربي يعينك على ترتيبها ان شاء الله.
بما أنك في دار جديدة هاذي فرصتك الذهبية باش تنظّميها وتحتفظي فقط بالاشياء الي تحتاجيها والي هي ضرورية بالنسبة ليك... بصح نصيحتي اخدمي غير بالشوية وركزي في عملية الفرز، عندك يديك الحماس تروحي ترمي نص قشّك......
بالنسبة للخزانة حطي ملابسك اليومية في متناول اليد يعني قريبة ليك وتاع المناسبات بعديهم شوي لأن استعمالهم يكون نادر أحيانا.
حاولي تحطي غير شوية لبسة باش تقدري تلبسيهم دايما وتكون الخزانة متنفسة من اللبسة الكثيرة. ومرة على مرة خبيهم واجبدي أخرين كانو مخبيين باش تنوعي في اللبسة خاصة بعد ما تكرهي وتملي من لبستهم دايما، خبيهم ومرة اخرى رايحة ترجعي ليهم.
شكرا على الموضوع وان شاء الله يستفيدو منو كامل.
مرحبا زخرفة
أولا مبروك عليك الدار الجديدة.... وربي يعينك على ترتيبها ان شاء الله.
بما أنك في دار جديدة هاذي فرصتك الذهبية باش تنظّميها وتحتفظي فقط بالاشياء الي تحتاجيها والي هي ضرورية بالنسبة ليك... بصح نصيحتي اخدمي غير بالشوية وركزي في عملية الفرز، عندك يديك الحماس تروحي ترمي نص قشّك......
بالنسبة للخزانة حطي ملابسك اليومية في متناول اليد يعني قريبة ليك وتاع المناسبات بعديهم شوي لأن استعمالهم يكون نادر أحيانا.
حاولي تحطي غير شوية لبسة باش تقدري تلبسيهم دايما وتكون الخزانة متنفسة من اللبسة الكثيرة. ومرة على مرة خبيهم واجبدي أخرين كانو مخبيين باش تنوعي في اللبسة خاصة بعد ما تكرهي وتملي من لبستهم دايما، خبيهم ومرة اخرى رايحة ترجعي ليهم.
شكرا على الموضوع وان شاء الله يستفيدو منو كامل.
ام لجين و فيصل
2018-01-08, 09:54
صباح الخير عليكم يا وجوه الخير
راكم top يا لبنات
انا ملي شفيت على روحي وانا نفرز و نرمي و نمد بصح الخردة ما تخلاصش
حوايجي فرزتهم الحمد لله
حوايج ولادي نفرزهم بشكل دوري يعني من الفصل للفصل
ضرك راني حاملة هم الصبابط حاشاكم لازم نخصصلهم وقت كبير بحكم اني خدامة وقتي بزاف محدود مي لازم نتقعدلهم
كيما قالت رندة جني و غزالي نشوف فنجال ولا كاس مشقوق يدور قدامي نغمض عينيا و نرمي
راجلي يقولي تعرفي غير ترمي كاش نهار ترميني خخخخخخخخخخخخخخخخخخخخخخخخ
بالمناسبة زخرفة راهو يحييك على وسام التقشف ههههههههه البارح كنا نحكيو على موضوعك و عجبونا بزاف الافكار خصوصا نتاع سائل غسل الاواني و savon Marseille liquide
عندي وحد العام ملي شفت الطريقة في موقع مغربي مي ما جربتهاش و ضك كي شفت لبنات شكروها راح نطبقها ان شاء الله
كون تشوفي راجلي مات بالسعادة كي قتلو راح نوفر عليك 650 دج نتاع savon marseille قشوف من الطراز الرفيع خخخخخخخخخخخخخخ
بالمناسبة انا ام لجين و فيصل
zokhrofa
2018-01-08, 10:12
ههههههههههه رندة حكمني هذاك الحماس فالرحلة
ماشي رحت مديت كامل حوايجي بلا ما نفيق كي دخلت الشتاء حوست واش نلبس وااااااااااااالو ما لقيت
معليش ربي يعوضني ان شاء الله ههههههههه
zokhrofa
2018-01-08, 10:13
ام لجين اهلين ربي يحييكم و يكمللكم على خير
شوفي والله تبعيه تشوفي كيفاش طمي دراهمك
ام لجين و فيصل
2018-01-08, 10:32
كملت قريت الموضوع نتاع التقشف البارح في الليل
كاين امور راني مطبقتها من قبل
و كاين لي رايحة ناخذهم بعين الاعتبار
تامني بلي راني عندي وحد 15 يوم وانا ندور في الحوانت باش نشري بقراج نتاع حليب حبيت نرافقو لوحد الفناجل نتاع قهوة حليب بزاف شابين مي ما صبتش نفس الزواق
حتى للبارح شفت واحد عجبني مي يدير 700 دج جاني غالي واش رايك?????
هو شباب نتاع porcelaine و فيه تقريبا نفس الزواق
zokhrofa
2018-01-08, 10:43
اذا تستحفظي على صوالحك و ما تكسريش اشريه في الاخير راح يعيش سنين ان شاء الله اذا ربي كتب طبعا
حاجة لي تدوم معليش تشريها الحاجة لي تروح تم تم هي لي تقولي غالية
ام لجين و فيصل
2018-01-08, 10:48
ههههههههههههههههه
جيتي ليا يا زخرفة كيما تقول يما انا شداد بن عاد هههههههههه يعني نحافظ على صوالحي و ما نحبش نغسل المواعن بالزربة باش ما يتكسروش
لعشية ان شاء الله بعد الخدمة نروح نشريه
مشكورة جدا حنونة على توجيهاتك
zokhrofa
2018-01-08, 10:58
أهلا اهلا في كل وقت
فكرتيني في روحي يا زخرفة كي رميتي قشك.
انا مرة كنت نفرز لقيت 3 بلايغ كنت دايرتهم للوضوء تقلقت منهم مديت زوج وخليت وحدة برك ليا قلت ماعندي ما ندير بيهم..... انا مديتهم اليوم غدوى جاوني ضياف... عطيتهم تاعي باش يتوضاو وانا قعدت بلاش ندمت الي تسرعت قلت على الاقل لو كان خليت 2..... على هذا قلتلك ركزي وما نتسرعيش في رمي الاشياء.
كنت حابة نقول ل اثنو ام لجين اشري البقراج تاع الحليب كي عاد يتشابه للفناجل... ماتضيعيش الوقت وتخممي.
السلام عليكم
افكار جيدة شكرا على طرح الموضوع هكا كل مرة نتفكرو حاجة و نتحمسو
انا عندي قجور نتاع لاكوفاز راني نتهدد باه نفرزهم كنت ناويا نفرزهم في العطلة مي مالحقتش تخيلي حتى قرع البارفا الفارغين مخبيتهم هههههه
هاذ المرا راميتهم راميتهم مافيهاش
عن تجربة ننصحكم حوايج الشتا افرزوهم في شتا و حوايج الصيف افرزوهم في الصيف لانو مرة فرزت حوايج الشتا في الصيف مديت كلش وكي لحق الشتا مالقيت واش نلبس ههههه
ام لجين و فيصل
2018-01-09, 10:55
صباحكم برباحكم يا العدرات نتاع الخردة ههههههههههههههه
رندة راني شريت البقراج و بتخفيض 100 دج
شفتي ختك شحال قشوفة و مسمارة خخخخخخخخخخخخخخخ
ام لجين و فيصل
2018-01-09, 10:59
rejine عندك الحق على وقت الفريز كل حاجة في الفصل نتاعها
انا هادي المرة نقصت حتى حوايج الصيف لي راني متاكدة بلي ما نزيدش نلبسهم
zokhrofa
2018-01-09, 11:54
سلالالالالالالالالالالالام
واش راكم اليوم
رندة ههههههههه ضحكتيني و الله انا تان موالفة تصرالي كي نمد الحاجة نحتاجها لكن معليش ما تندميش على الاقل هذا درس لينا هههه
اختي رجين هاذي فكرة شابة بزاف تاع الفرز ما كنتش نعرفها منا للجاي نلي نخبيهم و في الفصل ديالهم نفرزهم احسن
اختي ام لجين مبروك عليك البقراج صوريهولنا ههههههههههههه نفرحو معاك امزح
zokhrofa
2018-01-09, 11:56
فكرة اليوم
تخلصو من الكراطن و الساشيات لي قاعدين فارغين و مخليينهم تقولو نديرو فيهم الكادوات هههههههههه
واش رايكم ؟
نتوما تخبوهم ولا تتخلصو منهم في الحين لي تفتحو الحاجة ؟
ام لجين و فيصل
2018-01-09, 11:59
ما كاش مشكل اختي زخرفة نصورو و نحطهولك مع الفناجل
مي الفناجل شابين عليه
zokhrofa
2018-01-09, 12:01
ههههههههههه حسنا انا انتظر
كاش ما فرزتي ولا مزال ؟
ام لجين و فيصل
2018-01-09, 12:13
هههههههههههه صبرا ال ياسر
ما زدتش فرزت من نهار الجمعة
الويكاند هذا ان شاء الله نزيد نفرغ شوية من مغارة علي بابا ههههههههههههه قصدي الصبابط حاشاك و نحاول نفرز الكوزينة راهي تخلع سيرتو تحت البوطاجي بحكم انو ما عنديش بلاكارات انا نخمل و وليدي بسلامتو يخرب
ام لجين و فيصل
2018-01-09, 12:17
الساشيات نخليهم pour la poubelle مي نهار يكثروا عليا نلمهم في صاشي كبير و نتخلص منهم
الكراتن نخلي سيرتو نتاع لي كوش كي نكون معولة نفرز باش نخمل فيهم سواءا الصوالح لي نمدهم ولا لي نحتفظ بيهم الى اشعار لاحق
مبروك اثنو ام لجين لعقوبة للسينية والسكرية ان شاء الله
شكرا رجين عل فكرة فرز الملابس في مواسمها هي فكرة فكرة عملية للغاية
لأنو كنا بمجرد ما ينتهي الفصل نفرزو ملابسنا
وملابس الاولاد قبل ما نخبوهم للعام الجاي اذا كنا من الاحياء.
بالنسبة للكراطن ماعنديش وما نحتفظش بيهم فارغين نهائيا. اما الساشيات غير هوما لخاتش نحتاجوهم باستمرار.
ام لجين و فيصل
2018-01-09, 12:33
يبارك فيك رندة و العاقبة ليك ان شاء الله
zokhrofa
2018-01-09, 12:41
هيا مليح مادام ما تحتافضوش بيهم في مكان يبان و يرجع المكان بشع و ماشي شباب معليش
كيما انا نحتفظ بالساشيات كيما قلتو للمهملات حاشاكم في قجر تاع الكويزينيار يعني ما يبانوش
و اما الكراطن راهم عندي زوج طميت فيهم البارح كامل المهملات و من بعد نقول لزوجي يخرجهم ان شاء الله
على العموم عندهم يومين فقط ملي راهم عندي لكن ضايقولي خاطري هههههههههه
zokhrofa
2018-01-09, 12:41
زيدو كاش افكار ؟
ام لجين و فيصل
2018-01-09, 20:36
زخرفة هاو ليك البقراج و جماعتو هههههههههههههههههه
https://a.top4top.net/p_739m2zjq1.jpg
https://b.top4top.net/p_739syudg2.jpg
https://d.top4top.net/p_739n3xep3.jpg
https://e.top4top.net/p_739s00q34.jpg
https://e.top4top.net/p_739s00q34.jpg (https://up.top4top.net/)
ام سراج وملاك
2018-01-10, 08:56
السلام عليكم ورحمة الله تعالى وبركاته
اسفة لدخولي المتقطع وذلك بسسبب المرض
اليوم فقط تسنت لي الفرصة لمراجعة مضمون المسابقة جيدا وقراءة ردود المشتركات
اختي زخرفة رجاءا منك توضيح فكرة المسابقة جيدا فأنا اجدها عبارة عن دردشة فقط
يجب ان تكون مثل جميع المسابقات السابقة في القسم يجب ان يكون هناك شروط للمسابقة مثلا جمع المشتركات وضع صور للمراحل الانجاز قبل وبعد ........الخ
لللاطلاع اكثر زوري المسابقات السابقة لاخذ فكرة على سير المسابقة وانا بدوري ان اردت اي مساعدة لاتترددي بذلك واكيد سوف تكون هدايا وونقاط لرفع الرصيد ....
و مسابقتك سوف تكون في واجهة الاعلانات ان شاء الله
في انتظار تعديلاتك اختي زخرفة في اقرب وقت
بالتوفيق للجميع
zokhrofa
2018-01-10, 09:38
سلامممممممممممممممممم و صباح الخييييير
ام لجين درتي لافار والله يتشبهلهم الف مرة صح كاين بعض التفاصيل لكن المهم الوردة الكبيرة نفس اللون مطاااااااااااااااااابق
بصحتك اختي و المرة الجاية كي تكوني متأكدة كيما هكذا اشري ما تراطيش خاطش تندمي
ام لجين و فيصل
2018-01-10, 10:33
صباح الخيرات و المسرات على الاحباب
ربي يفرحك دنيا و اخرة يا زخرفة و الله غير فرحتيني بكلامك لي يطلع المورال
لعشية ان شاء الله بالاك نزيد نلحقلو طاقم شفتو في نفس المحل فيه سكرية + porte serviettes+ porte cuillères
يدير 1700 دج و بقى في قلبي..............................
zokhrofa
2018-01-10, 11:04
صباح النور لكن اذا تستحقيهم اذا عندك لي يتوالمو معاهم ما تشريهمش
ام لجين و فيصل
2018-01-10, 12:18
justement ما عنديش حاجة باهية
خاطرش راني بعيدة على اهلي ب 270 كلم يعني مرة في الغرة باش يجوني والديا
و اهل زوجي يعني خواتاتو و نسا خاوتو يجوني غير في زيادات ولادي
كانو عندي 2 اطقم تاع قهوة صبتهم عند راجلي يعني كادوات نتاع العرس مي لونهم غامق و مغموم دونك ما عجبونيش
و زيد هو بسلامتو كل مرة يكسرلي حاجة دونك حبيت ندير حاجة بالطبع و على ذوقي
حكيتلك قصة حياتي خخخخخخخخخخخخخخخخخ
zokhrofa
2018-01-10, 12:43
ههههههههههههههه معليش مالا مادام ما عندكش المهم ما ديريش الزيجة و تخبيهم
استعملي صوالحك
zokhrofa
2018-01-10, 12:44
فكرة اليوم
هل نتوما من النوع لي يشري بزاف حاجات و يخبيهم تحت سبب كي يجو ضياف نلقاهم ؟
انا في الحقيقة نكره هذي الحاجة بزاف
ما نحبش واحد يشري طقم ماعن و يخبيه غير للضياف
انا نجبد و نستعملهم و كي يجو الضياف نحطلهم في نفس الطقم
نتوما كيفاش ؟
ام لجين و فيصل
2018-01-10, 12:55
سيداتي انا نجاوبك ههههههههههههههههههه
انا بحكم ما يجونيش بزاف ضياف المواعن كانو قيس قيس و لكن مؤخرا بديت نشري بالشوية مي حنا الاولين لي ناكلو فيهم خخخخخخخخخخخ
و ساعات راجلي يقولي وعلاش راكي غير تشري في المواعن وين راهم الناس لي راهم يجوك
نقولو نحب داري ما يخص فيها والو ماشي كي يجيني واحد على غفلة نبقى نحمر و نصفر في وجهي قدامو
صراتلي العام لي فات كي زاد وليدي في نوفمبر جاتني يما قعدت عندي سمانة و كي جا خويا باش يديها جات معاه مرتو و بنتو و اختي و وليدها و انا الغطاوات لي عندي ما يكفوش امالا جابلي راجلي من عند ختو كوفيرتات مي كي شميت فيهم ريحة عدم النظافة ما حبيتهمش يتغطاو بيهم
اعطيتهم شي لي عندي و زدت في درجة الحرارة نتاع الشوفاج لي في الصالون و رقدو في رحمة ربي ما بردو ما والو
من هاديك عولت نعمر داري خاطرش ولادي راهم غير يكبرو
zokhrofa
2018-01-10, 16:43
هههههه انا الحمد لله ما عندي لي يجي يبات عندي ما نحصل الفراش قيس قيس لكن كيما قلتي الذراري راهم يكبرو و راح يولو يبدلو الفراش كل مرة على مرة على الأقل الواحد يكون عندو الفراش
لكن انا الفراش نفرشو ليا و نخلي واحد فقط لماما ههههه و الباقي يرقد بواش كاين
ام لجين و فيصل
2018-01-11, 09:43
هناك ربي كيما قالو ناس بكري
تهنى الفرطاس من حك الراس هههههههههههههههههه
zokhrofa
2018-01-11, 11:03
صباح الخيرات كيف حالكن ؟
ام لجين و فيصل
2018-01-11, 11:27
صباحك بربحك زخرفة
راني غير انا و نتي ندورو هنا
على حساب الشوفة الناس كامل ما عندهمش الخردة ههههههههههههههههه
zokhrofa
2018-01-11, 15:06
لالا فهمتني ام سراج انو راهي عبارة عن دردشة ضرك نعدلو الموضوع و نرجعوه مسابقة على حساب قوانين المنتدى احسن
zokhrofa
2018-01-14, 18:22
سلام واش راكم يا لبنات ؟
بناتي نور العين
2018-01-15, 11:10
سلاااااااااااااااام
موضوع رائع زخرفة كيما العادة دائما متميزة
مشجع جدااا على فعل الخير
و بصراحة طبعا كامل تعرفو انا معنديش دار باش ندير الخردة هههه عندي شمبرا وحدة
شوية كرفيتات نتغطى بيهم و شوية لحوفا
اما الملابس لي منلبسهاش نصدقها
و حتى ملابس ابنتي لي صغارو عليها كامل قالولي يا جايحة خليها تزيدي تولدي
ولكن الحمد لله منحبش ندس و ربي هو الرزاق
كاين بيبيات راهم بردانين و مصايبين وش يلبسو و انا نهار لي نولد ربي يرزقني
ان شاء الله
zokhrofa
2018-01-15, 17:51
ايه صح و الله كيما يقولو لهذاك الوقت يرحمها ربي
zokhrofa
2018-02-17, 19:33
اهلا اهلا اختي نائلة مرحبا بك هنا
ام رقية74
2018-02-22, 23:27
التخلص من الاشيلء الغير مستعملة اول الخطوات في التنظيم و الفرز شكرا لك على الموضوع
zokhrofa
2018-02-23, 00:57
اهلا اختي شكرا علغŒ مرورك
*أم سجى*
2018-02-24, 01:04
شكرا زخرفة موضوعك هايل
zokhrofa
2018-02-24, 15:00
شكرا على مروركم العطر
ninaricci
2018-04-03, 09:36
ياختي زخرفة نشالله تساعديني انا مشكلتي ما تقنعنيش الحاجة اللي شوية نشري غير الغالي في اي حاجة نتاع الملابس وكيما نكره منها ما نقدرش نمدها تبانلي مليحة وحقيقة تبقي مليحة ياك تعرفي بللي الحاجة لمليحة عمرها ما تديمودا يسمى ما نلبسهاش علي خاطر يقولو الناس لاصقة غير فيها وما نمدهاش خاطر غالية ومليحة واسمو هاذ اشىء بخل????? واذا مديت حاجة ولبسها هاذاك الشخص طبعا وهي مليحة نقول واش بيا عطيتهالوا راهي مليحة بزاف ونندم عليها اصلا ساعات تبانلي روحي راني بخيلة نولي نزرب نجبد حاجة من حوايجي ونقول ما نلبسهاش ونزرب نمدها ومن باعد نندم عليها مع العلم حوايجي كامل جدد و انا من النوع اللي يستحفظ
zokhrofa
2018-04-03, 22:38
هذا اسمو الشيطان و العياذ بالله يخليك تندمي على الصدقة
الناس تندم كي ما تمدش الحاجة نهار تموت في قبرها تولي تقول كان غير صدقت و زكيت
صدقي مادام مزالك حيا قبل ما يفوت الاوان
روعة الصحراء
2018-04-03, 23:03
هههههههههههههه مشكلة كبيرة حتى انا عندي برميل في البالكون مضيق عليا لازم نقنع زوجي نحيه من تمتيك
انا راح ندير نهار ما يكونش هنا و نفرغو من الماء و نعطيه لشيخي يديه
انتي من رايي كل مرة خرجي منها شوية بلا ما يفيقو حتى تكملي كلش الكراريس و الخردة
من بعد نهار ما يكونوش قولي لخوك يجيب تاع القش القديم يديها او اقنعيهم تصبغيها و ترجعيها شابة
تقدري تصوريهالي ؟ باش نعطيك افكار اكثر
اختي زخرفة شكرا على الموضوع تعرفي انا في الدار قريب كل شهر نفرز الحاجة ليسحقوها الناس نعطيهم مثل البلاستيك والقارو رات كاين واحد يديهم للمصنع والملابس القديمة نعطيوها للجمعيات لان اممي رباتنا على الصدقة والحمد لله والالات الكهرومنزلية القديمةبنعطيوها لاصحاب المحلات ليصلحو وثاني الكادرات الي تكسرت وادوات الزينة المكسرة والعلب نعطيهم لاصحاب الحرف اليدوية المهم انا منحبش التخزين نحب المكان يكون واسع ونظيف وساعات نختلف مع امي ربي يحفظها لكن نقنعها بشوية هههههههههه المهم اختي انوي بيها الصدقة على فكرة الماءاللي في البرميل حاولي اختي ماترميش ديري بيه حاجة لاني سمعت مرة في الحلقة ان النعمة الماءلاترمي وشكرا
ninaricci
2018-04-04, 09:54
شكرا لكي اختي زخرفة والله راني نجاهد في نفسي جهاد اختي انا نحكي بصراحة تامة
zokhrofa
2018-04-04, 10:58
اختي روعة الصحراء لا ما راحش نرميه صحيتي طبعا نخدم بيه حتى يفرغ
اختي نينا جهاد النفس تدي عليه حسنات ثابري
yasshalamadrid
2018-11-12, 17:30
شكرا لك على الموضوع الرائع و بارك الله فيك
zokhrofa
2018-11-12, 20:28
اهلا في كل وقت
زهرة ملوح
2021-07-03, 14:01
بالتوووووفيق
zokhrofa
2021-10-04, 10:27
انوي ان تكن استفدتن من هذا الموضوع
اسألوا الله التوفيق لكم و لي â¤ï¸ڈ
vBulletin® v3.8.10 Release Candidate 2, Copyright ©2000-2025, TranZ by Almuhajir