حياتي راحت

[مشكلتي]

سلام عليكم
جيتكم يا ناس المنتدى و علابالي تعاونوني بحل لي يريحني كل واحد ولا وحدة تحط روحها في مكاني
انا فتاة عمري 22سنة تزوجت عندي عام براجل عرفتو من قبل و جا خطبني انسان مصلي يعرف يهدر كلامو موزون عمرو 33سنة
عندي طفل عمرو 5 اشهر
مشكلتي بدات من ثاني يوم زواج اهلو يجيبولي في واش هدرو ناس كل يوم فيلم
كل يوم امو تقولي انا لي نحكم و انا ماكنتش فاهمة حتان هاذ الاشهر الاخيرة امو تحب تحكم فيا و اخوه تزوج عايش معانا دار 2 شنابر و صالو عايشين انا و هو و خوه و زوجتو و خالتو و امو و 2 بنات اختو
مرت خوه تخدم انا قاعدة في دار حبسني من لخدمة هنا حبو يرجعوني بونيشة تاعهم شغل انا لي قاعدة في الدار انا لي نخدم بزاف
اخر مرة شافتني امو ندير بالانترنت قاتلي عندك حبيبك قتلو شوف امك وش راهي تهدر ماقال والو قالي كي شافتك نضتي صباح ديراكت للانترنت
قاتلي امو ماكيش متربية و خامجة هذا كل كي ماسيقتلهاش برك و ماقال والو
انساااان بدون شخصية امو تحكم في كلش نقولو جيب فرماج ولا اي حاجة يقولي قولي لامي
كي صارحتو قالي ماعجبكش الحال روحي لداركم
مع العلم علاقتنا الزوجية ماعندها حتى معنى يخرج صباح يخدم يرجع في الليل على 12 كل يوم يرقد و كل يوم نفس سيناريو
يخدم مع خوه خوه يدخل للدار على 4 تاع لعشية و هو يقعد ل 12 تاع ليل سقسيتو قالي خويا يخدم خدمة صغيرة انا نم لخدمة لكبيرة يتمسخر بيا
يا ناس راني رايحة نهبل
عايشة مع راجل اسم برك
وش ندير؟؟؟
خممت نطلق و نروح نخدم ها جاني الولد في النص
نقعد مانقدرش مرضت وليت مهبولة
وش ندير؟؟
راجل ماعينوش فيا ماعندو حاجة فيا ساعة يحبي ساعة يكرهني بدون سبب يقولي كي نجي للدار نحس روحي مخنوق انا نتبدلو يقولي راني نشوف فيك سوداء
امو مدايرتني في راسها قاتلي نزوجو قاتلي نديرلك في المشاكل باه تروحي وحدك سجلتلها هدرتها و سمعها و هكذاك و كونطري

[سحابة مسافرة]

ربي يكون معاك و يخفف معاناتك
حاولي تقنعيه تعيشو وحدكم بلاك تتصلح الامور

[abd el nour 2017]

اي احد حاب يتزوج لازملو بيت مستقل

[- بصمة خير -]

امه حابة ديرلك للمشاكل و انتي الجايحة تمشي في الخط
راهي انتي اللي راكي دير في المشاكل لروحك
كما يجي راجلك لازم ديريلو الجو للراحة و الفرفشة و الفرح
ماشي للنكد اكيد يهرب منك هكذا يجي على ظ،ظ¢ تاع الليل هارب من همك و الشكاوي تاعك
كوني فاطنة فحلة ذكية
ريحي راجلك ترتاكي و تكسبيه و يدير واش تحبي باش يرضيك حتى يبقى هو مرتاح
كما يشوفك راكي تخمي فيه و في راحتو و راكي تحسبي حسابو اكيد هو يحسب حساك و حساب راحتك باش يبقى هو مرتاح
ما تشكيلوش كوني فاطنة
و كيفاه تنوضي الصباح طول للانترنت ماراكيش في دار باباك و ماركيش عايشة وحدك ديري واش تحبي
راكي عايشة مع الناس و الناس ما ترحمش
و اتعلمي اسكتي ما ترجعيش الهدرة
باش يخافو منك و يشوفوك صعيبة بزاف
انفضي الغبار على روحك و افطني و بدلي العقلية
هذه امه امه امه عنده وحدة برك في الدنيا هذه ما يقبل عليها والو
انتي عندك ابنك تقبلي ابنك يحقرك على جال زوجته كوني منطقية
راكي انتي يطيح من بالك لو زوجك يحقر يماه انتي تحسي رجولته نقصت
الزوجة يقدر يجيب للبنات غير هما
كبري بيماه يفرح بيك
حتى لو قدامو برك
باش اذا شكات بيك ليه ما يصدقهاش يقوللها راني نشوف في العكس
الخدمة ديري الدالة في الدار مع البنات
قوليلهم رانا كامل عايشين في دار وحدة مع بعض نديرو الدالة و اخدمي خدمتك
و العجوز كوني فحلة مل تخليهاش تحكم عليك حاجة وحدة
كوني حقانية معاها اعطيلها حقها ما تظلميش و اذا ظلماتك اسكتي راه كاين ربي يشوف و علابالو
كوني فاطنة
اكتبي ميساج شباب لزوجك فرحيه من عندك او حوسي عليه من الانترنت
ساعة على ساعة عيطيلو سقسي عليه و فرحيه بدعاوي شابين و كلام حلو
يجي للدار بدلي للتعامل معاه
خليه يلعب مع ابنه ريحيه سقسيه واش يريحو ديريهولو
و لازملك الصبر و الدعاء
هذه زوجك ما تسمحيش فيه دافعي عليه
و اذا كان نصيبو يتزوج امراة ثانية هذا نصيب و قدر مش يعني تطلقي لانه يبقى راه بالحلال و بشرع ربي
عندك الانترنت حوسي اقراي اتعلمي اتثقفي افطني
و اغلبي العجوز بالفطانة و الذكاء و ربي معاك راكي تدافعي على زوجك و بيتك
هذا هو الزواج كوني قوية. قد روحك و لبناس تتعلم من تجاربها و اخطاءها


اذا محتاجة نصاءح و اي شيء ممكن تبعثيلي على الخاص

[ridha34]

ربي يكون في العون.

[kacimo.samy]

سلام عليكم
يا اخت ربي معاك جربي كيفاه تسكني وحدك..... ديري حل واسكنو وحدكم
وبتوفيق ليك وربي يفتح عليك

[خالد عنابي]

نجيبلك ملخر خلاص


مشكلتك ماعندها حتى دواء


لان لب المشكلة في الصميم



وهو ان راجلك عديم الشخصية ومجرد امتداد لامو لي تحكم فيه


وامو تشوف فيك عدوة ولن يتغير شيئ


اذن ملخر ارفعي ضدو عدوى خلع وفي جلسة الصلح اشترطي دارك وحدك ولو حتى الكراء


شيئ اخر امحي التسجيل الصوتي يعاقب عليه القانون

[ksaido]

انصكي اختي ان تطرحي المشكل لوالدك او اخوك الاكبر اوحتى احد اقاربك المثوق فيه يتكلم معاه او يىتي بشيخ يتحدث معاه لان كثير من الناس يضن ان طاعة الوالدين في كل شيى ربما اذا وجد من يقنعه سيتغير وتحل المشكل انشاء الله واكثري من الدعاء والاستغفار و الصلااه حتى يفرج الله كربك

[زبدة ذايبة]

ماخلات مانزيدو الأخت بصمة خير

الكلام اللي قالتهولك نفذيه بالحرف الواحد.

راجلك كسرتيلو راسو بالهم

تظلي تشكي

تاع الصح مايرجعش للدار حتى ترقدي !!!!!!!!!!!!!

انت عندك المشكل مع زوجك

وهذي أول مشكلة لازم تعالجيها

وثانيا

أم الزوج مستحيل تحرشي عليها وليدها !!!!!!!!!!!!

وش رايح يديرلها كي تقوليلو يماك قالت ولا فعلت

يضربها

يديها لدار العجزة

أو يقاطعها

أي حل مع الأم مايقدرش يديرو

صافي غير ريحي روحك وبركايك من التصرفات الطفولية

الراجل تزوجك وجابك لدار فيها الضيق وحارب وش حارب من ظروف

باش في الأخير تجي انت تكرهيلو حياتو ويولي مايرجعش للدار

كوني فايقة وشوفي لعروسة الثانية وش دير

واعرفي كيفاش تتصرفي مع عجوزتك

إذا تسحق تعاونيها في شغل الدار ماكالاه تقعدي على الأنترنت وهي محنة بالبالي والنشاف !!!!!!!!!!!!!!!!!!!!

الحياة الزوجية ماراهيش غرفة النوم فقط

الحرث والكد اللي فيها لاايعلمه إلا الله

ديري الدالة مع هذ لعروسة الخدامة

اخدمي انت الصباح وهي في الليل

وروحي بالشوية

وتدريجيا

حتى توصلي

الطلاق ماشي حل

واعرفي كيفاش تتواصلي مع زوجك

بدل وين مايدخل للدار مهلوك من خدمة النهار

تفتحيلو سجل الشكاوي اليومي

تاع الصح يكره منك ومن مواضيعك

يلقى غير الهم قدامو

عاودي راجعي روحك

واقراي مليح النصائح اللي كتبتهملك الأخت بصمة خير

ان شاء الله نافعين لك

بالتوفيق

[Elwawy]

إعملي ماقلته لكي زبدة ذايبة, طبقي بالحرف ما تأمر به عجوزتك, في ظرف أسبوع ستنتهي الطلبات الجانبية ويبقى إلا الأساسيات فقط, أطلب منها الإذن في كل شيء حتى عندما تريدين استعمال الأنترنيت, شوية وقت ستنفش كي النبولة...

[النجمة القطبية]

زوجك وراكي عرفتي شخصيتوا
وعجوزتك وراكي عرفتيها
درك واش الحل من وجهة نظرك الطلاق بعد عام زواج !!
ام الهروب !!
يا اختي الحياة تحتاج الى قوة وصبر ومرونة في التعامل
كل ما تحتاجيه تخرجي من مشاكلك خطوة خطوة بشوية دكاء وحسن التعامل
تقدري في الاخير بقوة شخصيتك تربحي دارك وزوجك وتغيري في زوجك وحياتك وتتقدمي الى الامام
وتقدري بالمقابل في لحظة ضعف تخسري كل شئ !!!
ضعي مجموعة من الاهداف
اولها انك تسترجعي زوجك ثم تغيري فيه للاحسن تدريجيا ولكن ليس قبل ان تتخلصي من النكد
انك تكسبي قلب عجوزتك او تكسبيها لصفك احسن من ان تجعليها ندا لك
عيشي بسلام في بيتك مع زوجك وابنك تربحي صحتك وراحة البال
ممبعد فكري في العمل والاستقلالية وصدقيني ادا ارتاح بالك ممكن وحدك تتراجعي عن فكرة العمل والبيت المستقل
المهم واش حبيت نوصلك كل شئ يجي بالصبر والمثابرة
موفقة

[أثيلة]

انا من الاخير يااختي نقولك روحي ترقي روحك كيف هاذي يشوفك سوداء ؟؟ بالاك ماهوش في حوالو ولا ماش مادارولو
ولي يقول اني نخلط نقول انو رانا في زمان كثر فيه اناس يعرفو كلش شيء عن الدين و العكس فيه تاني بزاف مايخافوش ربي

[خالد عنابي]

سبحان الله



يتم لوم الضحية وتبرئة الجلاد



نقرا بعض التعليقات نبقى حاير


زوجة ابنها الثانية تروح تخدم وهاربة من اشغال الدار


والعجوزة شاطرة غير مع لي حبسها راجلها مالخدمة وتفحال غير فيها


وزوج عديم الشخصية يرجع لامه في كل شيئ مهما كان صغيرا


علاه تلومو فالمرا وتقولولها راكي تديري فالمشاكل


يعني باه تكون ناس ملاح يلزم تكون تحت رجلين عجوزتها ؟


هي ملخر التواضع والطيبة فوق اللزوم وين توصل العبد


وزيد الناس يوقفو مع القوي حتى لو ظالم لانو جا على قد يدهم


وعلاه ما تنصحوش بالاستقلال بالبيت الزوجية هذا الحل عميتو عليه ؟

[النجمة القطبية]

يا اخي الكريم زوجها واضح انه شخصيتوا ضعيفة وزيد كارهها
والجوزة كارهتها وادا استمرت تقابحها ستخرب بيتها
وبالمقابل عندها طفل وعام واحد زواج
والبنت لم تقصر ايضا تنوض الصباح مباشرة للانترنت وتقول لعجوزتها منسيقش !
في حالة صاحبة الموضوع لم يبقى الا الطلاق كحل
وحتى لو تطلقت وتزوجت مرة اخرى فاحتمالات الوقوع في نفس المشكل كبيييرة
لان شحال من امراة في مجتمعنا عجوزتها لا تتدخل في حياتها حتى لو كانت ببيت مستقل
وشحال من امراة زوجها دايما يجي مع مرتوا حتى لو مظلومة
اعطونا النسب يا نساء !
اكاد اجزم ان النسب قليلة
احنا لا نشجع المراة على الطلاق
كل شئ يتصلح مع الوقت
ولا يوجد زوج كامل ابدااا !
ثم بالنكد فحتى لو استقرت وحدها وتتصرف نفس التصرفات وتنكد على الزوج سترجع تشتكي وتطلب الطلاق
للاسف ثبت ان الرجال لا يتحملون النكد حتى لو كانت الزوجة على حق !
الرجال لديهم لغة مختلفة عن النساء وليستمع الرجل لراي المراة يحتاج ان يتقبلها اولا حتى يقبل الحوار
امالا تحتاج المراة للحنكة في التعامل مع الامر
اليس الامر يستحق !
ام انها لا تحمل درة حب لهدا الزوج ولا يستحق حتى المحاولة !
الم يكن يوما حبيبها
تحتاج فقط ان تسترجع حبه كاول شئ
ان تكسب قلبه
عندها تستطيع تغييره درجة درجة
وليس عيب ان تسعى للسلام مع عجوزتها فتربح بيتها وراحتها وصحتها
ومن يدري قد ترجع لعملها وتستقل ايضا فتستقيم حياتها
الحياة كلها تحتاج لصبر ومثابرة مكانش اللي يديها طايبة
وطبعا لم نطلب منها تستسلم وتصبح بونيشة
لا تعمل المستطاع فقط وتفرض شخصيتها لكن بحنكة
تواجه وتاخد مكانها الدي تستحقه
اما لو كانت تريد الطلاق لا اعتقد انها ستكتب الموضوع
فهو اسهل شئ ! لا يوجد اسهل من الاستسلام
و حتى في اسعد البيوت توجد مشاكل والانسان يحتاج لعمل وصبر على اية حال
ارجوا اني وضحت اننا لسنا ضد السيدة ولسنا جلادين
لكن واقعها صعب للاسف والحلول صعبة في البداية
نصيب ونخطئ ونتمنى للاخت التوفيق لايجاد افضل الحلول
وسنبقى في الخدمة

[خالد عنابي]

هي ملخر ملخر الحلول المثالية والوردية لا تصلح للتطبيق العملي


ما يصلح هو ان يكون رجلا ويقصف امه علنا ويخبرها انها على خطأ ويستقل ببيته


هنا راح تولي تلحلح وخايفة لا تخسر وليدها نهائيا


وحينها يختفي شرها على الاقل


اما ان تبقى الامور على ماهي عليه فالام وجدت متنفسها في الزوجة الاضعف وهذا كل ما في الموضوع


يعني حتى لو تطيعها وتنفذ كل اوامرها ورغباتها لن يتغير الكثير راح تبقى تشوف بلي راي تخدع فيها وتنوم فيها


وبالتالي كل يوم قالب جديد وتهم جديدة


اما الاخرى العاملة اكيد تعمللها الف حساب لانها عاملة وبتقى ساعات طويلة خارج المنزل يعني متحكمة في حياتها ولديها راتب



يعني هي وابنها الاخر ينجمو يخرجو عليها ويكريو يسمى عاملة حسابها مليح وما تغلطش معاها


اكبر غلطة دارتها هي الموافقة على التوقف على العمل والعيش مع حماتها


كان لازم تشرط اما تبقى تعمل واما الخروج ببيتها

[samir-physique]

السلام عليكم
الحق يا اختي راكي في حرب وانت دخلتي هاد الحرب
بدون اسلحة و بدون استراتيجية لانك في الاول احببتي
زوجك و كيما يقولو الحب اعمى و كنت تتخيلي انو الوضع
راح يكون نوعا ما كالحياة الوردية. الان مادام مازلتي حية
فيمكن استدراك الامور وهذا يعتمد على قوة الارادة لديك.
اذن نقدرو نقولو باللي عرفتي العقلية تاع العايلة اللي عايشة
معاها و حسب ما فهمت فان حماتك هي قائدة المعارك
و هنا لازم تعرفي باللي حماتك ياإما تكون شخصيتها صح
قوية وهنا التعامل معاها لازم ليه تخطيط كبير. ياآما تكون
شخصيتها ضعيفة وراهي تدعي فقط القوة وهنا تقدري تواجهيها
بسهولة. حسب ما فهمت زوجك انسان واقف على الحياد هو
ما يقدرش يقلك واجهي يمابصح نظن راه عطاك الضوء الاخضر
باه تواجهي يماه و ترديلها الصرف كيما نقولو و لكن ما تكثريش في البداية حتى تشوفي ردة فعل زوجك.الشيء الثاني و هاد يعتمد على قوة التحمل عندك. لازم يشوفو في وجهك نشوة الانتصار و الثقة و عدم الاستلام
لازم تنقصي الضغط عليك باه مايصرالكش انهيار عصبي
وحطي في بالك بلي عجوزتك راهي مريضة بالغيرة منك. اذن
انت احسن منها. اذن لما تكوني مع زوجك حاولي تنسايها
واحكي مع زوجك في امور اخرى وحاولي تكوني زهوانية لانو
بعض الرجال و للاسف كالاطفال الصغار لازم تكلحيه و تحاولي
كيفاه تزهيه باه تملكي قلبه. المهم يا اختي واش نقلك كاين
رجال يجيبو بنات الناس وممبعد يقلها يما هي كلش. اذن وعلاه
تتزوج. و ربي يعينك في هاته الحرب.

[زبدة ذايبة]

دار الناس ماشي ساهلة.

وماكانش حتى وحدة فينا لقات عجوزتها وزوجها يموتو عليها من النهار الأول.

مشاكل الحياة الزوجية بالطريقة اللي كتبت بيها صاحبة المشكلة

مثل الصراط.

كاين اللي تسلك وتكمل حياتها

وكاين اللي طيح من الصراط وتتطلق.

لهذا

رانا ننصحوك أن المشاكل اللي كتبتيها ماراهيش مشاكل.

ماعندك حتى مشكلة

سوى أنك ماتعرفيش تسيري بيتك

وماتعرفيش كيفاش تمشي.

وتتطلقي على توافه

يكون هذا من عين الغباء.

هذا راجلك راه هارب منك

لو كان جا مايصلحش لو كان راه يرجع للدار ويسبك ويضربك وتزيد يماه تضربك.

لكن انت عبارة عن مناوشات خفيفة

وجزنا عليها كامل.

لو كان جا المجال مفتوح لو كان كتبت كتاب كامل على وش حصل معي في بداية زواجي.

لهذا فوتي هذا كله.

كل النساء الجزائيات عصرتهم الحياة الزوجية بمشاكلها.

وراكي صغيرة ماتضيعيش حياتك.

تكسبي زوجك وأبو ولدك خير من يكرهك ويهرب منك.

ردي بالك تخربيها وتقعدي على تلتها.

غدوة يتزوج يجيب ثانية ويطلقك

ورايحة يصرالها نفس وش جوزتي انت.

هي تصبر وتكمل وتبقى أمام الناس سيدة وزوجة

وانت المطلقة.

رب عطالك فرصة للحياة بجنب رجل في الحلال ماتضيعيهاش.

[أم رمزي]

السلام عليكم ورحمة الله تعالى وبركاته
هذا الشيء صعيب عليك بزاف مادام يسمع لأمه ماراهوش في سفك رآه ابن امه ماعندك حتى حل اصبر ي لله وادعي الي ربي ممكن يولي الي الطريق

[محارب الحمق]

عرفته قبل الزواج؟ أرجو ان لا يكون الأمر كما أعتقد. على الأزواج ان يتقوا الله في زوجاتهم فهن لسن جواري ولهن حقوقا, صحيح ان على المرأة طاعة الرجل, ولكن على الرجل أن يقوم بواجباته وأن لا يظلم زوجته. ربي يصلح الأحوال

[زهرة جوري]

حاولي تقنعيه تعيشو وحدكم ربي يصلح بينكم