اللقاء الاول

[مشكلتي]

دلني احد اصدقائي على فتاة قصد الزواج و تعرفت عليها عن طريق وسيلة التواصل الاجتماعي و تكلمت معها 4 مرات في الهاتف دون ان اراها لانها بعيدة نوعا ما ارتحت لها و ارتاحت لي اكثر دون ان احدد رأي في المظهر . و قلت لها انني بهذه العلاقة اريد الزواج اي يجب ان اراها لكي استرستل في الخطوات الاخرى استخرت و اثناء اللقاء لم اكن مرتاح الى حد كبير هناك اشياء لم اردها مثل الهندام تلبس سروال و فوقه ليكات و ايضا الشكل مقبول نوعا ما و هذا ما لاحظته هي من خلال تعابير الوجه رغم انه كان لي مشكل ما زاد من لا مبالاتي . هي لها اشياء يجب ان تضحي بها من اجل علاقتنا مثل العمل لانها لم تكمل التكوين و يجب ان تغير مكان تكوينها . لكن بعد اللقاء اصيبت بالخيبة كيف تضحي من اجل شخص لم يعتبرها فتاة احلامه و لم يعبر لها عن قبوله. و لاني انا من النوع العقلاني لم اتخذ اي قرار و راني بين و بين و قلت لها هذه هي طبيعتي اخفي مشاعري و اعطي الوقت بعض الوقت قبل اتخاذ القرار. لكن هي قالت على الاقل يكون هناك قبول مبداي و هذا ما لم تلاحظه من جانبي ... وانا لم اصرح باس شئ قررت ان اتوقف عن التواصل معها سوى السؤال حتى احافظ عليها و على نفسي قبل لقاء ثاني. يعني هناك اشياء ايجابية و اشياء سلبية كيف اوازن بينهما و امشي في الخطوات مع مراعات مشاعرها ؟ و هل الانسان من اللقاء الاول ممكن ان تكون لديه قناعة كافية؟

[إنسانة بسيطة]

معجباتكش الطفلة خلاص علاه كثرة التقلقيل

[toulay]

السلام عليكم
من المفروض لو كنتي صح مهتم ماتهدر معاها لا في مواقع التواصل الاجتماعي لا الثقافي تروح طول تشوفها باش مبعد متصرالكش خيبة امل
بما انه الخطة تاعك واضحة هي الزواج علاش طول فيها وتبني وتهدم وحدك
انت حكيتي معاها بلا ماتعرفها حتى كيفاش جاية وبقيتي عايش في وهم وعمبالك راح تتلاقى بالبنت لرسميتها فالمخيلة تاعك
تاني قولي واش دخل اللبسة فالوسط
Bref معجبتكش البنت خليها tranquille كاين لتعجبوا وربي يعوضكم ان شاء الله
بالتوفيق

[مُحمد رازي]

السلام عليكم
لي فقط تعليق على قولك أنك عقلاني
أنا نظن شخص عقلاني ما يوصلهش عقله أنه يقبل اقتراح تاع شخص آخر يدلّه على فتاة جامي لا شافها حتى يتزوج بيها !!
أنا يظهرلي هاد الأمر لعب ببنات الناس و جعلهم قيد الاختبار و التجربة فإدا وافقت هوى الشخص يقبلها و إدا ما جاتهش على قوسطوه يليكيديها
بالنسسبة للعقلاني حسب رأيي يشوف فتاة و تعجبه يزيد يسقسي عليها أكثر إمّا يلقاها راح تكون مناسبة ليه أم لا
إدا لقاها ما راحش تكون مناسبة ليه ما يقتربش ليها أصلا و ما يلعبلهاش بمشاعرها
و إدا شافها مناسبة ليه و عجباته يكمّل باقي الخطوات المعروفة و "العقلانية"
أما أنه يتعرف على فتاة جامي لا شافها و يعطيها أمل كاذب أنه راهو جاد و قصده الزواج
و نهار لي يشوفها يقوللها سمحيلي ما عجبتينيش واش يسمّو هاد الشي حسب رأيك ؟
لهذا أرى بأنه من الأحسن للجميع وقف هذه المهزلة و قبل تفاقم الأمر

[kacimo.samy]

السلام عليكم
نقولك حاجة اي شئ لم يعجبك فيها لم نفهم؟؟
ام بالنسبة للباس تقدر تتفقوا وانا حسب رأي ذاك لباس اي فتاة غير متزوجة
وكي تتزوج راه يتغير لباسها
صحا وهذا نوع من لعب ببنات الناس ورايح تبحث وتجرب وتشوف...
وجربها في روحك كون شافتك..... نتا اعُجبت بها وهي لا ...ودخلت العقلانية مثلما تقول
كيف يكون ردت فعلك تكره نسا كل ..
المهم
يا اخي الفاضل فكر جيدا
كن مظلوم ولا تكن ظالم في هذي الحياة
انا ارى هذه الفتاة تخاليها لواحد اخر تعجبو وانت اخطيك من تاع صاحبك شافلك...
نتا تزوج موش صاحبك
سلام

[زبدة ذايبة]

كان من المفروض تكون الرؤية الشرعية قبل أي خطوة ثانية

في الشريعة الإسلامية وفي ديننا الذي ابتعدنا عنه

الخطبة تبدأ من الرؤية

وعمرها ماكانت تبدأ من الكلام مع المرأة

بداية خاطئة نهاية سيئة

وانت هذا وش صرالك

مع أنك لست الوحيد

في الزمن الأخير اللي رانا فيه

أصبح الزواج مبني عند الفتيات والفتيان على محاولة معرفة عقلية الآخر


وهذه من نكت الزمان الأخير الذي نعيش فيه

من شدة التقدم والتطور الذي استوردناه من البلاد الأجنبية

ومن شدة تخلينا عن قيمنا الإسلامية

وعلى قدر التخلي يكون التردي

انت لو كان من الضربة الأولى رحت شفت الطفلة

ماكانش يصرالك هكذا

وهي نفس الشيء

انت بالنسبة ليك الرؤية مطلوبة لأانها أساس الزواج وأساس المضي قدما نحو إجراءات الخطبة الرسمية

بالنسبة للفتاة

مايهمها والو المهم تتزوج

مايهمهاش شكل الرجل بقدر مايهمها الجيب

موظف وعندو سكن بالنسبة ليها فرصة لاتعوض

المرة الجاية ان شاء الله

أدخل للبيوت من أبوابها

ماتدخلش من الفيسبوك

لأنك مارح تلقى فيها سوى الخيانة والصور غير الحقيقية

وما أجمل الكلمات باستخدام لوحة المفاتيح

وأخيرا بما أنك وصلت لدرجة أن الفتاة لم تعجبك

ماعليك غير تخليها

لأنه وحسب رأيي تستاهل البنت وش صرالها


من أمن العقوبة أساء الأدب

هي اللي رضات على نفسها هذا الشيء

أرادت أن تخوض تجربة فلتتحمل النتائج كامل

وأسوأ العلاقات هي علاقات الفيسبوك

مكان قذر ولايحمل إلا من يشبهه

إلا مارحم ربي يستخدمه فيما ينفع

تساهل في المحرمات

وعلاقات وكلام في ما حرم الله

ينتهي بسخط الله وغضبه.

الأسرة المسلمة شأنها عظيم

أن تكون لك زوجة صالحة ليس بالأمر بالهين

أن تكون لك إمرأة إذا خرجت من بيتك حفظتك في نفسها وفي عرضك ومالك

ماتكونش المرأة اللي كي تخرج انت من الدار تعيط للأصدقاء تاوعها في الفيسبوك

واحد يضحكها!!!!!!!!!!!!!!!!!!!!!!

واحد تشكيلو وتفرغ قلبها معاه !!!!!!!!!!!

بداية خاطئة

وأسلوب في الزواج خاطئ

يا أخي ماشي هكذا دير دار

حاولت تخطب وحدة عرفك بيها واحد عن طريق الفيسبوك؟؟؟؟؟؟؟؟

معادلة تحتاج لتفكير طويل

ياهل ترى هذ البنت تتقبل كل من هب ودب؟؟؟؟؟؟

هل اختيار الزوجة بهذ السهولة ؟؟؟؟؟؟؟

يعني الزواج واختيار الزوجة يكون بنقرة على حرف f في الفيسبوك

وتروح تتزوج عادي !!!!!!!!!!!!!!!!!


لا اهتمام بأصل

ولا اهتمام بنسب

ولا اهتمام بدين

بالنسبة ليك

لو كان جات شابة لو كان كملت في الموضوع

لذا يا أخي

نعاود ونقولك

ماشي هكذا دير دار وتتزوج

الإنسان يفكر في العاقبة تاع الحياة

والزواج ليس قضية أسبوع أو اثنين

هو للحياة كلها

وهو لأجل الحصول على أولاد صالحين في الأخير.

وولد صالح يدعو له

[FATIHA131]

بداية خاطئة من المفروض من الاول تشوفها بلا ما تحكي معاها عجباتك سقسي عليها على عايلتها ما عجباتكش مادير والو
بلا ماتوصل تحكي معاها وتعيشو في الاحلام والتضحيات كلش حكيتو عليه قبل ما تتلاقاو ؟؟
لي يبغي لحلال يبديها صح للرجل والمراة

[رندة.]

هي المشكلة كانت في البداية مش الآن.
انت تواصلت مع هاذي البنت في وسائل التواصل الاجتماعي وكذلك عبر الهاتف،
تكلمتو وعرفتو عقليات بعض وقلت لها انو نيتك معاها هي الزواج،
انتوما الاثنين مشيتو على هذا الاساس حتان جاء النهار الي شفتها فيه وما عجباتكش، لأنو لو كان عجباتك الطفلة.... اللبسة شيء عادي تقدر تغيرها ... الخدمة ولا التكوين كيف كيف تحبسو ولا تغيرو عادي.

خلاصة القول، اذا ما عجباتكش وماراكش حاب تكمل معاها غير خليها وربي يرزقك ويرزقها من باب واسع.

[المنصور بن أبي عامر]

لم تعجبه نقطة الى السطر احسن من ان يتزوجها مكرها ثم يخونها او يطلقها

[سحابة مسافرة]

شفتها و معجباتكش خلاص علاه تكسر راسك و طمعها هي ممكن انت اعجبتها ..راهو زواج مش لعبة حاول توصلها المعلومة انها لم تعجبك و يكفي

[abd el nour 2017]

انت راك تقول صديقي دلني على بنت وتعرفت عليها في الفايس بوك
وصديقك واشنو علافتو بهده البنت
حتى يدلك عليها ..........................

[kaderr09]

السلام عليكم و رحمة الله و بركاته
الأخ الكريم و كل من هو على شاكلته.المشكل من الأساس هو البداية و عدم تحكيم الدين,
يجب علينا كمسلمين اعتماد الشرع كمقياس لكل ما نقبل عليه لا أن نتبع الهوى و نتبعه بمبررات قصد نيل الحلال بحرام.
عد إلى رشدك و ابتعد عن العالم الإفتراضي ، فهنالك الكثير ممن تبحث عنهن في البيوت و الشوارع ، فقط استخر الله و اسأل الناس ممن تثق فيهم و عش في عالمك الحقيقي.
بالتوفيق إن شاء الله

[samir-physique]

السلام عليكم
اذا كان لقاء ثاني فتاكد راح يكون لقاءثالت ورابع
وخامس...... ومشاكل. وكيما قالت الاخت toulay
انت درت image في خيالك و لقيت حاجة اخرى.اظن
باللي الطفلة طيبة ولهذا انصحك ان تجلس مع نفسك
جلسة جدية وتتخذ احد القرارين التاليين :
اما تروح مباشرة الى بيت الفتاة وتطلبها مباشرة من
اهلها.
او تقطع اي اتصال معاها و ماتخليهاش مسكينة
تطمع و تحلم.

[mohamed nadim]

حاجة مليحة كي تمشي بلعقل و ما تسرعش

المشكل في الليكات و السروال

قولها تلبس حجاب طويل و راك فريتها

حاشا ادا كان يدور في راسك امور و وساويس اخرى

زيد سقسي عليها و رجعلها بلخبر ايه / لالا

[لؤلؤة تلمسان]

اصبحنا في زمن غريب

اختيار الزوجة من الفايسبوك مثلا

شخص يدلك على فتاة فتتكلم معها من غير ان لا تراها ثم تكلمها بنية الزواج فتقتنع الفتاة وتجعلك نصب عينيها وتفكر في الامر جديا ، كل هدا وانت لم ترها بعد ، يعجبكما الحديث فتواصلا ، البنت تقتنع بالكلام والرجل يقتنع بالرؤية ، وعندما يراها لا تعجبه فيصدم الفتاة التي صدقته ومن هنا هي تدخل في دوامة شك وعدم ثقة في أي شخص وهكدا ، واخينا يبدا بوضع الاعتدارات والأسباب الواهية ، كانه مظلوم ، والزمام في يده والقوامة له

[الأصيــل]

يظهر لي انها عاجباتك بصح انت خايف منها ... خايف من الخيانة من خلال كلامك على لباسها وعلى العمل وهذا اللى مخليك عقلاني ، اذان اترك بنت الناس في حالها فحتي هي تفكر بعقلانية وتفكر في مستقبلها وقالت لك على الاقل قبول مبدئي .. وهذا حقها لأنها لن تعلق مصيرها بالمجهول
واذا شايف انكك معجب بيها افتح معاها كل المواضيع سواء اللباس او غيره وشوف العقلية ربما ستجدها مثلما تتمنى وربي يرزقك