مشكلة خطيبتي و حجاب

[مشكلتي]

السلام عليكم و رحمة الله تعالى و بركاته

حاليا أنا خاطب بنت و عندي سنتين معاها خطبة و بقالي 6 اشهر على العرس . على كل حال خطيبتي نهار لي خطبتها كانت تلبس سروال و تريكو و تزير روحها شويا مع العلم أنها جامعية . المهم تفاهمت معاها على أنها تتحجب و تشري لبسة نتاع حجاب و تستر روحها . ايا كيما كان الحال شرات لبسة و بعض المرات كنت نشريلها أنا فقط باش تتحجب و بحكم بعد مقر عملي و سكني عنها قليل وين نشوفها . المهم في الربيع لي فات قلتلها تحجبتي خلاص قاتلي ايه درتلها كادو نتاع ذهب كيما وعدتها قيمتو تقريبا 10 ملاين سنتيم فقط حبيت نوريلها بلي نفرح كي تتحجب . ايا سمانة لي فاتة تكلم فيا قلتلها واش راكي لابسة كنت نسنا تقولي حجاب كذا ولا كدا فإذ بها تقولي لابسة سروال و معطف قلتلها علاه قاتلي معنديش لابسة حجاب نتاع شتا كي نشري نتحجب . حسيت خدعتني زعفت و تقلقت بزاف و راني مكوبي عليها تيليفون و الله راني حاير كيفاش ندير معاها نكمل ولا نحبس راني في دوامة من تفكير . من فضلكم أعطوني كيفاش ندير معاها

[محمد جديدي التبسي]

وعليكم السلام ورحمة الله وبركاته
يا أخي لازم تكون واضح في هذا الموضوع من أول يوم تضع شروطك من ناحية العمل واللباس وكل الأمور التي تتعلق بالزواج
أما تاع تهديلها ذهب بعشر ملاين راك تبالغ لا داعي لذلك حتى لو لبست الجلباب
فالحجاب فرض في ديننا وليس أمر تكافئها عليه انت
ثم ان المرأة تتعود على الهدايا وستصل لمرحلة لا يرضيها شيء
أنت رجل فلابد ان تكون حازم في أمر الحجاب ولا تتساهل مع النساء في هذا الموضوع وإلا أضحت كرامتك في الحضيض
وأنت ترى الحال التي وصل لها مجتمعنا وراء تساهل الرجال في هذا الأمر وتغلب النساء ويقولك حرية شخصية !!!!
اشريلها 2 جلابيب ملاح بمليون وحطها أمام الأمر الواقع وكن واضح وصريح هذا أمر بسيط المفروض لا يُطلب من المرأة فما بالك بأمور أكبر يريدها الرجل من الزواج وهي أن تكون أم مربية وقدوة لبناتها. .ربي يصلح الاحوال.

[الداعي الى الحق]

سبحان الله كانت تلبس سروال وتريكوا وانت امرتها بالحجاب هي اصلا لابسة حجاب من قبل على واش راك تامرها

مافهمتش سروال نازل لتحت خبلها كلش وزيد تريكوا خبلها كلش واش بقى تستروا

شوف يا صاحب المشكلة لوكان جيت فبلاصتك نخليها ماشي خاطر ملبستش حجاب انا اصلا مايهمنيش المرا لي لابصة حجاب ولي لماشي لابساه هدي الامور ماتهمنيش .

يااخ ماتحولش معها باينة مراهيش مليحة يعني حتى لو لبست جلباب فداخل مراحش تتغير هي عجبها حالها هكدا فالاول قالتلك لبست حجاب ومبعد قالتلك ملبستوش لاني ماعنديش لابسة .
يسمى هي كدبت عليك حتى تشريلها دهب لانك قلت وعدتها قبل يعني هي عارفة بالوعد ديالك وكلختلك . وزيد قالتلك ماعنديش لبسة نتاع شتا علاه ماعندهاش باباها يشرلها علاه انت لتشريلها مراكش زوجها .

هدي طماعة وكدابة وانت ماشفتش لهدوا الحوايج شفت برك للقشرة ابخارجية نفترضوا انها لابسات جلباب ماشي برك حجاب وانت غادي تديها نورمال؟ مايهمكش داخلها
مايهمكش اد كدبت عليك ولا طماعة ولا خايبة يهمك برك الحجاب . كل ليهمك ان لقلوبهم مرض مايطمعوش فيها . راكم تهتموا بشرف هادي حاجة مليحة بصح مراكش تهتموا بالاخلاق خلاص رغم ان شرف يدخل فالاخلاق

[بناتي نور العين]

الاولى نصحتها و طلبت منها ووعظتها بالتي هي أحسن و لم تفهم البنت

الآن جاء الوقت لتجبرها على لبس الحجاب و تستر نفسها

هذا حقك يا اخي

ننبه أخواتنا المسلمات بأن الحجاب هو فرض من الله تعالى فلا يجوز للمسلمة أن

تفرط فيه ولو أمرها زوجها بتركه، فكيف وقد اجتمع عليها فرض الله تعالى بالحجاب، وفرض الله تعالى بطاعة الزوج.

[زبدة ذايبة]

ما كاين حتى إمرأة ماتحبش تبان جميلة

حتى لعجايز وطامعين في الزين والإغراء لمن حولهم

والحجاب أمر فرضه الله عزوجل من فوق سبع سماوات على المرأة المسلمة

مافيها لانقاش ولا جدال

واللي يسميه قشرة فوالله هو مخطئ

يعلم الله عزوجل بخبايا نفوس البشر

ونزل القرآن الكريم لتنظيم حياتنا

ومافي أحد في هذه الدنيا يقدر يسير حياة البشر مثلما يسيرها خالقها

أثمن فيك حبك وإلحاحك على خطيبتك بالحجاب

لكن تأكد

هذه المرأة رايحة تعييك

هي أصلا عاجبها حالها من غير حجاب

ومقتنعة بعريها

يعني مهما حاولت معاها ماراهيش رايحة تقتنع

حتى وإن لبساتو رح تبقى هذيك النزعة للتبرج موجودة في داخلها

وحتى لما تبح زوجتك رح تبقى على هذا الحال

ويبقى باب الشك مفتوح

إذا كنت رجل غيور من الأحسن تتزوج من إمرأة متحجبة

وإذا كنت من النوع اللي ماعندك حاجة في ملابس زوجتك وخروجها ودخولها على الرجال

فهذا أمر يخصك

رأيي الشخصي أن تضع النقاط على الحروف بشكل قطعي

واضح جدا أنها ترفض التحجب

لأنها درجت على العري ولن تتغير

والمشكلة اللي تلقاها في البداية رايحة تكون هي سبب النهاية

يبقى تحزم أمرك فقط

تعرف انت وش تحب

وماهي حدود رجولتك

وماهي الأمور اللي تسمح بيها

والأمور اللي تمثلك ثوابت ماتتبدلش

وتأكد أن هذه الفتاة حتى هي عندها ثوابت ماتتبدلش

مهما فعلت معها

في هذ الحالة شوف إذا فيه مجال تتنازل انت

أو تتنازل هي

وإذا تنازلت هي وخذاتلك الراي ياهل ترى تبقى ثابتة على رأيك !!!!!!!!!!!!!

أم أنه لما تكون معاها تتحجب !!!!!!!!!!!!!!!!!

ولما تكون غايب تخرج من غير حجاب يشوفها الجار وصديق الأخ وصدبق الأب وكل من هب ودب

رب يوفقك لما فيه صلاح بيتك

[غزلانْ]

السلام عليكم

أردتها و خطبتها و تريدها أن تتحجب يبقى لها حرية الاختيار
اما الالتزام بشرطك أو عدم الالتزام به و نقطة انتهى
و بلا تحفيز منكَ و احسم أمرك قبل الارتباط
بالتوفيق

[رَكان]

السلام عليكم
أخفيت بعض المشاركات ..
السبب ..
الإقتباس لما يطرحه الآخرون غير متاح .
التعليق على ما يطرحه الآخر هو كذلك ..
الحوارات الجانبية غيرمسموح بها ..
من لديه نصيحة لصاحب المشكلة فليقدمها .وإلا فليترك لغيره عناء ذلك بارك الله فيكم .

[Aniraz]

ياأخي أنت معاها بالنية ولكن هي على حسب واش قلت راهي تستنى فيك تشريلها حجابات لشتاء والسؤال المطروح هنا وينو باباها ؟؟؟

ثانيا لو اقتننعت صح بالحجاب لي انت حبيتها تلبسو لوكان راهي دارت المحال وشرات حجاب للشتاء وحتى ولو ماقدرتش لوكان هدرتلك قبل ماتلبس السروال

ثالثا واش لزوم الهدية لي درتهالها حتى ولو بدينار ؟؟؟ بالمقابل انها دارت فرض فرضو عليها ربي ؟؟؟؟؟ معليش انت ربي يثبت اجرك على كل حال ولكن واش اداك ليها من الاول وانت حاب وحدة متحجبة ؟؟؟

احسم امورك قبل الارتباط اخي لانو اذا تمادات بعقليتها هادي ماتقدرش تحكم فيها منبعد

وربي يسهلك

[إنسانة بسيطة]

انت اعجبت بها لمفاتن جسدها وليس لاخلاقها و الحجاب طلبته لتراها فقط يعني غرضك منه مصلحي فقط وليس ديني
وافق شن طبقة ( بكل صراحة )

[لـيثون]

رجولتك على المحك. فهم روحك واش راك حاب واتخذ قرار. من الواضح أنك قلت راك رايح تقنعها مع الوقت، يعني اعطيتلها فرصة، ولكن يبدو أن المهلة شارفت على الإنتهاء.
لازم تسأل نفسك وعلاش راك حابها تتحجب وتكون صريح مع نفسك ومعاها. عندما تعرف الإجابة ستعرف ما يجب عليك فعله.

[اياد حياتي]

كلكم تحرضونه ان يتركها استغفر الله ولا واحد نصحة بالتي هي احسن

[khelifa09]

يا اخي الكريم شوف روحك اذا لاحظتها تطيعك بدون مجادلة كبيرة فيمكنك الاستمرار معها و اقناعها بافكارك.
وان لاحظت انها مصرة على شيء دون اخذ رايك اخطيها احسنلك.
لانك ستتعب نفسك كثيرا.

[جالب الخيرات]

راك غالط من البداية.........................خويا وحدة ماعندهاش ثيقة في ربي و ماعندهاش غيرة في دين ربي................ما نديرش
فيها الثيقة ........................ نقلك راك غير ضيع في الوقت......................................اليوم في حالة و غدوة تندم.

المبدأ أصلا ما عنديش و ش نقلك رااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااك نرفيتني..................................ندمت و علاه نقرا في مشكلك.................................

[وسيمツ]

جابلي ربّي انت راح تتزوّج الفعل "تَحَجَّبَ" مش فتاة
الحجاب اللي فرضو عليها ربي و مابغاتش تلبسو ، ماذا تنتظر من بنتٍ كهذه .. ؟
أتنتظرها عندما تصير عندك أن تقرأ القرآن و تصلي؟ أتنتظر أنه عندما يكبر بناتك تقولهم تحجبو؟ منين راح يجي هذا ؟
طالما أنها متبرّجة فأنت معجب بمظهرها لا ذاتها و أنا نقولك ... ستدم كي تتنحالك السخانة اللي راك فيها و تصير الأمور إلى الروتين .. ثم تفيق.
بنات خلاّو كل شيئ طالما أنه يمسّ بحجابها و بنت تمدّلها الدراهم و ما تتحجّبش يخي حالة يخي
أخي قس بعقلك ... من لا يستطيع الإتيان بأبسط الأمور الدينية فلا يستطيع قياسا أن يأتي بأكبر منها ، و عليك أن تعي أن الزمن لا يربي و لا يجلب شيئًا ان كنت تنتظر تغيرها.
بالتوفيق.

[* الحلم سكر *]

مع كل اجترامي بعضالمشاركات تنطق الحدر
البنت لو كانت بالسوء لي توصفت بيه هنا من اخوتي في الردود بلا ما يهرفوها
اولا لو كانت خبيثة كانت ما صارحاتكش و كذبت و قاتلك لابسة حجاب
ثانيا لم لا نحسن الظن الفتاة في فترة خطوبة و قبل عرسهاو الله تشتاق تشري الحاجة و تحسبلها الف حساب الدورو وين يروح بالاك هي اعتبرت المونطو طويل مع اني مانيش نبرر ليها
اخي انت الوحيد تعرفها و تعرف مواقفها ماشي غير هنا اذا طبعها عنيدة و تعكس كلامك راه يبان في حوايج كصير ماشي غير هنا
انا نقلك شوف رد فعلها اذا راح تعتذر و تسنتعرف و الا راهي كيما قالو مقتنعة بغلطتها رغم اشك لانو الواضح عندها استعداد تتغير
البنات لي جاوبو كانو ماكنش لي كانت تلبس سروال و تحجبنت حجابات عادي

اخي انت ادرى بخطيبتك و فترة ما قبل العرس رد بالك الشيطان يلعنه يحاول غير يفرق انت استخير دوما و ربي ييسرلك لي فيه الخير
م

[محارب الحمق]

مافهمتش واش صرا للذكور في هاذ الزمان؟ وين راحو الرجال؟ أنا طفلة حبيت نشوفها في الخطبة جاتني بمعطف طويل تحت الركبة وسروال, شفتها قبل ما توصل عندي قررت رفضها. عيطولي قالولي واش صرا قلتلهم الطفلة جايتني بسروال, قالولي راهي قابلة تلبس جلباب درك قلتلهم لا. واش ندير بمرا تلبس الجلباب او الخمار على وجهي موش على وجه ربي؟ رسالة لك يا صاحب المشكلة ان كان لك عقل وغيرة

[رحاب رحوبة]

الشئ لي محيرني
كيفاه تحوس على وحدة متحجبة و خطبت وحدة سيفيليزي
هي في بيت باباها كبرت بدون حجاب
كيفاه حابها جي لعندك تتحجب
يا اخي من شب على شيئ شاب عليه
و كي نفترض انها دارت الحجاب ديرو غير باه ترضيك و ليس لوجه الله اي انها غير مقتنعة بيه
و الدليل انها درت في الصيف و نحانو في شتاء و كي تشريلها القش تعاود الديرو
اصبح لعبة و العياذ بالله
و الخطا الاكبر انك مديتلها 10 ملايين
هذا خطا 1000 بالمية
الحجاب فرض عليها و لازم
ماهوش مزية تجازى عليها
و زيد الامر اصبح واضح
انا ارى ان البنت استغلالية و طماعة و تاع مصلحة
حكمت الدراهم على جال الحجاب
معناتها بعد الزواج لازملها 10 ملاين باه طيب
و 10 اخرى با تسيق
100 باه تفسلك قشك
في راي انك تقنعها بالحجاب ما تفرضوش عليها
يعني تخليه التحس بلي حرام الامر لي راهي دير فيه
و انو لازم عليها تتحجب
يعني من اصلها تقتنع بيه و بي وجوب و ذالك بتخويفها العذاب مثلا
تبشيرها بالجنة و المغفرة و ........ و .........و لا تجبرها عليه فيزداد كرهها له
ان لم ينجح الامر فاخي اافسخ الخطوبة قبل ان تصبح في الطلاق او تسيئ تربية ابنائك

و زيد صلي صلاة الاستخارة و الدعاء لها بالهداية
و ربي يجعل خير ان شاء الله

[النجمة القطبية]

مفهمتش كامل هادي الهجومات بصراحة وكان الرجل كفر
واحد عجباتو واحدة وخطبها وحاب مرتو تتحجب وين راه المشكل هنا هل خرج من الملة ام انه كفر
ياما ناس تحجبوا بعد الزواج ورباو وﻻدهم احسن تربية وهداهم ربي
عﻻه عليكم تقطعوا رحمة ربي على الناس مع العلم انها قبلت بالحجاب وثانيا الرجل في اﻻصل ربي حللوا حتى الكتابية فما بالك بالمسلمة
ثانيا شرالها كادوا وكانه اجرم سبحان الله وباﻻك داخل في اﻻتفاق او المهر او حتى حب يكرمها او الرجل ربي فاتح عليه عﻻه حراام !!!
انا عمري ماشفت ناس تحرم كيما في هدا المنتدى
وكامل رجالنا شراولنا كادوات هل اجرموا ؟
اﻻن لصاحب الموضوع انت تحتاج للحزم فقط وانت ادرى بزوجتك ادا طايعاتك
ليكن كﻻمك واضح ولهجتك اكثر حزم وربي يصلحها ويجيب الخير

[وسيمツ]

أكره أن يتم التحدث بصيغة الجمع هكذا
صاحب المشكلة مُحتار أيكمل أم ينسحب فالردود تأتي على هذا الأساس بتعليل الحالة كل مرّة
فاميكانيزمية اللتي تقوم عليها المُشاركات هي استقراء المُعطيات اللتي أفاد بها صاحب المشكلة
و بالنسبة لكل رأي يتم وضعه هنا هنالك استثناءٌ بـ "لكن" أو ''ربّما' ،فإحتمالٌ أنّ صاحب المشكلة لم ينقل المعطيات كما هي،
أو نقلها في حالة غضب أو ما يقوله و ما هو حاصلٌ حقًّا في الواقع شيئان مختلفان تماما فقد لا يفهم هو أصلا ما هو فيه حتى يصفه
فكما أنّ من يقول عن الفتاة بالسّلب لا يعرفها، فمن يقول عنها بالإيجاب لا يعرفها أيضا، فما يحصل هو استقراءٌ وفقط للمعطيات و بعدها سيتبيّنُ صاحب المشكلة الجواب الأقرب للحالة مِمَّا هو بعيدٌ عنها.

لذا كل الآراء تقبل هته الـ"ربّما" فلو تتبعنا على هذا المنوال، كلُّ رأي هنا يمكن أن نضيف في آخره : "و ربّما..."
و في مكان الثلاث نقاط نقيض ما قاله لأن المعطيات ليست قطعيّة في ذاتها من ناحية الصحّة أو في عددها من ناحية الإحاطة..

فنصحُ صديقنا في هذه المسألة يكون بإختيار الحل الأمثل، بعبارة أخرى أختار له الرأي الأفضل لنفسي لو كنت مكانه
أي أبدي لصديقي صاحب المشكلة الدائرة الضيّقة اللتي تحتوي أنقى ما يمكن بعيدًا عن المجازفات بـ"ربّما" و ليس الدائرة العامة تلك التي تشمل كل شيئ حتى تبلغ
الحدّ المُتمثّل في الفتاة النصرانيّة فهذا لا يحتاج لاستشارة أصلا.