مخدوع

[مشكلتي]

راني مهموم و تعبان نفسيا اولا انا شاب في نهاية عقدي الثاني نخدم لباس عليا كلش كاين.مالا قررت نتززوج و نكمل نصف الدين لقيت طفلة شكلها كيما بغيت تماما جمال و بياض و طول كما تشتهي نفسي و متجلببة من عايلة متدينة .حاولت نتقرب منها و بش متضيعش من يدي طلبت يدها مباشرة و هي وافقت في الحين . في فترة الخطوبة بعد العقدين الشرعي و المدني خطيبتي عيشتني اجمل الايام و الاماني حنان و دلع و مأكولات شهية من حين لآخر حتى حسيت اني في الجنة فاستعجلت الزواج و هنا الطامة كي تزوجنا لقيت انسانة اخرى تماما ما تنظف ما تطبخ ماتعرف دير والو . لا اداب الحوار و لا اداب المعاشرة الحسنة و يقلقها واحد تسب بكلمات نابية . اداب الاكل ما عندهاش تاكل بهمجية و صوت عالي اكرمكم الله والله مرات كثيرة نتغدا برا بش نتجنب ناكل معاها و مانحرجهاش بالملاحظة هاذي . بيتنا قمة في القذارة الحاجة الوحيدة لي تعرف ديرها هي المكياج والزينة حتى اني وليت نقرف من طيابها لانها تطيب بطلاء الاظافر في يديها . ماهيش صغيرة لانها في سني تقريبا وايضا متزوجين من سنتين والحال على حاله شحال من مرة نبعثها لدارهم كشما تتعلم و لا تتسقم والو . حتى نية في الاصلاح ماعندهاش .نصحتها هجرتها ضربتها لافائدة وليت نكره نروحلها للدار و نحشم بيها في الاجتماعات العائلية لأنها تبهدلني .و راني كتبت الموضوع هذا كخطوة اخيرة قبل الطلاق نستنى نصائحكم.

[الأصيــل]

صدمة ..حطها امام الامر الواقع إما تتسقم وإما الطلاق .. ربي يوفقك

[الداعي الى الحق]

وراهم ليحوسوا على المتحجبات الماكثات في البيوت يدخلوا مالي لاراهم واقيلا جع دخلوا في حجورهم هههههه


علا بالك علاه راك مخوع بصراحة حتى واحد ماخدعك انت خدعت روحك بروحك لانك تتحكم بالمظاهر علبالك كل متحجبة شريفة وكل متحجبة دات دين وخلق املا خلص الفاتورة

ديما كانسمع هنا في هدا المنتدى نساء صالحات دات دين وخلق ولما نسال كنلقى دات دين والخلق هي المتحجبة يعني الخلق ودين راه معلق في قطعة قماش وكل صاحب لحية والدي لا يقوم من مسجد هو دو دين وخلق واكتاه تكبروا وكتاه تحبسوا ماتحكموش على ناس بالمظاهر

شوف هدا الموضوع جالي سوا سوا بردت قلبي شوف نقولك حاجة تعرف اكرام روح حوس عليها في جوجل اكرام وزوجها عبد القادر ليسكن في امريكا تزوج دات دين وخلق كيما انت وكي راحت مريكان نحت الحجاب وسرقتد درهمه وهربت مع واحد مغربي وهو مسكين واش يدير راح فضحها في الانترنت وفي قناوات الجزائرية هههههه اكيد سمعتم على القصة بصح حتى واحد في هدا المنتدى ماحاب يهدر معاها تعرف علاه لان البنت متحجبة حجاب شرعي لو كان متبرجة لو كان شفت كل اسنان تقضم عليها

االاخلاق عندنا ودين مقترن بالمظاهر فقط في الجزائر للاسف
سلام نتمنا يعظوا اصحاب منتدى الجلفة ولكن لااظن

[قدور بن عاشور]

يا أخي راك حيرتني في حاجة :
أنه في فترة الخطوبة كان الحنان و الدلع و بعد الزواج صارت ماتعرفش تهدر و ما عندهاش آداب الحوار
يعني انقلبت 180 درجة هكذا و بدون مقدمات أو أسباب؟؟

ممكن أنت تكون عصبي و تزيد فيها، خاصة أنك تقول راك ضربتها

[محمد جديدي التبسي]

طفرت ما عندك ما دير خيرت الجمال والجلباب ولم تسأل عن الوعي
قل لوالديها يوعوها عسى ولعل يصلح حالها
ربي يفرج عليك.

[toulay]

السلام عليكم
الملاحظة الاولى من الاحسن تقول خدعت روحي بروحي لانو انت خدعوك المظاهر شغل اي واحدة لابسة الجلباب راهي مبشرة بالجنة هكذا ياك
وحابة نعرف العائلة المتدينة هاذي كيفاش جاية هل العائلة المتدينة متربيش اولادها مليح هل متقولهمش بلي السب والشتم ممنوعين وبلي النظافة من الايمان وحاجة اجبارية
لاحظت هنا في قسم مشكلتي ولا فالمنتدى عموما يقولك مدابيا تكون ذات خلق ودين بالجلباب يعني البنت سيفيليزي مشي خلوقة
عندو الحق الgاوري مين قال les apparences sont souvent trompeuses
ومين مالقيتي عليها وليتي بينتي العضلات تاعك وضربتيها مليح واصل على هذا المنوال
هل من الرجولة ترفع يديك على مراة
صح فيها لفيها بصح متضربهاش كل شيء بالسياسة ابقى حاول
على كل ربي يصلح الاحوال ان شاء الله
بالتوفيق

[بناتي نور العين]

لك ان تصبر عليها و تحاول ان تغير من طباعها و تكمل معها

ولكن عليك اولا ان تجلس مع عائلتها وتخبرها بكل ما يضابقك

فان صلح حالها فالحمد لله و ان لم تحاول ان تتغيير فطلقها قبل ان يكون بينكما ابناء

اسئل الله ان يصلح شأنكم و يهديكم لبعض

[الصديق قروف]

ربي يفرج حاول تصلحها
هاذي من نتائج العلاقة قبل ازواج يعني تعيشو فلخيال وبعد دخول تتصدمو بلواقع

[khelifa09]

رغم أن الطلاق أبغض الحلال. أنا أنصحك أن تطلقها ان لم يكن بينكم أولاد وذلك بعد مشاورة امام حتى لا تظلمها

[زبدة ذايبة]

راني نشوف أن الأعضاء وكأنهم يشمتون بصاحب المصيبة

والسبب لأنه اختارها متجلببة !!!!!!!!!!!!!!!!!!!!!!!!!

بالنسبة لصاحب المشكلة

والله مشكلة

في عطلة الصيف عاينت إمرأة مثلما تقول أنت

البيت قذر

حتى لماعن تاع لحليب يبقاو بالأسابيع

حوايج فصل الشتاء لقيتهم -وانتم بكرامة- موسخين حتى دخل أوت !!!!!!!!!!!!!!!!!

وهذ المرأة لاعلاقة لها بالجلباب

والله استغربت

ماعرفت هذي حالة نفسية

ماعرفت هذا تفنيين

المهم زوجها طلقها مرتين

والآن قال نخليها معلقة

كيما تصرف معاها ماجابتش نتيجة

من المفروض المرأة دورها في بيتها

تهتم بالنظافة وتهتم بالمكان الذي يجلس فيه زوجها

وتهتم بتحسين مستوى الطبخ لديها

وتربي أبنائها

وإذا كان مافيهاش هذا الأشياء الرئيسية

على ماذا أنت متزوج ؟؟؟؟؟؟؟

تعيش كي الزوفري وانت متزوج ؟؟؟؟؟؟؟

اللي قالولك إذا ترضى هذا لأمك ولأختك

ياهل ترى هن (نون النسوة) يرضاو هذا الشيء لأخوهم ؟؟؟؟؟؟؟

لا أعتقد ذلك

نعرفوا بعضنا بعض مليح

المرأة الجزائرية مهوووووووسة بالطبخ والنظافة

والتي تشذ منهن عن هذا فيها نظر


زيد أعطيلها فرصة

أهدر مع يماها

وخلي يماك تجبدلها وذنيها

وخواتاتك يضغطوا عليها

لعل وعسى تتسقم

أما بعد هذ المحاولات وما جابتش نتيجة

دير وش يخرج عليك

واحد مايقدر يعيش في مكانك ويعاني معاناتك

والزواج تاع العمر وتاع الحياة كلها

تبقى حياتك تتكركر مع وحدة عفنة

وتدفن شبابك على وحدة ماشي قادرة تخدم أو ماتحبش تخدم

المهم

أعطيلها فرصة وأعطي لنفسك الوقت

غير الطلاق اللي ساهل.

رب يصلح حالك ويهديك

[11111]

أخي الله يرحم الوالدين لمادا دكرت أنها متجلببة !!

ألا تعلم أن هناك قوم مغلقين من عقولهم وقلوبهم !!!

الجلباب راه فرض من رب العالمين وواجب على كل مسلمة !! وبهدا الكلام تعطي شبهة للمتبرجات فتحسب أنها على خير وكأن العيب في الجلباب !! سبحان الله !!

أما مسألة الطلاق فإن كانت كما تقول فلا تتردد في الطلاق ما دام أنه ليس بينكما أولاد

[محارب الحمق]

المرأة التي تلبس الجلباب ليست قديسة او متدينة بالضرورة. المرأة التي لا تلبس السروال والبودي هي امراة قليلة الحياء والتدين بالضرورة. قاعدة عليك تعلمها. أهم شيء عند الخطبة السؤال عن العائلة وطريقة التربية والسيرة. الاستخارة ثم الخطبة حتى لا تندم فيما بعد

[ابو سليمان10]

النساء لهن القدرة على النفاق...بعضهن يعرفن ان رجالا يحبون الجلباب فيخدعنهم به

في الحقيقية لايوجد ميزان لاختيار المراة ...كل شىء قد يكون مصطنع...يجب ترك الموضوع للنساء فلايكشف مراة الى مراة اخرى

لقد احسست بقرفك من الاكل...انا ايضا اقرف من المراة التي تطبخ بطلاء الاظافر....يحسن عاونك
ان لم يكن بينكما اطفال فاظن القرار سهل

[غزلانْ]

كان اختيارك الشخصي و لك الحرية المطلقة في الاختيار
بناءا على شكلها جمال بياض و طول و ذات جلباب و عائلة متدينة
اذن ما لك الا الرضا باختيارك لأنك اخترتَ ما أردتَ
لو كنت في فترة خطوبة لكانت ردت فعل مغايرة اذ يمكن التراجع لكن لست بمخدوع لأنها معايير أردتها في شريكة
حياتك ووجدتها بنفسك و رضيت
يجب أن يكون اختيار وفق قناعة دون رجوع
و بخصوص مساحيق التجميل و طلاء الأظافر ان كانت على حسابك فكيف يصيبك القرف من أشياء تقتنيها لها
اذا لا تقتني لها و حل المشكل
حاول اصلاح الوضع
بالتوفيق

[توتة2008]

يا اخي قول لدارهم باش ينبهوها احسن

[lyna2007]

من بين الامور الواضحة من مشكلتك
صغر السن بالمقارنة مع مجتمعنا الان الذي اصبح فيه سن العشرينات. لايستطيع صاحبه تحمل المسؤولية يعني هناك نقص في النضج العقلي خاصة من جانب زوجتك.
تانيا التسرع قلت لقد تسرعت في جميع خطوات الزواج حتى لاتضيع منك. والان تتمنى لو ضاعت منك احسن حينها .
فالتسرع في الزواج امر غير مرغوب وهناك فرق بين السرعة او التسرع.
فالشخص لازم يسال مليح قبل طرق الباب لخطبة فتاة.
المشكل التالت اتسال لماذا انقلبت بهذه الطريقة
لم تذكر لنا ان لم يكن هناك مشاكل في المعاشرة الزوجية او امور اخرى لا نعلمها
حسبما قرات انك ما لستما من نفس الطبقة يعني تربيتك وتربيتها مختلفاتان انت انصدمت من طريقة اكلها وتقول هي همجية
لانك تعودت على طريقة جد منضبطة في الاكل وانصدمت لما رايتها كذلك وبدات تحرجها بالملاحظات حسب قولك وهذه الملاحظات اكيد كان ينجر عنها شجارات و معايرة لزوجتك وهي كانت ترد عليك بطريقتها مما ادى بك الى ضربها وهجرانها وهنا بدات تفقد القدرة على شحن بطارياتها كل صباح لتنهض وتنظف وتطبخ لك اشهى الاكل .يعني اصبحت نفسيتها محطمة وليس لديها اي رغبة في التنظيف او الترتيب ومع مرور الوقت اصبح الامر خارج عن طاقتها وانفلت من يديها . اصبحت تعاني نفسيا لانها لا تستطيع القيام بالاعمال المنزلية يديها مكبلتين .
ولانها صغيرة في السن فكرت انها ستعيد جذبك مرة اخرى بجمالها وزينتها فاصبحت تحاول التزين لك من اجلك جذبك اليها .لكن هي لا تعلم انها مخطئة في هذا الامر .
اظن ان زوجتك نحبك ولا تريد ان تخسرك لهذا تتزين كل صباح لك .
المشكلة في كما انما الاثنين تربيتك تختلف عن وتربيتها .
فانت لم تتقبل طريقتها وانصدمت منها واصبحت تتهرب من البيت .
الحل هو اعطاء فرصة اخرى لزواجكما هدا
حاول تدعو زوجتك لعشاء خارج البيت وحاول التحدث معها بهدوء عن ماكرهته فيها وحاول ان تهديها هدية لتطيب نفسها
حاول مصالحتها
ولا تقول لي انك تحشم بها برا لان هذا مابزيد الطين بلة فقولك لها هدا او عدم اصطحابها معك وتركها في البيت يولد لديها الكآبة وتكره كل شيء
ان كنت مازلت تحبها حاول اصلاح الامور
حاول ان تحضر عاملة تنظف البيت لمساعدتها مادام عندك امكانيات ولو لمرة واحدة فقط حتى تساعدها في البداية ولما يسترجع بيتكما نظافته يمكن الاستغناء عن العاملة .
لما تحس زوجتك انك تقبلها وتحبها وتعاشرها بالحسنى ستعود متلما كانت قبل الزواج.
انا قرات مشكلتك من زاوية اخرى ولدي احساس كبير ان المشكل يكمن فيما ذكرته اعلاه.
اذن حاول اصلاح الامور و حاول اعادة تدريبها على اداب الاكل وحسن التصرف
اعطيها القدر الكافي من الحنان لان فاقد الشيء لايعطيه
وستعود باذن الله الى ماكانت عليه قبل الزواج
هدا رايي واعذرني ان اخطات
فانتوادرى بحالك
ونتمئ ربي يصلح اموركم

[الواثق]

الجواب حسب المذهب الخامس وهو المطرق......علمها ووبخها وعاقبها فالرجل مؤسسة تربوية وعقابية..........فان لم تجد نتيجة فاغلق الباب كلية وارجعها الى بيئتها التي تربت فيها

[Elwawy]

أخي تريث و Relax و أمهل بعض الوقت, أنا شخصيا لا أندهش لهذه الحالات لأن معظمهم هكذا par defaut يعني من الأصل (على تربيت و عادات بيتها لا بيتك أنت) , جرب طريقتين :

1- إمشي مع التيار, إعمل mirroring هي تقنية NLP لتظهر وتنبه للأخر أشياء معينة, يعني كل أنت بهمجية, تكلم بصوت عالي, وسخ المكان, إعمل ما تعمله هي تماما كالمِرآة (mirroir) سوف تلاحظ الشيء ويمكن أنت تتغير.

2- إمشي عكس التيار, نظف أنت, تكلم بلطف, كل بتأني, إعمل عكسها تماما و كن نشيطا في هذا المجال إجعل الضوء يسطع فوقها حتى تتبهدل معا نفسها.

أمهل الوقت و لا تتعجل,و لا تذكر أبدا أبدا أنك تقوم بtest أو إختبار لها, إن هناك نتائج اللهم بارك, إن كان هناك لاشيء قرر بنفسك.

أردت أن أضيف, الأعضاء المشاركين كأنهم "يشفاو" و أعجبهم الحال? ما بكم هذا إنسان و هي إنسانة, ليست رُبُوتْ أو script يقبى على حاله إلى الأبد

[جالب الخيرات]

شربتو.............................روح بيع الكاوكاو..............

[ايمان4]

السلام عليكم ، أرجو من صاحب المشكلة التحلي بالصبر و الحلم و أن لا يتسرع غي اتخاذ القرارات حتى لا يندم لاحقا .. تذكر محاسنها جميلة الشكل متدينة لم تخنك و تحبك الدليل انها تتزين لك ... الباقي اشياء شكلية نمشي معاك تطلق و تتزوج باخرى لكن ليست بمواصفات الاولى ممكن جميلة و تنظف لكن خائنة و غير متدينة او وحدة اقل منها جمالا او طولا .... يعني درك هادي راها مراتك حلاللك اصبر معاها و بالشوية درك تتربى اعطها الملاحظات لكن في قالب رومنسي ... المراة ا يجدي معاها الزعاف قد ما يجدي معاها النصح و الارشاد بطريقة رومنسية تتغير 180 درجة و ربي معاك