مشلكتي مع زوجي كرهت حياتي

[مشكلتي]

السلام عليكم اخواني

نتمنى تنصحوني و توجهوني الى مافيه الخير و الصواب

مشكلتي يا اخواني زوجي رايحة نهبل معاه تخيلوا بعد ما طارت لبابا باطيمات تاع لاكناب اول حاجة خمم فيا انا بنتو بما اني ساكنة مع عرش كامل عماته فوقنا و عمامو و تحتنا مرت عمه و دارهم الله يبارك تسع افراد و البنات متزوجين بيهم بولادهم اقترح على زوجي يحكمها و لانه كان عنده حق الدفعة الاولى سلكها و دا المفاتيح و بقات الدفعة الاخيرة كل شهر يسلك مبلغ ..بصح السكن مازال باسم الوالد هدا الشي كامل قبل ما نحمل و حملت تسع اشهر في هاديك الفترة عاودها بنترلها و سقدلها الكوزينة و ركبلها كل ما يلزم على اساس راحلين و من بعد قالي خلي حتى تسلكي بخير و يرحمها ربي و شيخي تاني قالهالي قلت ماعليش المهم نسلك على خير سيرتو بعد الشي لي صرالي مع ولدي الاول(وفاة ابني البكر) المهم الحمد لله سلكت على خير و زيدت و جبت بنيتي ربي يحفظها و يحفظلكم وليداتكم و يكبرهم ف طاعة الله ..و سيدي راجلي بدا يتمسخر خلي نفوتو رمضان و من رمضان العيد الصغير و من العيد الصغير اني نخدم ف الطوموبيل و من الطوموبيل العيد الكبير و من العيد الكبير خلي نفوتو عرس اختي و ختو لحد الان تاجل عرسها الف خطرة كل مرة بسبة و اخر سبة عجوزتها تكسرت ...و كي نجبدلو على الرحلة يموت و يبرد و
* كي نشكي لامي تقولي ماتجبديلوش خلي يشبع برايو مع العلم قشي كامل رحل بقالي غير السرير و الخزانة و الكوافوز و كل يوم مشاكل عمامه التي لا تنتهي و بويو مع خاوته و معاه اكم تعرفو دار العايلة كيفاه و مؤخرا خرجهالي قالي منا للصيف و يرحمها ربي
تخيلوا فرطت في خدمتي علاجال بنتي و قلت ماعليش يخي راني راحلة نحكم داري و نربي بنتي لقيت روحي بونيشة في دارهم حتى هو ملي يدخل و هو يأمر استحلاها كي قعدتله في الدار حسيت قرايتي راحت و احلامي تحطمت كي نشوف لبنتي نفرح بصح كي نتفكر كيفاه راني عايشة و التخيبيث تاعه معايا نكره حياتي و تغيظني خدمتي لي ندمت عليها
لقيت روحي ضيعت شخصيتي و ضيعت احلامي علاجال الدار لي ما سكنتهاش و عدت نجداق كلش تالمون كون يصيب ما يعطيني فرنك يصرف على بنتو و دارهم و روحو و انا ماهو مدايرلي حتى اعتبار كي نقولو اعطيني نشرري يقولي المصروف بززاف مع العلم انه مقتدر ماديا
تقولولي بالاك امه و ابوه نقولكم حاشاهم مساكن كل يوم يقولولو اخرج خلي خوك يتزوج و هو لي لاصق مع العلم خوه 35 سنة و ماهوش حاب يتزوج علاجال الظروف لي راهم ساكنين فيها و دار السبيطار لي رانا فيها

سخفت نستقل نلبس وش نحب نطيب وش نحب نظف داري كيما نحب نرقد كيما نحب نربي بنتي كيما نحب ..لكن للاسف مع سي زوجي ما لقيت حتى حل
انصحوني و ادعولي من فضلكم

[*** عبق الزهور ***]

السلام عليكم
اولا مبروك عليك وربي ان شاء الله يكبرها في طاعتو ويحميهالك من كل سوء ^^
ثم هل حاولتي ان تعرفي السر وراء تاجيله للموضوع حاولي تفتحي معاه الامر ربما تعرفي وعلاه راهو يدير هكذا بالاك عندو سبب مقنع
وما تقلقي روحك ما والو لي كاتبها ربي توصل وبالاك فيها خير
اما مسالة انك بطلتي خدمتك اظنك تسرعتي اخية خصوصا وانك تقولي انو ما يصرفش عليك فهميه بلي راكي عايشة تحت جناحو يعني راهو مسؤول عليك ما عندكش شكون لي يلبيلك احتياجاتك من غيرو خصوصا وانك بدون وظيفة الان
كان الله في عونك اخية ^^

[kacimo.samy]

السلام عليكم
ربي يعينك

[ROMMEL]

الحل عندك انتي ماكيش راح تلقايه عند أخر

[samir-physique]

بسم الله و عليه توكلنا
اظن والعلم لله ان زوجك ينتظر ان يدفع اخر قسط ثم يسجل البيت باسمه ثم يسكن
يريد ان يحس بانه يعيش في ملكه

[محمد جديدي التبسي]

مشكلتك لا تقارن بما تعانية متزوجات من الضرب والاهانة وغيره
انت عندك حل واحد ووحيد وهو الصبر والدعاء حتى يفرج عليك ربي
وأكثري من الدعاء وما تمرضيش روحك بالتفكير لأنو الضغط النفسي هذا يسبب أمراض عضوية كثيرة ربي يفتح عليك.

[yasmine700]

ربي يعينك اختي مادام سلكت السكنه انتي راحله راحله زيدي اصبري وربي معانا انشاله

[ع.عيسى]

ربي يفرج عليك اصيري شوية ، وشوفي مع والديه ان امكن باش يقنعوه باش يرحل

[Rafik.B]

الصبر يا أختي راكي غير تحرقي في ذمك وغيري معاه الأسلوب أسلوبك والله أعلم هو اللي راه مخليه ميبس راسو احكي معاه بالظرافة

[حاملة المصحف]

الصبر اختاه الصبر و الدعاء ربي يفرج عليك
وانت قلتيها شوفي لبنتك و افرحي بيها و ان شاء الله تفرج

[*حامل المسك*]

السلام عليكم
عليك بالصبر اختي. فانك سترحلين الى بيتك الجديد على خير ان شاء الله ان اجلا اوعاجل مادام نويتما ذلك انت وزوجك اعتقد ان سبب تماطل هذا الاخير هو صعوبة ذلك بالنسبة.اليه الله غالب والف مع دارهم انا صارلي تقريبا نفس الشيء انا بنيت داري وكملتها ما خصها والو كل شيء فيها ولكن زوجي بقي يتماطل كل مرة يخرجلي بخرجة وكي تحتمت باش نرحلو عمل حاله بالبكاء ايامات وهو حازن ومع مرور الوقت والف وكي نفكرو واش كان يدير يحير في روحو خاصة اننا كنا نسكنوا مع والدته في غرفة وحدة قديمة حيطانها رايبين وولادي كبروا ولا يرقدوا مع جداهم واليوم الحمد لله راني في داري كل شيء بالمكتوب وانا مع رد الوادة نتاعك ربي يحفظهالك

[*اعتز بوطني *]

اصبري بيد ربي الفرج قيمي الليل وادعي "ان مع العسر يسرا"

[Saif al-Islam]

الإنسان بطبعه إجتماعي ..و هناك من لا يستطيع مفارقة أبويه ... و لعلّه باقٍ بسبب حمايتهما ...و ربّما أنت إشترطّي عليه أن تكوني لوحدك في هذا المنزل و هو يريد أخذ أبواه معه ....و ربّما المنزل الجديد متواجد في حي لا يساعده فيما يخص عمله ....و ربّما هو يعمل حاليًا كل ما بوسعه لإيجاد حل ما حتى يتمكن من الرّحيل بدون أضرار .......

لا ندري ما يدور في رأسه أو ما الذي جعله يؤخّر الرّحيل خاصتًا إذا كان زوجك كتوم ، لذلك أنصحكي بالصّبر يا أختي ....خليها للصّيف إدير ربّي طريق كما قال ، المهم هناك أمل و هناك منزل ، فتخيّلي أنّ هناك من لا يملك لا أمل و لا منزل ....صبرًا جميلاً يا أختي

بالتّوفيق