حساء التشيشة بي الزعتر اكلة تقليدية عند اهل تلمسان تفضلو

[أم فاطمه]

:dj_17: السلام عليكم اخواتي الكريمات

جبتلكم اليوم اكلة تقليدية نطيبوها في الغرب وخاصتا في تلمسان حنا نحضروها في سائر الايام و خاصتا يوم عيد الفطر نتناولوها في الصباح قبل ما نتناولو القهوة وهيا حساء التشيشة تاع الشعير بي الزعتر وهي صحية بي معنى الكلمة تطهر المعدة هده الاكلة تجدها حاضرة يوم العيدفي كل بيت في تلمسان بسيطة لكنها مفيدة
بسم الله نعرفكم بيها
انا درت غرفية تشيشة
مغرفة فلفل احمر حلو
مغرفة صغيرة حار
مغرفة ملح حسب الحاجة
مغرفة توم بودرة
3 مغارف كبار زعتر مرحي
4 مغارف زيت
مغرفة طماطم مصبرة
الطريقة
ضعي الماء في قدر على النار ولما يغلي ضفيله التشيشة وتركيها تنضج على نار قليلة باش ما تفيضش

لما تحسيها طابت ضفيلها الزيت 4 مغارف والطماطم والتوابل كما في الصورة وتركيها تغلي شويى باش يندمجو المقدير
حنا نقدموها سخونة مع اضافة. مغرفة تاع زبدة في صحن التقديم وشهية طيبة

https://www.m5zn.com/newuploads/2017/11/07/jpg//fd130bd4b955e33.jpg


https://www.m5zn.com/newuploads/2017/11/07/jpg//616294bc3439059.jpg.





https://www.m5zn.com/newuploads/2017/11/07/jpg//be26c2bfb85b356.jpg.



https://www.m5zn.com/newuploads/2017/11/07/jpg//9d5f2f35b7aa146.jpg.

اتمنى هده الاكلة تعجبكم وتجربوها غرفية واحدة تخرجلك قدرة تاع الحساء تحياتي:mh31:

[ام هدول]

اول مرة نعرف هاد الحساء ..التقلدي الرائع الصحي ..شكرا ..ام فاطمة لي عرفتينا عليه ...الدشيشى فقط هي نفسها كما تع ..امينة ..القمح مفلق ..ولا وحدة اخرى نورينا الله ينورك

[أم فاطمه]

السلام عليكم اهلا ام هدول هدي تشيشة تاع الشعير مشي القمح وهدي نطبخوها ما نفوروهاش هده اكلة تجي كي الحساء تجي خفيفا وكاين وصفات
اخرى نخدموها بتشيشة مشاء الله بلادنا فيها كل خير وكل منطقة تختلف عن منطقة في الاكلاة التقلدية شكرا على مرورك وعلى كلامك الجميل تحياتي

[nihal159]

يعطيك الصحة أم فاطمة لأنك عرّفتينا بهذي الأكلة التقليدية؛ بارك الله فيك

[وردة الرمال43]

يعطيك الصحة اااااااااممممممممم باينة تشهي نموت على الطباق التقليدية ههههههه تقول عليا عجوزة هههههههههه
فكرتيني في طبق عندنا يشبهلو نقولو بودشيش نديروه بالبصل الاخضر الطويل وعشبة زي اللسلق نقولولها سمومة وطبعا المكون الرئيس دشيشة المرمز ونحطو زيت زيتون اااامممممممم يهبل

[أم فاطمه]

السلام عليكي نهال لكي بلمثل اسعدني دخولك الجميل

[أم فاطمه]

السلام عليكي وردة الله يبارك ناس بكري كنو صنف واحد من الحبوب يحضرو منه عدت أطباق تشهي وتركو لنا ارث الله يرحمهم

[تاج الوقار16]

أختي تشيشة الشعير اللي نديرو بيها الحريرة نورمالمون
وحبيت نفهم
دراتيها غير بالطماطم بلا بصل

[أم فاطمه]

السلام عليكي اختي تاج تشيشة الشعير لي رها في الغرفية مشي تاع القمح لي يصنعو منها الفريك
مندروش البصل ندرو التوم بودرة او فصوص مبشور شكرا على مرورك الجميل تحياتي

[سوسن تسنيم]

يعطيك الصحة أم فاطمة
حتى حنا درناها للعشاء البارح
في هاذ البرد سلكها غي تشيشة بالزعتر و لا بركوكس بالعشوب
امممممم جعت

[أم فاطمه]

السلام عليكي سوسن نورتني شكرا