جاري يؤذيني

[مشكلتي]

السلام عليكم اخوتي والله عائلتي الصغيرة تعيش مشكلة الجار السوء المؤذي لجيرانه وعدم احترام اوقات الراحة المتعامل عليها عرفيا كالقيلولة و ما بعد منتصف الليل فأبواب بيته لا تسكن ولا تنغلق بهدوء فلازم يخبطوها بكل قواهم والله كانه زلزااااال من هول الصوت تكلمنا و تكلمنا معهم على اساس النصيحة لكن لا جدوى بعد مرور يوم فقط تعاد نفس الافعال و فوضى ليلا و تشغيل كل الالات الكهربائية حرنا فصار ليلنا نهارا يسهرونا كما يحبو اتخذنا كل الاسباب لكن ما يحشموش و الله صرت اخاف ان تحدث جريمة ويسيل الدم ادعولنا ان يهديهم الله ويفرج علينا عارفة رح البعض منكم يقول لو كان انا
راني قتلتهم و درت و درت على بالي احنا دمنا سخون لكن ما ناش في غابة حتى ندمرو رواحنا بايدينا مشكورين اخوتي على القراءة و الدعاء

[قدور بن عاشور]

قدم شكوى رسمية إن كان في هذيك البلاد قانون

[مراد سابقا10]

يا خويا في حالات كيما هذي لازم الرحيل مكانش حل اخر لتعودوا في الكبيرة

وحتى ولو شكيت بيه لن يكون هناك حل ولا دليل قادر يزليك نورمال ومبعد يستمر في ازعاجه

شوف بلاصة اخرى وارحل ليها

[ابو سليمان10]

يوجد اشخاص مكان عيشهم الطبيعي هو الزريبة...كما يوجد اشخاص يتعمدون ايذاء الجيران

الحمد لله الاسبوع الماضي تخلصنا من جيران مزعجين الجميع فرحان حتى الجيران البعيدين بعض الشىء..مظاهر الارتياح منتشرة في الحي و عم الهدوء و سقطت الامطار و كل شىء جيد بعد اندثار الوباء

[بناتي نور العين]

قد يصبر المؤمن عن أذى جار السوء ويحتسب الأجر عند الله..


التباعد عنه بالانتقال عنه - إن وجد لذلك سبيلًا -.


جعل الله لك مخرجا عاجلا غير آجل .

[رندة.]

ربي يفرج عليكم ويهدي جيرانكم ان شاء الله
وحدة نعرفها كانت تعاني من إيذاء جارتها ، ماخلاتش حاجة مادارتهاش لكن الجارة ما توقفتش على ايذاءها، قررت في الاخير انها ترحل ومكانتش حابة تبيع دارها راحو كراو ( استأجروا) دار بعيييييييدة على دارهم الأصلية وكراو دارهم. وبدراهم الكراء تاع دارهم يخلصو الكراء تاع الدار الجديدة، المهم قاتلنا الآن الحمد لله رانا مرتاحين ياااااسر، ونستنى حتان ترحل هاذيك الجارة باش نرجع لداري.

الله يهديهم يوصلو حتى يخرجو الواحد من دارو

[nihal159]

المشكل هذا منتشر بقوة في المجتمع، و اغلبنا نعانيو منو، احمدو ربي ان مشكلتكم تكمن في الضجيج و خبط الابواب، ربي يفرج عليكم.

[النجمة القطبية]

كيما قالت الاخت نهال قبلي اغلبنا نعانوا من نفس المشكل
غلق الابواب بقوة واصوات المهراز واحيانا اغاني لما يزوجو اولادهم تزعج الجيران خاصة اللي ميحبوش يسمعوا
فضلا عن الزغاريد في الدرج وخارج بيوتهم ونساءهم طالعين هابطين دايرين الحس في الدرج حتى تقول مكانش راجل يحكمهم
والواحد راه صابر حتى ربي يفرج عليه
المهم انت متبادلش السوء بالسوء واصبر لعل الله يفرج عليك وعلينا بسكن افضل
موفق

[ام رضوان]

السلام عليكم
وااااش نقولك يااخي احتسب عند ربي سبحانو
اقسم لك برب الكون يالوكان تسكن مع جارنا غير شهر والله العظيم غير تتمنى الموت لنفسك
وين راه لخبيط تاع البياب وين رمي الفضلات وين الغناء زايد للاخر وين الضياف
اللي مايخلاصوش والجري فوق رؤوسنا وسرقت اغراضنا من زرابي ووو
حتى خيط البارابول سرقوه لقينا رواحنا زيرو معاهم
اتخيلو يااخواني بالمارطو بيكار من 8تاع ابصباح حتى ل10تاع الليل وهوما يقلع فوق راسي ومانقدروش نتكلم لانو ولادو خريجي سجون
وخلي وخلي والاخيرة خلاص لباسنا كامل حرقوهولنا
لاني لما انشر الغسيل يرميو عليه الطفية تاع الدخان حرقولي كل شيء
والله رانا بدواء الاكتأب كرهت العيش من هذا الجيران
حسبي الله ونعم الوكيييييييل
كل يوم ندعي ربي يفرج ان شاء الله
راني اختصرتلك معاناتنا لكي تصبر وتعرف انك مش وحدك
اذا عمت خفت
السلام

[oumhana]

عند بالي غيرأنا لي راني نسوفري أتريهاالكل مكوي كحالتي ربي يفرج عليكم وعليا.آمين

[djalal200984]

كيما يقول المثل [ شوف الجار قبل الد ار اظم صوتي للاصوات لي تقول الباب لي يجيبلك الريح سده واستريح ادا كان باستطاعتك التحول من هدا البيت فسوف تستريحين
ان شاء الله فهدا الجار مؤدي ابتعدي خير لك size="4"][/size] size="3"][/size]

[لمسة ابداع]

و الله محسوبك تحكي على مرت خويا
اللي ساكن فوقنا
رايحة تهربني من داربابا
ينات ختها يضلو يجرو فوق راسي في القايلة على 12 تاع الليل على صباح ربي
هي بالطالون تاع الحطب تمشي و تخبط ,لماعهن محسوبها تتقابض معاهم

هي تمكر راجلها ما يفهم لا عربيي و لا فرونسي مرتو و البراكة


اصبر كيفي ووكل ربي حتى تهار تفرج

[الصديق قروف]

ربي يفرج
كيما قالو بدل الجار
اكريها و اكري انت في بلاصة اخرة احسن حل يضهرلي حتى تفرج
او مليح تكريها لواحد قبيح اكثر من جارك ههههه باش يربيه

[النجمة القطبية]

خخخخخخخ يبدو ان كامل الجزائريين يعانوا من نفس المشكل الضجيج
وبعد ما قريت بعض الردود حسيت ان جيراني نعمة مقارنة بالبعض على الاقل شوية حس معليش المهم محترمين الحمد لله
لكن يبقى مشكل الحفلات والاعراس يعملوا هرج كبيرلمدة طويلة
والمهراس والروبوات والابواب خاصة تع الحديد :confused: ورغم دلك لما تجي عندي عجوزتي تقولي عندك واحد الكالم :D
لان مشكل الضجيج ماشي في العمارات برك حتى البيوت كل مرة تلقى واحد يكسر داروا ويبني مارة يكسر الدروج مرة البالكون هه وادا حبسوا هوما تجي الحكموة تكسر وتبني
هدي هي بلادنا والحمد لله

[dounia el amani]

ربي يهديهم

[beautifulmin85]

بالاضافة لكلام لاخوة قبلي ساروي لك قصة رواها لي صديقي

قصة جاره الدي توفي وبعد ايام قام احد اولاده بالدهاب لجارهم الدي يسكن فوقهم واخبرهم ان يصلحوا انبوب الصرف الصحي

فتفاجأ الجار وقال له انه سليم وليس هناك تسريب فادا بالولد يقول له بل هناك تسريب وهو مند اكثر من عشر سنين

ووالدنا حرم علينا ان نتكلم في الموضوع معك وكان يضع اناءا تحت التسريب ويرميه لاحقا !!!!!

فانهمر الجار بالبكاء واخد يطلب السماح وانه لم يكن يعلم ولو كان يعلم لاصلح الامر

لكن الولد اجابه ان والده لم يشأ اخباره لانه يعرف انه فقير وقد يكلفه التصليح فآثر ان يصبر ويدخر دلك لآخرته

افضل من يخبره فيصلحوا المشكل ....

ربما لكل رأي في القصة ولكن الحقيقة هي أن الجار اما يكون نعمة او ابتلاء فان كان الاولى فسعادة بالدنيا اما الأخرة فمع الصبر ستكون السعادة بالآخرة

والله المستعان

[نور العلوم17]

ادعيلهم ربي يهديهم و خلاص

[mimi mimita]

فوض امرك لله مكاش كما حسبي الله و نعم الوكيل ضربت العربي ساهلة مي ضربت ربي واعرة

[abdou30]

الله يهدي ما خلق

[sam_16]

ادعيلهم ربي يهديهم و خلاص

[mouhamed41]

الى الاخت صاحبة المشكلة
والله يا اختي انا بيتي مستقل اي لست في عمارة
لكن جاري انتقل من الريف واشترى البيت بجواري
وبدا في البناء الطابق فوق الاخر له ثمانية ابناء ذكور
اربعة منهم متزوجون ويقيمون معه في نفس المسكن
ولهم ابناء
حقيقة خارج البيت هم قمة في الاخلاق لكن داخل البيت شياطين
انا لااتكلم عن اشغال البناء فهذا امر مفروغ منه المشكلة ان الضجيج
والضوضاء لاتتوقف عندهم ولو خمس دقائق من السادسة صباحا الى منتصف الليل
لاتهمهم راحتي وراحة ابنائي اطلاقا ابواب تفتح وتغلق في كل ثانية اصوات المطبخ
اطفال تجري ذهابا وايابا جري في السلالم باب المراب يفتح ليلا لادخال او اخراج سياراهم
وتظل مشتغلة طول النهار تقريبا ضرب في الجدران في كل لحظة
والله من المستحيل ان اخذ قيلولة ولو ربع ساعة والله مستحيل انتظر انا وعائلتي حلول منتصف الليل بفارغ
الصبر حتى نستسلم للنوم للنهض على الخامسة اوالسادسة صباحا على الاكثر
تكلمت معهم جميعا اكثر من مرة دون جدوى
والله كرهت حياتي حتى البيت لااستطيع بيعه فليست لدي شهادة المطابقة وان بعته اين اذهب