طفح الكيل

[مشكلتي]

السلام عليكم
أنا سيدة متزوجة و كنت موظفة قبل الزواج لكن زوجي رفض عملي خارج البيت مشكلتي مع زوجي هو يريد مني أن أطبخ جيدا ولا أكل جيدا وأنظف و أكوي ولا أخرج للتنزه يريد أن أنجب له الكثبر من الأبناء دون أن أزور طبيبة النساء
مشاكله ومشاكل أهله مرضتني منذ فترة أخذني لطبيب القلب أعطاني ورقة فحوصات في طريق العودة للبيت أشبعني شتائم و دعاوى قال لي كم أتمنى أن تموتي ...بكيت بصمت ولم أجبه بكلمة بعدها أخذني لبيت أهلي لكي أجري الفحوصات و بالطبع فعل ذلك لكي لا يدفع ثمنها
ماما أخذتني للمختبر و أجريت الفحوصات و الحمد لله لكنها قالت لي يابنتي متزيديش جي عندي كي تمرضي نبعثلك دراهم و زوجك يديك للطبيب العائلة كبرت و مكاش وين نستقبلك أنت و وليدك......صدمتني لكني عذرتها
أنا كانت عندي وديعة في البريد بإسمي مخبيتها للزمن أخذها زوجي العام الماضي و أعطاها لأمو كانت رايح للحج ولما كنت في بيت أهلي تصدق بمبلغ مالي لأختو راهي تبني مع العلم هو معندوش سكن يعني الدراهم لي من المفروض يداويني بيهم تصدق بيهم
دبرو عليا كيفاش ندير راجلي حقار ويضرب ...حبيت نرجع نخدم و نصرف على صحتي
لي من نلجأ معنديش مكان نرجع ليه في دار بابا ......حتى للمبيت ليلة أو ليلتين
واش ندير ربي يجازيكم

[ع.عيسى]

الله يفرج عليك اختي ....الطلاق في حالتك سيزيد الطين بلة وبفاقم من مشكلتك ....حاولي خلق مصدر رزق لك وانت في البيت ، مثلا ان تتعلمي حرفة منزلية تدر لك المال كالخياطة مثلا ...فمثل هذه الحرف تدر الكثير من المال لاصحابها .كما يجب ان تتجنبي المشاكل نهائيا حتى وان اتت اليك المشاكل ..فصحتك اولى فالتركيز في المشاكل سيجلب لك السكر والدم والامراض النفسية ....فحاولي خلق عمل لك في البيت يدر لك المال وينسيك في مشاكلك .

[kacimo.samy]

السلام عليكم
رجال اخر زمان...
يجيب بنت ناس ويضيعها .. ما يعرفوش حاجة اسمها امانة؟وظلم؟
راجل اذا جاب مرا اذا احبها اكرمها وان ابغضها لم يظلمها

يا اختي حلك كثري استغفار

وكوني معاه مليحة حتى سماطة هو يحقر ونتي ناس ملاح معاه حتى يكره حياتو ويقول انا واش راني داير معها وهي مليحة ..حتى يفيق مع عمرو ويتريقل لانه يجي نهار ويريح مع راسو
والخدمة ممم الخياطة فيها دراهم تعلميها واكري رواب تاع العرس
ربي يفرج عليك

[زبدة ذايبة]

غلطتي النهار الأول.

وصلتيلوا أنك المرأة الحديدية

عندها المال وعندها الصحة

تعرف تخدم وتجيب الذراري.

ونهار ماتقصري او تظهر عليك بوادر الضعف يبدى في الشتائم.

كسرك في الأول وكنت قابلة للكسر.

وحتى لو كان تحاولي ترفدي روحك

رايح يعاود يحاول يكسرك.

إذا تشوفي عندك القوة للمواجهة.

ماتسكتيلوش واجهيه.

وش حب يدير ، يدير.

بالنسبة ليك هذي مسألة وقت فقط.
لأنك كلما فكرتي تكوني غير هذ الشخصية اللي راكي عليها كلما تسلط عليك.

هذا ماشي راجل.للأسف.

وتتحملي انت الحال اللي راكي فيه.

ماتزيديش تبكي !!!!!

تقابلي الشتائم والكلام البذيء بالدموع المخفية.


حتى البكاء مثل الأطفال ماراكيش قادرة عليه.

على واش راكي قادرة؟؟؟؟؟؟

ماخص تفكري تخرجي تخدمي؟؟؟؟؟

وين تروحي.؟؟؟؟؟؟

مع راجل مثل هذا يذبحك ويتهمك في عرضك بكل بساطة.

لذا ياعزيزتي.

قبل ماتفكري تخرجي تخدمي

فكري كيفاش تبدلي هذ الشخصية الضعيفة اللي ماراكيش رايحة بيها بعيد.

تعلمي أولا دافعي على نفسك

وتعلمي ماتخليهش يهينك ويسبك ويشتمك وتكتفي بالاستماع فقط.

نهار ماتعرفي روحك تبدلتي وهو كي يجي يهدر كاش كلمة يحبط عينيه.

هذاك النهار قوليلوا راني حابة نرجع للخدمة.

خلاك للجوع وللإهانة وأكل مالك بالبطل. واكل تعبك وجهدك ظلما وعدوانا وزيادة على هذا قلة الاحترام.

وزدتي كملتي عليها بالخوف والجبن، خليتيه يهينك ويوصلك لهذ الحد.

مارانيش نقولك طلقي.

راني نقولك حافظي على كرامتك.

ماتقوليش كي تكوني بهذا الحال مايطلقكش. بالعكس.

مع الحقرة اللي راكي فيها ماشي باين راكي مطولة عندو.

حاولي تتداركي أمورك قبل مايطيح الفاس في الراس.

وصليلوا أنك سيدة يجب أن تحظى بالاحترام.

وصدق المثل : ومن يهن يسهل الهوان عليه.

صححي وضعك بالاول ثم أطلبي العمل لأنه تحصيل حاصل.

وممكن لوكان تغيري من نفسك ماتحتاجيش تخرجي تخدمي.

رب يصلح حالك

اسمحيلي شحال زعفت ماتقدريش تتصوري.

[غصن البآن]

مرات العمل هو حل و ضرورة ..ليس لانو لايوجد من يعيل المراة ..لكن اصبح الرجال مجرد ذكور او اشباه رجال ..مع احترامي للجميع ... اصبحت المراة التي تثق وتعامل بنيه وتتنازل ..تدفع الثمن من صحتها وراحتها النفسيه ...لا حول ولا قوة الا بالله ...اشعر بالقهر حين اقرا هكذا مشكلات ...زوج حقار و اخر همو الاسرة نتاعو ..واهل كل مايفكرون فيه البنت راهي بوليدها والدار باهلها لازم تقعد فبيتها ...كم من امراه اصيبت بامراض مميته بسبب الضغط وتحمل ما لايتحمله قلب ....استغفر الله

كلامي ليس موجه لكِ اختي لكن يستفزني الرجل الذي يجحد النعم و ينكر جميل زوجته ويريدها كامله لا يشوبها عيب ..والكمال لله ..ولعل ذاك الرجل يملك من العيوب ما يغث النفس

ناس متخافش ربي في النساء ...ومعندهمش خير فاهلهم

وكلي ربي على كل من ظلمك واحتسبيه وادعي ...والعمل اذا الموضوع كما ذكرتي هو حل ...حتى زوجك راح يتغير معاك لان معدنه صدئ ميشكرش النعمه ...الطلاق ليس حلا ...لكن تغيري و حاجه من حقك تعلمي متتنازليش عليها مادامك متاكده انه لايستحق التنازل
ربي يهديه ويفرج عليك

[بناتي نور العين]

أسأل أن يفرج همك، وينفس كربك

كلما تقربتي إلى الله تعالى بالدعاء، والذكر، والإكثار من الطاعات،
والصدقات، والنوافل، وفعل الخير والإحسان إلى الغير..
سييسر الله أمورك مع زوجك

ونسأل الله أن يصلح لنا ولكم الأحوال، وأن يرزقنا طاعته .

[ROMMEL]

مازال هاذ النوع من الرجال لم ينقرض بعد؟؟؟انت باين عليك ناس ملاح ونية بزاف ربي يفرج عليك

[رندة.]

ربي يهدي زوجك ويفرج عليك ان شاء الله
ما دام كتبتي طفح الكيل معناها راكي عانيتي كثير قبل ماتكتبي مشكلتك، في البداية حبيت نقلك بلي انتي تنازلتي كثير على حقوقك، هذا الشي خلى زوجك يتمادى عليك تدريجيا. حتى وانتي مريضة ما رحمكش، واش من مودة وواش من رحمة هاذي.
ما تزيديش تخليه يهينك انتي زوجته من حقك انو يحترمك ويعالجك هو مش اهلك، الا اذا كان محتاج، بصح مادام يصدق في الدراهم على البناء معناها ما هوش محتاج.... بصح علاه راهو يعامل فيك بهاذي القسوة.... وانتي علاه ماتحكيش لداركم يديرولو حد؟ الى متى رايحة تبقاي صابرة على الظلم؟ ديجا الطبيبة عطاتك باش اديري فحوصات على القلب. راكي تستناي حتان يتوقف قلبك من المحصة؟ انتي راكي حاسة بلي ضحيتي على جال الراجل هذا وهو مش مقدر تضحيتك، على هذا راكي مريضة ومقهورة، فيقي لروحك وما تزيديش تضحي وتخسري صحتك.
استغفري وتصدقي وان شاء الله ربي يفرج عليك.

[mohamed nadim]

لا تعملي و لا هم يحزنون
لانك حتى و ان بحثت عن مصدر للمال سيكون مصيره الى جيب زوجك رغما عنك
و لا تفكري في أشياء تافهة فأمك قد قطعت عليك الطريق حتى لا تفكري في الهرب أو الطلاق
يبدو أن زوجك بخيل جدا

ليس لديك الا الله و الاستعانة بالصبري و احتسبي دلك لوجه الله حتى يكبر ابناؤك
ربما يكونون لك سندا

[fati21]

حبيت ندعلك ربي يفرج همك ويهدي زوجك

[Hanan salim]

لا حول ولا قوة إلا بالله العلي العظيم الله يكون بعونك يا اختي هاي معاااااناه كبيره .. مابعرف شو أحكيلك بس صلي استخاره أحياناً الطلاق بكون خير استخيري رب العالمين وربنا راح يختارلك الأفضل إن شاء الله

[ابو سليمان10]

لا حول ولا قوة الا بالله
هناك اناس غير مؤهلين للزواج..بل حتى للعيش في مجتمع..مثل هؤولاء الاشخاص يستحقون ان يعزلوا تماما عن المجتمع

[قدور بن عاشور]

لوكان جينا في دولة تحتكم للشرع لنصحتك باللجوء إلى القاضي حتى تستعيدي كرامتك و كبرياءك
و لكن مادام الحال كما نعلم فماحك جلدك مثل ظفرك
علميه أن المأكل الطيب و اللذيذ و الإعتناء بالبيت أقل شيء يجب أن يقابل به هو الإحترام
أوقفي و انفضي الغبار على كتافك و لكن بأدب و إن قل أدبه.
مع الوقت راح يحط نفسو في بلاستها و يعرف قدره


(https://www.google.ca/url?sa=t&rct=j&q=&esrc=s&source=web&cd=2&cad=rja&uact=8&ved=0ahUKEwi_su6vwOLWAhWiApoKHZoVDOIQFggxMAE&url=https%3A%2F%2Fwww.isalna.com%2F242787%2F%25D8% 25A7%25D9%2584%25D9%2582%25D8%25A7%25D8%25A6%25D9% 2584-%25D9%2585%25D8%25A7%25D8%25AD%25D9%2583-%25D8%25AC%25D9%2584%25D8%25AF%25D9%2583-%25D8%25B8%25D9%2581%25D8%25B1%25D9%2583&usg=AOvVaw1f3M03zX34xIoPBUshWJhD)

[rose2010]

مشكلتك تشبه مشكلة الكثير من النساء وللاسف.
الطلاق يا حنونة كوراج وانت للاسف ما عندك هاد الكوراج بكل صراحة..رغم أن الله عز و جل قال في كتابه العزيز

إِنْ يَتَفَرَّقَا يُغْنِ اللَّهُ كُلًّا مِنْ سَعَتِهِ وَكَانَ اللَّهُ وَاسِعًا حَكِيمًا﴾

[nihal159]

ربي يفرج عليك و يهدي زوجك

[طيور الجنان]

ربي يفرج عليك اختي هذا ظلم اكثري من الاستغفار و الدعاء و في نفس الوقت حاولي تقوي شخصيتك ماشي تقبلي كل شي ربي يسهلك و يسخرلك زوجك اااامين

[abdellah36]

اين هو الظلم المزعوم .... كون زوجك منعك من العمل فهذا فيه خير كثير في الدنيا و الاخرة ,,,,,, المراة العاملة امراة مهملة و مضيعة لدبنها و لزوجها ,,,,,,,,,,,,,

كونه اعطى الوديعة لامه .....ان كان هذا باذنك فلماذا تمنين عليه الان و ان كان بغير اذنك .....فهذا مستبعد لا يمكن ان يسرق مالك مجبرة ......

اعطاءه المال لاخته هذا دليل على انه شخص مسؤول عكس ما يفهم من شكواك ,,,,, و اما المنزل فالظاهر انكما تسكنان عند اهل زوجك و ما هو العيب في ذلك هل اشترطت عليه السكن قبل الزواج .....ا

قضية المرض ، انت لم تذكري ما هو المرض الذي اصبت به ,,,,,,,,,,, و لم تذكري نتائج الفحوصات و الذي يظهر لي انها مجرد حجج تتحججين بها من اجل ان تعودي للعمل ,,,,,,

اذا كان زوجك قد اشترط عليك ترك العمل قبل الزواج و وافقت فيجب عليك ان تنسي امر العمل نهائيا و تنزعيه من راسك و لا تجعلي المشاكل التي تحصل بينكما شماعة لتظهري الندم فلولا تركك للعمل لكنت الان عانس من العوانس المرميات في اروقة الادارة ...............فاتقي الله في نفسك و اعرفي حقوق زوجك و فضله عليك

[خالد عنابي]

ماهذا ؟


ياخذ اموالك ويعطيها لامه واخته من اعطاه هذا الحق ؟ ياله من حقير


المفروض الراجل يصرف على المرأة وليس يديلها دراهمها والعجيب انه يحوس ماتخدميش وماتحوسيش وماتروحيش للطبيب


يعني ممارسة دور القوامة بشكل تقليدي كامل



ولكن مع التهرب من مسؤولية الانفاق ههههه سبحان الله


المعيشة مع هذا الحيوان ليست بالحل مهما كان الامر


شوفي كيفاه تديري وترفعي عليه دعوى خلع او خوفيه على الاقل



انتظري حتى يضربك ويترك اثرا وروحي للطبيب الشرعي وادي دليل واشكي بيه


اذا وصلت الامور للمحكمة فالاخيرة ستقوم بعقد جلسة صلح ويلزم تشعليه مليح وتذكري كل تصرفاته الشنيعة


وخصوصا توقيفك عن العمل واخذ مالك دون رده



هذا النوع من الحقارين لايخاف او يرتدع الا من القوة


وكي يشوفك عاقلة يرجل

[خالد عنابي]

اين هو الظلم المزعوم .... كون زوجك منعك من العمل فهذا فيه خير كثير في الدنيا و الاخرة ,,,,,, المراة العاملة امراة مهملة و مضيعة لدبنها و لزوجها ,,,,,,,,,,,,,

كونه اعطى الوديعة لامه .....ان كان هذا باذنك فلماذا تمنين عليه الان و ان كان بغير اذنك .....فهذا مستبعد لا يمكن ان يسرق مالك مجبرة ......

اعطاءه المال لاخته هذا دليل على انه شخص مسؤول عكس ما يفهم من شكواك ,,,,, و اما المنزل فالظاهر انكما تسكنان عند اهل زوجك و ما هو العيب في ذلك هل اشترطت عليه السكن قبل الزواج .....ا

قضية المرض ، انت لم تذكري ما هو المرض الذي اصبت به ,,,,,,,,,,, و لم تذكري نتائج الفحوصات و الذي يظهر لي انها مجرد حجج تتحججين بها من اجل ان تعودي للعمل ,,,,,,

اذا كان زوجك قد اشترط عليك ترك العمل قبل الزواج و وافقت فيجب عليك ان تنسي امر العمل نهائيا و تنزعيه من راسك و لا تجعلي المشاكل التي تحصل بينكما شماعة لتظهري الندم فلولا تركك للعمل لكنت الان عانس من العوانس المرميات في اروقة الادارة ...............فاتقي الله في نفسك و اعرفي حقوق زوجك و فضله عليك

هل وصل بك التحيز والتبريرات السخيفة حد القول ان اعطاء مال زوجته لاخته يدل على المسؤولية ؟


يمد من مالو علاه يمد مال زوجتو لامو واختو ومبعد كي تمرض يديها لدار باباها باه مايخلصش حق الادوية ؟



ومهما كان المرض فلا يحق له ان يشتمها بسببه

[الماسة النادرة]

ربي معاك والله غير حرت لكن نقولك كوني شديدة معاه شوية لأنو اللين مجابش فايدة