زوجي يرفض العلاج

[مشكلتي]

السلام عليكم
أنا اختكم متزوجة بدون أولاد مشكلتي واضحة من عنوانها عالجت في بداية زواجي وحدي و كانت مشاكل بسيطة و الأطباء ديما كانوا يطلبو تحاليل زوجي لي كان يرفض في كل مرة و بسيف باش قبل في الأخير و اتضح أنو عندو نقض استعمل الدواء لمدة 3 أشهر و كي ماجابش نتيجة خلاص رفض يكمل العلاج بشكل نهائي مرت السنوات حتى لحقنا ل 7 أعوام زواج قررنا نتكفلو بطفلة و الحمد لله جبناها قبل عامين و راهي قرة عينينا لكن هذي الأيام كل مانروح لبيت أهل زوجي أم زوجي تقولي كيفاش ماراكمش تعالجو و علاش راكم تستهزاو و ديما نحسها ماراهيش مأمنة كي نقوللها أن السبب من عند زوجي و هو رافض يتعالج و ديما تقولي المرأة هي لي تزير الراجل كي تحب حاجة تقنعوا ........المهم أنا اليوم عاودت جبدتلو على الموضوع و قلتلو بالاك ربي يرزقنا بأخ و الا أخت لبنتنا هو تقلق و زعف و قالي راهي عاجبتني حياتي هكذا و راني راضي و هذا الموضوع مارانيش حاب نزيد نسمعو مرة اخرى و راح خرج برا ....
و راني حابة نصارحكم أنا كنت ساكتة على الموضوع و نقول وقت ماحب ربي يرزقنا لكن عندي أيام عن طريق الصدفة قريت محادثة بين زوجي وصديقه و هو زميلو في العمل زوجتو طبيبة و عندهم 10 سنوات بدون أطفال و فهت بلي هذا الصديق عندو عشيقة تخدم معاهم و زوجي قعد يقنع فيه باش يخطبها و يعدد بيها قبل مايطيح في المحضور و الا يجبد روحو لأن الشيطان واعر أنا الحق من هذاك اليوم دخلني التوسويس قاعدة نقول عوض ما يقولو ارجع امرتك و ارضى بيها هو يشجعو باش يتزوج مع العشيقة لي ماتخافش ربي و تدور براجل متزوج و فوقها على حساب واش فهمت حتى تهدر معاه في الفايسبوك و تبعثلو في صورها تاع البيت بدون حجاب . صح ماشديت والو على زوجي لكن راني خايفة يمشي بي العمر حتى نلحق لسن اليأس و بعيد الشر زوجي كاش ماتغرو هو ثان وحدة في العمل كيما صحبو و من بعد نطلع خسرانة عمري كامل و تروح سنوات عمري صبر على عقم زوجي باطل .
اعذروني على طريقة تفكيري المفاجئة بالاك كاين لي يشوفها غير صحيحة لكن أنا توسوست كي قريت محادثات كثيرة بين زوجي و صديقه و لقيتو أحيانا حتى يمدح بعض زميلاتو في العمل و أحيانا حتى يسقسي زميلو على عشيقتو و يناديها باسم دلع و ماتقولوليش وهلاش تتجسي يعني إذا ماراقبتش زوجي و نتقلق عليه عليمن رايحة نتقلق

[ROMMEL]

صراحة نسبة كبيرة لو كان المشكل منك راح راجلك يتزوج عليك و يمكن يخليك.....صراحة ما نكذبوش على بعض المراة تصبر بصح الراجل ما ظنيتش....كلامك منطقي وصحيح لازم تزيريه باش يعالج اذا حابة تكملي معاه

[mohamed nadim]

وقتنا صعيب

مشكل عويص ادا لم تكن للانسان رغبة في العلاج

الدعاء هو الحل و لايجاد الحل

[أم أسماء وعبد الرحمن]

الله المستعان أنت في موقف محرج وأي إمرأة في مكانك تفكر نفس التفكير
من الأحسن ياأختي ماتخليش الأمور غامضة وحاولي تعالجيها قبل فوات الأوان وماتنسايش الدعاء
إن شاء الله ربي يفرج عليك ويهدي زوجك.

[ابو سليمان10]

سلام عليكم

بالنسبة للعقم...الاسباب كثيرة بعضها ميؤوس منه و بعضها مجرد عيوب يمكن علاجها لذلك يجب المحاولة دائما...و تغيير الطبيب ان فشل الامر ...و كل حالة مختلفة عن الاخرى و و ان شاء الله ربي يرزقكم الذرية الصالحة

لكي تقنعي زوجك...استعملي معه طرق غير مباشرة ان كان لا ينصت اليك...مثلا اجعلي طفلتكي ترغب في الحصول على اخ او اخت و تقوله لزوجك فقد يلين...ولاكن بطريقة ذكية حتى لاتخبره انك انت من ادخلت الفكرة في راسها

اما المشكل الثالث فلا علاقة له بالانجاب...انا اعرف اشخاص متزوجين و لهم اولاد و مع ذلك وقعوا في مشكل الزميلة في العمل التي تبحث عن ذكر...بالعكس بعضهم يتزوج رغبة في الحصول على امراة يجدد معها شبابه بعيدا عن الزوجة الاولى التي لها 3 او 4 اطفال تهتم بهم كل الوقت

[Hanan salim]

صلي صلاة استخاره واطلبي من الله انو يجيبلك الامر يلي فيه الخير الك

[noeddin]

ربي يعينك على زوجك ،وربي يهديه ، والواحد ما يقنطش من رحمة ربي ، لكن الأسلام يدعونا الى اتخاد الأسباب من اجل الإنجاب ، ولم يدعوا الى الخمول والتقبل بالبساطة ، السعي وراء النجاح قبل التقبل بالوضع ،،، اما مشكل الخليلة فحسب راي وانا موظف والاحظ ان المجتمع في خطر من هده الظاهرة ، مرات تلقا راجل مزوج داير تجمعات مع فتياة او فتاة في خلوة هو عاجبوا الحال وهي عاجبها الحال ،الله يهدي ،

[زبدة ذايبة]

عندك مشكلتين.

لعل المشكلة الثانية فيها خير كبير لك.

بالنسبة للحمل، زوجك ماشي برأيو يجيب الذراري ولا مايجيبش. هذا حكم الله عزوجل هو الذي يهب الإناث والذكور.

والمشكلة الثانية بيد زوجك هو الذي تسبب فيها.

تشحيع الصديق على الفسق والفجور رح يكون عندو نفس الإثم.

الدال على الخير كفاعله.

والدال على الشر .......

نقص رقابة الله والخوف منه وعدم الحياء من الله.

كل هذ الصفات السيئة موجودة في زوجك مع الأسف.

تشجيعه لصديقه يدل على أنه غير ماصابش .......

حاولي تزرعي فيه مراقبة الله والخوف منه.

وأن أعراض الناس ماشي لعب.

حتى وإن كانت بنتهم فاسقة ،تبقى أعراض الناس خط أحمر.

إن تجاوزه سيدفع الثمن.

لعله من الخير لك أن يكون زوجك عقيما. لاتدري حكمة الله عزوجل تفوق تصوراتنا. وتدبيره لأمورنا فيها من الخير والرحمة لنا مالانعلمه.

زيدي حاولي معاه على العلاج وإن اضطر الأمر أن تضغطي عليه من جيهة أهله.
خليه يحس أنك موجودة وأن لديك نفس الحق في اتخاذ القرار بخصوص الأبناء.

رب يصلح حالك.

[رندة.]

كيما قالتلك أم زوجك زيريه وأضغطي عليه باش يعالج لانو من حقك تكوني أم كيما كل الناس، اذا كان هناك علاج لازم يعالج راكي صبرتي سبع سنين ياسر. الا اذا كانت حالته ميؤوس منها، هنا ما عليك غير بالدعاء و ان شاء الله ربي يرزقك.
أما بالنسبة للمشكلة الثانية كيما جاوبوك الأخوة التعدد ما عندوش علاقة بالانجاب، الي حاب يعدد تلقايه عندو عشرة اولاد ويخمم يتزوج.
بصح لازم تقنعيه يتعالج قبل ما يفوتك الوقت تاع الانجاب.
ربي يفرج عليك ويرزقك الذرية الصالحة ان شاء الله

[dede2000]

السلام عليكم الأخت الكريمة عندك
مشكلتين أولا قضية العقم دائما عندما يكون
العيب في الرجل تتعقد هذه المشكلة لأنو هناك
نوع من الرجال يحس أن رجولته ناقصةويتحرج من
العلاج رغم أنو مشكل صحي عادي والعلم تطور
ووصل حتى الي تلقيح البويضة بخلية جذعية،
ومراكز العلاج موجودة داخل وخارج الوطن
يعني المشكل راه في عقل زوجك فقط وهنا لزملك
القدرة على الإقناع وأنت بحكم سبع سنوات عشرة
تعرفي أقصر الطرق إلى عقل زوجك
المشكل الثاني أصعب من الأول لأن المرء على دين
خليله....لذالك كوني فحلة وحاولي إحتواء زوجك قبل
فوات الأوان وبذكاء وركزي علي كلمة إحتوائه بذكاء
حبيت في الأخير نقلك عندك ألف حق تعسي راجلك
هذا حق لأن الزوجة الصالحة هي لتعس راجلها
من الخطأ في حق الله قبل ما يخطىء في حق
نفسو وحق زوجتو....وفي الأخير سندعو لك إن
شاء الله بالهناء والذرية الصالحة

[النجمة القطبية]

اولا يا اختي يا ريت كنت اعطيتينا فكرة عن النقص في زوجك
هل هو نقص في الحيوانات المنوية او نقص في الحركة وكم النسبة لانوا ماشي بالساهل نحكمو على الشخص بالعقم فقد لا يكون لان اغلب الرجال يكون عندهم نقص احيانا حسب الصحة والحالة المزاجية فهميه هدا الكلام ويا ريت يعاود التحاليل
من ناحية اخرى قلتي انو عندك بعض المشاكل البسيطة ولم تدكري ما هي
حابة نقولك انو الافضل انو متفكريش من منطق زوجي عقيم وانا راني نضحي من اجله وكل الرجال ميحبوش يعملوا تحاليل هدا شئ منطقي وحتى ميحبوش يشربوا دواء عرب فما بالك بالكيميائي !!
توكلي على الله فقد يكون مشكل زوجك بسيط وتعاملي معاه درجة بدرجة دون ضغط ودون ما تحسسيه انك سليمة وهو العكس وخدي بالاسباب الدينية والدنيوية وربي يفتح عليك
بالنسبة للمشكلة الثانية صحيح كامل نخافوا على ازواجنا لكن انا لاحظت انوا من كلامك زوجك كان خايف على صاحبوا من ان يقع في الحرام فقالوا اما تتزوجها او اجبد روحك فلا ادري اين هو الخطا هنا بالعكس هدا نصحوا ومشجعوش انوا يستمر معاها في الحرام وقالوا انتبه تقع في المحضور حسب كلامك
اما انه مقالوش مرتك وارجعلها وو فصدقيني كل الرجال هكدا تفكيرهم يختلف عن تفكيرنا هو يعلم ان صديقواا راهو معمي بالاك شاف هادي انسب نصيحة وهدا لا يعني انوا لديه نية خداعك
واش حابة نقول احسني النية وابعدي عن راسك فكرة الغدر وانك تحضري نفسك قبل ان يسحب بك البساط لان هدا التفكير من الشيطان
ومتفكريش تاني انك تضحي على جالوا لانه المفروض زوجك حبيبك وزواجك بيه حب وليس تضحية وعموما حتى لو عندك عشر اطفال ستحسين بنفس الشعور لو غدر بيك وفقدتيه فما الفرق
توكلى على الله وادعي ربي يفتح عليكم

[المتوكل على الله.]

احسني النية وابعدي عن راسك فكرة الغدر وانك تحضري نفسك قبل ان يسحب بك البساط لان هدا التفكير من الشيطان

[المتوكل على الله.]

هناك من يبحث عن زوجة ثانية اذا اردت

[غصن البآن]

مرات الصبر ميعنيش السكوت وانك كل مرة تغمضي عينك خوف من جرح مشاعر زوجك لان شوفي وين ممكن توصل .... مادم كين امل مش براحتو لان حقك تكوني ام ذا هو سامح فحقو يكون اب .الواحد يسعى واذا ربي قدر غير واش نتمنو نرضه و نحمدوه ..لكن مش نبقو قاعدين ونقولو ربي قدر ل لسعي واجب قبل لا تدعو ن الله كاتبها
يقولك السماطه تغلب لقبحه ....يعني قد ما تقلق كي تقوليلو متحبسيش ...وكيما قالولك عشرة سين بينكم حاولي معاه مي ا منفعش اللين حقك تواجهيه و تطلبي منو تتعالجو مع بعض وتصبرو للعلاج .....
اما على قضيه صديقو و لخليله انا منضنش زوجك نيتو خبيثه ولا قصدو ان السيد يعدد لكن زوجك نصحو نصح واضح ....قالو متوقعش فالمحضور اما تزوجه او اتركها ...علابلي نتوسوسو ....لكن الحق حق . ون حقك تخافي و كامل واش فكرتي منطقي و حتى مراقبتك لزوجك من حقك و لا غربة فلموضوع .....الخوف من لحكايت على لزميلت ولمدح ....و و
ربي يهديه ويسخرولك ويبعد عليكم بنت وولاد الحرم .....لفحله تحاول قد ماتقدر تحافظ على داره و متسمح لحتى شي يخربلها .....و لولاد نعمه ومن عظم لنعم ربي يرزقكم على قدر الخير لي درتوه كي كفلتو طفل يتيم و ربيتوها واعتبرتوها بنتكم

[محمد جديدي التبسي]

فيما يخص موضوع الانجاب من حقك تحاولي مرارا وتكرارا لتقنعي زوجك بالعلاج
لكن ليس من حقك التجسس على زوجك وحديثه مع صديقه وهذا ما غفل عنه المشاركون أعلاه
لأنك بهذا التجسس ادخلت نفسك في دوامة يصعب الخروج منها
ماذا لو واصلت تجسسك واكتشفت أشياء سيئة عن زوجك وسقط من عينيك كيف سيستمر زواجك؟؟
ما اريد ان اوصله اليك هو ان التجسس لا يأتي بخير ولو كانت نيتك طيبة وتريدين فهم تفكير زوجك وطريقة التأثير عليه ليقبل محاولة البحث عن علاج
النية الطيبة لا تصلح العمل الفاسد الذي هو التجسس ولو كان زوجك اقرب شخص لك
ربي يرزقكم ذرية صالحة.

[Saif al-Islam]

أختي الكريمة

مخاوفك طبيعية يا أختي .....و لكن إيّاك و سوء الظّن و التّجسّس ، و حتى و لو كانت النية من ورائها الخوف على الزّوج ، و هذه الآية تثبت ذلك ، بعد بسم اللّه الرّحمان الرّحيم : يا أيها الذين آمنوا اجتنبوا كثيرا من الظن إن بعض الظن إثم ولا تجسسوا ولا يغتب بعضكم بعضا أيحب أحدكم أن يأكل لحم أخيه ميتا فكرهتموه واتقوا الله إن الله تواب رحيم (12) / سورة الحجرات

معنى التجسس هنا هو : لا يتتبع بعضكم عورة بعض, ولا يبحث عن سرائره, يبتغي بذلك الظهور على عيوبه ، ولكن اقنعوا بما ظهر لكم من أمره ...../ و أنا ناصح لكي أختي ......و كاذب من قال عكس ذلك

و بهذا أدعم الأخ الكريم محمد جديدي التبسي بارك اللّه فيه

ــــــــــــــــــــــــــــــــــــــــــــــ

أمّا فيما يخص مشاكل العقم ، الأمر للّه يا أختي ....فهناك ما يّمكن شفاؤه و هناك ما لا يُمكن شفاؤه ، أمّا التهويل للقضية ربّما يأخدنا لمسار غير مستحب " كالطّلاق مثلاً " ، و حتى و إن حدث الطّلاق .....هل هناك ضامن أنّ الزّوجة المطلّقة ستتزوّج مرّة أخرى لتنجب مع زوج آخر .....كلاّ ...... و ربّما ستصدمين مرّة أخرى بزوج آخر بنفس المشكلة .....سلّمي أمركي للّه و كفى ......ألا إنّها مشيئة اللّه سبحانه و تعالى
و هناك حالات كثيرة جدًا سلّموا أمرهم للّه سبحانه و تعالى ، و تقبّلو أمر اللّه تعالى كما هو ، و بقدرة القادر عزّ و جلّ جلاله و بدون تدخّل طبّي رزقوا بأولاد بعد 10 و 15 عاما زواج فما فوق ......سبحان اللّه العظيم

فيا أختي ، اللّه سبحانه و تعالى ما ترك خيرًا إلاّ و منحه لمخلوقاته ليسبّحوه بحمده و يشكروه بنعمه عليها ، و ها أنا أنصحك مرّة أخرى و أوجّه بصرك صوب خيرات ربّك و معجزاته في مأكلنا و طعامنا " و للّه الحمد " ......كوني طبيبة زوجك ..... و ثقّفي نفسك .......و إبحثي عن كل مأكل من خضروات و فواكه و مكسّرات لها فوائد و عائد نافع لخصوبة الرّجل ..... و تفنّني في طبخها و تقديمها .....مع بسمة تلطّف الجو .........و كلوا هنيئًا مريئًا .....و إختتميها بالإستغفار ليلاً و نهارًا ......يقول الله تعالى: { فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا (10) يُرْسِلِ السَّمَاء عَلَيْكُم مِّدْرَارًا (11) وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا (12) مَّا لَكُمْ لا تَرْجُونَ لِلَّهِ وَقَارًا (13) وَقَدْ خَلَقَكُمْ أَطْوَارًا (14) }([13]). ........و ما بقي لي إلاّ أن أقول آمنت بك ياربّي و برسولك محمّد صلى اللّه عليه و سلّم ، اللّهمّ ما خلقت هذا باطلاً ...... سبحانك يا ربّ العرش العظيم

[الفارس النبيل 93]

هناك خطأين :

الخطأ الأول : هو سوء ظنك بزوجك

الخطأ الثاني : هو إنكارك على التعدد وكأنه زنا ، التعدد حلال يا بنات الناس

الواحد إدا كان قادر يفتح بيت ثاني ، هاداك الشيء راه من حقه

الله يهدي بنات المسلمين

[mimi mimita]

انت في وضع لا تحسدين عليه الله المستعان

[المتوكل على الله.]

هناك من يبحث عن زوجة ثانية اذا اردت

هناك من يبحث عن زوجة ثانية اذا اردت

[imen1200]

.كلامك منطقي وصحيح لازم تزيريه باش يعالج اذا حابة تكملي معاه