هذه قناعتي ولن اغيرها

[مشكلتي]

جاءني خاطب وسالني كم اشترط فاشترطت عشرين دينار جزاءري ولله المنة ولحمد ولكن وصل كلام من اخواته اني رخيصة وثمني بخص ولكني لن اكترث باحد لان سيد الخلق نبينا محمد خير من العالمين وكلامه هو الذي يحكم وليس راي اخواته
اخواته اشترطن على ازواجهن محزمة تع سبعين مليون ووالذهب من الوزن الثقيل
هذه قناعتي ولن ابدلها من اجل البشر
والعريب في الامر ان اشترطت الفتاة يقولون انها سبب في عزوف الشباب وان زهدت يقولون انها ثمنها بخص
لا يهمني كلام البشر
اخي لو اشترطت اختك مهرا غاليا على خاطبها ماردة فعلك وان اشترطت اقل من القليل ما هي وجهة نظرك بعيدا عن المثاليات جاوبونا بكل صدق وشفافية

[مصطفى_س]

السلام عليكم

مبارك مبارك عليكما و بارك الله لكما و جمع بينكما بالخير و جعل حياتكما سعيدة مليئة بالمودة و الرحمة

لا تكترثي لاحد اظن رضى الله و رضى الوالدين و رضى الزوج هو كل ما يهمك
لا يهمك أي كلام أنت في الطريق الاكثر من صحيح لقوله صل الله عليه و سلم
أعظم النساء بركة أيسرهن مئونة. رواه أحمد

اذا لا تبالي بكلامهن نحن نسمع لكلام رسولنا لا لكلامهن

لا أحب ان يكون مهر اختي غاليا بل في الحدود المعقول و على حساب قدرة الخاطب
اما ان اشترطت اقل من القليل فسأكون فرحا و سعيدا لانني اؤمن بكلام رسولنا انها ستكون بركة عليهما

وفقك الله

[عثمان الجزائري.]

الحمد لله أن من قال هذا الكلام هم نساء و ليسوا رجال و إلا لكانت المصيبة أعظم، المهم أن هؤلاء النسوة هم أحد أسباب الخراب الذي نعيشه اليوم.

[خوخة جوجو]

محزمة بسبعين مليون منك بصح هذي وين. في الغرب الجزائري اذا شرطو 15مليون مع الذهب هذا الشرط الغالي وبنت فلان فلان اي ابيها لاباس عليه.
اما بنسبة لقناعتك انا نتحيلك راكي داية اغلى من الذهب و الدراهم راجل و عليه لكلام.
اذا كان لاباس عليه ولا ربي يفرجها عليه غادي يديرلك الذهب ولماس وقليلا عليك
راكي بنت خلال.شكرا على الموضوع.

[kacimo.samy]

السلام عليكم

اعجبتني قناعتك

وان شاء الله يكون اهل لها فقط

[نورسين.داية]

ياخي نتي تفاهمتي مع الخاطب .....أين المشكل ؟؟؟؟

[toulay]

السلام عليكم
ياك الهدرة باطل يجي النهار ويعيوا ويسكتوا
ربي يهنيك ان شاء الله
بالتوفيق

[ابو سليمان10]

التي تشترط ذهب ب 70 مليون سنتيم.يعني انه بيع و شراء..بالنسبة لي تعادل ثمن سيرة ماروتي...يعني رخيصة
التي تشترط شىء رمزي يعني انه زواج...و اقلهن مهورا اكثرهن بركة

لاتكترثي لكلام النساء....فالشيطان يتحدث على لسان المراة دائما

[زبدة ذايبة]

رايحة نخالف الإخوة اللي ردوا على موضوعك.

عرفنا في عرفنا أن الأب هو الذي يحدد مهر الفتاة.

والأصل أن الفتاة تستحي وحيية.

وإذنها في الموافقة أن تسكت.

وانت درتي شروطك مع هذا الخاطب دون الإشارة إلى أبيك.

20دينار يعني ألفين تاعنا !!!!!!!

وش فائدة هذا الشرط؟؟؟؟؟؟؟

المهر حق أعطاه الله عزوجل للمرأة.

والمطالبة بالمهر تعتبر أولى واجبات الزواج.

وأول الإنفاق على المرأة.

ماتشوفيش للمهر كقيمة مادية فقط. لأنه ليس كذلك.

المهر يحمل في طياته الكثير والكثير من المعاني العميقة جدا.

مارحش يعجبك كلامي. ومارحش يعجب الكثيرين.

على حساب وش كتبتي يظهر أن أهل زوجك ناس مرتاحين ماديا.

كنت على الأقل تقدري الموقف.

بما أنهم مرتاحين كان أبوك يشترط مهرك وفق مايوافق هذ الناس.

يعني مامعناه خواتات زوجك يشرطو محزمة تاع ذهب اللي يتجاوز سعرها 150مليون( بكري كانت سبعين مليون) وانت تشترطي20 دينار !!!!!!؟؟؟؟؟؟؟

ماكاين حتى علاقة.

لو كان الخاطب فقير ياهل ترى يكون نفس الشرط؟؟؟؟؟؟

ولا تنحولوا لعظم قبل اللحم من شدة الشروط؟؟؟؟؟؟

أنا مارانيش موافقاتك نهائيا في هذا الشرط.

لأنه ماراكيش رايحة تجني منه سوى التعب والنصب والحقرة من طرف أهل زوجك.

والمؤشرات بدات تبان.

وماشي محال يسبوك ويكرهوا زوجك فيك لأنك بالنسبة ليهم ( رخيصة) مع الأسف.

مهر المرأة الزهيد يجب أن يكون متوافقا مع وضع الرجل المادي.

يعني إذا الرجل صالح وراتبه مثلا 4ملاين. ماتشرطيش فيه ذهب تاع 30 مليون والدراهم زيادة.

ممكن يكفي خاتم يجيبهولك

عرفت فتيات كثيرات كان مهرهم خاتم وخمس ملاين

20دينار عمري ماسمعت بيها

ومن جهة ثانية. خاطب عندو محلات وربما مؤسسات وسيارات مايكونش شرطك 20دينار ؟؟؟؟؟؟؟

هذا غير معقول.!!!!!!!

وماتدخلش في الراس وماعندها حتى معنى

ربما المعنى الوحيد اللي عندها أنك ساذجة وماتعرفيش

وممكن حتى أهل زوجك إذا فعلا مرتاحين ماديا يحسوا أنك تستهزئي بيهم

لازم يكون كاين التوافق مع استخدام العقل والمنطق ومراعاة الظروف الاجتماعية والبيئة والمادية.

ياعزيزتي

الإسلام لم يفرض علينا المهر الزهيد أو المهر الرمزي. الأمور تقدر بقدرها.

أتمنى ألا يبقى رأيك متصلبا حتى لاتتعرضي للأسوأ في حياتك الزوجية

لازم تستخدمي الحكمة في قراراتك وتنظري للموضوع من كل الجوانب.

[* الحلم سكر *]

المفروض الوالد لي يشرط لا ؟؟
نخاف يجي نهار يقلك ياك ديتك بلاش !!
في وقتنا للأسف تساعفيه يقلك زعما علاه بالاك ما صدقت لقت راجل هذا الواقع ما كلاه نكذبو على بعضانا

احنا كي نحبو نساعفو الخاطب نقوللهم حطوها بنتكم و يجيبو واش تقدروا و الا
نقولو شرطنا الهناء و لي تقدروا عليه ربي يسهل

المهم ان شاء الله ربي يهنيك و يكون الخاطب أهل لتفكيرك

[Meriemmarina]

اتفق معك اختي الكريمة (زبدة ذايبة) ..يجب استعمال المنطق في مثل هنه الامور لتجنب المشاكل و القال والقيل والله اعلم ..وفقك الله

[sohaibdz]

الرجاء تقبل رايي
علاه حتى 20 دينار السيد هذا معندوش ولا مريض ميقدرش يخدم ولا كيفاه؟؟ قصدي كيفاه حتى ولات عندك القناعة هادي
وعلى الهدرة تاع خواتاتو عندهم حق يهدرو عليك انت راكي تزوجي في روحك بروحك و ب20 دج برك يعني بالنسبة لسهم انت معندكش قيمة والعلم لله

[~أمة الله~]

السلام عليكم ورحمة الله وبركاته أخيتي
موافقة إلى حدّ كبير على كلام الأخت زُبدة ذايبة، والحقيقة كان تفكيري مِثلك إلى وقت قريب، أنا أظنّ أفضل شيء أبيك يشرط الهنا، والنّاس هوما يجيبوا واش يقدروا عليه إن شاء الله، يعني لن ترهقيهم إن شاء الله بطلباتك وفي نفس الوقت هوما على حساب مقدورهم يقدّروا مهر مِثلك، وهذا ما فعله أبي في عقدي الشرعي، وما فعله أبّ زوجة أخي مع أخي، والكثير مِمّن أعرِف...
وفقكِ الله وأسعدكِ

[kader001]

الزواج مسؤولية و ليس نزهة سرعان ما تنقضي و يرجع كل طرف الى بيته سالم غانم ..لا ..الفلوس لا يجب ان تكون اساس قيام العلاقة الزوجية بين الزوجين غير انها مهمة جدا في دوام العشرة في ظروف مادية محترمة و لا باس ان تطلب الفتاة صداق محترم اذا كان الخاطب قادر على ذلك و هو حقها ..سلام

[romina_auxanne]

اختي كان عليك ان تقولي انا اشترط الهناء و تنقصي عليك الهدرة

[first first]

هناك حقيبة واحدة مثبتة في قصتك وقرارك
هي انه لاعلاقة لمطلبك ولالمطلبهن بقيمتك وقيمتهن الحقيقية
يعني لي تشرط الكثير لايعني انه يعبر عنن قيمتها الحقيقيدة فقد تكون اقل او اكثر بذالك
ولي تطلب القليل كذالك لايدل علي قيمتها مطلقا

بالحق اي فتاة هي اغلي بكثير من كل مال يدفع لها

لذا فانت لست رخيصة وتصرفك لاتفعله اي كانت.
نختلف معك او نتفق في القيمة التي طلبتها....لايهم .....هذه قناعات وكل له منطق ووجهة نظر.
.....
اسمحيلي نمازحك قليلا......زيدي كمليها وماتديش الجهاز.......ادي حقيبة يد وهكذا مثلما رحمته تكوني رحمتي الوالد واهلك ورحمتي نفسك ايما رحمة
مبارك اختي زواجة وبصحتك البركة في حياتك....فاقلكن مهرا اكثركن بركة

[رندة.]

انتي قلتي هاذي قناعتي ولن أغيرها بمعنى انو مهما تكلمو الاعضاء مش راح تغيري فكرتك.
بالنسبة لسؤالك في آخر الموضوع، احنا عندنا البنت ما تشرطش يعني هنا تدخل هدرة الرجال، ولا ابوها راح يشرط لأنهم يشرطو الهنا بشكل أساسي،
والمهر راح يكون حسب قدرة الزوج.

[muslim girll]

اللهم وفقنا للقول السديد والعمل الرشيد
على الرغم من ان ختام المشكلة كان سؤالا موجها للاخوة
لكنني ساذكر رايي مادامت المسالة قد طُرحت...
انت مخطئة ! حسب رايي
لو اننا خطبنا لاخي واشترطت هي مثلما اشترطت انت لضحكت ثم لقلت
"هادي راهي تلعب فييها ..وراهي حابة تثير الانتباه ! "
علاه هاد المبالغة تع الفين
الكباش راهم يديرو خمس ملاين !

الفين يجيبولك زوج شيواوا ولا اربعة!
ماتفليكسيش بيهم
كيلو بطاطا مايجيبوهمش !
يعني اللي تشرط ستين مليون نقولو سومة طونوبيل
واللي تشرط عشرين الف نسكتو !!!
كاين اللي مارحش يديرلك قيمة كيما تشرطيلوش ...كاين !
والدليل شوفي وشراهم يهدرو عليك
ماشي لازم ترضيهم راني معاك بصح ماشي من الاول هكدا تخالفي ...لانو خالف تعرف هاد المثل ماشي دايمن معناه مليح ...
ايدا حبيتِ يكون مهرك قليل وفيه البركة لو كان اشترطت مصحف
كاين كيما كلام ربي
هكدا منها بركة منها ديري رايك منها تسكتيهم
علاه الحرب من الاول هكدا
و

هدا الراجل خياتو يمدوهم بهاديك القيمة المالية
وانت جاي يسقسي فيك شحال تشرطي
اللي يدير هكدا يعيط للشر
مام ايدا معندوش الراجل ما يبداش يمص فالقارص من الاول
هذا يخمم غير شحال يدفع
كونو سقساك هكدا ...هادي تحتاج وقفة
ولا بالاك لالا راهو مشوكي من خياتو !
شوفي خير الامور اواسطها ...يعني الوحدة كيما تشطرطش كامل تقول تسع ملاين

هادي اللي حقروها جابولها تسعة

وحنا عادةً نقولو نشرطو لهنا .... اومبعد نسناو مبلغ معتبر
شوية!!! اخرج عريان ربي يكسيك !
ونعرف اللي يقولو كيما مديتو بناتكم نمدولكم بنتنا يعني كيما تشرطو انتوما نمدولكم بنتنا ...شوفي الدهاء !

وهادا المهر تاعك يقعدلك سوفونيغ ..يعني مليح لو كان الوحدة من دراهم المهر تتصدق ولو بشوية والباقي تشريه ذهب يقعدلها
حتى كي يكبرو ولادها تمد لبنتها تقولها هادا من دراهم باباك المهر تاعي
وتمد لوليدها يمد لمرتو (هههه )
ايه يعني تقعدلك ..حاجة تفكرك ... معامن راني نهدر الشعب الجزائري خاطيه الرومنسية ..
المهم انا برايي غلطت ما تخالفيش وماشي لازم اتبعي خياتو
وخير الامور اواسطها يعني قولي مبلغ معتبر
ولا الهنا
نعرف وحدة هي لاباس بيها وهو تاني باباها قالو نشرلبنتي الخدمة ..اومبعد فراوها مدلها مئة الف (1000 دج) مئة الف تخبيها فتغوسو ماتصرفيهاش
(ذكرى🌌 ) خرمن الفين ..!
والمهر عادة يتحدد على حساب مقدور الخاطب ماشي على حساب هواك...
هادا رابط لكلام الشيخ المغامسي يرد عليك 😊

https://dztu.be/ecR24QxLuUQ
في اليوتيوب ( المهر اكرام للمراة وليس لتعجيز الزوج ..المغامسي)

[النجمة القطبية]

شوفي يا اختي المهر هدا انزله الله سبحانه وتعالى من سبع سموات
له معنى عميق جدااا كيما قالت اختى زبدة دايبة ومراهوش مجرد رمز او زيادة
والا ما رايك نلغوا المهر تماما وخلاص !!!! مدام المهر لا فائدة منه نحوه وخلاص
علاش في بالك ربي شرع المهر ما هي الحكمة وما هي الاسباب
مالا بدون تفلسيف حبيبتى الاولى كنتى تخلي الوالد ديالك يقول نشرطو الهنا واهل زوجك يقدروا المهر المناسب حسب امكانياته
حنا مثلا في عايلتنا العادة منشرطوش مهر معين فقط المهر يقدره الرجل وغالبا يكون في حدود المهر المتعارف عليه وخلاص
اما انك تشرطي 20 دج!!!! هدا استهزاء بالرجل وقدراته او معناه انك لا تحتاجي انوا يصرف عليك وقادرة على شقاك
ولازم تتوقعي متطلبي والوا بعد الزواج ايضا لانك تبعثي لزوجك رسالة غير مباشرة معناها انا منحتاج منك والوا قادرة على شقايا
والسؤال المطروح الان بما ان واضح ان اسرة زوجك مقتدرة هل راه تديري جهاز مثلك مثل غيرك او متوقعة تروحي بدون جهاز ويرحبوا بيك عادي
ام انك راح تحملي والدك فوق طاقته وتروحي للرجل باطل وتزيدي تعمريلوا داروا مالفوق
يا اختي لازم يكون عندك منطق في تخمامك باش متتعرضيش للسخرية

[ابنة الاسلام]

جات تكحلها عماتها
انت اردت تسهيل الامر على الخاطب كنت تقولي مصحف يعني كتاب الله معناه مقدس واذا طحتي في ناس يعرفو وش هو مهر مصحف هنيئا لك لكن اسمحيلي مر قتيها ب عشرين دينار !..ربي يهنيك ويسعدك .