مشكلتي

[مشكلتي]

السلام عليكم ساحكي قصتي من البداية
... في عمري 17 سنة اعجبت بشخص و هو كذلك كان عمره 26 سنة .. فتقدم لخطبتي و تمت الموافقة بين الطرفين ... بعدها درنا الفاتحة و ولات علاقتنا رسمية و حلالية ولينا نهدرو فالتلفون و نتلاقاو احيانا و يجي ليا للدار يشوفني
الحق فالاول كان مليح معايا بزاف ... بعدها جبت الباك و هوا ماكنش معارض قرايتي بالعكس كان يقولي اقراي و انجحي ... كنا متفقين بلي كي نكمل اول سنة في الجامعة نديرو العرس و نكمل نقرا عندو موراها ... المهم كي بديت نقرا في الجامعة ومن النهار الاول ولا يشك فيا بزاف كل ليلة يقولي راكي مع وحد اخر غيري و و و كل ما نتلاقاو يقلبلي التليفون و الفايس بوك و كي نعيا نقولو لازم نرقد خطش نقرا صبح بكري يقولي لالا راح تحكي مع واحد اخر
المهم انا قلقوني تصرفاتو حتى اللبسة وليت نلبس غير الاسود باه منعجب حتى واحد لحق وحد النهار قالي خلاص حبسي القراية خطش انا عييت هكا راكي مقصرة معايا و و خلي نتزوجو و كملي و انا تالمون كنت نحبو و حبيت نبقى معاه درت عطلة اكاديمية و وعدني بلي كي نتزوجو نقرا و نكمل
المهم كي حبست من الجامعة ولا يهبلني اكثر و اكثر غير الشك و التوسويس كلما نحوس نبدا من جديد معاه نضاربو ... وحد النهار عيطتلو فليل جاوبتني مرا كي سقيتو قالي وحدة كنت معاها البارح **سهرت معاها // قتلو معناها خدعتني قالي مدام مازال متزوجتش ندير واش نحب ... صراحة انا حملت كلش بصح الخديعة منقدرش نحملها حبست معاه قبل 3 أشهر من عرسنا ... ذركا جاز عام و انا وليت لقرايتي ... عندو وحد الشهر عيطلي و قالي بلي مازال يحبني و انا صراحة مازال منسيتوش قالي ولي معايا و وعدني بلي يتبدل بصح انا خايفة انصحوني ....

[toulay]

وعليكم السلام ورحمة الله وبركاته
رد بالك تولي ليه رد بالك فهمتي
واش دير بشخص مقرف هكذا
شافك خير منو وانت رايحة تهبل عليه قاعد يديرلك كيما هكذا لانو عرف نقطة ضعفك لهي متقدرش على فراقو
bref فكك منو وراح يجيك خير منو ان شاء الله
مزالك صغيرة بصغرك اقرا قرايتك ومبعد يرحمها ربي
بالتوفيق

[yassefe]

اخطيك من لخر
يخونك مرة يقدر يعاودها الف مرة

[زبدة ذايبة]

رب يعوضك ماخير منو.

تهنيتي منو.

كل الشكوك اللي كان فيها كانت بسبب الخديعة والخيانة اللي كان يدير فيها.

مادخلوا الشك من جيهتك إلا من بعد ماهتك الستر اللي بينوا وبين الله.

ردي بالك تحبي واحد خاين.

ماتخليش عواطفك الواهمة تحطملك حياتك.

احسبيها صح.

الرجل اللي يتعدى حدود الله في حرمات الله ماعندك ماديري بيه.

لأنك أصلا ماكنتيش ذات قيمة عندو.
بالتالي كان من السهل تجي أي وحدة رخيصة تدي مكانك.

هو شخص رخيص وعديم الأخلاق والدين. أخطيك منو واحمدي ربي اللي نجاك من هذا النوع من الذكور.

ماشي مستبعد يكون يشرب الخمر وربما حتى المخدرات.

انساي أي عاطفة تجاهه.

خدعك وانت زوجتو. وش تستناي يزيد يدير اكثر باش تكرهيهه.

فكري مليح.

وماتزيديش تعاودي كلمة مازالني نحبوا!!!!!!!!!؟؟؟؟؟؟؟.

[karime amrs]

الخاين مافيه الامان
هذه هي القاعدة في الحياة

[dede2000]

السلام عليكم
وانا أقرء لكي وعند وصولي الي حكاية عقبلك وحدة هدرت معاك في التلفون وزاظ أعترفلك بلي كان معاها والعياذو بالله في الحرام
تفكرت المثل القائل لا يقرء السفيه إلا مافيه.
أختي هذا سفيه وخارج طريق واش ديري بيه ؟؟؟؟؟؟
أنا نقلك إن البيوت لا تبني بالحب بل تبني بالأخلاق وهذا لي راكي تحكي عليه إنسان بلا أخلاق.....ربي يرزقك بولد الحلال

[الصديق قروف]

كيما قالو الي قبلي
كل الشكوك اللي كان فيها كانت بسبب الخديعة والخيانة اللي كان يدير فيها.
زائد تبرير خطئه وهذا يدل انو بلااخلاق
انتي تحبيه لانك عشتي معاه ان صح التعبير
ربما لانك لم تعرفي رجل اخر و ولفتيه

[رضاك يا ربي]

كي كان يشك فيك قبل تاكدي بلي كان يدير
الكوارث من موراك ...يحسب كامل البنات كيما لي
يصاحبهم.....والكارثة الكبرى انو يعرف واحدة ويبات معاها
لا اخلاق لا دين موسوس غيار انك إنسانة ناجحة ومتعلمة
مايخافش ربي
اخطيك منو
واحمدي ربي لي عرفتيه قبل الزواج
ربي يعوضك احسن منو ألف مرة
البيوت السعيدة تبنى على الاخلاق و الثقة

[سَامِيَة]

ربي يعوضك بولد الحلال
إياك أن تضعفي أمامه
غيري رقم الهاتف إن أمكن
ولا تخدعي نفسك بكلامك معه لمحاولة
إقناعه بإنهاء العلاقة .

كلمة وراء كلمة حتى تقعي مرة
أخرى في شباكه وإن وقعت
مرة أخرى لن تخرجي منها بسلام
لأنه سيعرف كيف يستفيد من
الاخطاء السابقة.

من يخون قبل شهور من زواجه
وهو يعلم أن الحلال في انتظاره
كيف له ألا يخون في عز مشاكل
الزوجية وروتينها الممل أحيانا.

بالتوفيق

[kacimo.samy]

وعليكم السلام ورحمة الله وبركاته

اخطيك منو

فاسد لازملو 100 جلدة خخخ كي يخلصهم ساهل
والله ياطفلة ما تغلطيش هذا كشف روحو بروحو وشكاك لانه خائن


ربي حفضك
وربي يعوضك احسن منو ألف مرة
البيوت السعيدة تبنى على الاخلاق و الثقة

(كي يعيطلك قوليلو خلص 100جلدة في وسط ناس و داك لوقت نخمم نرجعلك الا دارها راه صح تاب خخخخ)

[غصن البآن]

ردي بالك تولي ليه ولا تسامحيه ...راح تندمي حياتك كامل...
وكملي قرايتك وديريها اهم هدف ..
بالنسبه لرأيي .....في وقت الدراسه ليس من الحكمة الزواج والارتباط لانك تعبي نفسك بكثرة المسؤوليات ..
الله يبعد عليك القلوب المريضه

[dali rami]

أختي الكريمة ،،

فقط استعملي عقلك واتركي العاطفة جانبا

دون استشارة ولا شيء ، هذا شخص لا خلاق له والدليل مجاهرته وافتخاره بالمعصية وكذلك عجرفته الزائدة

مثل هؤلاء لن يتغيروا وبهم فيروس الخيانة في جيانتهم

هذا الشخص سيخونك حتما لو تزوجت به لأنه من النوع الذي لا يرضى بالحلال ويبحث دوما عن أنواع مختلفة من النساء

أنت كبيرة واوعية بحكم سنك لذلك لا تكوني غبية وتصدقي وعود وهمية منه

أسأل الله أن يعوضك خيرا منه ان شاء الله

موفقة بإذن الله أختي

[رندة.]

كيما قالو السفيه ينوي ما فيه
حاليا ركزي في قرايتك، باش تعوضي العام الي راحلك في العطلة الأكاديمية خسارة. وربي يرزقك زوج صالح قد نيتك ان شاء الله.

[nihal159]

ربي فضحو ونجّاك منو؛ علاه أنتي مصرّة أنك طيحي روحك فالفخ؟؟؟؟؟؟؟ أخطيك منو؛ إنسان مايخافش ربي و مش عامل حساب لحدود الله؛ رايح يحترمك أنتي و يعملك حساب و خاطر؟؟؟؟؟ ماكانش حاجة تقتل المرأة قد أنها تعيش مع راجل تشك فيه كل ساعة و كل دقيقة أنو قاعد يخونها مع إمرأة أخرى، أخطيك أخطيك أخطيك؛ أخطيك من المشاكل و الهم و الشك و التوسويس

[منى6019]

السلام
هذا ليس ممن يرضى دينه و خلقه
لا تنسي ما سببه لك من الم و حرج

[muslim girll]

اللهم وفقنا للقول السديد والعمل الرشيد
ربي يعوضك
طريق اللي داتو تديه ...الله يسهل عليه
وانت بالاك تولي
تقدري تدي سيد سيدو
عادي
شوفي
انا مافهمتمش وانا نقرا وش كتبتِ ...شحال من تناقضات
اولا كنت معاه فعلاقة غير شرعية
علاش ما تخممش المراة كيما الراجل وتتعلم منو الراجل يقول كيما عرفتني تعرف غيري
كيما هدرت معايا تهدر مع وحداخر
علاه ما تقوليش كيما كان معايا فالحرام يكون مع غيري !!
وراهو دارها وفالسهرة ....
صحة ....
يقولك كملي اهدري معايا خاتش يشك فيك
كاين احتمال اخر وهو ماحبكش تنجحي فقرايتك ...يعييك تسهري ماتركزيش كي تروحي تقراي ..مايكونش عندك وقت تريفيزي ..تعياي ..تبداي تراطي محاضرات
هادا احتمال
...
كي كان يدير هكدا مارحمكش
وما خممش على مصلحتك
كيفاه يقولك ماراكيش تتهلاي فيا
انت اصبري اصبري كيفاه سبعطاش سنة يمدوك داركم !!! انا نديك للماناج تنحي على خاطرك ... !!!
صغيرة بزاف على الهدرة فتليفون ديجا..وهو كبير عليك تسع سنين !! ماشي بزاف!!! يعني لوكان انت سبعطاش وهو عشرين شوية مقبولة !!!
ايه ...
ربي سلكك منو
كنت صغيرة وغلطت ماتزيديش تغلطي

ماتحبيه ماوالو والفتيه
مع الوقت تولي تقولي كيفاه انا كنت مع هادا ؟ كيفاه قبلت بيه
غلطت مليار كي بلوكيتِ العام ديالك
بصح هاديك هي اللي زادت كشفاتو كثر
كاين رجال مايحبوش المراة تكون خرمنهم ويسيو يهبطوها ويحطموها كيما يقدرو ..وي كاين ناس هكدا انا مكنتش تدخلي فراسي هاد الهدرة وحد الوقت
كي حبست قرايتك ربحت !
اصلا معاه وش ربحت !
اما هاديك اللي جوزلك وحدة اسمحيلي مي ديري شوية قيمة لروحك
راكي متواضعة بزاف !!!!
وشنو هاد الوقاحة تاعو
هههههه حرت وش نقول
شوفي كاين ممثلة سورية كانت متزوجة مع واحد ممثل سوري وش نقولك جمال وجسد ومال وجابلي ربي قاري تاني وزيد مشهورويدور غير مع الناس "الهاي" وناجح الى حد ما... على حساب وش فهمت صحبتها كانت تبعتلو رسائل وهو واقيل تجاوب معاها
وش دارت المراة هههه طلبت الطلاق وزادت بهدلتهم فالاعلان
وتزوجت بسيد سيدو رجل اعمال ولاباس بيه شكلا
ودّات ولادها يعيشو معاها
وكملت حياتها عادي
انا مانشوف الافلام تاعها ماوالو بصح حكايتها تبعتها لاني تفاجات من الموقف تاعها الحازم كي تشوفيهم كيفاه متفتحين تقولي هادو كلش مباح عندهم
امالا هي مجرد رسالة ومادارش كثر قالت عليها خيانة
وعندها دراري
وشوفي
وانتِ !!!!
لو كان جيتي متزوجة نقولو طاح الفاس فالراس بالاك وبالاك وماكانش وين تولي
علاه عليك
وهادا ديري فيه كونفيونس اومبعد !!!!!
انا اللي ترمش عينو خلاص ... فمابالك كان معاها فالليل !!
هادا يسموه
وعذرا على الكلمة
خ
م
ا
ج

ربي يرزقك نفس مومنة صالحة .

[زايدي أمحمد]

لا ترجعي له ردي بالك ترجعي ليه روحتي فيها

[kader001]

ربي يسهل على كل مؤمن ..سلام

[عبدالنور.ب]

اعتذر عن العبارة :

اذا قبلتيه مرة أخرى فأنت -جايحة- ,فالمرء لا يلدغ من الجرح مرتين

[mehdi_mascara]

اخطيك منو إذا الغيرة أوكي كلنا نغيرو و بزيادة ،

لكن عن السهر ، بففف هنا غير فوتيها ،

لما تكلمت في البداية عن غيرته الشديدة ظننت أنك تتكلمين عني هههه ، فغيرتي كالنار ، فما ليس لي وحدي لا يهمني ،

لكن أن أخون هذا من المستحيلات ، حتى و أنني لم أتزوجها بعد إلا أنني منذ عرفتها و أنا أتجنب حتى النظر للفتيات الأخريات من فرط تعلقي ،

المهم اخطيك