احتاج نصحكم و ارشادكم يا ناس الخير

[مشكلتي]

السلام عليكم و رحمة الله


انا شاب متزوج منذ سنتان و نصف و لدي ولد عمره 15شهرا ، بعد عيد الفطر باسبوع حذث خلاف بسيط بيني و بين زوجتي ، ما ادى بي الى هجرانها ، اصبحت انام في الصالون و تركت لها غرفة النوم مع ابني ، حتى اثناء الخلاف كنت اقوم بدوري و واجبي كزوج من ناحية مصاريف و احتياجات البيت و ابني ، في اليوم الرابع ، تفاجأت بأهل زوجتي متواجدون بالبيت ، علما انني اسكن عند اهلي في الاعلي في الطابق الثاني ، جاء ابوها و اخوها و امها ، وجدت اباها واقفا في بيت العائلة في الاسفل داخل البيت و اخبرني انه يريد اخذ ابنته ، فقلت له عن السبب فقال لي انه لا يعلم ، قال لي انه سياخذها و انه علي احضار والدي و الامام و اذهب الى بيتهم ، علما ان والدي شيخ كبير و مريض ، فقلت له نحل المشكلة هنا و انني لن احضر لا امام و لا والدي ، و بعدها تفاجأت باخاها نازلا من اعلى الدرج الى بيت العائلة ، و احذا من افراد اسرتي لا يعلم بهذا ، فقلت له ساذهب الى ابنتك لاكلمها ، صعدت الى منزلي في الاعلى لارى ان زوجتي تجمع في ملابسها و كل صغيرة و كبيرة في اكياس بلاستيكية من الحجم الكبير ، و معها امها ، فحاولت نصح زوجتي و قلت لها : تفاهمنا من اليوم الاول باننا لا ندخل اهالينا في مشاكنا ، و ذكرتها بالولد الذي بيننا و قلت لها لها خافي الله تعالى ، فقالت لي : لا اخافه ، و لما رأيت خلفي وجدت اباها و لم يحرك ساكنا لا هو و لا امها ، و بعد قليل صعد اخوها الى الاعلى و غمز اباه و قال لي كيف تقول لها خافي الله امام ابوها و اخوها فبدؤوا يصرخون علي و حاول اخاها ان يضربني في عقر داري ، و الله انتابتني حالة من الذهول و بدات اصرخ في وجههم ، و قلت لهم انني لست مقطوعا من شجرة ، و عندي اهلي و ساحضرهم ليشهدوا على كل ما تأخذونه من اغراض ، نزلت في الدرج اناذي على اخي و اهلي ، في هذه اللحظة و قبل قدوم اهلي بلحظات حاول اهل زوجتي و زوجتي الهروب من المنزل تاركين كل الاغراض ، و في اخر لحظة حضر جميع اهلي و شاهدوهم و اصبحت هناك حالة من الصراخ و الغضب ، تفاجأت بأن اهلها احضؤو شاحنة و سيارة ، هربت زوجتي و اخوها ، و بقيت الشاحنة و فيها ابوها و امها ، قلت لابيها ابنتك خرجت دون اذني و انت الذي اخذتها و انت الذي سترجعها و كان اخي شاهدا ، في مساء ذلك اليوم جاء ابوها و معه امام الى منزلنا ، فقال له لا اعلم سبب المشكل ، و انكر انه سيأخذ الاغراض ، و ايضا قال لهم انني انا من حاول ان يضرب ابنه ، وانكر وجود شاحنة و سيارة ، واقسم و حلف كل انواع القسم ، بقيت مندهشا انا و اخي ، المهم القصة الان عندها اسبوعان و لم ارى فيها ابني ، حاول الامام التوسط و الاصلاح بيننا ، لكن ابي رفض الصلح و رفض ان ارجعها الى بيته ، كون اهلها تعدو على حرمة المنزل و لم يستشيرو لا صغير و لا كبير ، حتى ان الامام ذهب الى منزل اهل زوجتي ، و اخبرني ان اباها احضرها اليه لتسرد القصة و الاحداث من الاول مع اخوتها ، فاخبرني ان كل كلامها و الاسباب التي ذكرتها لا تجعلها تكلم اهلها ليحضرو اليها ، انا الان في دوامة عظمى ، اخبروني مالمخرج ، علما انه لا توجد اتصالات لا بيني و لا بين زوجتي و لا اهلها طيلة هذه المدة ، بارك الله فيكم و جزاكم الله كل خير

[مراد سابقا10]

يا خويا واش راح نقولك انا مبغيت نتزوج اوكل لأنني اعرف معنى الزواج في الجزائر

انت لازم تتحدث مع زوجتك وتقنعها ترجع للبيب كي تبغى هي تروح كلش يسهال

النساء لي راهي تتحكم في البيوت دخل النساء ضرك تفرا

[زبدة ذايبة]

ماتدخل في دوامة ماوالو

أهلها حبوا يحقروك.

ويضربوك بيد إبنك.

رد بالك دير أي خطوة تجاه زوجتك

خليها ترشى في دار باباها.

أي خطوة ديرها انت أو أهلك تكون

قضيت على نفسك وعلى شرفك

ورجولتك.

إذا راك حاب تحافظ على زواجك

وتحافظ على إبنك هذي الطريقة

الوحيدة ( رأي شخصي).

كلما تنازلت وحللتها كلما أهلها عفسوك

ويردوك ماتسواش. رايحين يمسحوا بيك الأرض.

خلي للزمن يقول كلمته

وخليها تفهم أن حياتها من غيرك

ماعندها حتى معنى.

الحركة اللي دارها باباها وخوها

كانت مسرحية قدامك حتى يسيطروا عليك والظاهر من الكلام

اللي كتبتوا أنهم متعودين على هذه الأشياء.

الناس اللي تخطط تكون عندها

الأريحية في التصرف بعكس الشخص اللي يقع عليه المخطط.

لقيت روحك في دوامة. لكن هوما

ماعندهم حتى مشكل.

حبوا يدخلوك في مشكلة حتى يقطعوا فيك النفس.

وتولي العبد المطيع للزوجة.

لذا.

أرى أن تخلطلهم الحسابات.

ماتجيب إمام ماتحوس على الصلح

خلي الأمور مفتوحة.

وخلي مطلب الصلح يجي من عندهم.

استعن بالله واصبر


وتأكد أن الضعيف هو اللي يتنازل

لاتقم بأي مبادرة تجاهها.

أنفق عليها وعلى إبنك واحتفظ بأصول المبالغ اللي تبعثها لزوجتك كنففة.

حتى لا تتهم بالإهمال.

هذا رأيي الشخصي وشوف وش يناسبك.

ممكن الأعضاء يعطولك رأي آخر مخالف.

وأتمنى ذلك على الأقل تكون الرؤية عندك واضحة.

أي خطوة تخطوها تحسب لك أو عليك.

ودير في بالك أن مشكلتك هي مع

أب الزوجة وأخوها وأمها وهي.

لذا لاتنظر لمشكلتك من زاوية واحدة وضيقة.


أنا في رأيي أن أسرة الزوجة دارولك اللعبة

باش ماتزيديش تفكر نهائيا تداوس مع بنتهم

ولا ترفع صوتك عليها.

هذي وجهة نظري ممكن نكون غالطة.

الكلام اللي كتبتهولك كنت ننصح بيه حتى

أخي إبن أبي وأمي لو كان وقع في مشكلة مثل مشكلتك

زيد فكر مليح ومادوخش روحك.

خلي العاطفة جانبا وفكر مليح

انت تعرف هذ الناس اللي ناسبتهم خير مني.

ماتخليهمش يدخلولك الشك في نفسك.

في انتظار باقي آراء الأعضاء لمشكلتك

رب يفرج كربتك ويصلحلك بيتك.

[طالب له هدف]

سبحان الله .. الى اين وصلنا
خويا والله راني تشوكيت
--------------
ربي يفرج عليك

[☆ABID☆]

قل أستغفر الله
قل لا ححول ولا قوة الا بالله

[* الحلم سكر *]

و الله كنت سأقول نفس الكلام لي قالاتو الاخت زبدة ذايبة لكن ما كان سيكون بأسلوب أكثر من هذا :19:
أخي ما شد انتباهي و اقشعر له جسمي عندما قلت لزوجتك خافي الله فردت أنها لا تخافه ؟؟؟؟؟؟؟
--أحسن حل وسط خليها عند أهلها و ما تتصلش و خليها تتربى مليح و نهار ترجعها بشروطك انت أهمها علاقتك بيها ماشي مع أهلها حرم عليهم يزيدوا يدخلوا للدار لي ما عرفوش حرمتها
سبحانك يا ربي واش يجي المال و الثياب لي يلموا و يتسابقوةا باه يديوه أما هنا بنتهم ؟؟؟
راجع تصرفاته اذا ما ظلمتش ما عندك مناه تخاف و ربي سبحانه مع الحق و ينصروا بصح كون ذكي حتى اذا رجعتها خليها تدي درس أولا
و ربي يكون معاك عجب و الله ناس تشري في الهنا و ناس تبيع فيه ... ربي يهديها و خلاص

[خالد عنابي]

بعد عيد الفطر باسبوع حذث خلاف بسيط بيني و بين زوجتي ، ما ادى بي الى هجرانها ، اصبحت انام في الصالون و تركت لها غرفة النوم مع ابني

وما نوع الخلافات البسيطة التي تؤدي الى الهجران ؟؟؟؟؟؟؟

والقصة تاعك كاملة مش راكبة على بعضها

تقول لها خافي الله تقول لا اخافه ؟

واخوها يقول كيف تقول لها خافي الله امام اخوها وابوها ؟

عفوا راك متزوج وحدة من عائلة تعبد الشيطان ولا كيفاه ؟

تمسخرو بعيد

[nihal159]

رأي الأخت زبدة ذايبة هو الأرجح و الأسلم؛ على قد ماتخلي مرتك في دار بوها و ماتقيمهاش؛ على قد مايرجعلها عقلها و تعرف قيمة دارها و راجلها؛ لكن إذا رحت ليهم تجري و تقدّم فروض الطاعة و الولاء فأحب أن أبشّرك أنّك تكمّل حياتك كاملة ماتقدرش تهز عينيك لا في نسابك لا في والديك؛ القصد من هذه الحركة أنهم يكسرو كلمتك على مرتك.

[ابو سليمان10]

كل هذا فقط لانكما تخاصمتما لمدة قصيرة

لهذا السبب اصبحنا نخاف الزواج....الواحد راه عيش بعزة و كرامة و يخاف يجيب امراة توصله الى مثل هذه المهازل و في عقر داره

المهم كما نصحوك الزملاء لا تطلب الصلح ان ضعفت ركبوا ظهرك...انت الرجل و بامكانك ان تتزوج غيرها و تنجب اطفال اخرين...اظهر هذا و ستفوز في النهاية...

[Saif al-Islam]

إذا كنت تعلم أنها تُحبك و أنت تُحبّها فإذهب إليها و أطلب عودتها لمنزل الزوجية برفق و دون تهديد ، و إن إمتنعت حاول مرّة أخرى و أخرى و أخرى ....فلا تُصدّق من يقول لك أنّ كرامتك أولى ...بل كرامتك مع زوجتك يا أخي تكتمل .....حاول و إبعث لها رسائل نصيّة و قل لها بأن الخطأ في فراقنا كان الغضب و الشيطان الرّجيم فعل فعلته و فرّقنا ......أطلب منها مسامحتك ونسيان ما مضى ، و هذا ليس عيب طلبه من شريكة حياتك و لو كان الخطأ خطؤها ...فهي زوجتك و ليست عدوّك، حاول الكلام مع أبيها و خفف نبرة الكلام معه فهو ليس بعدوّك يا أخي بل هو جد إبنك ، و حتى و إن قبّلت رأسه هذا ليس عيب و هو بمتابة أبوك ، حاول مع أخيها بنبرة كلام حسنة دون تبادل التّهم .....لأنه نسيبك و ليس عدوّك ......

أنت و زوجتك يا أخي لستما أعداء مهما كان الخلاف ، و لا يُمكن هجرانها في الفراش بمجرّد غضب و خلاف بينكما ، لا يمكن القول أنّك مستمر في إطعامها و قضاء حاجياتها هي و إبنك و أنت تهجرها في الفراش .....توخى الحذر يا أخي فهي ليست رهينة أو أسيرة لذيك .....

المرأة يا أخي مهما أخطأت فلا تقسو عليها ، و إن كان من حقّك هجرانها لتأديبها فلا تشدّد يا أخي .... يوم واحد كفيل بتحطيم قلبها كلّيًا فما بالك بأربعة أيام و أكثر ، لا تحاول يا أخي إستصدار منها الإعتراف بخطئها و أنت هاجرها و لا تكلّمها .....الخوف يقطع قلبها منك و من غضبك يا أخي ، و هذا يجعلها تخاف حتى التقرّب منك و طلب مسامحتها .

متى نتعلّم أن يكون الأقوى هو المبادر للصّفح و المسامحة ، و الزوجة يا أخي حتى و إن أخطأت في حقك .... نعم ستتألّم و ربّما تغضب .....و لكن كان بإمكانك الخروج من المنزل و لو لساعة أو نصف يوم حتي ينخفض الغضب من كلاكما ...و بعدها كن سبّاق يا أخي لمعانقتها و كسر حاجز خوفها و رعبها منك ...فو اللّه ستبكي زوجتك و ستطلب منك مسامحتها ....و إن لم تطلب هذا فبكائها كافي يا أخي ، لا يوجد عيب في هذا .....إنّها زوجتك ....إنّها نصفك الآخر .....لا مجال للرّجولة الزائدة لكسر مشاعر الزوجة ...... حتى و إن تالّمت بفعلتها ،فلا تقارن يا أخي ألمها بآلامك ، فانت رجل و هي إمرأة .......يكفيك حبّها لك .....يكفيك سهرها من أجلك .....يكفيك حملها منك لتضع بين يديك زينة الحياة يا أخ و هو ولدك .....يكفيك و يكفيك و يكفيك .....

المرأة من طبعها الوفاء لمن تُحب ، فلا تحوّلو زواجكم إلى صراع لكسر أنف بعضكم البعض

[ameur elkhalil]

دير وش قالت لك الاخت زبدة ذايبة رأي سديد تبارك الله
عليك بالتريث

[ابو سليمان10]

مع كامل احترامي هي من اخطات و هي من جعلت المشكل يكبر ...هي من عليها ان تبعث رسائل لارضاء زوجها
ان هو فعل سيصبح عبد....لو كنت مكانه لما قبلت الا بعد اعتذار علني من اخيها و ابيها

[رندة.]

بادر إلى الصلح وماتخليش الأمور تكبر أكثر من هكا.
ربي يصلح أحوالكم ويجمع شملكم ان شاء الله.

[dede2000]

أخي راك تقول خلاف بسيط في البداية، لكن انا أسألك رجل لرجل اتعلم أحكام الهجر في المضاجع ،هذه عقوبة كبيرة تكون غالبا للمراة الناشز،
الحاجة الثانية لاثارت انتباهي هي عملية التواصل بينك وبين الزوجة يضهرلي فيها خلل انت اعلم بيه !
الحاجة الثالثة لوكان هناك تواصل وتفاهم وعلاه خلاف بسيط يوصل الي أن الزوجة تعيط لدارهم ويجبو شاحنة !!
اضن انو هناك حلقة مفقودة في القصة
المهم سأسلم انك اعطيتنا الصورة كاملة
انا نعرف. زوج متفاهميين المشاكل متخرجش حتي من الغرفة الي البهو فما بالك الاهل ،اذا كاين خلل
الزوجة ودائما حسب الرواية نتاعك غالطة كي جابت أهلها عالجت مشكل بخطأ
اهل الزوجة ناس ما تفهم ما تستفهم يضهرلي ناس نتاع مشاكل وعنف،
الاب نتاعك انسان صعيب ومباشرتا وضع العقدة في المنشار ورد علي الاساءة بالاساءة،
المهم نعطيك خطوات امشي بيها
1/طفي الضوء يعني ارتاح ومدير والو حتي يخطيك الغضب ،لانو قرارا الغاضب غير محسوبة العواقب
2/كون راجل ومتبينش الضعف او العاطفة اتجاه الزوجة ومتحولش تبان خلاص او تتصل
3/ الزوجة كي يطوال عليها الحال وتتشمخ مليح راح نسابك لي يجو ليك وثم حط النقاط علي الحروف
وفي الاخير ان شاء الله ترجع الامور الي مجاريها ويفرج عليك ربي.

[ridha34]

ربي يهدينا .

[muslim girll]

السلام عليكم
اللهم وفقنا للقول السديد والعمل الرشيد
شوف اخي صعيب بزاف الواحد يتدخل في امور الزواج والطلاق ..مانقولك رجعها اومبعد يزيدو عدد الاولاد الضحايا ..مانقولك ماترجعهاش ونيتم هاداك الطفل ..وتخسرو كي انت كي مرتك ..
خاصة انك ماذكرتش كامل التفاصيل
مي نحب نقولك بعض الامور
اول حاجة : سواء رجعتها والا ما رجعتهاش ..لازم تقوي شخصيتك شوية ..وانا نقرا فالاستشارة تاعك تفكرت لمثل تاع ( طفل قال للباباه يا بابا حقرونا (ظلمونا) قالو يا وليدي ما حقرونا حتى عرفونا ..يعني المرا هاديك ماتخافش (ديجا راهي قالتها ! )
حاجة التانية راك غالط كي هجرتها على ""خلاف بسيط"" (على حساب وش قلت انت ) وزيد بالزيادة الهجر يكون في الفراش ماشي من الفراش بمعنى الرجل ينام في نفس الغرفة مع زوجته لكن لا يقيم العلاقة الخاصة ..ماشي يروح لصالون !
وعلى حساب وش حكيت اعتقد انو هاديك المراة راهي محرشة ..واهلها هوما راهم حابينها تخرج من دارك -والعلم عند الله -
انت ماذكرتش قاع التفاصيل ويبدو انك حاب ترجعها ..نقولك خمم بعقلك واحسبلها مليح وماتخممش بقلبك
واعتقد افضل حل انك تهدر معاها (باش تتفاهمو ماشي تحللها !).. اما الواسطة تع اهلها ماتضمنهمش ..وكذابين .. سيي كيفاش تتفاهم معاها(شوف كاش وحدة بيناتكم تعرفها انت وتثق فيها باش تلاقيكم) .. بلاما يعرفو دارهم وتلاقا بيها واهدرو على مشكلتكم ...دير في بالك اي بيت يكونو فيه مشاكل لكن ايدا هي كانت راح تسرقك في دارك هنا لازم تخمم مليح مليح..
واللي فيه الخير يقدمو ربي

[hodayena]

انا منوافقش الراي الي قالك خاليها تتشمخ في دارهم واهلاها حبويسيطرو عليك لانو النهاية تع هاد التصرف معروفة تعنت الطرفن مكانش حل والنهاية طلاق ويتيتم الطفل
الحل هو من وجهة نظري
اهدر كلمة وحدة وتكون موزونة واقرء نتائجها مليح
البنت هي غالطة واهلها غالطين
معندهمش الحق يدخلو والهدرة معاهم ممنوع انت زوج ابنتهم مرتك باملاحة تديها بالقانون تديها
اهلك وكلام باباك متوليش هنا دورك تهدن باباك وتفكرو في حفيدو الي لي هو ابنك وانك متقدرش تسمح في ولا تخليه يعيش بعيد عليك وتفكر لا طاعة لمخلوق في معصية الخالق
روح ليهم وادي جماعة تفاهم معاهم على كلام واحد جيت ندي الطفلة اما بالسلم اما بالمحكمة وحدة من الزوج الخيار لكم هنا تحبيس
ميحوسوش يدخلو في التفاصيل تع الهجران وما الهجران المهم تدي الطففلة والطفلة وتروح لدارك وهاديك تع منمدلكش الططفلة ووو قلهم اوكي استناو ورقة من المحكمة والدرك نجي نديها
فرضا رجعت مرتك هنا دورك تربيها لانو صح ناقصة تربية تعدللها السلوك هادي مزال منظجتش مليح كيما الطفل الصغير الي عندو سلوك سيء والام ديالو تحاول تعدلو تتعب مي تنجح هكداك
رجعها اول حاجة امنع زيارة اهلها لعندك لدار باه تتفادا انو والدك وهدرتو محترموش حرمة الدار ووووو الخ
تروح لدارهم مرة في الشهر ومتباتش تروح وترجع
الدلال الزائد ووووووو نقص منهم العين الحمرا حتى تتسقم امنع كل شيء مرغوب تحبو قتلك طفل صغير وراك تعدل في السلوك ديالها
اندرها انو رجعتها فقط لانو متحبش تظلم والي دارتها حاجة ولا تغتفر وهادي الاولى والتالية ديالك و
مهمها كان المشكل عيب تهجر الغرفة يولد الجفاء بيناتكم
خليها وقت مليح ابعت نفقة لولدك ووو ومبقاش للعيد الكبير اديرو سبة وروح
وربي يكون في عونك

[جالب الخيرات]

نصيحتي لك......................أولا و قبل كل شيء سكر الهاتف نتاعك......................و أضرب النح............................و كأن لا شيء قد حدث...............عيش حياتك هذال النهارات ...................و أيامات صدقني تلقاهم يجوا يحللو فيك باش تردها..........................نقلك راهم يكرهوا قا باش يتكلفوا بمصاريف الطفل.................فما بالك إذا طول...............................آه باه ما نهفكش مرة على مرة أبعث 1000 د.ج كل شهر و نص عن طريق البريد...................و إلا أرفع دعوى طلاق و ردها أثناء فترة الصلح.......................................

[قدور بن عاشور]

يا صاحبي هذه عائلة بلطجية لا أنصحك بالتودد إليهم.
تبع واش قالت لك الأخت زبدة ذايبة حرفيا
و حذاري ثم حذاري تحل لهم العين
المرة الجاية يضربوك أنت و والديك و الإمام تاعك.
لا حوار و لا إستسلام
إلى الأمام إلى الأمام.:)

[ام سيرينا]

ربي يهديهم هاذو لوالدين يزوجو بناتهم ومباعد يروحو يدمرولهم بيوتهم ولمصيبه انو كاين وليدات هوما لراحو يتشتتو
وهذي لبنات نتاع زمان هذا مكيش قادره تتحملي لمسؤليه لاه رايحه تتزوجي وتغبني بن الناس وتفرزعيه وزيد علي مشكل نعيط لوالديا راح نهبل من هذا لجيل ربي يهديهم قولو امين وزيد بزيادا لمرى نتاع الصح مشاكلها تبقى فيدارها مش تجري تشكى للام ثو للاب منبعد للاخ وتكبر وتولي قضيت عرش
وانا وش نقلك اخي فالاخير متتسرعش بشويه تتحل القضيه وكون انت العاقل والرزين لانوكاين وليد صغير ميستهالش انو يتمرمد كاين وليدات ضاعت حياتهم من قله المسؤليه نتاع لوالدين
وربي يصلح بيناتكم ويكون لخير