هل مهري يكفيني؟

[مشكلتي]

السلام عليكم اخوتي مهري 15مليون يكفيني؟ علابالي رح تقولوا كاين لي مهرها 5 و7 لكن هدوك مع ذهب انا بدون ذهب مع العلم انني ساسكن ببيت اهله ان شاء الله واحتاج لشراء اثاث للصالون مثل القعدة واثاث لغرفتي ثلاجة الخ بالاضافة للباس الذي يسر الزوج طبعا كلش غالي وملابس تصديرة قلت نكري برك مش حابة نبذر ومع هذا الذهب وحدو يجي اكثر من 16 مليون مابالك بالاشياء الاخرى الحمد لله راني قانعة برك مرات نقول نشري بلاكييور ونهني راسي ولا واش؟؟ علابالي زمن الصحابة كانوا عيشة بسيطة والبركة لكن هدا وقتنا كلش داير هك واش رح ندير؟

[صُبح الأندلس]

يمكنك الاستعانة بالبلاكيور على الأقل لن تبقي خائفة طوال الوقت على سرقة ذهبك
ثم ستعيشين مع الأهل فما حاجتك لثلاجة؟ و ما حاجتك لصالون؟اشتري ما تقدرين عليه و كفى
هذا مهرك و ليس لتجهزي بيت الزوجية كل شيء يأتي في وقته

[ridha34]

القناعة كنز لا يفنى.

[محمد جديدي التبسي]

بالنسبة لي هذا مبلغ لا بأس به وهو صعب على موظف جمعه فما بالك ان كان من خطبك فقير على قد الحال ولمعلوماتك هناك من تزوج بمهر اقل من هذا بكثير دون ذهب ولا غيره وهناك من تزوجت بمهر رمزي كالمصحف او غيره
لست مطالبة بتجهيز البيت الثلاجة يجيبها الزوج والصالون ايضا انت اشتري بعض الأفرشة البسيطة وسلفي الذهب اذا كان ما عندكش او ديري بلاكيور كما قالت لك الاخت هناك من لا يمكن تمييزه عن الذهب
وثقي أن اقلهن مهرا أكثرهن بركة لا داعي لهذه المظاهر الفارغة لا داعي للتصديرة لأن النساء راح يهدرو في كل الاحوال
ديري عشاء بسيط في البيت لا داعي لصالات الافراح وربي راح يباركلك في زواجك
وأهم شيء ما ديريش على هاذوك اللي راح يقولولك ليلة العمر وفرحة تاع نهار ومالازمش تغبني روحك قوليلهم رضى الله اولى من مظاهركم السخيفة وربي يرزقنا باللي تساعدنا في المهر أقل منك ان شاء الله

[اناناسة]

اختي حسب ما تريدين فعله بالنقود ...سمعت بفتاة وفرت المهر حتى تعمل عمرة هي و زوجها لمدة اسبوع ...بالنسبة لي ارى بان التصديرة ضياع للنقود و لو بالكراء ناهيك عن ما يشوب ذلك الاجتماع من غيبة و نميمة و حسد ....احسن الاشياء هو اجتماع صغير للعائلة الصغيرة و فستان او اثنين مع الفستان الابيض ...بالنسبة للاثاث لماذا يا اختي؟ الاثاث يوفره الزوج اذا اردت المشاركة ...شاركي بافرشة الصالون ...فكرة العمرة اعجبتني كثيرا و انصحك بها لان اللباس يتغير و الاثاث يتغير لكن رحلة لبيت الله عز وجل لا تعوض ...ربي يباركلك و يهنيك

[لحن الحياة.]

اشري زوج حوايج تاع ذهب خفاف مهما كان لازم ديري حويجه ذهب من دراهمك كاين سلاسل تاع 2ملاين كارتيي او تاع هوليود تكون خفيييفه ولخواتم 2 ملاين تجيبلك خاتم زين وماذابيك كون تلقاي كاسي ولا بون اوكازيو معناها الذهب متفوتيش خمس ملاين...او تقدري تشري سلسله تاع ربع ملاين تبان لوكان تتعرضي في عرس تلقاي وش تلبسي
تصديره معادوش يكثرو لعرايس ديري ربع حوايج كرية يكفو مع لاغوب بلونش
بالنسبه للاثاث مكيش ملزومه تدي ثلاجة وصالون ووووو.ادي شورة زوج قعدات وزوج مطارح. او ربعة مطارح صغار تاع بونج طبعا. وربع قعدات شورهوزربيه وريدو وكوفرولي ودرا وكوفيرطة واكيد الاقارب يجيبولك هدايا اذا دراهم اشريها كوفيرطات تاع ميتينلف واذا جابوهملك حوايج تاع فراش مذبيك ينفعوك خطر مكش رايحة تسكني وحدك راكي مع دار شيخك وش لفايده تدي صالون وفريجدار ووووو

اللبسه تاع دار متفوتش 2ملاين كاين فساتين تاع ميتلف وميتينلف وبجامات رووعة
سهليها برك

[ابو سليمان10]

اصبح الزواج عند العرب عموما تجارة
15 مليون...الموظف ذو اجر ثلاث ملايين و نصف و هو الاجر المتوسط لدى الاغلبية خاصة الشباب قد يستغرق 5 اشهر ليجمعها....
في بعض المناطق من الجزائر مثل المدينة التي اعيش فيها تكاليف الزواج قد تصل الى 100 مليون سنتيم بسهولة و ربما اكثر...الذهب وحده في المعدل 25 مليون سنتيم
الاثمان التي تفرض علينا لنتزوج مقارنة بنوعية المراة غير عادلة....بتلك الاثمان المرتفعة يفترض ان يحصل الرجل على حسناء و تنجب اولاد عباقرة
مع كامل الاحترام للفتيات و الاسر التي تسهل الامور ...ومع ذلك لازم مجهود اكبر لالغاء الاعراس تماما ما عدا الوليمة...لانها داخلة في شروط الزواج و تعتبر صدقة و اعلان عن الزواج

[sohaibdz]

لا يكفي 15 مليون يعتبر مبلغ يسير

[ام رضوان]

السلام عليكم
اولا ربي يتمملك بالخير ويجعلو زواج مبارك وربي يرزقكم البركة في كل خير اميييييين
وثانيا انزعي من راسك فكرة ارضاء الناس لانو ارضاء الناس غاية لاتدرك
وزيد علاه تكلفي نفسك واهلك فوق طاقتك؟
لماذا تاخذي الثلاجة وفراش القعدة ووووالخ والله هذا الشيء عجب
نصيحتي لك
خذي معك ماتستمتعين بلبسه ولوازم الزينة واشياء انت ادرى بهاواشتري بعض الحلي من البلاكيور والله راهو مايتفرقش
ونوصيك دائما اسالي من الله البركة
والله يااختي نعرف اقرب الاقربين من اهلي واهل زوجي عند زواجهم والله اخذو معهم القلييييييل من اللوازم وكانو مقتنعين لانهم كانو قد حالهم والان اقسم بالله وتشوفيهم تبقاي حالة فمك هذا كله نتيجة البركة والرضا بما رزقهم الله
ربي يرزقك من ابواب واسعة امين

[زايدي أمحمد]

ربي يوفقك ويهنيك ان شاء الله

[رضاك يا ربي]

ربي يهنيك ويتمملك على خير
اختي في الله اقلهن مهرا اكثرهن بركة ماتسمعيش لكلام الناس ادي فقط الضروريات ونوصيك بحاجة بالاك تتزوجي وتخلي لوالديك الديون...اشرب حق 7 ملايين ذهب والباقي شوفي كيفاه تقسميه على باقي الاشياء....تاكدي من حاجة واحدة اذا ديتي معاك أو ماديتيش ماش هذا لي راح يهنيك...اطلبي الصحة و الهناء لانو بعد عام أو عامين كل شيء عندك راح يبان قديم وتقولي ياريت يولي الزمان للور ومانجيبهمش معايا....أما الصالون و الثلاجة ياك رابحا تسكني مع اهلو انا اتزوجت لدار وحدي وما ديتهومش معايا....ربي يهنيك ويسعدك ..

[أثيلة]

السلام عليكم ورحمة الله وبركاته
أختي حنا عاداتنا المهر فقط للذهب و الباقي الأهل لأب و الإخوة مسؤولون عنه و بالنسبة للثلاحة و غيرها لست مسؤولة هذه الزوج يهتم بها

[سهيلة2013]

الثلاجة و الصالون متحتاجيهمش لانك في بيت العائلة
الذهب مش شرط ديري طقم
على اقل من 15مليون ديري حاجة تاع ذهب على حساب امكانياتك
و الله يهنيك القناعة و الهناء هما الصح

[~أمة الله~]

عليكم السلام ورحمة الله وبركاته
ربي يعينك أختي ويفتح عليك ويبارك لكِ في مهرك.
حاولي تقسّميه، بالنّسبة للصالون والثلاجة أصلا ماراكيش ملزومة بيهم، فما بالك وأنتِ ستسكنين مع أهله، هادو ماكالاه.
نحّي المبلغ لي راح تشري بيه حوايجك تاع الموسم لي راح تتزوجي فيه إذا صيف أو شتاء، التهاي بروحك، لأنّ الملابس لي تتزيّني بيها لزوجك هي الأهمّ. والذهب اشري حاجة خفيفة تاع كلّ يوم.
ربي يباركلك ويهنيك

[رندة.]

وعليكم السلام ورحمة الله تعالى وبركاته

تكفيك 15 مليون بربي ان شاء الله ماتتقلقيش برك، انا اوافق الاخوة على عدم ضرورة الصالون والثلاجة على الاقل حاليا ، تقدرو تشروهم امبعد انتي والزوج بعد الزواج.
ديري سلسلة ومناقش تاع ذهب فقط ماتزيديش حوالي 7 ملاين في زوج، الخواتم والحدايد اشريهم بلاكيور......والباقي اشري بيه ماقل ودل كيما كانت شرحتلك الاخت لحن الحياة، اللبسة اشري تاع الموسم الي رايحة تتزوجي فيه فقط وامبعد ربي ورحمته، واكيد هدايا الاهل راح يفيدوك كثير ، ديري وليمة بسيطة حسب امكانياتك ماتكلفيش روحك واهلك فوق طاقتهم ، باش ماتديروش الديون او على الاقل ما تكثروش الديون.
ربي يتمملك على خير ويرزق كل الاخوة والاخوات الازواج والزوجات الصالحين

[النجمة القطبية]

اولا نتمنالك زواج مبارك والهناء والسعادة
بالنسبة لموضوعك هو المتعارف عليه ان جهاز العروس على والدها بكل تفاصيله لكن طبعا ادا كان والدك معندوش متكلفيش نفسك وكيما قالوا الاخوات المطلوب منك امور زينتك وفقط
خصصي 6 ملاين للدهب واشري حاجة لوكال او ميكونش مطبوع راح يكون ارخص المهم حاجة تنفع للزينة
والباقي قسميه بين الافرشة والملابس الشخصية وتقدري تخدمي بعض الافرشة اليدوية بنفسك ادا كنتى شاطرة وتعرفي تخدمي راح تخفف عليه بزاف
كيما الدراوات تع برودي مثلا وقطع الزينة تع الغرفة والمخايد وو تقدري كامل تشري القماش وتخيطيهم بنفسك
وملابس التصديرة اشري فقط حاجة او خيطي فستان ولا زوج يكونوا بثمن معقول تلقايهم تلبسيهم للمناسبات بعد الزواج والباقي اكري
واتوقع الاهل والاقارب راح يسقسوك واش يخصك وانتى قوليلهم يجيبولك واش خاص على شكل هدايا
بالنسبة للفريجيدار والصالون هادوك يشريهم الزوج انتى جهزي غرفتك يكفيك وخاصة انوا ساكنة مع عجوزتك
انا داري وحدي ومشريتش الفريجيدار مفهمتش ما هده الموضة الجديدة حتى انها لا تليق بالعروس ادا كنتى حابتها اطلبيها من زوجك يجيب واحدة صغيرة في الغرفة للماء البارد على الاقل
موفقة

[nihal159]

حنا في عادتنا المهر تشتري به العروس الذهب فقط؛ أما باقي المستلزمات يتكفل بهم الأب؛ مادام تعيشي مع العايلة أدي حاجة قليلة فقط لأنك ماتلقايش وين تفرشيهم و نهار تخرجي بدارك إن شاء الله أشري ثلاجة و صالون؛ لكن مش من الآن.

[lwiza2000]

مهري كان قرآن يااختي
البركة في القليل
مكانش منها وقت داير هاك
كون تبعي الناس مش حتفرا
المهم تكوني مقتنعة انت

[جَمِيلَة]

السلام عليكم ورحمة الله وبركاته
اولا اسال الله ان يسهل زواجك ويبارك لك فيه
ثانيا احب ان اعلمك ان المهر عبارة عن هدية يكرم بها الرجل المراة التي سيتزوجها، وهي ليست مطالبة باظهاره في شكل مشتريات، يعني تستطيع فعل ما تريد به لن يحاسبها عليه احد، لكن حاليا عاداتنا وتقاليدنا قضت بان يوجه لتجهيز العروس وما الى ذلك مما ادى الى المغالاة في المهور والتضييق على الناس.
في الحقيقة الزوج ليس مسؤولا عن جهازك هذا امر يخصك وعليك تدبر امره بنفسك، فاذا وجدت بانك لا تستطيعين ان تتجهزي بكل ما ذكرت فلا تحملي نفسك ما لا تطيق، وحاولي اقتناء الاساسيات فقط،
ثم ان مهرك ليس بالقليل ما شاء الله من منظوري انا اعتبره مهرا غاليا، اعتقد بانك تستطيعين شراء ما يلزمك لو حذفت الذهب من القائمة وعوضته بمعدن اقل ثمنا.
اخيرا اسال الله ان يرزقك البركة، والقناعة، وحسن التدبير
بالتوفيق اختي
تحياتي

[karime amrs]

مهر زوجتي كان 5 ملايين سنتيم و حمد لله