خاطب مطلق بأولاد

[مشكلتي]

السلام عليكم و رحمة الله ... بعد الاستخارة اود رايكم
فتاة قريب 37 عمرها مطلقة قبل الدخول يتقدملها شخص حوالي 40 سنة عمره مطلق و لديه ولد و بنت عايشين عند جداتهم -أم والدهم- هل أوافق رغم اني عمري لا توقعتها نتزوج شخص مطلق له أولاد ؟؟؟؟؟؟

[محمد جديدي التبسي]

وعليكم السلام ورحمة الله وبركاته
اذا كان الرجل مرضي الخلق والدين وعرفت سبب طلاقه وكان لديه سكن خاص فتزوجيه عادي
المرأة كلما تأخر زواجها سيتقدم لها المطلق وغيره بل هناك حتى بنات في العشرينات تزوجوا من رجل مطلق
المجتمع فيه كل شيء ولا يمكن تعميم تجربة فاشلة للزواج من مطلق على الجميع..ربي يكتبلك اللي فيه الخير.

[غزلانْ]

السلام عليكم

حتى أنتِ أختي الكريمة مطلقة بغض النظر قبل أو بعد
غالبا مثل هذه الحالات حين يتزوج الأب يُرمى الأولاد اليه لأنه تزوج
و طبعا يتكفل بهم لهذا راجعي الوضع بكل ما يحمله من احتماليات
و بصفته مطلق اسألي سبب طلاقه فكم من امرأة تطلقت ظلما بلا سبب
اذ السبب في الزوج
بالتوفيق

[ايمان4]

ابحثي جيدا في سبب الطلاق جل الفتيات لا ينطلقن سوى في حالة استحالة العيش لا تساليه هو اسالي الناس من حوله..... تعرفي لعرب قرعاجين .... اما ان كان عكس ذلك و هذا ما نتمناه تزوجي و الله يسخر لكن فيما يخص الاولاد اتفاهمي معاه من الاول اذا يعيشوا معاك او مع امهم مع جدتهم المهم من الاول تفاهمو باش ما يوقعش صدام ... و اذا عاشوا معاك ديري في بالك ببلي هادو كيشغل يتامى ابوهم و امهم كل في جهة لا تظلميهم

[مراد سابقا10]

اسالي جيدا عن سبب الطلاق


فاذا كان مبررا فتزوجي عادي

واذا كان هناك خلل ما فتوقفي من الان

[نورالهدى بيولوجيست]

اختي تدي رايي تزوجي و سبب الطلاق ماتقدريش تعرفيه مهما سعيتي او على الاقل ماتقدريش تتأكدي

انا متزوجة من شخص في نفس وضعية خاطبك تقرييبا و الصراحة عندي عام و الزيادة زواج متهنية و الحمدلله الرجل المطلق لديه ايجابيات كثيرة فالزواج الثاني متريث اكثر و حكيم و يحافظ على زواجو هذا و الهنا راه من عند المولى سبحانو ماتنسايش انو زوجتو الاولى اداتو اعزب و تفرقو يعني مش شرط

تزوجي و جيببي وليدات بالحلال كما يقولو جداواتنا ماعندكش وقت كثير صدقيني الامومة ارووووووووووووع مما تتصوري مهما كان مستوى زواجك ماكيش راضية بيه لانو الذرية تونسك و تنسيك فيي كللش

[سومية88]

مدام ولاد عند تزوجيه اال كان عند امهم اخطيك لان غير تشوف تزوج تبدا تقل نرجع وتصيب روحك مطلقة

[فتـ حييةـاة]

ديري صلاة الاستخارة

[noeddin]

ما دام صليتي الإستخارة قالقرار بيدك والله المستعان :
لي يقولك اسباب طلاقه خرافات ولا يمكن معرفة الحقيقة لأن كل طرف سيجمل نفسه
ربما ستكون هده اخر فرصة لك للزواج في حياتك
"" لا تنسي السؤوال عن الدين والخلق دعي اخوك او ابوك او قريب يسأل عنه "" واكدي على هد الشيئ وانا ادرك ما اقول ادا كان سلبيا اياك ثم اياك ان تقبلي فقول رسولنا الكريم فوق كل قول ,

وما يسعني الا ان اقول ربي يوفقكم ان شاء الله

[ع.عيسى]

الطلاق هو حل للزوجين الذان ما طاحوش على بعضاهم ...اي لم يألفا بعضهما البعض وشخصيتهما لم تمتزجان بسبب او باخر واستمر زواجهما لفترة معينة اما بسبب الاولاد او الاهل .........فليس شرط ان يكون الزوج هو السبب او المراة هي السبب... ممكن أن تتزوج المراة بعدها وينجح زواجها وكذلك الامر بالنسبة للرجل ....لذلك اختي اولا اسالي عن اخلاقه وتكلمي معه ثانيا واخيرا صل صلاة الاستخارة .....ولا يهمك ابدا سبب الطلاق .....وفقك الله لما فيه صلاحك

[ridha34]

عليك بصلاة الاستخارة.

[karime amrs]

اذا كان على خلق و دين
يتقي الله و كما يقال بالعامية رجل باتم معنى الكلمة فاقول لك توكلي على الله هذه فرصتك فلا تضيعيها
الطلاق ليس عيب لا للرجل و لا للمراة بل هو حل من الحلول
لا نتظري الى الافكار البالية للمجتمع و انظري الى مصلحتك اين هي
ربي يوفق الجميع

[fathbb]

السلام عليكم أخيتي ..........توكلي على الله واستخيري...وفقك الله.

[loulou kati12]

توكلي على الله فالخير فيما اختاره الله لكي .

[ilinafatna]

:dj_17:الطلاق مش عيب ولكن يجب ان تتحري جيدا عن اسباب طلاقه ربي يوفقك

[Saif al-Islam]

أختي الكريمة

أحيانًا الإنسان ينساق وراء العناوين بسبب عوامل عديدة مؤثّرة تسيطر على عقولنا و مشاعرنا ثم نقع ضحيّة سوء قراراتنا و نندم عليها ما حيينا بسسبب التسرّع و غير ذلك

حقيقتًا أنت يا أختي حاليًا في مفترق طرق حقيقي سيقرر ربّما مصير حياتك بشكل شبه نهائي ، و هذا بسبب السّن الذي أنت عليه الآن ، أما مسألة الزواج بصفة عامة تحتاج إلى أسئلة قد تُطرح و بحث و تحقق عن أصل و فصل من أتى به القدر إليك ، و هذا كلّه من البديهيات التي لا مفر منها ، و لعلّ سن الشباب يعطينا فسحة زمنية نستطيع إستغلالها في الأخد و الإمتناع ، أما سن 37 سنة قد يكون بحد ذاته يلعب دور في الضغط على قراراتك

يا اختي أنت الآن أمام مشروع كبير و تحدّي قد تخطّى مسألة الزّواج نفسه ، و هذا ما أنبّهك عنه قبل أن تقرري ، و لهذا قد أطرح عليكي أسئلة مصيرية لمستقبل زواجك هذا ، و أجيبي عليها بينك و بين نفسك

أوّلاً > هل بإمكانك إحتضان هؤلاء الأبناء و تعويضهم حنان أمّهم الحقيقية بدون عقدة أو نقص ؟
ثانيًا > أمّهم الحقيقية على قيد الحياة و هؤلاء الأبناء يعلمون ذلك ، هل يمكن لكي تحمّل أعراضهم النفسية التي من الممكن أن تصدر منهم إتجاهك مثل النفور ، و التمرّد أحيانًا و هذا بسبب إعتلاءك منصب أمّهم الحقيقية ؟
ثالثًا > إحتمال كبير أنك ستفكّرين في إنجاب أولاد مع هذا الرّجل ، هل بإستطاعتك التوفيق في تقسيم مجهوداتك و حنانك بين ما هو لكي و ما هو ليس لكي

و إن كانت الأجوبة إيجابية و أنت متيقّنة بما تشعرين به بدون أيّ عاطفة ، و رضيتي ب خُلق هذا الرّجل و دينه ، فإستبشري خيرًا و توكّلي على اللّه سبحانه و تعالى

[صُبح الأندلس]

اذا وافقت فإياك و ظلم الأولاد

[abdellah36]

الاستخارة تكون بعد اتخاذ القرار و ليس قبله ..........كثير من الناس يظن ان الاستخارة هي وحي الاهي .....و هذا خطا الاستخارة تكون بعد بذل الوسع من الجهد في معرفة ما ينفع و ترك ما يظر ...........اما ترك العمل و التفكير و الجهد .....و انتظار الوحي من السماء فهذا جهل و دجل

[muslim girll]

السلام عليكم
شوفي اختي راكي ماعجبتينيش كي قلتي اولادو عايشين مع جدتهم
ديري في بالك بلي راكي رايحة تدي راجل عندو ولادو .. ولازم عليه يتحمل مسؤوليتهم ويصرف عليهم ويعطيهم كامل حقوقهم من عاطفة واهتمام ويدللهم وكلش ..هادا ديريه مليح في بالك
ماشي انت بنت الناس جي في دقيقة ديري كي شغل هادا راجل طاح من السما ماعندو والديه ماعندو خاوتو ماعندو ولادو ..كيما بزاف نسا .. كي شغل ربي خلقلها هاد الراجل سبيسيال ليها وهبطولها من السما ...لالا ماشي هكذا !
ايدا قبلتي بيه معنتها انت مارح تتحسسي من ولادو.. ايدا شرا لبنتو ماتقوليلوش علاش شريتلها ولا كيما شريتلها اشريلي .. وايدا صرات حاجة مع وليدو ماتزيريهش باش يقولك ويحكيلك كلش ..كاين علاقة تجمعو مع ولادو وانت مادخليش روحك -- غير بلخير -- ..
وهادي مانهم ماولدتهم ماراهي مسؤولة عليهم وماتعرفي كشما يصرالها (بعيد الشر) الدراري وين يروحو ؟ يتشردو ؟؟؟؟ اكيد يماهم رح تخليهم لباباهم ...امالا خممي انت لبعيد ..
مانقولكش كوني كي يماهم (علابالي بلي اغلب الناس تع هاد الوقت ولادهم تع صح وما يديروش لواجب تاعهم ! ) المهم لازم ما تظلميهمش
باش تكوني زوجة اب ماشي حاجة ساهلة وبالاك طليقتو تسيي ديرلك مشاكل ويمكن حتى تستغل الاطفال (مايعرفوش) باش يديرونجيوك ..مالا انت وشطارتك (الشطارة =الحكمة والصبر...)
مانيش نقولك هكدا باش ترفضي مي باش تبانلك بعض الامور ..
وانا جابلي ربي هاد الانسان راهو حاب يتهنا خاتش كان قادر يخطب وحدة صغيرة او موان ثلاثين ..مي هو راهو يحوس على وحدة ناضجة (ممكن هاد الاحتمال ايدا ما خطبش صغارات وما قبلوش ) ايدا قدرت تعرفي هاد الامر راح يساعدك تعرفي عقليتو شوية ..لانو ايدا كبير ومطلق وبدراري وراح يخطب فواحدة صغيرة هادا ماتسنايش منو لخير صراحة وانسان غير ناضج ومايخممش لبعيد ... )))قبل مايخطبك يعني(((
•وتاني انت راكي سبعة وتلاتين سنة (ربي يبارك في عمرك ) يعني هادا وقت الزواج ووقت جيبي الذرية وتعيشي الامومة .. لالا؟؟؟ خاصة ايدا مارهمش يتقدمولك رجال ملاح ... انت قدري وشوفي
نقولك حاجة ايدا كان مليح ما تراطيهش (في الاخلاق ) الاخلاق هي اهم حاجة ايدا شفتيه متربي ومايكلش حق لخرين وما يظلمش (باختصار يخاف ربي) فهادي الدنيا ومافيها ..وماتقدريش تدي كلش فهاد الدنيا لازم تخص حاجة
انا رايي انك تقبلي تشوفيه ويشوفك بالاك ترتاحيلو وماتخميش كامل ترفضي
وبالاك العكس
يعني الشوفة الشرعية مهمة جدا واكيد اهدري معاه
وماكان حتى واحد ماشي حاب يتهنا ايدا طلبك معناتو راهو حاب امراة تهنيه
ويهنيها
وكاينة حاجة ايدا هو عايش مع دارهم يعني ولادو ويماه وهو في دار وحدة معنتها قالولك عايشين مع جدتهم غير باش تقبلي ... ماكاش منها هادي باينة !
وتزيدلك حاجة وحداخرى ايدا هو مافيهش لخير فولادو غير اخطيك هادا ربي مايباركلكم ماوالو ومع الوقت يدور عليك .فالحديث النبوي (خيركم خيركم لاهله)
المهم ايدا قبلتي تشوفيه اومبعد ايدا قبلت الخطوبة اقعدي تميزي فيه وماتزربيش روحك على العقد .. وايدا معجبكش حبسي نورمال ..ماشي بالسيف
اعطيلو واعطي لنفسك فرصة ..ولازم لازم لازم تسقسو عليه ... ماشي واحد ماشي زوج سقسو فالخدمة فالحومة فالجامع من لافامي تاعو صحابو .. لانو ممكن ربي يكشفو(اذا ماشي مليح) كي تسقسو عليه
ربي يكتبلك الخير .

[dede2000]

السلام عليكم ،اختي الكريمة لن أضيف الكثير علي ما قاله الاخوة والاخوات ربي يجازيهم كل خير ،حبيت نشيير لبعض النقاط التي أراها مهمة
1/ الطلاق ليس بالشيء الذي يعييب الرجل أو المرأة علي حد سواء لان ربي دارو رحمة بعباده وكذالك لاعطاء فرصة أخري لشخص للبحث عن السعادة مع شخص جديد،فهو حياة جديدة اذا إستحالت الحياة الاولي
2/زوجك له أولاد وهذي نعمة من ربي وأولادو رايحيين يبقاو أولادو مدي الدهر وإذا كتب ربي زواجك مع هذا الشخص حاولي تكوني أم لهذو الاولاد وربحيهم ،هذو حسنات متفرطيش فيهم
3/ الانسان هذا لعجبك دين نتاعو وخلقو والخليقة نتاعو اتكلي علي ربي وروحي ازوجي وبربح ان شاء الله،
شوفي نعطيك تجربة شخصية انا يتيم الام(رحمها الله) وتربيت مع مرت بابا انا وإخوتي 3
كانت نعم الام لينا وحنا كي كبرنا والله ديرينها في مقام كبير بزاف ،وندعولها ليل ونهار،ازرعي اليوم حبا وحنان والحصاد اكيد أختاه سيكون غدا عطف واحترام وعائلة ولا أروع.والله المستعان

[dede2000]

اسمحيلي أختي ،إن شاء الله بعد ماتخمي وديري قرار ،ما تنسايش درينا رد باش هكذا علي الاقل نطمنو وندعو لاختنا بالتوفيق والهناء ورفاه والبنين
يارب استر أخواتنا وبناتنا وبنات المسلمين

[karime amrs]

ماهو سبب مشاركتك في المنتدى
هذا الامر بينك و بين نفسك و انت الادرى بما تريدينه
انت الاعلم بمحيطك يمكنكي الاستفسار حوله و معرفته
الاهم الاخلاق و التربية و الرجولة
ماذا تريدين من رواد الموقع قوله
هل تريدين بعث اشكالية زواج من مطلقة او مطلق
الامر محسوم و لكل رايه و قناعته