حريرة وهرانية بأيادي عاصمية .............. يعني على طريقة زُخْرُفَةٌ

[zokhrofa]

السلام لبنات

حبيت اليوم نشاركم فرحتي لأني اول مرة نجرب حريرة وهرانية و الحمد لله جاتني تهبل

بدون اطالة نجوزو للوصفة

http://www.up.djelfa.info/uploads/149782415214081.jpg

الطريقة :

في قدر حطي زيت و شوية سمن و حطي قطعة اللحم لي حابة تستخدميها يا اما غنمي يا اما دجاج من الاحسن صدر يا اما ديك رومي يعني الداند و من الاحسن فخذ او عنق يعني عنقوق

كي يكسب لون ذهبي اللحم لي حاطة

ضيفي عليه حبة بصل مسكرفجة و خليها تتقلى

من بعد ضيفي المكونات التالية مع بعض :

جزر + بطاطا + طماطم منزوعة الزريعة + كرافس + قصبر + بصل من غير لي مسكرفج زيدي حبة + 1 سن او 2 ثوم بدوم هرس منقيين برك

البهارات :

ملح + فلفل اسود + كركم + زنجبيل + فلفل احمر حلو + فلفل احمر حار حسب الذوق + عود قرفة صغير + كروية + حبة الحلاوة مرحية + زريعة البسباس مرحية + شوية كبابة مسكرفجة + شوية جوزة الطيب مسكرفجة

حمص لي تكوني غليتيه 45دقيقة لي كنتي نقعتيه ليلة كامل

خلي الكل يتقلى 2 د

ثم مرقي غير قيس ما يتغطاو المكونات

في جهة اخرى ديري الماء لي راح يعمر الباقي يغلي و زيديلو 2 ملاعق طماطم مصبرة

بعد ما يمر 1 سا على القدرة الاولى مرقي بالماء لي فيه الطماطم

كي تغلي القدرة ضيفيلها تيشة المرمز لي تكوني غسلتيها مليح

و مرة على مرة ردي بالك تشدلك من التحت يعني حركي شوية

المدة تاع الطهي لي تزيديها 1سا و نصف على نار هادية نسبيا يعني لازم يبقى الماء يغلي مالازمش يكون هادي

لوكان يكون هادي راح تتركز التيشة و تشدلك تم تم

المهم بعد ما يفوت الوقت تاع الطهي لي قلت عليه

احكمي الخلاط الكهربائي تاع اليد و ارحي كلش ما عدا القصبر و الكرافس و اللحم

و عاودي رجعي القدرة على النار

كي تغلي مليح

ضيفيلها خليط من الماء و الفرينة باش تعقد

في الحقيقة انا درت تيشة المرمز بالزيادة شوية ما ستحقيتش نزيدلها الفرينة باش تعقد جات عاقدة بالخضر لي درتها و تيشة

كي تكوني راح طفي عليها قبل 5 دقائق

في فنجال ماء ديري ملعقة كبيرة كروية و خلطي و ارميه في القدرة خليه 5 د

من بعد ضيفي قصبر مقطع رقيق و طفي

و شهية طيبة

[أمنية غفران]

حريرة وعليها الكلام بصحتكم زوزو

نعطيك استيس باش ما توليش كل مرة تخلطي في التشيشة و تخافيها تهبط لك التحتة في القدر

شوفي حكمي التشيشة قيس الي حابة ترميه في القدر ضعيه في ماء يعني غطيها كامل بالماء خليها ثلاث دقائق فيه و من بعد صفيها من الماء و خليها شوية و من بعد ارميها في القدر و خلطي شوية و رايحة تشوفي بعينك بلي التشيشة ما تهبطش التحت خلاص

ربي يحفظك و يعينك

[zokhrofa]

اهلين امينة

نفس طريقتي ههههههههه لكن خفت نقولهالهم و من بعد يبداو الدعاوي

خفت تكون تنجح غير معايا هههههههههه

[أمنية غفران]

ههههههههههههههههههه لا لا اختي ما تدي غي دعاوي الخير حنونة ربي يبارك فيك

هادي تدبيرة امهاتنا و جداتنا ربي يحفظهم

صحا سحورك

راني غي انا وانتي نزنقو هنايا في القسم هههههههههههه

[zokhrofa]

هههههههههههههههه والله غير صح

[fleur de lili]

أن ثاني راني معاكم.....زخرفة طليتى علي قلبى حبيت حريرة خفيفة .لقيتك حطيتيها
شكرااااااا

[zokhrofa]

اهلا اختي زهرة الليلي هيا مالا نتمنى نشوف تطبيقك عن قريب

[zokhrofa]

تنبيه : نسيت في المكونات 1 سن او 2 ثوم بدوم هرس منقيين برك

[أثيلة]

ممممم يعطيك الصحة يا سطورة... عابالكي حلم حياتي نذوقها في جيجل او في دارنا نديرو شربة فريك برك لكن باذن الله نجربها في اقرب وقت

[zokhrofa]

جربيها و نتمنى تعجبك كيما عجبتني

[بيان 5]

يعطيك الصحة من يدك باينة بنينة

[zokhrofa]

اهلييين بيان

وااااع البارح عاودتها و مع الدوخة درت زوج مرات فلفل اسود جات حاااارة ههههه

[idron0]

يعطيك الصحة

[ام حمزة22]

السلام عليكم

ماشاء الله علبك اختي زخرفة يعطيك الصحة راكي درتي القلب والكوراج وحضرتي الحريرة انا نموت عليها لكن ماعنديش ااكوراج نحضرها نخاف ما تصدقليش رغم ان ختي تحضرها امامي وجي بنيييينة تشهي
هدي الطبخة الوخيدة لي ما جربتهاش في حيات رغم ان وليدي طلبها مني في رمضان بصح قلتلو ما نعرفش نديرها قالي فرحتيني بصراحتك ههه

المهم ان شاء الله ندير بحالك ونجربها

تحياتي الحارة

سلااام

[Yakuzaishi]

شكرا على الموضوع

[Yakuzaishi]

طريقة سهلة وبسيطة

[zokhrofa]

فيكن بركة اهلا بكن نتمنى تجربوها

اختي ام حمزة جربتيها ولا مزال ههههه

[nadine0159]

وضحي اكثر كمية التوابل بالملعقة سواءا صغيرة او كبيىرة باش نجربوها

[zokhrofa]

سلام اختي ما نقدرش نقولك شحال خاطش الكمية على حسب الماء المستعمل

على كلٍ من الاحسن تجربها وحدة تعرف طيب ولي ما تعرفش تستعين بتجربة امها مع التوابل

[شمس الأمنيات]

اختي زخرفة

والجميع

انا بحاجة لدعواتكم هذا رجائي منكم

وفقكم الله

[zokhrofa]

ربي يكون معاك فيما فيه الخير لكي و للأمة الاسلامية

[شمس الأمنيات]

ان شاء الله شكرا لك

[zokhrofa]

عفوا اهلا في كل وقت

[أم حمزة السلفية]

يعطيك الصحة والعافية وتسلم ايديك يا مبدعة والله راني معجبة جدا بطبخك ونتمنى ندوقو هاهاها

[zokhrofa]

ههههه ام جعفر ردي بالك راه كل شيء غير مستحيل وين تعرفي ربما تذوقيه يا في الدنيا يا في الجنة ان شاء الله

[سعيدة بربي]

يعطيكم الصحة انا ما نعفهاش مي كاين اللي يقولو يديرولها الفريك شكون هي اللي خير المرمز والا الفريك

[zokhrofa]

سلام اختي انا جربتها بالاثنين الذوق لا يفرق كثيرا

[ام وسامة]

يعطيك الصحة اختي تشهي

[zokhrofa]

عفوا اختي هذا اقل شيء

[lola2018]

شكرا وبالتوفيق مع كل جديد

[zokhrofa]

عفوا اختي هذا اقل شيء

[ikram Mkr]

يعطيك الصحة

[zokhrofa]

شكراااااااااااااااااااااا

[djoher_m]

شكرا حبيبتنا

[عالم حواء للجمال]

شكرا على الوصفة

[djoher_m]

الحريرة تاعي
مرات نديرها بارد في بارد و مرات نقلي حسب الوقت.
هي تشبه لتاعك اختي زخرفة
طريقتي:
حسب عائلتي اربع اشخاص ندير
في قدر زيت ولحم اللي عندك و مرات منديرش اللحم ع¨اع نزيد كامل الخضر اللي هي زوج حبات كبار زرودية بصلة كبيرة ولازوج متوسطين وحبة مليحة طماطم يكون حتى تقطيعهم عشوائي تقطيع كبير نورمال نزيد ملعقة كبيرة طماطم مصبرة عود قرفة ملح حرور كركب زعفران شوية سكنجبير و شوية كروية حبة حلاوة زريعة بسباس الهيل حبة كبابة فلفلة حمرة رأس الحانوت وهو اساس الحريرة تاعنا كلش في خطرة نديره وتكون نار قليلة. الخضرة راهي تتقلا وأنا راني نوجد فالقصبر نغسله و نربطه ونزيد نرميه مع الخضرة تاعي ونسقي بالماء الساخن مرة وحدة .و راهي اطيب عادي بعدما تطيب المرقة نطحنها اما بالميكسور او الرحايا تع بكري او نْصَفِيهَا في كسكاس و نمرس الخضر هذا بعد اللي تنزعي القصبر والقرفة و الهيل و الكبابة واللحم و ترجعي المرق فوق النار لما تغلي نرمي تشيشة و نزيد اوراق نعناع يابس او اخضر ولما تطيب اذا جاتك خفيفة ثقليها بالفرينة. و كي تعقاد راهي واجدة و شهية طيبة واللي معندهاش مشكل مع جمبو ادير حبة بعد التمراق او بعد الطحن و شهية طيبة.
ملاحظات برك انا ندير تشيشة مخلطة مع الفرينة ونزيدلهم الماء نوجدهم من قبل ونعقد بيهم لكن معرفتش كي نفهمكم عطيتكم هديك الطريقة تع تشيشت في الاول و الفرينة في الأخير لتسهيل لانه مرات المرقة بعد الطحن تكون ثقيلة بالخضر او تجي خفيفة شوية متسحقش الفرينة كامل( في رمضان نوجد في علبة تتغلق التشيشة مع الفرينة والماء من اول يوم كمية مليحة ونغلقها ونديرها في الثلاجة كل ماتبغي تكملي نزيد غي عليها حتى يكمل رمضان)
وكاين اللي يدير فصوص ثوم وكاين لميديرهمش.
ومرات تنشف المرق بعد الطحن تبان قليلة ممكن تزيديلها ماء ساخن تكوني غليتيه مع القصبر اللي نزعتيه و تكوني زدتيله شوي عطور اللي درتيهم من قبل باش يصمطلكش الحريرة يعني عطرية وزيديه للمرق
واهل زوجي مرات يعقدو في مكان التشيشة بشوية شوربة فارميسال وفرينة تجي ثاني بنينة

انشاء الله نكون فهمتكم حباباتي
عذرا على الإطالة

[zokhrofa]

اهلا اهلا اختي جوهر اسمك شباب و يعطيك الصحة على الوصفة


لا اطالة ولا شيء العكس افادة رائعة زورينا

[djoher_m]

الله يسلمك حبيبة
وشكرا لك

[zokhrofa]

عفوا اهلا بيك

[azertyguid]

باينة بنينة بلاما ندوقوها

[zokhrofa]

ههههههههههههههه طوماطيش الحارة

[القدس لنا.]

اختي زخرفة زخرف الله ايامك بالمسرات ممكن توجيه انا من الشرق تعودنا على شربة فريك خاطيني الحريرة وزوجي اكلها في وهران والجلفة طيبت ليه الحريرة الوهرانية والتلمسانية قالي بنينة لكن يصر ان يكون لون الحريرة اخضر وهذه اكلها في الجلفة كان ضيف ، والتي طبختها فيه لون احمر خفيف فهل من توجيه حتى تجي خضرا وانا لك من الشاكرين

[zokhrofa]

اهلا اهلا اختي شوفي كاين بهار خاص بالحريرة تشريه من وهران او توصي البائع يجيبهولك

و تان اللون الاخضر ربما رحاو معاه القصبر و الكرافس ما نحاوهمش و هذا ما يجعل لونها هكذاك ماشي احمر

[القدس لنا.]

جزاك اله خيرا اختي زخرفة واسعد الله ايامك ان شاء الله لما يسافر زوجي الى هناك ساوصيه لشراء البهار وشكرا مرة اخرى

[zokhrofa]

امين يا رب العالمين يااااااااااارب

شوفي تفكرت وحد الحاجة هوما كي يديرو الخضر ما يرحوهمش معاها فقط يديروها في الرحاية اليدوية يعني ماشي كامل يرجعوها راكي تعرفي كيفاش ترحي

و تاني الطماطم تاع الحب يديرو وحدة برك متوسطة الحجم

طماطم العلبة وحدة فقط اذا كمية تاع عائلة صغيرة

البهار يكون بني اللون خاطش فيه بزاف الكروية