مقبلة مالحة:. بغرير محشي في مكان البوراك ...... على طريقة زخرفة

[zokhrofa]

السلااااام

حبيت نشارك معاكم وصفة البارح ابتكرتها و نتمنى تعجبكم

ماكانش عندي لا ديول باش ندير بوراك لا فرينة باش ندير كاش ميني بيتزا

خممت قلت مايسلكني غير السميد لرطب كنت حابة ندير محاجي لكن مكانش عندي البصل ههههه باختثار البارح كان كلش يصفر

جاتني في راسي البغرير بصحةقلت لازم نحشيه

الخضرة الوحيدة لي كنت نقدر نديرها هي الباذنجال



نعم الباذنجال

هذه هي النتيجة


http://www.up.djelfa.info/uploads/149746765239331.jpg

http://www.up.djelfa.info/uploads/149746765242432.jpg


الطريقة :


اوّل حاجة تبداي بيها هي الحشو باش كي يوجد يستنى البغرير باش نستعملو الحشو بارد في بغرير سخون من بعد تفهمي علاش

تبعي

المهم تحكمي باذنجال تنقيه من القشور كامل

في طنجرة فيها زيت بالزيادة شوية حطي الباذنجال كي تشوفيه دخلو الطياب مليح مليح

جيبي لحم مرحي ضيفيه + ملح + فلفل اسود

كي يطيب اللحم ضيفي حبة بيض

من بعد ما طيب طفي و ضيفي المعدنوس مقطع رقيق بزاف و خلطي الكل بالخلاط باش يترحاو و يشكلو عجينة الحشو

الان حطيه في حاجة كبيرة مسطحة باش يبرد


البغرير معروف وصفة ديالو

لكن نمد طريقتي ربما تساعد اكثر بحيث توجد في 30د

في اناء حطي 500غ سميد رطب بزاف + ملح + سكر شوية برك + ملعقة كبيرة خميرة الخبز + كيس خميرة الحلويات خلطي كلش ناشف

من بعد ضيفي 60 سل ماء دافي اذا شفتي بلي العجينة ما ولاتش جارية زيدي 20 سل و هكذا حتى تتحصلي على عجينة سائلة

احكمي الخلاط و اضربي لمدة 10د بشرط كل 3د تريحي الخلاط 10 ثواني

حتى يخلاصو 10د

غطيه و خليه يخمر 15د فقط لا أكثر

احكمي المقلة تاع البغرير و ادهنيها بالزبدة و ابداي تحطي بالغراف

كي طيب الحبة ادهنيها بالزبدة

و هكذا حتى تكملي كامل العجينة

الان بالنسبة للحشو

من الاحسن كل ما تخدمي وحدة تحشيها لماذا ؟

خاطش مادام البغرير سخون مادام يتغلق في لطراف تم تم و ما يتفتحش اذا برد تولي تتفتح

اذا حطي في نصف البغريرة حبة فرماج مقطعة قطع صغار او كيما تحبي

من فوقها حطي الحشو و أغلقيه على شكل هلال كيما في الصورة و ادركي على الاطراف باش تتغلق

و اذا ما تغلقش ماراهيش اخر الدنيا ههههههه عادي ينتكل


نصيحة : من الاحسن صغري الحبات باش ما تشبعوش غير بيه كيما صرالي انا هههههههه

نتمنى تكون عجبتكم الوصفة و ان شاء الله طبقوها من باب التغيير و الخروج عن المعتاد

[**وحدها غريبة **]

الوصفة مليحة بالصح تبان ثقيلة لالا؟؟؟؟؟؟
كان درتي بطبوط بالسميد
او عجينة المحاجب بنفس هذ الحشو تبالي يكون احسن واخف
مجرد اقتراح
يعطيك الصحة المهم المراة تفكر وتبدع ومتحبسش ههههه

[zokhrofa]

هههه راكي قلتيها المهم تفكري و تسلكي الموقف قبل ما البركان يفيض هههههههه

على هاذيك قلتلكم ديري البغريرات صغار احسن

انا غلطت درتهم كبار بزاف

اما المحاجب يعيوني و كانت السخانة بزااااااااااف

[**وحدها غريبة **]

بما انك تحبي الافكار يا ام الافكار
هههه حبيت نديد نقترح عليك
كنتي تقدري تديري عجينة المحاجب
وتحليه قرص عادي كما كان نديرو الشخشوخة غير يدخلها الطياب تقلبيها وتنحيها ثم ثم
وتحطيها في طرشون حتى تكملي
المهم تكون رقيقة جدا
تقدري تستعمليها في بلاصة اوراق البوراك وبما انو سميد احسن بكثير
وكاين ثاني وصفة البيتزا بالسميد لحورية المطبخ تجي تحفة
400غ سميد مغرف خميرة وسكر وملح تعجني مليح مليح ومبعد تضيفي كاس تاي زيت على دفعات حتى تدخل في العجينة هذ العجينة تتعجن مليح ومتبقاش تخمر تستعمليها في الحين
والحشو طماطم والذي منه هههه
اسفة طولت ولكن حبيت نفيدك حتى تشري فرينة ��������

[**وحدها غريبة **]

بالعكس مدام عندك سميد ارطب تعجني على الاول مامبا ثلاث دقايق وحطيه في الكيس المبلل بعد نصف ساعة ترجعي تلمي العجينة حوالي ثلاث دقايق واستعمليها كما تحبي والله تجي تحفة انا هذي طريقتي منعجن مانعيي روحي
طولت بزاااف في الردود المهم يعطيك الصحة حنونة

[zokhrofa]

ياااااااااااااااا والله يعطيك الصحة على بيتزا تاع السميد تامني بربي مقبيل جاتني في راسي قلت زعما مكاش كاش بيتزا بالسميد ههههههه و من بعد قلت من بعد نحوس في انترنت

راه ربي بغاني و ما بغاليش الشقا جبتيهالي حتى لعندي

روحي ربي يفتحها عليك من كل جهة و طريق بالخيرات

[zokhrofa]

نفس طريقتك اختي في العجن لكن نعيا كي نطيبهم ماشي كي نعجن ههههههه

لا ما طولتي ما والو واش راكي تقولي

مرحبا و سهلا بالناس بحالك يحبو يفيدو و يستفادو

[**وحدها غريبة **]

كاينة هههه ديري في اليوتوب وشوفيها تاع حورية المطبخ العجينة تحفة تجي خفيفة ومقرمشة ومتقهمش
انا العجينة نديرها مام خبز يجي مليح
شكرا على دعواتك حبيبتي ربي يجسر خاطرك باللي تتمناي انت اللي انسانة رائعة تتقبل الاراء الاخر

[بيان 5]

يعطيك الصحة

[zokhrofa]

طبعا نتقبّل الاراء مادام الاحترام متبادل طريقتك محترمة جدا و انا نحب بزاف النقاش البنّاء و الحمد لله المنتدى يعج بناس مربيين و متفاهمين ربي يدومها

[zokhrofa]

اهلا بيان شكرا على مرورك اختي

[طيور الجنان]

يعطيك الصحة زخرفة راكي سلكتيها المهم الوحدة فينا ماتحصلش كي ماتلقاش كاش حاجة لازم نبتكرو و خلاص

[zokhrofa]

و الله صح طيور هاذاك هو الصح

[حياة نور الدين]

يعطيك الصحة الحاجة ام الاختراع بصحتكم

[حياة نور الدين]

يعطيك الصحة الحاجة ام الاختراع بصحتكم

[zokhrofa]

شكرا اختي حياة في انتضار اختراعك هههه ازربي قبل ما يروح رمضان

[oumhana]

هذي هي لفحلة الجزائرية تدبر و تحبر وتتحف غير باه ترضي عائلتها.مشي غيرجيب هات ونصو يروح في الصاشيات......بارك الله فيك إنسانه فحلة وقادرة على شقاك .

[zokhrofa]

الله يبارك في أيامك اختي ام هناء شهادتك أعتز بها كثيرا

[conductrice]

يعطيكـ الصحة زخروفة
انا نجيـ عندكـ وقلشينيـ بأكولاتكـ الشهية

[zokhrofa]

شكرا اختي اهلا و مرحبا

[RIMA.87]

السلام عليكم ،
بارك الله فيك على الوصفة و الشرح المفصل و بصحتكم ،

[zokhrofa]

عفوا اختي اهلا بيك

[مِـشْاٌغَبّـ ^-^]

واو هايلين يعطيك الصحة

[bouthaina tuna]

الله يبارك روعة رابي يحفظك اختي

[zokhrofa]

اختي اهلا بيك