زوجي و اهله

[مشكلتي]

السلام و الرحمة علي الجميع ..
بدأت مشكلتي منذ زواجي برجل دامت خطبتنا عامين و أخذني زوجة له رغم الجميع ..تزوجنا منذ شهور قليلة جداا ..سكنت مع عائلته ..فإنصدمت بالواقع فمنذ زواجي لم أجد الراحة قط و بأخص الراحة النفسية مررت بفترة حمل سيئة جدا اصبحت منعزلة علي عائلتة اصبحت فقط اريد الجلوس في غرفتي لوحدي و هنا جن جنون زوجي و عائلته يريدون مني ان اجلس معهم طول الوقت و ان لا اصعد لغرفتي الا عندما يأتي زوجي .. و قطعت الشهية علي الاكل و بوصاية من الطبيبة يجب عليا فيها الراحة التامة سواء النفسية و الجسدية
اهله يريدون التحكم و التسيطر في كل كبيرة و صغيرة حتي في الذهاب الي اهلي او في الخروج معهم ارد بلا اريد الخروج ارى منهم الجواب بأن أغير ملابسي و اذهب معهم رغما عني او عندما يأتي زوجي يبدؤون في شحنه عليا بمجرد ذهابي الي المطبخ لجلب شيء اصبحت اعيش معهم علي اعصابي دائما متوترة و دائما خائفة من تمرد زوجي عليا و في آخر مشكلة طلب مني ان اجمع ملابسي و اذهب عند اهلي و حصل ما حصل ..اريد من اهل الخبرة ان ينصحوني في كيفية التعامل مع اهله و مع زوجي و شكرا

[sohaibdz]

بما انه اخدك زوجة رغم الجميع فانتما تحصدان ما زرعتماه
اي ان الزواج الذي لا يكون بموافقة و رضا الاهل(خصوصا الابوين من الجهتين)
يكون غالبا مصيره الفشل - اتمنى العكس في حالتك-
اما المطلوب منك هو انك تحاولس تتاقلمي مع اهل زوجك وماتبقايش حازنة في وجوهم
و هذا امر مطلوب و ليس اختيار وفي نفس الوقت لازم تكون عندك شخصية و مواقف باش تخليهم يتقبلو رايك

و ربي يجيبلك الخير

[غزلانْ]

السلام عليكم


المشكلة من منطلق '' رغم الجميع "
كوني امرأة كما كان رجل معك رغم عنهم اختارك
تريدين راحة نفسية و جسدية لا بالانعزال و الانطواء بل
بالاندماج معهم و بطبيعة الحال بممارسة الرياضة المنزلية
المرأة التي بحاجة لراحة بال تُقيّد تقيّدا و من تُترك على هواها لا أدري
ماذا تبحث مثلك و لا تغضبي
ما عساه زوجك فعله و حالتك هذه حتى الظلم لم تتلقينه
لا تخيّبي ظنه و يصبح نادما على كلمة '' رغم الجميع '' قد ينقلب عليك
بالتوفيق

[ايمان4]

يا اختي و حنا واسم نديرولك المشكل بين الاهل ... لم رفض الجميع هل لسبب مقنع ام فقط لانهم ارادو مثلا تزويجه بنت الخالة ؟؟
جربي تكوني مليحة معاهم طيبي و مديلهم اشري طكادوات اخرجي معاهم على الاقل يعرضةك تمشي معاهم كاين لي يخليوهم يطيبولهم و يديرو الميناج و هوما يمشيو يحوسوا .... الله يفتح عليك بدويرة وين تقدري تريحي و واحد ما يدخل روحه فيك ما تجبديش غير البلاء و السلام ربي يعطيك وقفة ساهلة ان شا الله

[قدور بن عاشور]

هو ضحى و تزوج بك بالسيف على أهله،
و أنت واش قدمتي في المقابل؟؟؟ لاشيء

ثم أين هو المشكل؟
سبوك، ضربوك، حرثو عليك؟
كل ما طلبوه منك تقعدي معهم و تخرجي معهم!!!!!

للأسف أنت غير ناضجة و مشي قد المسؤولية.

[abder03]

ابعثي عن اقرب عنصر في العائلة قريب من افكارك و عاداتك، ابحثي عن من تستطعين ان تتقربي منه و يتقرب منك بسلاسة. اخته، ابنت الاخ، ومن هنا تقربي اليهم اي العائلة من خلالها و ستكون لك سند و دعما و محاميا.

[زبدة ذايبة]

عنوان مشكلتك خطأ

زوجك ماعندو حتى علاقة بالعنوان وبالمشكلة

مشكلتك عنوانها أنا وأهل زوجي

يعني راكي طرف في المشكلة

احمدي ربي اللي عندك ناس دارك يعرضوك تخرجي معاهم وتقعدي معاهم

هذا إن دل على شيء فإنما يدل على أنهم يحترموك ويحبوك ويحبوا تكوني معاهم

ويحبوا يدخلوك في حياتهم باعتبارك زوجة الإبن اللي داوسهم على جالك

وتحداهم على جالك وتزوج بيك بالسيف عليهم

عرفت متزوجات كان منهم أهل الزوج يخرجوا من الدار وماتجيبش خبر

كي تخرج من غرفتها تلقى الدار خالية

وكاين فيهم يروحوا يقطعوا الشرط تاع واحد من اولادهم وهي آخر من يعلم

وكاين اللي كي يجو الناس يخطبوا وحدة من البنات (أخوات الزوج) يديرولها مئة سبة وسبة باش ماتبقاش مع الناس

راكي من العرايس المحظوظات جدا جدا كي راهم يعاملوك هكذا

خاصة أن بداية زواجك كانت سيئة بالنسبة ليهم ( جيتي بالسيف عليهم)

راهم يحترموك كي راهم يقولوك امشي معانا

نجيو ليك ضرك من زاوية ثانية

انت كي تزوجتي ظنيتي تلقاي دار كيما دار والديك

نفس المعيشة ونفس طريقة الحياة ، نفس الاهتمامات ، نفس العادات ، نفس التقاليد ، نفس التفكير

خرجتي من داركم وراكي في دار الناس خلاص انساي حياتك في بيت أهلك

وانساي الطريقة اللي كنتي عايشة بيها

إذا كنت عيانة اعتذريلهم بطريقة لبقة مايحسوش منك متكبرة أو تكرهيهم

وماتكثريش التشناف على الناس مادارولك والو

الحاجة اللي داروها هبطوا راسهم كي راجلك مشى كلمتو عليهم

روحي معاهم بالحكمة و السياسة

ماتخسريهمش كأسرة زوج

وماتخسري احترام وحب زوجك ليك

وهذيك فكرة تاع راهم عمروه دارهم عليك غير نحيها من راسك

ماعندها حتى أساس من الصحة

لو كان جا يتعمر كيما راكي تقولي لو كان راكي في داركم تستناي في كاش واحد يجي يخطبك

عاودي راجعي تصرفاتك مع هذ الناس

وماتربحيش منهم دعاوي الشر بدافع أنك مختلفة عنهم واحتمال أهلك ماديا خير منهم

حاولي تنحي من نفسك هذ القواعد والقوانين اللي راكي تمشي بيها معاهم

وخلي حياتك معاهم بسيطة مثل بساطتهم

شاركيهم أفراحهم واهتماماتهم

وماتعطبيلهمش أكثر من الشيء اللي يطلبوه واللي يسحقوه

إذا عندك وقت الراحة فهميهم أن وقتك اللي تخصصيه لنفسك ماتبدليهش

وروحي معاهم تدريجيا حتى يفهموا هما ثاني الاختلاف اللي بينك وبينهم

واعرفي كيفاش تتصرفي

مرة تتنازلي مرة لا لا

مرة تشدي مرة ترخي

ماتكونيش كيما حرف الألف دائما واقفة هكذاك تجي ساهلة يكسروك

بدءا بزوجك ونهاية بعائلته.

نتمنالك التوفيق والسعادة في الدارين

[amina 31]

السلام عليكم،
ربي يفرج عليك أختي، ويرزقك الهنا و الصحة و العافية أنت و أهلك،

[فافا مينوشة]

عندهم الحق يا أختي ريحي مع اهل زوجك اضحكي معاهم كوني اجتماعية معاهم ادفع بالتي هي أحسن
هاو انتيا شادة شمبرتك وغالقة على روحك وتحبي يحبوك حتى زوجك داك برغم عليهم وجابك وزيد حتى كرهتي الاهل لالا اختي رانا كامل عانينا من هاد الاهل والله انا ساكنة معاهم والمرار لي شربتو قاع وكل منجي نضحك مع هادي نخلط في شيخي في سلافاتي والله عجوزتي ولات تحبني حمد الله حتى زوجي نحسو كي يدخل ويلقاني معاهم منسجمة نحسو مرتاح من كل نواحي حمد الله وهانا عايشين

[yasmine700]

يا اختي الزواج فيهاد الوقت اصبح نقمه للاسف مشاكل بزاف وتدخل الاهل ما يخلاصش كل البنات اللي عرفتهم ندموا علي الزواج والمشاكل يبدوهم اهل الزوج ينكدو عليك ويكرهولك كل شي ربي يفرج عليك وعلينا

[مخلوقة فضائية]

بعض الناس يفرحون كثيرا بزوجة الإبن ويعبرون عن ذلك بتصرفات لم تتعود عليها الفتاة في بيت أهلها..مما يجعلها تنفر منهم وتعجّل في الحكم عليهم ....
لست أرى أية مشكلة في رسالتك، كل ما في الأمر سوء فهم بسيط وإختلاف أهواء فقط ... وبالنظر إلى فترة الحمل التي تمرين بها فلا أنصحك بأن تثقي بحدسك وآرائك كثيرا.. ستترائى أمامك الكثير من الأمور التي لم تحدث أصلا!! ضعي في الحسبان أن جسمك يمر بتغيرات جبارة ستؤثر على نفسيتك وعلى حيويتك! عمر زواجك أشهر قليلة وهي ليست فترة كافية لتكتشفي طباع أهل زوجك حتى تحكمي عليهم بالسلب. مشكلتك تحل بالحوار، لا ضير أن تخبري أم زوجك عن ألمك أو شعورك بالتعب أو عن حبك للعزلة وتعودك عليها عند أهلك ربما! فضفضي لها بأسلوب ذكي وستتفهم الأمر...

[wala]

احسنت النش زبدة ذائبة من خلال طرحك للمشكلة عرفت انك متكبرة مع احترامي لك لكن هذا الشيئ الوحيد لي يخلقلك 70 مشكلة راجعي نفسك ولاتخسري زوجك وحبيبك وسترك واهل زوجك علي العين والراس