خائفة ,,,

[مشكلتي]

السلام عليكم
انا فتاه عمري 19 سنة
العام هذا نعاود فالباك مترشحة حرة
منذ اربعة ايام اعاني من اشياء غريبة تصرالي
منذ قررت الدراسة بجد حددت كل شيئ للبدا فالعمل صرالي مشكل لقدو مشكل فالدار مع امي و بكيت لتكسر راسي يومين مقريتش من بعد اختي دارت مشكل مع بابا عليا انا و السبب تافه نظارات ,, لا اعلم حتى ما هو السبب و من غدوة ماما حاوزتني و قتلي نتي السبب ووووو و بكيت حتان خويا خرجني باش راحت عليا و يومين من الصداع في راسي مقريتش و لول لبارح قريت الاذكار و راح نرقد حسيت لحاجة تمشي في جسمي استغفرت ربي و حاولت نرقد لكن مقدرتش ,,, حسيت بخوف غير طبيعي و انا لي ديمة نرقد وحدي و مانخافش ,, و كي رقدت نمت بروحي شغل حاجة حاكمة رجلي و انا مش قادرة ندور على جهة اليمين و بعد قراءة قران في الحلم بصعوبة قدرت ندور و فطنت ديراكت و حسيت بخوف تاني كانو شكون كاين في الفرقة مي مكان حتى واحد ,, و اليوم جسمي كامل فيه تنميل و حرارة غير طبيعية و رعشة ,,, من غير اي سبب ,,, و خوف ... و بغيل شوي رقدت ,, نمت شغل انا خارجة برى بلا خمار مع العلم متحجبة نلبس حجابات و خمار طويل ,, و شغل صابني الجنون و لا شي من هكا ,,, خارجة و بلا خيمار و لابسة قندورة تاع دار تحت الركبة بشوي و حافية القدمين ,,, و اللله راني حايرة واش بيا ,,, وش هادي الهلوسات لي راهي حاكمتني ,, ادعولي ربي يجازيكم ,,, راني خايفة كاش وش بيا مرض و لا ,,, و اذا واحد يعرف حالة كيف حالتي يقلي نعرف واش بيا من فضلكم

[الرميصاءْ]

السلام عليكم ورحمة الله
هذي مجرد وساوس من الشيطان عليه اللعنة
وبيك خايفة من امنتحان الباكالوريا
متخميش بزاف واقراي الاذكار وديري ورد من القران الكريم اقرايه
واهتمي بدراستك
ربي ينجحك ان شاء الله

[اخلاص الجزائرية]

رأييي من رأي الاخت رميساء حلي سورة البقرة في الدار

[first first]

مابيك غير الخير باذن الله

من رايي ليس الان وقت الزعاف من كلمة قاتها اختك واخرى قالتها امك

هته المشكلات الى ان تفنى الدنيا وهي تصرى في جميع البيوت

علي همتك وصلي صلاتك وتوكلي على الله حق التوكل للتحظير للباك لانه فرصة لاتعوض .

بالتوفيق وربي يسهلك المراجعة والتحظير ويفتحلك ابواب التوفيق والنجاح

اللهم امين

[##AICHA]

أختي الفاضلة فلتعلمي أن المشاكل لاتنتهي أبدا ،فتجنبيها پقدر الإمكان .ولاتتخلي عن التحصن بالأذكار وكثرة الإستغفار ،وقراءة قليل من القرآن بعد كل صلاة يوميا ،وأيضا الأستماع له،حتى تتخلصي من هذا الوسواس ،والعمل على طاعة والديك حتى يدعوان لك بالنجاح ، ووضع برنامج للمراجعة ،ولاتنسي بعض فترات الراحة .وإدعي الله يوفقك في دراستك وإنشاء الله تكوني من الناجحين ويارب يفرجها عليك .ولاتخافي أبدا وضعي ثقتك في الله فهو المعين على النجاح والتوفيق .