خطيبي فقير جدا جدا

[مشكلتي]

السلام عليكم أولا أحيي هذا الصرح وكل أعضائه مشكلتي هي ليس فقر خطيبي لانني وعدته ان اصبر معه ولا يهمني لو شربت معه الماء وسكننا في خيمة مادام على خلق ودين لكن
ما يؤرقني هو وعد خطيبي لي بالعقد هذه الايام اذا دخلتلو رابال فهو استاذ ويسالهم عشر اشهر مخلصوهش امس جاء لبيتنا بحضور والدتي وانا صراحة كنت زعفانة لانه معقدناش حابة نتزوجوا قبل دخول رمضان ==زعما درت في بالي نروح معاه تراويح ووو=لكنه صدمني بقوله معنديش دورو الان حتى دراهم الطرونسبور بسيف ومنيش نفليكسي لهذا السبب وانت وعدتيني بالصبر قال لي انا كنت صريح معك من الاول صراحة غاضني كلامو خصوصا انه الرجل لما يكون منكسر ,ويخمم بزاف بسبب احتياجه للنقود لكن استغربت لهجته معي قلت قادر يقولي ظروف مش يقولي معنديش دورو في وجهي؟مع العلم هو يصرف على دارهم هو كبير حائرة جدا وانا لهذا سبب حابة نخدم استادة مع انه في الماضي كنت رافضة فكرة الخدمة لكن الظروف لو كان هناك مندوحة كنت شرحة لكم اكثر لي عودة باذن الله اريد سماع ردودكم

[اناناسة]

و عليكم السلام و رحمه الله تعالى و بركاته ...اختي لا ارى بانه اخطا في شيء ربما ضغطت عليه فقال الكلمه حتى يبين لك انه ليس بمقدوره شيء ...على الاقل هو صريح و قال لك الحقيقه القليل من الرجال يرضى بان تراه امراه منكسر و خاصة من يريد الزواج منها ...لكن مادام رايته في اسوء حالاته فلابد هو يكن لك مشاعر قويه و يتوقع ان لا تهتز صورته لديك ...حسب كلامك فهمت انه شخص جيد و يستحق ان تصبري معه ...لذا عزيزتي لا تفرطي في هكذا شخص يعاني في الكسب الحلال و يرضى لنفسه الحاجه على ان يفتخر باموال مجهولة المصدر ....صعب جدا ان يقف شاب على رجليه ماديا الان لوحده دون دعم من احد ...هذه صفات لا تجدينها كل يوم لذا لا تضيعيه ...اصبري فتدبير الله احسن و اجمل من ما نريد

[maloukjaja]

شيئ عادي جدا خطيبك رجل شهم يابى المال الحرام او التسلاف زيدي ساعفيه و انشاء الله يكون العرس قبل رمضان

[نورسين.داية]

السلام عليكم

هذا لي سال rappel و الأجر اليومي مكانش ؟؟؟؟؟؟؟

10 أشهر معناها قيمة ترقية .هذه ........أو على الأقل حددي السيد وقتاش توظف ؟؟؟؟ معلوماتك ناقصة يا أختي

مسألة فقير غني متوسط .............أنتي على علم بها قبل الخطبة .................و لا لا ؟؟؟؟

أو أنه يليكدي فيك ........و الله أعلم أنا لا أظلم الخطيب لكن وضعيته غير واضحة

لكن و الله ضحكيتيني بصلاة التراويح ..................................يا الدزاير واش راه فيها ؟؟؟؟؟؟؟؟؟؟؟؟؟؟؟؟؟؟؟؟؟؟؟؟ نورمال نجي أنا نصلي معاك نورمال مكاش مشكل ماتقلقيش برك

[ايمان4]

استاذ يعني عنده عطل يعني ما يخدمش كل يوم من 8 ل 5 عنده على الاقل صبحة او عشية ف السمانة يعني لكان صح باغيك يتعلم كاش حرفة عمل ثاني باش يعاون روحه و يجهز حاله ... استاذ كان يدرسني يبسع كران من العشية للعشية و الصبحات الخاويين و العطل و اخر كان كورتي برك باش يعاونو ارواحهم صحا نقولو هداك ما عطى الله تبالي راه يليكيدي بطريقة حضارية و لله العلم

[ayoub55]

انتي اكثر الناس معرفتا به فهل كلمة ماعنديش دوررو يقولها لاي شخص بسهولة او فقط لانه يثق بكي ثقة عمياء

صراحتا الفقر صعب جدا جدا وليس عليكم اتكلم بل على اولادكم الحياة لم تعد مثل زمان اللباس والدراسة والمستقبل في بلد منهك اقتصاديا
متاكد ان الله لا يضيع عباده الصالحين لكن هناك فرق بين شخص ملتزم وشخص صالح
وانتي من يحدد من هو ومن انتي

[اسعى لرضى الله]

ياختي هدا مشكل معظم شباب. والله كي لقيتي راجل كيما قلتي مدين ومتخلق احكمي فيه خاصة انكما مخطوبان الباقي والله يفرج ربي مع الوقت حتى ومعقدتيش دك اصبري اورا رمضان والله يا اختي الدنيا هدي واحد ماراه لاقيها كيما حاب وزيد مدامكي ناوية لحلال وهو ايضا كوني على يقين انو ربي راح يفرجها في وتبالي تعرفي الحديث لي قال ثلاث حق على الله عونهم ومن بينهم من اراد العفاف . يعني ثيقو في ربي ومتخليهش لسبب الفقر الراجل هدا وش يكسرو غير كي ميكونش عندو متزيديش عليه وتخليه اصبري وادعي ربي وقومي الليل . ان شاء الله يفرحكم ربي في اقرب وقت ويحلها في وجوهكم يارب ويفرحك في اقرب وقت نتي وخطيبك ويسعدكم في الدنيا وفي الاخرة يا رب

[محمد جديدي التبسي]

هذا ما كان لا عقد لا والو وراكم تحكو هكا ربي يهديكم؟؟
زالت كل الحواجز حتى أصبح يبكي ويشكي لخطيبته؟؟
انت تقولي انه استاذ يعني وضعه المادي متوسط وليس فقير
لكن للأسف موظف براتب 4 ملاين يصبح فقيرا جدا اذا خطب وشاف المهور اللي يطلبوها النساء
سهلي عليه المهر وستتزوجان في اقرب وقت
لأن صراحة أكثر ما ينهك الشباب هو غلاء المهور وتوفير المسكن.
ربي يفتح عليكم

[زبدة ذايبة]

الغلطة اللي درتيها هي أنك وعدتيه بالصبر

ماكانش لازم توعديه بهذا الشيء

لأن الصبر أفعال وليس أقوال.

عذا الخاطب رح يتكل على صبرك

ورح موعد العقد يدير يدين ورجلين.

وربما حتى أشياء ثانية رح تضطري للصبر فيها.

حقوقك ماتتنازليش عليها.

وماتخليهش يحس أنك مستعدة للميزيرية.

لأنه موظف بالتالي عنده راتب

بالتالي يستطيع أن يوفي حاجاتك.

استغربت كي قلتي فقير وهو موظف.

على كل حال ماتتنازليش على حقوقك.

الشريعة واضحة جدا في حقوق الزوجة.

عطالك الشرع المهر والنفقة والسكن.

وهذا طبعا نحن متفقات فيه بأنه مايوافق

قدرة الزوج دون أن نثقل كاهله.

راجعي طريقتك في تعاملك معه.

كلما أعطيتي للأشخاص أكثر ممايستحقون.

جعلوك دون ما تستحقين.

لذا عزيزتي أرجو أن تنتبهي لهذا الأمر.

ماتطلقي روحك عليه.
ماتكلفيه فوق طاقتو

خذي الوسط.
حتى ماتخسريش حقوقك النفسية والمادية

والاجتماعية.

رب يسهل أمرك ويوفقك

[امبراطور البحر1]

الردود المثالية لا تقيم اسرة ولا تبني بيت القوامة شرط اساسي للزواج انسان طيب ومتدين كل هذا جميل وممتاز ولكنه لا يكفي
وناس زمان تركوا مثل يقول للذي يتزوج ولا يستطيع ان يعيل اسرة ( قوم ولا طلق ) التريث قلا تستعجلي وتندمي حتى تتهيا الظروف

[kacimo.samy]

نسألك العافية يارب
واالرزق

[nihal159]

ربي يفرج عليك؛ على حساب ما فهمت ؛ خطيبك يخدم كونترا مش مرسم؛ وإلا كيفاش يسال 10 أشهر؟
ياختي الحالة راهي صعيبة و الصبر راهو يحتاج قوة و أعصاب تتحمل؛ إذا عندك كاش صنعة غير أخدمي و تعاونو على الزمان.

[غزلانْ]

السلام عليكم


هو اشترط صبرا و أنت رضيت " لو شربت معه الماء و سكننا في خيمة...."
و عن مهنته كأستاد فليس بالفقير و لكن هي ميزة البعض من سلك التعليم
أصبحوا يشتكون نقص مادي مهما كانت الحالة
الفقر محمود لكن ان اجتمع و البخل أي صاحبه بخيل تكون كارثة
ها أنتِ نفد صبرك قبل العيش معه
تبقي أنت أدرى به و مدى درجة صبرك بما أنك صبرت

[أم أسماء وعبد الرحمن]

السلام عليكم
يا أختي ماتقلقيش روحك صومي رمضان في داركم أفضل لأنو أصعب رمضان هو رمضان الأول في بيت الزوج فما بالك وأنت عروسة.
والشيء الثاني هاذي مسؤوليتو خليه على راحتو وماتلحيش عليه .
ربي يهنيك أختي

[**د لا ل**]

السلام عليكم

واضح أنه خطيبك أستاذ جديد لهذا لازالت لم تسو وضعيته المالية .....هناك الكثير أمثاله ...

يعني لما قالك ماعنديش دورو فهو يعنيها .......اصبري يااختي وبسطي الأمور عادي ان لم تتزوجي قبل رمضان لم ينتهي العالم

السيد راه مضغوط أصلا في مهنته اضافة للنقل كما ذكرت ِ فلا تزيدي الطين بلةً بتصرفاتكِ

اصبري وساعديه بما تستطيعين من الغاء بعض الكماليات ...لعلّ وعسى يُفرج الله عنكما

أخيتي ...كل شيء في هذه الدنيا يأتي على مهل فلا داعي لكي تَقلقي و تُقلقي غيركِ

أصلح الله حالكِ وأراح بالك ِ وجَمعكِ بزوجِكِ على خير

[sarl02]

لا ادري ما مشكلتك ..كلش راه عادي عندك ...خطيبك مثل مئات الالاف المقبلين على الزواج وهم في فترة باش المو انفسهم ويتزوجو اين المشكل هنا؟ ومن واجبك الصبر عليه وماشي كيما اتحبي انت بل كما احب هو وفق ما يلائم وضعيته ...الناس ضربو 5 و 6 سنوات مخطوبين وعادي انت ربما عام واحد النار شعلت فيك ؟؟....وما زاد الطين بلة ردود بعض الاعضاء والله تنم على محدودية التفكير والنظرة الواقعية والمنطقية ..قاعدين اتبعو وخلاص ...واحد اقول لالا تجد 60 رد وراءه كيف كيف ما هذا يا هذا؟؟....لا حول ولا قوة الا بالله.

[لحن الحياة.]

اولا الاساتذة لي ينجحو فلمسابقة او يتوضفو من المدرسة العليا ،،الاساتذة كااااامل ،،، العام الاول ما يخلصوش. او علا الاقل من ستة اشهر الى ثمانية اشهر حسب الولاية ،،،احمدي ربي في وقتنا كانو بلعامين ما يخلصوش
اومبعد تجيهم دراهمهم تاع هذيك الفترة لي خدموها باطل ،،،،،علا شكل رابال واووومبعد باه تمشيلهم الشهرية
ثانيا اذا كانت الدخل تاعو يقدر يعيلك بيه. ماهوش فقير جدا متوسط
وراهم كاين لي رجالتهم ادماج برك تاع ثمنميتلف وعادي
وواش فيها كي قالك دورو معنديش راكي مرا ورايحة تبني اسرة اذا كان هاذ الجملة ما حملتيهاش فعلا الدنيا سلام
ما تزعفيش من ردي برك لانو هذا الواقع

[amel ramis]

من جهة استاذ ماهوش فقير ومن جهة المعيشة غلاة واصبح الغني ميلحقش يعني اصبري

[zalamite]

اين الصبر الدي وعدت به ...من اول عقبة بدات تتراجعي و تهتزي ....على الاقل يجب ان تكوني مهياة نفسيا لاصعب الاحتمالات مدت قبلتي بالرجل وبحالته العسيرة او ربي يفرج عليكم على كل حال

[abder03]

الرجل يريدك و يريد الحلال. - الخير كله-
الرجل حالتة ميسورة و يصرف على دارهم - بوادر خير-
الرجل بين نارين، بين اهله و انت و النقود قليلة. - امر محتوم-
انت تتدللين عليه، لهجته تغيرت، رفع صوته فتغيرت نبرته - ما شاء الله على المساند الحقيقية-
أختاه، ليس بهذه الطريقة نحافظ على مكتسباتنا، ليس بهذه الطريقة نمد يد المساعدة. كوني سندا حقيقيا أو على الاقل لا تكون عائق لهذا الرجل.