سئمت من تصرفات خطيبتي .

[مشكلتي]

مشكلتي هي أنني سئمت من تصرفات خطيبتي من عدم اهتمامها بي من إخلافها في الوعد بأي شي توعدني بيه من كلامها القاسح من إستهزائها مني عندما أقول لها اريد أن احكي معك. علاقتي معاها لها حوالي سنة . منذ سنة و أنا أدلل فيها نقلشها كيما يقولو لي تجي في بالها يكون ليها الحمدالله انا إطار سامي في مؤسسة اقتصادية و راتبي جيد نقدر نلبي واش تحتاج تخيلو ديرلها شهرية خاطر تقرا في جامعة . مرات نخمم نقول علاه نتعب روحي معا وحدة كيما هي نقلب بيها و نشوف واحد اخرى و لكن نتفكر بعض تصرفات مليحة نتاعها معايا و ايضا والدتها لي تحبني بزاف عليها تجيني صعيبة إنقلاب و نخدع تيقة والدتها فيا .. كل مرة نحدرها نقولها نحب نعيش حب و رومنسية مع انثى حاب نعيش حياتي جامي في حياتي و لا درت علاقة مع طفلة هي أولى و لكن مرضتني بتصرفتها غير المسؤولة . بصراحة حاب نعاقبها على تصرفتها و استهزاء نتاعها بيا بدون ما نخسرها خاطر نحبها . و ايضا الزواج مزال بعيد سنتين أو ثلاث حتي تكمل دراستها ان شاالله.

أرجو أن يغلق الموضوع خلال تلاث أيام

[مراد سابقا10]

شوف يا اخي مادام تقول راهي تستهزئ بيك

يعني الأمر غير عادي اطلاقا

كيف لمخطوبة ان تستهزئ بخطيبها

فما بالك بالزواج

لربما هي صغيرة في السن

لكن انت وضح لها كل النقاط التي تجوب في خاطرك

اذا فهمت بالحسنى اذا لم تفهم بالحسنى انا لا اقول لك توقف من الان ولكن فكرا جيدا

قبل الإكمال معها

[محمد جديدي التبسي]

يادرا راك عاقد عليها ولا خطبة برك؟؟
طول فترة الخطبة أمر سلبي للغاية انت معرض لمزيد من المشاكل مادمت تتواصل بكثرة مع هذه الفتاة والزواج مازال سنوات؟؟
أنصحك بالابتعاد عنها وتقليل التواصل معها لأنك اذا تعودت عليها سيذهب شغفك بها وتمل منها ويقع الانفصال
انت تلاحظ انها لا تعطيك قيمة لأنه في الغالب وقعتم في الملل والروتين واستهلكتكم كل المشاعر الموجودة قبل وقتها ولم يعد هناك جديد تتحدثون فيه وهذه من أكبر سلبيات طول فترة الخطبة ولو كان بينكما عقد شرعي ... ربي يوفقكم لما هو خير

[sohaibdz]

الحب و الرومنسية بعد الزواج يا سيد او على الاقل بعد العقد .
خطيبتك غير ناضجة في تفكيرها ( ربما تمر بالمراهقة المتاخرة) لهذا تستهزى بيك و متديرلكش قيمة
و بخصوص امها انت راح تتزوج بالبنت علاه تخمم في الام
و بخصوص انك مقدرتش تخسرها السبب ببساطة لانك لم تخالط غيرها ، الجنس اللطيف اشكال و انواع ناكدلك كون تتعرف على وحدة اخرى تقدرك و تعرف قيمتك و تحترمك تنساها في اول يوم
و بالتوفيق

[just do it]

لا اريد ان اكون سلبيا لكن تصرفك بمنحها راتبا و تدليعها اكثر من اللازم هو أمر أخطأت فيه لانها خطيبتك وليست زوجتك وفرق بين الاثنين ربما لهذا هي من الآن تترفع عليك و تعلم انك مجنون بها ولن تستطيع مفارقتها

من جهة أخرى هناك أمر يغيب عن كثير من الخاطبين وهو مشاورة الفتاة من طرف صديقاتها في أمر الخطبة . يعني أن الفتاة احيانا تقبل بالخاطب وتبدي اهتمامها به فقط لاجل والديها اللذان أرغماها على القبول وهي في قرارة نفسها رافضة للخاطب اما لكونه لم يعجبها واما لكون ان لها علاقة مع فتى اخر تتمنى ان يكون زوجها
فربما انت يا اخي لست الزوج في نظرها لذلك تلفق لك هكذا اسباب للفراق .
اما نصيحتي لك . اولا قلل من الاتصالات ومن الهدايا لتجعلها هي من تتساءل عن سبب ذلك
ثانيا ابحث عن صديقتها المقربة و اطلب منها ان تأتيك بالخبر الرسمي ان كانت خطيبتك تحبك و تنوي الزواج بك بارادتها ام انه من فرض عائلتها فقط

[عثمان الجزائري.]

أعطيتها أكثر مما تستحق و أظهرت لها أنك طايح في حالة، راك رايح فيتاس صديقي و أول حيط راح تصطدم فيه يفزدلك كلش، كما لا أستبعد أنها تشوف فيك جايح...قلل من التقلاش و لتكن تعاملاتك معها وفق الحدود...المال يفسد الكثير من الود و قضية الشهرية ستدفع ثمنها غاليا

[sarl02]

اياك واعتبار الامر عادي وتمشي فالخط الى مما بعد الزواج واتقول الامور ربما تتصلح مع الوقت وووو...الخ...العام ابان من خريفو يا اخي...الفتاة هذه من تصرفاتها اتبان انها لا تبادلك الحب او الرضى على الاقل والسبب عليك اكتشافه بنفسك وافتح الف قوس وتقصى الامر لانه كل شيء ممكن فالوقت الحالي ..ولا داعي لان اقول لك ما هي الاحتمالات ...لكن في كافة الاحوال مستحيل انه فتاة اتحب خطيبها تعامله كما ذكرت في فترة الخطوبة بالتحديد ...في كافة الاحوال ان اظهرت لك المزيد من التصرفات انها لا تبادلك نفس الشعور اوقف العلاقة فورا وكل شيء بالمكتوب .

[kacimo.samy]

اخي النساء مختلفات ما تقليش حابها كيما تاع مسلسلات ؟؟

انتا تحرى جيدا فقط بلاك ديك عقليتها الحب خاطيها وخاطيه هههه

ما عندهاش مشاعر كيما رجالة كاين لي ما عندوش و حتى نسا هكذا

[زبدة ذايبة]

راك غالط يا أخي م ساسك لراسك

وأكبر غلط موضوع الشهرية اللي دترهالها

اسمحلي نقرصك شوية

الحب لايشترى بالمال هذا أولا !!!!!!!!!!!!!!!

وتعطيلها شهرية ، على واش تخلصها

ماراك باباها ، ماراهي زوجتك ، وعلى فرض أنك عاقد عليها ماتعطيلهاش

هذا مالك اللي راك تتعب عليه وتجيبوا تروح تعطيهولها تصرفوا على صحاباتها وعلى بطاقات الشحن تاع التليفون و..........

ذليت روحك بزاف ليها

وهذا اللي خلاها دير معاك الشي اللي راك تعاني منو

وبما أنك على هذا الشكل وبهذا الأسلوب راك رايح تبقى دور في نفس الدائرة

الحل:

أول شيء لازم تسحب المرتب اللي راك تعطيهولها

ومن خلال تصرفك هذا رايح تكتشف حاجات كثيرة

أولها أنها تريدك زوجا ماشي على جال دراهمك

وإنما تريدك أنت

وتزيد تعرف هل هذه الفتاة أنت الوحيد اللي في حياتها

بنت تقرى في الجامعة........ إلا من رحم ربي في هذا الزمان

ممكن عندها حبيب غيرك ، وهي تحاول التخلص منك عن طريق الاستهزاء

والاستهزاء تاعها ليك يعني ماركش معمر لها عينها بالتالي هي تحتقرك

الإجابة على هذه المقترحات تبان بعدما تسحب المال اللي راك تبذر فيه عليها من غير وجه حق

ماتكلفش نفسك فوق طاقتها

ماراكش ملزم تصرف عليها إلا بعدما تولي زوجتك وتدخل بيها

وللشريعة رأي في هذا الأمر

أنت عمرتها و غمرتها بالعاطفة حتى ولات ماتحملكش

وهذ التنازلات اللي راك دير فيها ، تحلل فيها ، وتصرف عليها

وتجيبلها لبن العصفور هو اللي راه دايرلك المشاكل

وريلها الوجه الخشن للرجل

ماكاين حتى أنثى تحب رجل ناعم

زيرها شوية خليها تحسك راجل كيما الرجال

حسسها بالسلطة تاعك عليها

وبأن كلمتك نافذة لازم طبقها

تصرفاتك تجيبلك نتائج عكسية للأشياء اللي راك تطمح ليها

أضغط عليها شوية ، وازعف شوية ، واغلق التليفون تاعك عليها مرة على مرة

وماتكثرش تعيطلها

خليها أسبوع إلى عشرة أيام وشوف إذا هي تسأل عنك أم لا

حسسها أنك مشغول عنها بأشياء أهم منها

وكي تزعف هي عليك خليها شوية ماتحللهاش

وماترضيهاش دائما بالهدايا

ماتخسرلهاش طبيعتها

إذا كنت أنت الوحيد في قلبها .....خلي مشاعرها تخرج نحوك

التصرفات تاعك قتلت أي مبادرة منها ليك لدرجة أنها ولات تحتقرك

لأنك بالنسبة ليها ضعيف ولاصق فيها بشدة وهذا النوع من العلاقات يجيب الملل والاشمئزاز من النفس

نظن راني جاوبتك

وممكن الإخوة يزيدو يعطيولك وجهات نظر أخرى

رب يوفقك ويصلح أمرك

[خالد عنابي]

اسمحلي يا اخي على الكلام القاسي

ولكن راك رديت روحك مسخرة

كيفاه طفلة تقرا فالجامعة تعمللها شهرية من عندك ؟

وزيد لابورس تاعها وش راهي تدير ؟ ووالديها وش راهم يديرو ؟

انا تبانلي راهي مدايراتك صراف آلي و تختزلك في القيمة المادية التي تنفقها عليها

اما المشاعر ربي يجيب وبالاك لا راهي عندها مشاعر لشخص آخر وانت مدايراتك صوارد وبرك

رجال بشلاغمها تتعب وتشقى على زوج دورو وانت طفلة في الجامعة ماعلابالهاش بالديا تعمللها شهرية من عندك عجيب !

وتزيد تستهزئ بيك مالفوق !!!!!!!!! راك طيحتي بالعلام

اول حاجة يلزم تنحي الشهرية لي راك دايرهالها وتزير روحك شوية

ومبعد تشوف رد الفعل تاعها

[kamel76]

اتق الله يجعل لك مخرجا .

[غزلانْ]

السلام عليكم


ان كنت تريد اهتمامها بك فهي مطالبة به بعد لا قبل
لكن اسمح لي قمة الغباء أن تمنح لها راتب و هي تكرمك
تستهزء بك و أمها تحبك اكراما لغباءك
كن رجلا يا أخي و لست ملزم بتغطية مصاريفها
حتى لو كانت تدرس تبقى مجرد خطبة و ليست زوجتك ثم ما أدراك لو فسخت
الخطبة و كانت من نصيب غيرك هو الجنون يصيبك فكم من رجل قام بتجهيز
فتاة و هي و على حساب ماله أخذها غيره
ان لم تجد منها اهتمام ليس لأنها ليست المهتمة بك لكن أنت
المتسبب قمت بالافراط فيها ولعت ولعا بها قبل أن تكون لك
لا تريد خسارتها فلتمتحنها
اقطع تواصل معها
و لا راتب قطعا لا رجعة فيه ايّاك
حينها ستكتشف أنت و مدى درجة فهمك ان كانت تريدك
أو تريد ما مُنِح منك هنا تظهر مكانتك عندها
و هذا بعد أن تتصل هي لا أنت
كن أثقل بعض الشيء و تجاهلها تجاهلا مهما بلغت درجة
تعلقك بها لا تشعرها بما تكنه لها
لا ترتبط مع من لا يقدرك مهما بلغت مكانته عندك
بالتوفيق

[nadine0159]

انا ضد الاخوة اللي قالولك علاش درتلها شهرية نورمال مافيها والو يمدهملها حبيبها و زوجها المستقبلي خير من انو تتحصل عليهم من جهة اخرى و انا نقولك هي مراهقة ما تقلقش روحك بهادو التصرفات بعد الزواج يجي الصح تما راح تلقى انسانة اخرى ناكدلك بلاك انا كنت كيفها ههه كنت قاسية و مستهزئة و غير مبالية بصح بعد الزواج و الحمد لله زوجي كل شيئ في حياتي و هاداك الدلال يا حسراه ووحدة صغيرة تربيها على يدك علمها انت الرومنسية ماعندك مادير بوحدة محترفة في الرومنسية كل شيئ يجي مع الوقت و انا ننصحك نقص من الخروج معاها خليها تتوحشك و كي دير غلطة عاقبها بصرامة كن صارما معها احيانا و علمها الحب فهي ستتعلم منك صدقني انا جامي ننصحك ماتعاونهاش ماديا راك درت حاجة مليحة لا بورس مادير والو و علمها الطاعة و الثبات و عدم التبذير و امها ماعندها ما دخلها الاحترام في جهة و الزواج و الحب مع حنونتك حاجة اخرى انا نظن الملل اصاب علاقتكم جدد في كل شيئ و حذاري و الحقد نورمال هادي هي العلاقة عن بعد ستتغير مستقبلا و هادا يبقى رايي الخاص

[MuSLiMaN]

اسمحلي خويا لكن هذا هو الحلاب بأتم معنى الكلمة ؛ تحلبك مثل البقرة و لما تنشفك ترميك
أنا لو كنت كيفك و الله ما نعطيلها ؛ حقيقة خطبتك لكن لست بزوجتي بعد لأن الخطبة وعد بالزواج لأنها في أي وقت قادرة تفسخ الخطبة و تلقى روحك صرفت على الام و بنتها.
يا جدك دير قيمة لروحك و ما تكونش رخيس و مذلل روحك لهذه الدرجة عفس على قلبك و مشاعرك و اجعل رجولتك في المقام الأول ؛ أصلا أنا البنت تحبني على جال دراهم ما عندي ما ندير بيها حتى و لو كانت ملكة جمال الكون لأنك ستعيش ذليلا معها و الرابط الوحيد بينك و بينها هو المال

[~أمة الله~]

السلام عليكم ورحمة الله وبركاته
أولا: الطفلة هادي لا نعرفها، فالأفضل الإنسان يحمي نفسه من مغبّة الوقوع في الأعراض، فليتقِ الله من يقول أنّها على علاقة بآخر أو شيء من هذا القبيل.
و من جهة أخرى الأخ الكريم الظاهر على حسب طرحكم للمشكلة خطيبتك لا تبادلك المشاعر نفسها، أو أنّها مازالت صغيرة وغير ناضجة ولا تعرف مسؤولية المرأة وهي مقبلة على زواج، فالاحترام والتقدير أمران لا يُساوما في علاقة زواج، فلا تتخلى عنهما أبدا، والمرأة النّاضجة والسّوية تعلم أنّ جزاء الإحسان الإحسان، فإذا أكرمها زوجها زادت في إكرامه، ماشي تعفس عليه!!
والعلاقة الناجحة مبنية على التفاهم من الطرفين، ماشي واحد يضحي ويموّت روحو بالغمّ والآخر عايش حياته ما علابالو بوالو!!!
فالأفضل مادامك على البَرّ ومازال ما تزوجتوش تراجع هذه العلاقة من كلّ النّواحي، وإن كان الخير في الانفصال اِسأل الله العِوض وأحسِن الاختيار المرّة القادمة إن شاء الله، وحاوِل الالتزام بالشّرع في فترة الخطبة، وإن أردت أن تعيش الرومنسية فاعقِد وعيش كيما حبيت، أمّا في الخطبة فهذا ليس من الشّرع.
ربي يفتح عليكم.

[مصطفى_س]

السلام عليكم
اليوم تقدم لها راتبا محترما و غدا عندما تكون زوجتك ماذا ستقدم لها هل كل الراتب ؟
اعطها ما تحتاجه و فقط و اهتم بامور اخرى كتوفير سكن و سيارة مثلا
لا تكلمها كثيرا فكلما طالت مدة الخطبة كثرت المشاكل
انت ستتزوجها هي و ليس والدتها لذا ان كنتما تحبان بعضكما فتوكلا على الله توجد نساء كثيرات متزوجات و يدرسن
(زير روحك شوية اخي)

[نورسين.داية]

أولا قضية الأجر الشهري الدي رصدته للمعنية لا هو قانوني و لا شرعي و لا أخلاقي نقطة النهاية في هذا الموضوع

ثانيا : تهتم بك مثلا واش تعمل .........؟؟؟؟؟؟؟؟؟؟؟ أعطنا مثال ؟؟؟؟ الا تنسى أن علاقتكما مجرد وعد بالزواج يعني الصراحة الإلتزامات تبدأ بعد العقد و ليس قبله

نتمنى توضح ماذا تريدها أن تفعل حتى تهتم بك ؟؟؟؟ حابة نزيد نحكي بصح نخاف يحدفولي الرد أيا ماعليش أكتفي بالتلميح

[مُحمد رازي]

السلام عليكم
إدا كنتو في فترة خطوبة ما كان لا عقد لا والو
فلا تطلق مشاعرك الآن يا أخي و فكّر بعقلك و لا تدع قلبك يقودك
و كل حاجة تجي في وقتها تكون حلوة
و لو كانت زوجتك و تصرف عليها بهاد الطريقة و تغدق عليها لكان الأمر جميل
أمّا هذه التي يربطك بها فقط كلام ووعد بالزواج و يمكن في الأخير لن يكون لك معها نصيب
راح تعذّب روحك و تذل روحك باطل في الباطل
أضف لذلك كان من المفروض مين عرضْتَ عليها هاد الشهرية
تمتنع باش تقبل و تجيها عيب أنّها تشدّ الدراهم عليك
لكن حالتها و كيما قال الأخ من قبل راهي تشوف فيك البقرة الحلوب
و راهي تمشي بمبدأ : إدا خطيبك عسل لازم تلحسه كامل
و الغلطة من الأول أنت لي درتها و فتحتلها العينين و ما كانتش بيناتكم حدود و ضوابط مشيتو عليها
تكلّمها بلا قيود و متعطّش باش تحنّ عليك بشويّة رومانسية و زيد دايرلها شهرية ووو
و إذا كنت متوقّع بلّي راح ترجع تكنّ ليك المشاعر و تبادلك الإهتمام بمجرّد أنّك راك تصرف عليها
كيما قالولك من قبل الحب لا يُشترى بالمال أبدا
و الإهتمام الزائد في الغالب يخلّي الطرف الآخر ينفر منّك هادي قاعدة معروفة
و لازم يكون اتّزان الواحد ما يظل لاصق في الآخر ما ينقطع بشكل نهائي عليه
و حتّى هاد الفتاة راح تشوف ليك بنظرة شفقة
و تعتبر أنّك راك تعوّض في نقص عندك بالدراهم تاوعك
و إلحاحك عليها باش تبادلك الإهتمام و تخلّيك تعيش قصة رومانسية
راح يخلّيها تعتبرك ضعيف الشخصية و مونك حنان ههه
بالنسبة لوالدتها كاين شي أمّهات لمّا يتقدم لابنتها شخص يكون ميسور الحال
تفضله لابنتها و تقول بلّي راح تعيش معاه حياة رغيدة و هانية و ما يخصها معاه حتى شي
و هذا أمر بديهي الأم ما تحبش تشوف بنتها تعيش عيشة الميزيرية و خصوصا إدا عاشتها هي من قبل
بصّح هي ما عندها حتى دخل في قراراتك اتّجاه بنتها
ثمّ جامي الدراهم لا جابو السعادة يكذب عليك
العلاقة لي تكون مبنية و يكون أساسها أشياء زائلة كيما الدراهم قادر تزول في أي لحظة
لهذا أخي لازم توقف مع نفسك وقفة جادّة و تبدا توضع النقاط على الحروف و تتحكم في مشاعرك
و نقّص من التواصل مع هاد الفتاة
و ما تخلّيهاش تحسّ بلّي راهي خالعاتك و ما تقدرش تعيش بلا بيها ووو
و أيضا ما تحاولش تغطّي عيوبها بقولك بلّي دارت معاك تصرّفات مليحة
هدا هو المغزى من فترة الخطوبة باش تعرف الطرف الآخر إدا راح تكون مناسبة ليك و لاّ لا
مشي تعرف و تتأكد بلي ما راحش تكون مناسبة ليك بصّح يعميك الحب و ترجع ما تشوفش حتى عيب فيها
راح تندم من بعد
و الحب الحقيقي و قصة الرومانسية تاع الصحّ ما زال ما يحين وقتهم فلا تستعجل
و تأكّد بلي الحب قبل الزواج مضرّ للصحّة أكثر من التدخين و الكوكايين
ثم هادي ما راهيش زوجتك عاشرتها و تعرفها كيدايرة باش إدا كرهت منها خلق يعجبك الآخر
توسامبلومون إدا لم تكن مناسبة يعني ليست مناسبة .
و تروح تبيع اللفت على روحها و الله يرزقها من جهة أخرى
و ماكان لا تقولّك طفلة تربّيها على يدّك لا والو
الطفلة تجي مربية من بيتهم و كاين لي تكون صغيرة في السن
بصّح عندها تفكير سليم و راقي و مسؤول تخلّيك تحترمها رغما عنك
و إدا ما قلتلكش راح هي لي تربّيك
المهمّ لازملك شوية حزم في هاد المسألة لاخاطرش الأمر راه مصيري بالنسبة ليك
و لازم تصحّح البداية الخاطئة لي بديتو بيها و حتى ما تبقاش كي المتفرّج من بعيد
و خلّي كل حاجة تجي بوقتها
ربي يجيب لي فيها الصواب

[راما شهد]

اخي ربي يفرج عليك وان شاء الله مايكون خير الخير
لمادا تتهمو في الطفلة بلي عندها واحد تلني ونتوما ما تعرفوهاش
وتاني هل كل من درست في الجامعة لازم تكون عندها علاقات
ربي يهدينا

[yako02]

الاخوة وفاو و وفاو بالجواب انا فتاة و اشمئزيت منها هذي البنت لا تصلح زوجة لك شايفاتك دراهم حاول تبدل العقلية نقص المصروف حبس الشهرية لاي حجة كانت و شوف ردة فعلها اذا كانت حابة الراجل ولا جيب الراجل