ساعدوني بنصائحكم القيمة

[مشكلتي]

السلام عليكم اخوتي ..
لدي مشكلة تؤرقني و هي دايما مقلقة و منصبرش و معنديش تقة في نفسي و انا متزوجة حديثا والله مازال مانوالف طبايعهم كلش تبدل علي " ماوالفت لا ماكلتهم لا أخلاقهم لا حياتهم اليومية للعلم عايشة مع أهلو " كلش غريب عليا مانيش نحس بنكهة الزواج من كترة التخمام فيهم و نديرلهم حساب كبير لازم نتصرف كيما يحبو هوما باش نعجبهم . و من جهة المصروف ما يصرفوش كما ينبغي الحال يعني ماشي كيما في دارنا والفت كلش كاين ." مانيش نكبر في كرشي " بصح أحيانا ميشرو والو رغم انو كامل خدامين " اظن انهم متحاسبين " زوجي يجيب مي كيما يكونش عندو الله غالب لكن اخوه متزوج يجي غير ياكل للاسف
اخواني انا والله ماني حابة ندخل في سوقهم لكني هادي حياة يومية مشكلتي راني نخمم غير في هاد الاشياء برك أصبحت شغلي الشاغل
اعينوني باه نحارب هاد القلق و نريح مخي و الله عييييييييييييت و نعيش حياة هنية مع زوجي اساسها التقرب الى الله
ساعدوني بنصائحكم القيمة

[نورسين.داية]

السلام عليكم

يعني مبدئيا لم يزعجكي تصرف معين ؟؟؟؟؟ الحمد لله

مسألة أكلهم مثلا ياأكلون الصراصير ؟؟؟؟ واش راح يكونو ا يأكلون مثل كل الجزائريين ....سبحان الله

مسألة كلش كاين ، قلتي أن الزوج لما ما يكونش عندو الله غالب إذن عيشي على قدر مدخول زوجك ....الذي كنتي على علم به مسبق قبل الزواج عزيزتي

في رأيك كيف كنتي تتصورين حياة ما بعد الزواج ؟؟؟؟ هنا أعيدي التفكير في الموضوع ......و سوف تتقبلين حياة زوجك كما هي ...................ماعجبكش الحال أرجعي لداركم بارك الله فيك و كفى المؤمنين شر القتال ههههه
بالتوفيق

[ثلجَة]

السلام عليكم
أختي توكّلي على الله و عيشي حياتك الزوجية بشكل طبيعي أمّا البااقي فمجرد أمور هامشية
ستمضي كما يمضي الزمن
اسعدكِ الله و اصلح حالكِ

[عسجدة]

بارك الله فيك
يا أختي والله غير راني حاسة بيك
علابالك لوكان مجاوش يخدموا نقول
معليهش بصح يخدموا وتقعدي
جيعانة وللشر هذي لالا .

شوفي كيفاش تخدمي فيلم في
قمة الروعة وديري كوزينتك وحدك .

علابالك راهم متعاندين وهذا يستنى
في هذا والشيخ يقول الي تزوج هو
اللي يصرف و كل واحد يخبي في
دراهموا والكنة تقعد للشر والجوع .

شوفي حل لروحك اخاطش درك
زيد تتأزم الاوضاع .

هذوا كامل خدامين ماهومش دايرين
ميزانية شهرية ولا كل واحد جابد
الطرف .

الله يهديهم ويهديني .

سلام

[عثمان الجزائري.]

ستعتادين مع الوقت كثيرات من حصل لهن مثلك، تغير العقليات و بعض العادات يرهقك في البداية و لكن ستنسجمين، لا تحاولي التصنع كوني على طبيعتك و لا شيئ يستحق كل هذا التفكير فأنت لست تحت المجهر.

[الطيب الجزائري34]

لابد ان تعطي للوقت بعض الوقت.

[الطيب الجزائري34]

و عليكم السلام و الرحمة و الاكرام. . لابد ان نعطي للوقت بعض الوقت.

[kacimo.samy]

ربي يهنيك اصبري فقط

[هشام 12]

كبري عقلك ووسعي دائرة تفكيرك العام الاول دايما صعب واكثري من الدعاء والذكر

[غزلانْ]

السلام عليكم

عيشي وفق امكانيات زوجك و لتصبري و مع الوقت تتأقلمي

[الفراشة الرومانسية]

ربي معااااااااك

[lilia88]

يا اختي راني حاسة بيك بصح واش نقولك لازملك تكوني صبارة وتكوني شاطرة تتاقلمي مع الوضع لي راكي فيه طيعي زوجك واهلهم لازم تجيهم بالسياسة ولازمك تنساي الحياة الي قبل مع داركم هدي سنة الحياة ومالازمش تكثري التخمام وتديري المقارنات مع داركم ومع الوقت والاولاد انشاءالله رايحة توالفي.

[nihal159]

ربي يفرج عليك إن شاء الله؛ صراحة و بلا مانغطي الشمس بالغربال؛ الدار لي فيها أكثر من كنة صعيب بزاف تلقاي روحك فيها؛ راكي تقولي خوتو متزوجين و مايصرفوش؛ لأن كل واحد يشوف مع يدين خوه واش ذخلو للدار؛ وكل واحد يحسب لخوه؛ هذا واقع رانا عايشينو للأسف؛ حاولي توسعي بالك و خاطرك و إذا وافقك زوجك ديري كوزينتك وحدك مادام وصلت للجوع.

[Saif al-Islam]

القناعة كنز لا يفنى يا أختي ، إحمدي اللّه سبحانه و تعالى على نعمة تآلف قلوبكما أنت و زوجك ، أمّا غير هذا فأساسه و مصدره الشّيطان الرّجيم ، فلا تقلقي و لا تنزعجي بقلّة الشّيء ، و أطبخي ما تجدينه حاضرًا ، فإن لم تجدي شيء للطّبخ فقدّمي لهم تمر و ماء فوق المائدة ، فإن لم تجدي تمر فقدّمي لهم كوب من الماء فوق المائدة ، ليشعرو بعدها أنّ هناك شيء إسمه التفاهم على مصروف المنزل ، و دعي هذا للرّجال ، و هوّن عليكي يا أختي فلا تحملي هم العائلة بأكملها بوجود الرّجال
أما صعوبة تأقلمك راجع للحالة النفسية التي تمرّين بها و القلق الذي لا يفارقك ، لهذا يجب عليكي أن تعلمي أنّ تحت كل سقف أو منزل عادات و تقاليد يمكن لم تعتاديها في حضن عائلتك ، و لكن يكفيك حب زوجك أمّا البقية سيأتي بعد وقت من المعاشرة الخاتمة1

[زبدة ذايبة]

الصبر ثم الصبر ثم الصبر

مايهمك حتى واحد فيهم

خارج غرفة النوم حاجة ماتحوسي عليها

اللي لقيتيها كوليها ماتتعيفي ماتتشرطي

لو كان تبداي هذي ماشي مليحة ، وهذي مانحبهاش ، مارايحاش تفرى

ديري في بالك راكي عايشة عامين تاع العسكر

هذ العامين صعاب بزاف على المرأة المتزوجة حديثا

حاولي ماتذلي روحك لدرجة وين يعفسوك الناس

ماترفدي روحك لدرجة وين يفكروا يكسروك

خارج غرفتك ماتحوسيش على حتى حاجة

الشيء اللي لحق بيه زوجك كوليه واللي مالقيتيهش ماتهدريش عليه

وإذا تقدري خلي زوجك يجيبلك في جيبوا

والله عرفت بنت تزوجت في بيت فقير وبخيل جدا (البخل أشر من الفقر)

كانت تقولي هذ البنت بلسانها: "كنت ناكل ماكلة تاع المحابسية يعطولي طبسي تاع لجواز وطرف خبز وحتى الديسير كي يشروا ماتشوفوش (ماشي مايعطولهاش بالعين ماتشوفوش)

كانت تقولي كي نشوف الإشهار على الياغورت نموت من قوة اللي كانت ماتاكلش عندهم

يديرولها كل سبة باش تاكل وحدها في بيتها وماياكلوش معاها

ومرة تحكي قاتلي سرقتلهم شكارة حليب باش تشربها (من قوة الشر)

ومرة سرقت الفاكية (قاتلي ديت ثلاثة حبات )

وطلبت هذ البنت الفتوى إذا هذا حرام ولا حلال كي سرقت من كوزينة ناس دارها

والآن راهي في نعمة وفضل من الله

هذي قصة حقيقية وليست من نسج الخيال مارانيش نزيد من عندي وماعندي حتى مصلحة في هذا الشيء

وسبحان الله عوض عليها رب العالمين وصارت حياتها أحسن من اللي كانت

وبعد الصبر يأتي الفرج لا محالة

يابنيتي دير الدار اللي تصبر


لازم تصبري وتكبري بالك

ماراكيش مطالبة تبدلي لهذ الناس عقليتهم مايهموكش

المهم زوجك وبيتك حافظي عليها

ماكاش اللي مات بالشر اصبري برك

يجي نهار وتولي الأمور تتصرفي فيها أنت وتولي سيدة البيت ، وهذا يوم أن تستقلي ببيتك وبحياتك

وهذه النتائج تجي بإذن الله بعد الصبر

نصائح :

1-ماتحمليش روحك فوق طاقتها

2-مالازمش تكوني مطيعة لأبعد حد لأهل زوجك

3-الأشياء اللي تقدري عليها ديريها

4-واللي ماتعرفيهاش ، ولا تجيك واعرة ، ولا يحبوا يحملوها عليك قوليلهم لالا مانقدرش

5-لازم تعرفي حق نفسك أولا ثم تأدي الواجبات لغيرك.

6-خذي الأمور ببساطة وماتعقديهاش على روحك

7-دخلتي لدار جديدة مع ناس جدد مستحيل يكونوا كيما داركم

8-تقلبي الاختلاف وهذا طبيعي

9-طاعة الله أولا ثم طاعة زوجك. كوني نعم الزوجة له

وبإذن الله تتحسن الأمور تدريجيا

رب يوفقك ويسهلك أمرك

[نسيم الريح ش]

هادي حاجة باينة ختي الكل البنات كي يتزوجو الحياة تختلف من دارهم لدار ازواجهم في العقلية في المعاملة في الاكل .هادي الايام الاولى تاع زواجك عليك ان تتبعي طريقتهم حتى تقدري تتعايشي معاهم ما تفرضيش روحك حتى تعرفيهم مليح وتقدري تتاقلمي معاهم .وما تجهديش عقلك في التفكير بزاف اشغلي نفسك بواجباتك اتجاه البيت من طبيخ وتنظيف والاهم من هدا كله اتجاه زوجك من تعديل ولباس وابتسامة وغيرها

[mounir101]

ah c bien merci bcp

[اناناسة]

السلام عليكم . اختي انت تزوجت لتؤسسي اسره وهذه الاسرة ركيزتها انتي لذا اذا لم ترتاحي في بيتك ,كيف ستفعلين ذلك ؟ كيف ستكملين الطريق و انت خائفه و تتصرفين بحذر حتى لا يعترض عليك احد ....من الاخر هذه ليست عيشه . انت لك شخصيتك المختلفه عنهم و من الطبيعي جدا ان يكون هناك اختلاف في الاراء و طريقة عمل الاشياء ...بنظري مادام لا تختلفين عنهم في الامور الاساسية (النظام و النظافه) اين المشكل ...ماهمش جايبينك موظفه تحت الاختبار و الرقابه ...انت فرد مثلك مثلهم و لو كان لديك شخصية قويه فهم سيقلقون على رايك فيهم ...لذا لا تبداي هكذا لان طريق الخوف و قلة ثقتك بنفسك ضيعت الكثيرين ...اجمعي شتات نفسك و تصرفي بثقه في نفسك حتى لا يدوس عليك احد,,,,اكثر انسان يكثر الحسابات و يحوس ما يقلق حتى واحد هواكثر من يسيء الناس فيه الظن و يتهمونه بقلة اخلاصه و تفانيه ...خذيها نصيحه مني ...ربي يوفقك