كيفاش نطيب العدس البرتقالي؟

[أم إسلام]

اخواتي صباح الخير عليكن :1:
إن شاء الله راكم بخير:19:
جابلي البارح زوجي كمية من العدس برتقالي اللون وباغي انديرهولو باللحم المرحي على شكل بولات:confused:
وانا عمري ما طيبتو :o
عاونوني من فضلكم راهو مزروب ياكلو
قتلوا الفضول بغا يعرف الطعم انتاعو:D
وشكرا مسبقا:mh31:

[ام هدول]

[B]السلام عليكم ..في الحقيقة عمري ماطيبتو بصح علابالي بلي صحي ومفيد وكي ييطب يدوب...يليق سوب ..جبتلك هاد الرابط ممكن فيدك وكدللك ممكن تكتبي عند عمي قوقل طريقة طهي العدس البرتقالي رايحة تجيك وصفات ..جربي لي تناسبك وردنا لخبر

http://mawdoo3.com/%D8%B7%D8%B1%D9%8A%D9%82%D8%A9_%D8%B9%D9%85%D9%84_ %D8%A7%D9%84%D8%B9%D8%AF%D8%B3_%D8%A7%D9%84%D8%A8% D8%B1%D8%AA%D9%82%D8%A7%D9%84%D9%8A

[أم إسلام]

شكرا ليك اختي ام هدول
انا ما بغيتوش مرحي يبقى حبات بالبولات انتاع الكفتة
راح انشوف الوصفة واذا جربتها اكيد راح انردلكم الخبر
شكرا جزيلا اختي ودمتي متميزة

[طيور الجنان]

اختي مانعرفش كيفاش يجي بولات انا موالفة نديرو سوب لانو مليح لفقر الدم جربي و اذا عجبك نتعاندو عليك هههه.

[Asma Bouanani]

انا مداري نطبخه حتى طيبي المرق والكفتة وارميه وما تغلقيش الكوكوط شوية عشر دقايق بالاكثر وطفي تحتو

[أم إسلام]

لالا ما شي العدس الي يجي بولات اللحم المرحي هو الي يجي بولات
والعدس يبقى حبات لكن ما علاباليش إذا يطيب بالخف وإلا ايطول كيما العدس العادي
خفت انجربو وما يعجبهمش
خاصة انو زوجي جابو علاجال ولدي الصغير عندو فقر الدم وبغيتو ياكلو
شكرا لتفاعلكن

[أم إسلام]

لالا ما شي العدس الي يجي بولات اللحم المرحي هو الي يجي بولات
والعدس يبقى حبات لكن ما علاباليش إذا يطيب بالخف وإلا ايطول كيما العدس العادي
خفت انجربو وما يعجبهمش
خاصة انو زوجي جابو علاجال ولدي الصغير عندو فقر الدم وبغيتو ياكلو
شكرا لتفاعلكن

[ذات النورين]

السلام عليكم
اختي ام اسلام العدس البرتقالي يطيب بسرعة يعني ما ياخذش وقت كيما العدس لاخر العادي
انا ننصحك ديري شوية ثوم مسكرفج مع شوية بصل مسكرفج وثليهم مليح في شوية زيت حلي شوية طماطم مصبرة في شوية ماء ورميها تتقلى معاهم
ديري بطاطا مربعات وجزر مربعات ورميهم يتقلاو شوية ديري توابلك انا موالفة ندير فلفل اسود ملح طبعا شوية كركم باش يعطي اللون وكمون وارمي معاهم شوية كرافس يعطي بنة هاااايلة للعدس ومرقي عادي وكي تحسي الخضار طابولك ارمي العدس باش ما يذوبلكش كامل وكي يطيبلك العدس
ارمي لي بول تاع اللحم معاهم ودوزنيهم كيما دوزنتي مرق العدس يعني نفس التوايل وخلاص غير يطيبو طفي عليهم وبالصحة والهناء
ان شاء الله تعحبك الوصفة

[فردوس الرحمان]

يأختي هدا يجي une soupe مكان لاه ديري فيه اللحم المرحي بولات أصلا هو une soupe turc لان اصله تركيا ، انا طيبو عادي مرقة حمرا تلقايه داب ،. هو مفيد جدا خاصة لفقر الدم ، جربيه ميش رايحة تندمي ،

[أم إسلام]

اختي فردوس شكرا ليك لكني ما بغيتوش soupe
اختي ذات النورين شكرا جزيلا ليك راح انجربو على طريقتك وانردلكم الخبر وانحطو في قسم التطبيقات
شكرا جزيلا اخواتي للمساعدة

[أمنية غفران]

السلام عليكم و رحمة الله تعالى و بركاته

دخلت المنتدى قابلني موضوعك

أختي الكريمة العدس الأحمر معروف عليه انه يطيب تم تم علاهادي يعجيبني بزاف شوفي حبيبتي طريقتي

اقلي نص حبة بصل مسكرفجة مليح مليح في الزيت و من بعد زيدي مغيرفة طماطم مصبرة باش تعطيها هاداك اللون البرتقالي علاخاطرش لوكان ماضيفيش الطماطم العدس يتحول لونه الى ابيض كي يطيب هههههههههههه
وضيفي الملح و شوي فلفل اسود و مـــرقــي و هنايا تكوني دوزنتي اللحم المرحي ملح مع شوية قرفة شوي زنجبيل شوي فلفل اسود و عمليه بولات صغار و كي تغلي المرق ضيفي البولات و خليهم يدخلهم الطياب و من بعد ضيفي العدس راه مايديش الوقت في الطياب و هنايا زيدي وجدي الدرسة ادا حبيتي ضيفيها والي متكونة من فصين ثوم و دبشة ( قصبر اخضر) مفرومين في المهراس و ضيفيهم الى العدس و ما تنسايش تحركيه مرة على مرة و دوقيه اذا ناقصه الملح زيدي و شوفي قوام الشربة ادا حبيتيها ثقيلة و لا خفيفة شوي هادا يرجع ليك

و بالصحة و الراحة

[جلالي بلخير]

العدس البرتقالي مايديش وقت بزاف فالطياب