زواجى ينهار ساعدونى

[مشكلتي]

سلام اخوانى الكرام قبل طرح مشكلتى ارجو من كل من سيتفضل برد ان لا يرحمنى وان كنت على خطا ان يوقعنى لان اريد فعلا حلا لمشكلتى لا مجرد شكوى وتطيب خاطر بداية انا امراءة متزوجة مند عامين ولدى طفلة مشكلتى انى لم اعد قادرة على احتمال وضعى مع زوجى ولم اجد من ينصحنى اهلى كرهتم وفى نفس الوقت ماخلتههمش يدخلو لانى نعرف زوجي خير منهم مش راح يفيد فيه هو انسان ليس سيئ ولكنى انا وهو مختلفان على طول الخط انا انسانة حساسة تجرحنى القسوة والكلام الجارح وهو حين يغضب ولاتفه سبب مايخلى مايبقيلى وباه نوضحلكم اكثر يقولى مثلا ندمت على نهار لديتك فيه كل شوى هزى قشك وروحى لدارك وكى نقلو بنتنا يقول نديهالك تخيلو وين وصل ومرة قلى نروح برا ندير وش نحب وانتى نديرك اوتيل حتى ولو اعتدر على هدى برك عمرى ماننسهالو والله مانى مقصرة صابرة على كل ظروفو المادية على لسانو الطويل وعمرو ما رضى انسان صعب ترضيه ديما مشك هك ولازم هك عقدنى ودخلنى فى بعضاى كنت فى دارنا عزيزة بابا وخاوتى الدكورا محترمينى جامى لعيطو على ولا هانونى وملى جيت عندو ونا فى الرخس ومقدرتش نصبر على جال بنتى حاملة بصح الى متى منعرف حابتها تعيش كيما بين ام واب بصح حاسة روحى انى منقدرش نكمل هكا ديما انا لغالطة حتى كى نلمو على الهدرة الزيادة يتحجج بانى قلتك من قبل بانو غشى مشو مليح وانت لوصلتى روحك حتى الاعتدار مكانش قلبى كحال من ناحيتو عدت مش حاملتو ومنعقب حتى شى من كثر ماحملت حسيت بلى عند قرن مزوجة مش عامين ربي يعيشكم قولولى زيما نقدر نصبر اكثر والله ماقدرت نفسيا عييييييييييت حتى بنتى مش قادرة نربها قدقد من كترت الهم لراكبنى عمبالى بلى فى عيوب بصح تامون يئست حتى النفحة باه نغير من روحى راحت ما نحس انو يستاهل نتغير عجالو هو مادار والو عجالى تشوفو مع اهلو منكدبش عليكم نغير منهم ساعات اتصالات فى كل وقت حتى فى نص ليل حتى خصوصيتنا اقتحموها حنين عليهم لدرجة ماتتصورهاش ومعاى انا العكس ومعرفتش وعلاه لكنى مش عجباتو هدا مش دنبي ماماه لختارتنى وهو مقتنع انى مدامنى خيار امو فلازم نكون ملاحة ساعات نحس انو باقى معايا غير باش يثبت انو اخياو امو صحيح المهم عيانى فى مخى وعلاه هكا نقبل باقل شئ وفى المقابل مانلقاو والو صدقونى ماطلبت منو يشريلى لا ساك لا صباط مراعاة لظروفو لا تحواس حبسة فى دار ورغم كلش مشنى ملاحة هو من النوع المتطلب وانا بقدر الامكان نحاولبصح اكيد مقدرتش على كلش انصحونى وربي يجزيكم كل خير

[hanan7]

اولاً أسأل الله إنو يريح بالك .. اللسان الطويل مشكله .. بس خليني احكيلك ع تجربة صديقتي زوجها نفس صفات زوجك وتقريباً متل وضعك 90% كرهت حياتها وصارت بدها تتطلق نصحتها تتعامل معو بأسلوب معين لمدة 6 شهور فقط وازا ما تغير تتطلب الطلاق وهيا حساسه متلك .. وهيا ما عندها ولاد يعني طلاقها أسهل بس انا نصحتها لوحة الله تعالى انو تتعامل معو بهاد الأسلوب لمدة 6 شهور وبعدها بتقرر وانتي عندك بنت يعني لازم تحاولي ع الاقل بعرف انك زهئتي وئرفتي بس اتحملي بس هاي المده .. شوفي اختي الإنسان العصبي ويلي بحكي كلام طالع نازل بكون قلبو طيب بس ما بيعرف كيف يطلع طيبة قلبو ..شوفي انتي لا تناقشية بأشياء بتعصبو وكوني حنونه زياده عن اللزوم معو ازا عصب عليكي اسكتي وما تردي عليه واستنيه بس يروق ويهدا وروحي عندو واحكيلو سامحني لأني عصبتك .. حتى لو كان الحق عليه اطلبي منو السماح .. بعرف أنها صعبه عليكي بس اتحملي شوي عشان بنتك .. واي شي بحكيلك عليه حتى لو ما عجبك احكيلو امرك حبيبي يلي بدك ياه بعملك ياه .. خليكي لطيفه زياده عن اللزوم .. اعمليلو أجواء حلوه .. حتى ازا زعلك بدون سبب ارجعي واحكيلو انت تاج راسي ما بئدر ع زعلك يا ئلبي حاولي تعامليه وتداريه كأنو طفل .. وإياك تعاتبيه على عصبيتو عليكي أو تحكيلو ليش انت مع أهلك هيك ومعي هيك .. بالعكس حنني قلبو ع اهلو وامو اكتر واكتر صدقني راح تلاقي أجر عظيم عند الله وأولادك راح يعاملوكي معامله منيحه وكنتك بالمستقبل راح تعاملك معامله زي يلي عامليتها لحماتك .. لا تزعلي ع إي شي منو ولا تتحسسي حاولي اضحكي وامزحي معو .. واتحملي إي ردة فعل منو .. وحطي ببالك انو هاد كلو عشان بنتك .. في مثل بحكي نار جوزي ولا جنة اهلي .. انتي اكيد ما بدك بنتك تتشتت وأهلك شو ماكانو مناح ما راح يحبو بنتهم تتطلق .. حاولي انك تحتويه .. ولا تنسي الكلمه الحلوه بطلع الحيه من جحرها .. والكلمه الحلوه طالعه والكلمه البشعه طالعه .. انتي خلي كل كلامك حلو و غزل ودلعيه حتى لو ماكان بيستاهل .. صديقتي جربت هاد الأسلوب أول شي صار معها عصبي اكتر وهيا اتحملت بعدين صار مافي أحسن منو معها وعندها هلأ ولدين وعايشه مبسوطه ماشاء الله تبارك الله .. خليكي عاقله واحتوي زوجك وخليكي أحن عليه من امو وصدقيني راح يصير زي مابدك واكتر وعودي نفسك ع البرود حتى لو هو عصب قابلي عصبيتو بإحسان .. زي ما قلتلك الزلمه العصبي بكون طيب وحنون .. اتحملي عشان بنوتك الله يخليلك ياها .. وربى يهدي زوجك ويهديكي ويوفقك تقلبي مروري ..

[ياسمين تلمسان]

اختي لا تسكتي على هده الإهانات والتجريح انتي انسانه ولستي حجر لمادا لا يقوم هو بالتضحيه لا تكوني الحلقه الأضعف ابرزي شخصيتك القويه ولا تضعفي امامه انتي معاك الحق قولي له اما ان تحترمني أو طلقني وخطيك من هدي العيشه

[قدور بن عاشور]

سأدخل مباشرة في الموضوع،

هل تعتني بنفسك و جمالك و نظافتك أم أنك طالڤة روحك للآخر؟

كيف كانت علاقتكما في البداية و متى بدأت في التدهور؟

كيف أحوال المطبخ؟ راكي تنوعي في الأكل، ديري الحلوى مثلا ولا غير Service minimum

لاأظن أنه قبل بك فقط لمجرد أن أمه إختارتك له، ربما تكونين من الصنف لي كي تتزوج تنطلڤ

الحل بيدك، اجلسي مع زوجك لما يكون عاقل و أنت في كامل زينتك، و افتحي معه حوار هاديء، شوفي واش مشي عاجبو، و كذلك بالنسبة إليك.

[عثمان الجزائري.]

خذي نصيحية hanan7 لكن بلهجة عنابية و ليس لهجة أردنية - مجر إبتسامة - الحياة أختي أخذ و رد و فرح و نكد و يجب على الإنسان أن يعرف كيفية التعامل، عقلية الرجل الجزائري غالبا تكون هكذا و هذا موروثنا من أجدادنا ، لم تصفي لنا زوجك هل هو متدين أول لا إن كان إنسان مهمل لعبادته إبدئي بنفسك و لتكوني قدوة له، فمن كلامه لا أظن أنه متدين و إلا فما معنا قوله" برا ندير واش نحب "...الصبر أختي و نقولك قاعدة " مهما رأيت النساء من حولك سعداء فهن ليس كما ترى عينك، روحي عيشي معاهم تحيري" الناس كل عندها مشاكل ألوان و أشكال، ما لا حاولي أن تنسجمي و تجدي الحلول الذكية...زوجك أمامك و الطلاق وراءك إما أن تتقدمي لزوجك فتحتويه أو تتخلفي للطلاق فيحتويك

[نورسين.داية]

السلام عليكم

هذا هو الجانب الثاني للزواج التقليدي ............

عموما عزيزتي لاحظي أنك تحدثتي عن الزوج فقط ....لم تذكري شيئا عن نفسك .....قصدي لربما أنتي مقصرة من جانك ربما .....


الذي أعلمه أن كل تصرف سلبي في العلاقات الإجتماعية يكون عبارة عن ردة فعل لتصرف سابق سلبي ....الحالات الإستثنائية هي حالات مرضية يعني إنسان هو فيه ديفو من الأصل
قصدي لاحظي طريقة تعاملك معه لربما أني السبب .... ربما فقط ...........


و الصراحة التعايش مع الإهانة صعب جدا .............حتى إنسان ما يقبلها مهما كان ............

[lilia1948]

اضم رايي الى راي hanan 7

[عثمان الجزائري.]

بعد إعادة قراءة الموضوع لفت إنتباهي قول زوجك " هزى قشك وروحى لدارك " و الله يا أختي لا أريد أن أزيد من خوفك لكن حسب ما سمعت في درس لإمام الحي قال أن الطلاق يقع بالنية فقط يعني لو قال لك مثلا " روحي زوري أهلك " و هو ينوي الطلاق فإن الطلاق قد وقع...و لا أعلم ما كانت نية زوجك، لكن عليك تنبيهه إلى هذه النقطة أو إستشارة المشايخ لأن القضية قضية حلال و حرام.ربي يجيب الخير

[samiaa2017]

السلام عليكم
لم أجد شيئا لأقوله فآراء الأعضاء تكفي **كي نقرا قصص كيما هادو والله غير نضيق و نزيد نكره الطرف الاخر .اللهم اصلح أحوالنا

أسأل الله العظيم رب العرش العظيم أن يفرج همك و يصلح أحوالك

[ع.عيسى]

ولكن لماذا هو طيب مع اهلوا وانت معاك كيما تحكي ؟ وماذا تقصدين انه ليس سئ ؟ هل اذاه يقتصر على الكلام الجارح ام يتعدى للضرب ؟، ولماذا اصلا يتنرفز عليك ؟ اسئلة يجب ان تطرحيها على نفسك ’ هل جربت يوما ما ان تواجهيه بحزم عندما يتطاول معك في الحديث وتتعصبي عليه لاتفه الاسباب كما يفعل معك وتشوفي ردة فعله ، ؟؟؟

[ايمان4]

رايي من راي الاخ ع عيسى .... شوفي اذا ما مكاش مشكل فيك و منتم السن بالسن و شوفي ...

[محمد جديدي التبسي]

الانسان الحساس ما يقدرش يعيش في مجتمعنا
واللي كانت مدللة في بيت والديها صعب تتاقلم مع الزواج والمسؤولية الا بتوفيق من الله.
لازم تقوي قلبك وتتعلمي سياسة اللامبالاة للكلام الجارح والاهانات
لأنك اذا عمرت قلبك راح تمرضي غير انت وتكوني ضحية في الأخير مطلقة بولد
جددي حياتك وقوي شخصيتك واستعيني بالدعاء وقومي بواجباتك وضحي قدر الامكان لكن لا تجعلي زوجك محور حياتك حتى يعود لرشده ويعاملك مليح
ربي يفتح عليك

[خالد عنابي]

المشكلة انو يسمع لامو كثيرا وانها هي لي خيراتك ليه وزيد مقتنع انه طالما خيار امه يبقى مليح !!!!

يا سلام على الرجلة

هذا fi sa maman وبالنسبة لي الراجل الذي لا يستقل عن امه من حيث الشخصية والقرارات مهوش راجل

ربي يعينك

[زبدة ذايبة]

انت درتيه هو الشمس ودور عليه الكواكب


راكي لاصقة فيه لدرجة شديدة جدا

أنت دايرة في بالك كي تلصقي فيه وتفكريه في الطفلة مايطلقكش ومايديرلك حتى حاجة

بالعكس

في بعض المرات بعض الزواجات تكون ومن بعد يتبعها الندم

اللي يتزوج ويشوف روحوا حصل يولي يظلم في الطرف الثاني

السنة الأولى والثانية تسير بهذ الطريقة اللي راكي تحكي عليها

خاصة لو كان الزوج يكون يتوقع أشياء وبعد الزواج يلقى أشياء ثانية

انت راه كاااااااره منك لأبعد حد

وتزيدي تقلقيه بالردود تاعك حتى يولي يخلط في الهدرة

كي راه مايضربكش راكي هايلة

عندو شراسة تجاهك ، وعدوانية كبيرة ليك ، ماعندو حتى عاطفة تجاهك (بالطريقة اللي راكي تسيري بيها ماتوصليش لنتيجة)

حاب يحطمك بكل وسيلة

كيما نقولوا حنايا الجزائريين عندو الغزاااال منك

حاب يكسرك

على هذا تسمعي كلام جارح جدا جدا وإهانات

دخلتي لحيز ومجال هو مازال ماسمحلكش تدخلي ليه

مازل ماوصلتيش للمرحلة اللي راكي تحوسي عليها وحابة تعيشيها

هو يرفض تكوني زوجة ليه بالطريقة اللي راكي انت حابتها

على هذا يهددك بالكلام الرخيص والسوقي

انت كي تشوفيه ولى هكذا تزيدي عليه وتزيدي تضغطي ودخلي بنتك في الوسط

وهو يزيد يتقلق وتزيد الشراسة تاعو تجاهك وتولي تسمعي في كلام لايصلح


راني حابة تفهمي وش راه يصرى في حياتك الزوجية

أنا من رأيي والله أعلم

الطريقة اللي اقترحتهالك العضوة اللي تكتب باللهجة السورية و لا الأردنية ماتحاوليش فيها نهائيا

لأنه رايح يدمرك ومارحش يسمحلك تمارسي معاه الرمنسيات في هذ المرحلة لأنه يرفضك

وبالتالي يرفض أي شيء جميل تحاولي فيه معاه

الحل اللي راني نشوفوا -والله أعلم-

ماتزيديش دوري بيه ولا راكي حابة تكملي كزوجة

انسحبي من عندو (ماتخرجيش من دارك احذري)

استخدمي سياسة السكااااااات ماتزيديش تهدري نهائيا

ماتدي ماتجيبي معاه

عندك واجب الزوجة ديريه لأن الله يحاسبك عليه

خليه حتى هو يولي يجي لعندك يهدر

ماتهدريش معاه وماتناقشيهش

وماتفكريش نهائيا تستخدمي بنتك في حل الصراع .

التهاي بروحك

جددي من شكلك ونوعي فيه (قصة شعر، و.....)

إذا كنت ديري خياطة ولا طرز ولا طبخ ولا مهما كان النشاط اللي عندك ديريه

اخدمي لدارك ، بدلي الديكور ، أصنعي أدوات المطبخ، نظفي ، غيري

وماكالاه اللي تخدميها تجري توريهالو ، ولا تروحي ليه تقوليلو شوف وش اخدمت (مارحش يشكرك)


اخدمي بالصمت وكأنك عايشة وحدك


ماكالاه ترفدي بنتك وتحطيهالو في حجروا

ماتدنايش ليه ، خلييييييييييييييييه مادوريش بيه

نهار مايحس أنك ماوليتيش موجودة في حياتوا

ونهار مايحس أنك انفصلتي عليه عاطفيا

هذاك النهار يبدى يحوس عليك

ولا هدر معاك وتناقش معاك ماترديهش بالعكس كوني واقفة على روحك

وماتطلقيش روحك عليه حتى يكرهك ويمل منك

خلي المودة والرحمة تجي تدريجيا

هو راه كاره منك

ماتلعبيهاش رومانسية وهو ماشي حابك أصلا وراه يحوس يكسرك ، ويكسر كل حاجة فيك

ان شاء الله راكي فهمتيني

حاجة أخيرة

وزيدي شوفي ناس دارك كيفاش يهدروا وردود أفعالهم كيفاش

حاولي تتقربي ليهم ماتبقايش غافلة

حاولت نفصل التفصيل الممل ان شاء الله نكون أفدتك

على كل حال الرأي يرجعلك ليك

انت اللي تقرري ، هذي آراء ومحاولات للمساعدة فقط

[hanan7]

ع فكره انا بحكي أردني ما بحكي سورى ��

[توحيد الجزائرية]

تطلقي تتمرمدي وبنتك تعيش نفس قصتك
وديري في بالك كل واحد ونصيبو حتى لو لم يكن هو المقدر لك لكان اخر يشبهه
يا لعزيزة ..
البيوت مليئة بالهموم ..
كاين اللي زوجها شارب خمر ودخل للسجن سنوات طويلة وصبرت وانتظرت ..واكيد يتغير
خلينا منو حتى وان كان ظالم :
انت تغيري لاجلك انت وابنتك ..غيري علاقتك مع الله ..تقربي اليه
غيري شكلك (شيء عادي)
تعلمي ..
قبل ما تشتكي للعباد صلي في الليل فقلب زوجك بيد الله ..
ادعي قولي اللهم سخره لي واجعل الود بيننا ..لين قلبه واصلحه
بأهون سبب سيتغير ..
نعرف واحدة متزوجة بشخص (امام )من الريف ويكره زوجته وعين بالعاصمة لكن بعد سنوات تبعته زوجته ..تهتم به وبأكله واتذكر انها قالت لي :راني نحارب حتى نحافظ على بيتي
الراجل رحمة حتى لو كان فحمة وما ديريش في بالك بلي كامل الرجال مثاليين ..
كامل نضعفو ونتعبو لكن تفكري ان الكثيرات يترقبن طلاقك للتشفي
حافظي على بيتك وزوجك ..مهما كلفك ذلك ..

[هُدوء آلفَجر]

اقرئي هذه النصائح فهي قيمة و حاولي طبقيهااااا ,,, و لدي لكي نصائح ,,
كوني انثى ,,
امدحي زوجك ,,
احبي نقسك ,,و اعتني بهااا
ما تعيطيش على بنتك قداموا ,,
لا تتكلمي معه كثيييرا ,,
خليه هو لي يجري وراك ,,عامليه باسلوبه لكن بدلع ,,
و ربي يفتح عليك ,, و يفرج كربك

[ريان 7]

رضينا بالهم و الهم مارضى بينا
مافهمتش وش مصبركم على المخلوقات هاذي ؟؟؟!!!!

[zakaria1980]

ربي يفرج همك اختي ماعندي ما نقولوه