راجلي و خاوتو

[مشكلتي]

السلام عليكم اخوتي اردت ان اشارككم مشكلتي بالاك تقدرو ترايو عليا مشكلتي اخوة زوجي الذكور يضلو لاصقين في خوهم بشيعتي داري وحدي يضلو عندي كانو ساكنين معايا بسيف باش خرجو كراو و كي كراو لصقو فيه اكثر غير يخرجو مالخدمة يجو عندي حتى تفوت 10 باش يخرجو يوميا عييت منهم و زوجي ما يبغيش عليهم مرات يكون عيان و ما يحبش يروح يرقد و يخليهم يساعفهم حتى يروحو و يرقد مانيش حاسة روحي براحتي في داري ما نقدر نجمع مع ولادي و راجلي براحتنا ما لقيتش الحل كنت ندير حجابي قدامهم كي طولت الحالة وليت نحيتو قتلو تحبني نتحجب منهم ما يجوش كل يوم حتى لليل حتى باش نماكيي ولا نلبس ما نقدرش ايلا دخل مالخدمة و لقاني لابسة يقلي روحي بدلي ذرك يجو خاوتي حتى وليت كرهت منهم و منو هو كي ما يهدرش معاهم القاولي حل مع هذو القوم واش ندير

[زبدة ذايبة]

انت علاش تسهري ؟؟؟؟

حب يقعد مع خاوتو خليه

ارفدي اولادك وديهم يرقدوا

كانوا ساكنين معاك ماتحملتي !!!!!!

جاو ليك زيارة ماتحملتي ؟؟؟؟؟؟

وش حبيتي تقطعي راجلك على خاوتوا؟؟؟؟؟

راهم إخوة لزوجك وزيد أعمام لأولادك. وليك سلاف

يحبوا يجو يسوفوا خوهم.

وانت حابة تحمري وتشمري!!!!!

حبيتي ديريها سبة.

ماراهمش ساكنين معاكم في الدار انت

سكنتيهم في عقلك

تقبلي الوضع هذا وعيشي مع زوجك

واولادك وفق ما كان

ويجي نهار كل واحد يستقل بحياته

اصبري

ماتخرجيش الكلام اللي مايصلحش.

وماتبينيش ماراكيش حاملتهم

التصرفات اللي ديريها معاهم يسجلها التاريخ

بالنسبة ليهم. مارايحين ينساو منك الخير ولا ينساو الشر

خلي صفحتك نظيفة.

وخليهم كي يجو يكتبوا التاريخ تاعهم معاك

يقولوا كانت فخاة ونص.

ولا قدرتي تكسبي الاحترام تاعهم والتقدير.

تكوني كسبتي رجال زيادة هلى راجلك.

آباء ثانيين لأولادك.

ماتخليهمش يهربوا منك ومن خوهم واولاد خوهم

على جال الحماير اللي راكي حابة طلسي بيه وجهك.( درتيها سبة برك)

فكري لبعيييييييد جدا

ماتفكريش كيفاش تتخلصي منهم وحابتنا نعطولك خطة للخلاص.

الله يهديك

[ريان 7]

إذا هوما مافهموش رواحهم و راجلك محاولش يفهمهم راح يبقى الوضع على حالو
هذا بلاء , ماعليك غير تصبري ومادخليش روحك خاطر تلقاي روحك نتي برا وتربحي العيب رغم أنو الحق معاك

بصح هاذا مايمنعش تفهمي راجلك بلي الشي هذا عيب و البيوت عندها حرمتها وخصوصيتها فهميه بلي خاوتو هو مش خاوتك نتي و الدار داركم في زوج مشي دارو وحدو بش يقرر في بلاصتك , وبلي نتي مسؤولة على خدمتو هو برك بما يرضي الله ماشي مسؤولة عليهم هوما و على مأكلهم ومشربهم ...بالمختصر ضيف العام تليقلو ذبيحة وضيف اليوم تليقلو طريحة.

و حكاية الحجاب لي نحيتيه مش تصرف أخلاقي ماتخلطيش مشكلتك معاهم حاجة و مبادءك و دينك حاجة.

ربي يكون في العون

[" شاهير خان "]

بالاخير هوما اخوة زوجك يعني اين الخطا يحبو يسهرو معا اخوهم يعني
الصراحة الغلط يرجع لك وليس لهم حتى لو كان يسبب ازععاج احملي ابتسامه
خفيفة وخلي قلبك ابيض وكوني طيبة معاهم لانو الدنيا دوارة بلاك يجي اليوم
اللي تتوحشي يجو عندكم والله اضافة ل ذالك ونهاية الموضوع هوما اخوة زوجك
يعني من لحمو ودمو يعني مانشوفش انهم لازم يحشمو باش يجو يعني الدار دراهم
عادي مانتوقعش انهم غلط وانت لك الحرية

[عثمان الجزائري.]

نصيحة واحدة لا تنزعي خمارك أمامهم و كي تغلبي روحي أرقدي و خلي راجلك يسهر مع خاوتو الجياح لوكان جات مرة في الفال معليهش بصح على حساب هدرتك راهم ديما لتم، في 2017 و مازالو ما يعرفوش أوقات العورة!!!؟...أخي متزوج منذ 5 سنوات دخلت منزله 3 مرات لكي أعينه في حمل بعض الأشياء و فقط...الوقاحة لا دين لها.

[خالد عنابي]

لكل شيئ حدود وهؤلاء كما يبدو مافهموش حدودهم ولابد من افهامهم بانه كل واحد يروح لدارو ومش كل يوم يضلو ساهرين عندك

العضوة زبدة ذايبة منعرف وش بيها تضرب فالخاطي وما دخل قطع الصلة في الموضوع اصلا ؟

الموضوع عن الافراط في الزيارات لغير سبب

المهم صاحبة الموضوع ثقلي روحك شويا باه يفهمو رواحهم

[a-malik]

سلام
ارى انك زايدتلها شويا اختي
مهما يكون لازم انت لي تعاوني زوجك على صلت الرحم الي هي من وصايا الرسول صلى الله عليه و سلم
ذهبت إمرأة �� تشتكي عند رسول الله صل الله عليه وآله وسلم من زوجها .
كان زوجها يدعوا الناس في بيتها ويكرمهم وكثرة الضيوف سبب لها المشقة والتعب �� .
فخرجت من عند رسول الله ولم تجد الجواب منه ، وبعد فترة ذهب رسول الله إلى زوجها وقال له إني ضيف في بيتك اليوم ، سعد الزوج بالخبر وذهب إلى زوجته وأخبرها إن ضيفا عندنا اليوم وهو رسول الله .
سعدت الزوجة بالخبر وطبخت كل ما لذ وطاب وهي راضية ومن طيب خاطرها .
وعندما ذهب رسول الله إليهم ونال كرمهم وطيبة ورضى الزوجة قال للزوج عندما أخرج من بيتك دع زوجتك تنظر إلى الباب الذي أخرج منه .
فنظرت الزوجة إلى رسول الله وهو يخرج من بيتها والدواب والعقارب وكل ضرر يخرج وراء رسول الله .
فصعقت �� الزوجة من شدة الموقف وتعجبت مما رآت
فقال لها رسول الله هكذا دائما عندما يخرج الضيوف من بيتكِ يخرج كل البلاء والضرر والدواب من منزلكِ
فهنا الحكمة من إكرام الضيف وعدم الضجر.

كبري قلبك و عقلك وبدلي النظرة تاعك درك ترتاحي هدو خاوت راجلك يعني هما لي يهزوك كي طيحي من بعد راجلك احسني ليهم هذه هي نصيحتي لك وربي يوفق

[Salima2017]

للزوجة خصوصية و يجب على أهل الزوج احترامها. و الشيء ادا زاد عن حده أصبح ازعاج لخصوصية المراة في بيتها. الأولى انه زوجك يواجه اهله باللين و يفهمهم.
و يحط نفسه مكان زوجته ويرى ان كان سيقبل بأهلها يزوروهم بهذا الشكل أو حتى أقل.
أنا اتعجب من الزوج الذي يعطي نفسه و اهله كل الحرية في التصرف و عندما ياتي دور زوجته بالمطالبة بأقل حقوقها يبدأ يبرر بقال الله و قال الرسول. الحمد لله ديننا منصف للمرأة لكن بعض العقول تحلل و تحرم و تشتهد بأحاديث و تسقطها على الحالة حسب هواء نفسها.
الرجل الّذي لا يستطيع مواجهة أهلة بقول كلمة حق باللين يعرض زوجته و نفسه للكثير من المشاكل و الضغوطات.

[عاصمة الضباب]

السلام عليكم، أختي لا إفراط ولا تفريط أنا امرأة وأقدر ما تمرين به من ضغط نفسي وكبت قد يؤدي بك إلى الانفجار......لكن في المقابل زوجك يجد فتح الموضوع مع إخوته ليس بتلك السهولة خوفا من أن يخسرهم أنصحك بالتكلم معه بهدوء واطلبي منه أن يتفهم،صحيح أنه اخوهم وهم عائلته لكن ما ذنبك أنت في أن تتحملي وقاحتهم صلة الأرحام لها أداب معينة وعندما اوصانا بها ديننا سعى من خلالها إلى توطيد العلاقات الأسرية وليس تدميرها لكل شيئ حد معين والظاهر أن ما يحدث معك أمر مبالغ فيه،المهم أختي كما قال الأخ خالد ثقلي روحك شوية وكوني جدية قليلا معهم.....لكن ليس بشكل دائم لكن لا تقللي الأدب معهم أو تجرحيهم بالكلام خاصة في حضور زوجك لأنهم مهما كان هم إخوته لا يقبل عليهم،وبالعكس أختي عندما يدخلون بيتك إن كنت دون حجاب ارتديه أمامهم حتى يفهموا أن هناك ما يجب أن يحترمون وحتى لا يأخذوا كامل راحتهم......كي نحيتي الحجاب حسبوا رواحهم صحاب الدار لكن أختي أعود وأؤكد ...... حذاري أن تكوني سببا في تفريق الأخوة ربما ما يفعلونه ناجم عن حسن نية........الأعضاء يقدمون مجرد نصائح لكن أنت الادرى بتفاصيل الموضوع رجاءا تصرفي بعقلانية ولا تتهوري حتى لا تندمي فيما بعد ويعود الزوج ليلومك وحدك.....في الأخير تصرفي بحزم واظهري بعض الإزعاج........بالتوفيق

[الرميصاءْ]

انا نظن المشكلة راها فيكي اختي والله اعلم
تاكدي انو راجلك هو لي حابهم يبقاو عندو يحب حكياتهم يحب مغامراتهم يحب قصصهم المهم عندهم اسلوب جميل في الكلام يخلي راجلك مايقدرش يبعد عليهم واذا ماجاوش نهار عندو يكره ويروح هو عندهم
المهم حاولي تجذبي راجلك بموضيع مفيدة وعمريلو الوقت تاعو رايح يبعد عليهم ويتلهى بيك

[لمسة ابداع]

قالك الحر يفهم بالغمزة و البتي بالدبزة
ربي يكون في عونك

[رندة.]

يا اختي اصبري و ما تتقلقيش.وكيما قالولك ما تنحيش خمارك في وجودهم.
ربي يوفقك ويريح بالك ان شاء الله

[Trilli555]

لا إله إلا الله محمد رسول الله ، أختي أظن أنت بحاجة إلى فهم زوجك أكثر من خلو الجو والتخلص من إخوته، أنا وكل واحد هنا حتي اللي يعاتبو فيك متأكد باللي رانا فاهمينك وفاهمين ظروفك.

عاودي راجعي روحك وهزي راسك وادعي لمن بيده كل شيء. البشر راهو ضعيف ما يقدر يديرلك والو (لا اللي مدايرينلك المشكل ولا اللي يدبرو عليك)

أنا بتجربة واحدة أخرى كنت رافض حاجة وخانقتني أكثر منك ، ومبعد مدة أقسم بالله الذي لا إله هو وأنا نتمنى تصرالي لحد الساعة.

[أثيلة]

السلام عليكم و رحمة الله و بركاته
أولا حسبي الله و نعم الوكيل في كل من رد منكم و قال انها مخطئة
ايه من حقها تكون عندها دارها وحدها خاصة إذا كان عندو خاوتو شباب بزاف
و من حقها تلبس و تماكيي لزوجها
و زيد هي مش تحرم فيه
مي الواحد غير يخرج من الخدمة يروح لدارو مش يروح يتجمع في دار خوه يخلولو شوية خصوصيات
زوجها يدخل يلقى خاوتو ديجا تلايمو في دارو و مايجو يروحو يكون تعب وقتاش الزوجة تلقى وقت باش تكون مع زوجها وتشكيلو همها او تنحيلو همو
والله راح تهبلو هده الاخيرة حرمتو المراة من كلش مش هكا خاوتي بزاف
و زيد البنات ماكالاه تتضاهرو بالكمال الكمال لربي سبحانو و هدا الواقع لي عايشتو المرأة هادي صعيب و مايتحملش بالعقل عليكم حطو رواحكم بلاصتها والله عيب عليكم

بالنسبة لصاحبة الموضوع ،، إخوة زوجك متزوجين ؟؟ إذا متزوجين كاش نهارة قولي لراجلك و روحو سهرو عندهم وكررو الامر مرتين او ثلاثة خليهم يحسو بواش تحسي
و تاني مرة على مرة قول لزوجك يقولهم راني مسافر مع مرتي لازم تديري اي حل باش تخصصي وقت لراجلك و تكوني معاه براحتكم
في أمان الله

[couscousa]

عندك،ماية حق الله يكون في العون ما يحس بالجمرة غي لي كواتو من المفروض هوما يفهمو ارواحمهم و حدهم الواحد يحب يريح في دارو في الليل مع اولادو اسمحيلي هادو اذا يجو كل يوم عندك،في الليل من عندي ما يحشموش رانا مع صلة الرحم لنكن في حدود الاحترام،و عدم المساس بخصوصية الغير الحشمة مليحة اختي الله يعينك،عل هاد القوم السامط يخي عباد ياخي ياو الليل يا خاوتي فهمو ارواحكم .....اتمسك بالحجاب و وكلي امرك لله انا ننصحك انت و اولادك و راجلك تولي تروحي عندهم و تقعدي حت لليل باش يحسو بيك ديريها و ردينا اخبر الله يكون في عونك فعلا ان لم تستح فافعل ما شيت.

[جَمِيلَة]

http://up99.com/upfiles/png_files/WGP15144.png
السلام عليكم ورحمة الله وبركاته
مرحبا أختي لا أدري إن كنت أهلا لتقديم النصح
لكن مشكلتك أجبرتني على الرد
قرأتها عدة مرات وفي كل مرة أخلص لنفس النتيجة حل مشكلتك بيد الله وحده لأنك استنفدت اجتهاداتك
إخوة زوجك ليسوا من محارمك ومن الخطر التعامل معهم هكذا بصفة مستمرة وبلا حواجز
يقول رسول الله صلى الله عليك وسلم: "الحمو الموت"
هذا أمر لا يجب التهاون به على الإطلاق
أمر آخر البيوت لها حرماتها وخصوصياتها وأسرارها
وأسرتك تحتاج الاستقرار من أجلكما ومن أجل أبنائكما
حتى الأطفال ولديهم أوقات لا يجوز لهم فيها الدخول
على والديهم فما بالكم ببقية أفراد العائلة
يمكننا تلخيص العقبات:
من ناحية زوجك لا يمكنه أن يخبرهم بعدم الإياب متى ما أرادوا فهم إخوته ولا يريد خسارتهم.
ومن ناحية أخرى أنت لا يمكنك أن تخبريهم أنت بذلك
لأن الأمر سيثير الفرقة في العائلة وستخسرين أبناءك أعمامهم وربما تخسرين زوجك لأنه يرفض هذا.
لهذا أخبرك بأن لا ملجأ لك من هذا غير الله ادع الله واستخيري واستغفري وصل صلاة الحاجة وارضي بما سيكتبه الله لك
ولا تستعجلي الفرج والاستجابة انت صبرتي ولن يخيبك الله عز وجل
-على ذكر نزع الخمار لا تساومي بدينك أختي لأجل أمر دنيوي كل حاجة في بلاصتها كيف تلقين المولى عز وجل بعد هتك الستر-
سبحانك اللهم وبحمدك أشهد أن لا إله إلا أنت
أستغفرك وأتوب إليك
بالتوفيق أختي
http://up99.com/upfiles/png_files/WGP15144.png

[صُبح الأندلس]

ما هذه المثاليات الزائفة
الأخت معها كل الحق
من حقها أن تكون على راحتها و اذا كان أخوته متعلقون به فما أكثر المقاهي أو يذهب هو عندهم

[أم أماني أريج]

عندك كل الحق تتقلقي من هذا الوضع أختي من حقك تعيشي أجواء عائلية و لحظات جميلة مع عائلتك الصغيرة بدون إزعاج ........يعني صح هذو إخوة زوجك و قراب منو لكن لكل شيئ حدود و للبيت حرمة لا يجب التعدي عليها و لادخل لصلة الرحم و لا للترحيب بالضيوف علاقة بالموضوع .
الحل كيما قالوا بعض الأخوات يعني الإلتجاء إلى الله بالدرجة الأولى ثم تبينيلهم بطريقة أو بأخرى أن الوضع غير مريح بالنسبة ليك بدون ما يحس زوجك باش ما يديرلكش مشاكل هكذا ممكن يفهموا رواحهم .
ربي يفرج عليك أختي .

[Lydia istanboul]

ياخاه غاظتني الردود الزائفة كتر من المشكل نفسو.عيب عليكم لمرى يجوها كل يوم حتى الليل لا هم محارمها لا هم والدي الزوج.امراض وعقد حسبنا الله ونعم الوكيل.كاين ناس بزاف هكا يا اختي الله غالب والظاهر البعض منهم راهم عنا تان لا يحترمة لا خصوصية و لا راحة الشخص في بيته.

[nihal159]

نصيحتي ليك أختي؛ أتفاهمي مع زوجك؛ يقوللهم كل يوم السهرة عند واحد من الإخوة في دارو؛ باش هكذا يخف عليك الضغط شوية يعني يعودو يسهرو عندك مرة أو مرتين فالأسبوع على أقصى تقدير.