تزوجت و ندمت

[مشكلتي]

عروسة حزيينة
نعم انا هي .......تزوجت هادي مدة خمسة اشهر يدعي زوجي انني كنت حلم بالنسية ليه بحكم اني كنت جميلة و كان يسمع ان الكثير خطبوني يفوقونه حسبا و نسبا و جمالا لكني انا خدعت لاني اخترته على دينه و اخلاقه لكن مع الاسف ماكانت ايلا مظاهر في اولى ايام الخطبة وعدني بالكثير مع اني فقتلو بلي عصبي و مزاجي شحال بكاني غير في فترة الخطوبة علابالي تلوموني تقولولي كنتي تم تبطلي لكن ماكان باليد حيلة لانو كان دايما يجي يطلب السماح و زيد دارنا يوري قدامهم على انه ملاك نازل من السماء حتى و نقولهم يكذبوني حبوووه بزاف خاصة الوالد تاعي تزوجنا حتى ايام العرس كان يعيط عيا و دارلي مشاكل و انا عروسة بكاني بعد العرس ما نحكيلكمش البخل و العياط نقولو نحتاج حاجات نشريهم ما نخرج ما نشوف اقاربي من غير اسرتي فقط سسسسجن و خلاص ايلا مدلي خمس دقائق ملاح نبقى خايفة وقتاش يدور عليا حتى عايلتو ناعنديش واش نقولهم امامهم حتى راسي يسلم عليه اما وحدنا على اتفه الاسباب يعيط عليا في اولى ايام زواجنا لجيران يضالو يسمعو في العياط قتلو واش يقولو العيب يديروه فيا راني عروسة في ايامي الاولى كنت نخافو مانجاوبش نبكي و نولي وحدي نسكت مي دوك خلاااص ماقدرتش قتلو انت منافق ماتتصوروش شحال هزاتو هاد الكلمة بكا بكاء الاطفال قتلو امام عايلتك و عايلتي تبين روحك ملاك و وحدنا ديرلي هكدا صح لاحظت تغير فيه منبعد رجع يعاملني باحسن معاملة لكن سرعان مايرجع على واش كان و المشكل راني حامل ماعلابالوش قع بمشاعري يبكيني و يخليني وحدي صح نغيضو نفيقلو لكن ما يبينش ماننكرش بلاك انا ثاني فيا ديفوات لكن عمري مااذيتو طلباتي كلها حبيت نخرج نشري قالي لالا معليش بلاك راني غالطة ماشي لازم نخرج اشريلي انت لالا يشريلي الحاجة الرخيسة قع ويلا شرالي حاجة حبيتها نضحي ببزاف حوايج و خلي و خلي عاونوني واش نديييير

[مصطفى_س]

السلام عليكم و رحمة الله

زوجك لا يصرخ في وجهك امام العائلة هذا شيء جيد
زوجك يشتري لك اشياء و تقولين انها رخيصة فالحمد لله يشتري لم يمنعك
خروجك من البيت قصد الشراء هو تكفل بالامر فلم الخروج اذا ؟
ممكن في وقت عزوبيتك كنت تخرجين و لكن الان انت زوجة و لك بيت و زوج لا داعي للخروج الا للضرورة او احيانا للتنزه مع زوجك لا باس
الوعود التي وعد بها لم تذكري ولا وعد وعد به
عن قولك انك قلتي له انه منافق فهنا قد تكونين جرحته فأنصحك ان تتحاوري معه و ان تجلسي معه و تذكرينه بايام الخطوبة من وعود و لم لم يتم تحقيقها هل هناك مانع لذلك قد يكون له عذر او اعذار قد يكون يفكر بطريقة اخرى لمصلحتكما من سكن خاص مثلا من سيارة ،انتبهي انه زوجك و بدلا من كثرت الطلبات عليه فكري في قليلا من العطاء

تريثي و تحاوري معه لعلكما تخرجان بنتيجة لصالحكما بالاخص مر على زواجكما خمسة اشهر و انتما في البداية
اسال الله ان يجمع شملكما و يقوي الود بينكما

[زبدة ذايبة]

[b]ماتزيديش تبكي

هذ البكا هو اللي جابلك المشاكل

رايحين يزعفوا عليا الرجال اللي في المنتدى

لكن

كاين نوع من الرجال مايقدرش يعيش مع المرأة غير ولا ضرباتوا

ونظن راجلك من هذا النوع

الله غالب طحتي في واحد منافق مايسواش

ماتزيديش تبكي خلاص

عندك مشكلة حليها معاه راس براس

وش غير الخير

تزوجتي تتهناي ولا كل يوم المشاكل

هاوليك زيريه

كاين رجال مايتحملوش المسؤولية

وللأسف شفت حالات كيما حالتك

من قوة اللي كانت تظل تبكي وتتنازل طلقها

هذي كانت نهايتها.

ردي بالك تضعفي ، ولا تتنازلي

الحمد لله رب العالمين

مادارش فيك مزية على جال كي تزوجتيه

هو تقدم للزواج وانت وافقتي

ماتذليش روحك خلاص !!!!!!!!!!!!!

يجيبلك الحاجة الرخيصة من الحانوت هذا ماشي راجل

ممكن الإنسان يقدر الظرف ويتنازل لما يكون الوضع المادي حساس

لكن

يشد عليك لو كان تولي تاكلي معاه هذي كارثة

اوقفي على رجليك وواجهيه وناقشيه

وحتى ولا راه يعيط وكذا

اعرفي بأنه ضعيف من الداخل

راه خايف خوف شديد ماراهش عارف يتصرف

اعرفي كيفاش تسيري حياتك برك

وبطلي من البكا يرحم والديك

كاين أنواع من الرجال يستمتع كي يشوف المرأة تبكي

كاين اللي يحزن ويلوم نفسه

كاين اللي يتقلق ويزيد عليك وممكن حتى يضرب

ناقشيه وماتسكتيلوش على حقك اللي عطاهولك رب العالمين من فوق سبع سماوات

الطلاق ما نظنش يطلقك هو يخدم على الصورة الخارجية أكثر من الداخل
/b]

[MiSsoU23]

من رأيي يا أختي اصبري عليه شوية و ما تكبريش الحكايات في راسك و تقعدي تدمري في روحك
في فترة الحمل كاين ياسر نسا يكرهو أزواجهم و يفركتولهم على كل غلطة باه تكون حجة عليهم راكي تعرفي التغيرات الهرمونية وتأثيرها على مزاج المرأة
أنصحك أن تريحي بالك و تخلي الحمل تيعك يمر بسلام و من بعد عاودي فكري في حياتك وأظن أنك ان شاء الله حينها ستضحكين على ما تفكرين به الآن

[نورالهدى**]

يا اختي زبدة داااااااااااااااااااااااااايبة يرحم والديك ماتزيديش تحاولي تحلي مشاكل الاعضاء

نصائحك رتهي كارثية كي واحد بنيتو مسكين وياخد برايك غادي يروح فيهاااا

كيفاش تقولي على الراجل مايسواش ؟ تعرفيه من فاميلتك هو

يخي قريتي علم النفس وعلى بالك بللي المشكلة لها طرفين

انتي تسمعي لطرف واحد وتبداي تحكمي هكدا قراوك ؟

ربي يهديك


اختي صاحبة المشكلة

زوجك راهو انسان ماهوش رسول

يعني اصبري عليه باش توالفي عليه

راهو بالمقارنة مع شي ناس مليح بزاف احمدي ربي

قصية وقت فقط

[ريان 7]

اسمعي ما تسمعيش للكلام تاع اصبري راه راجللك وساترك و بلا بلا بلا
راكي انسانة حرررة عشتي في دار باباك معززة مكرمة ماش باش يجي انتهازي و منافق كيفو يكرهلك حياتك
مافهمتش علاه المرأة الجزايرية يكبروها على الخوف من الراجل والطاعة العمياء (معليش اسيدي نقبلوها كي يكون الراجل يصلح بصح في حالتك لالا)

لازم تفهميه بلي راكي انسانة عندك حقوق وعندك حريات وعندك شخصية
وحكاية البكا و السكوت غير انسايهم

يقلقك بكلمة رديلو بعشرة من الشرع و القانون
مايكلحك ما يتمزا عليك راكم متساويين قدقد كيفك كيفو
دافعي على روحك و على حقك واهدري مع ماليك يجيبلوك حقك اذا نتي مقدرتيش

يدللك ويعززك و يشريلك الغالي والمخير ذراع عليه مشي بمزيتو .يحمد ربي لي راكي صابرة وحاملاتو معندو وين يزيد.
ماتخافي يطلقك ماتخافي يحاوزك انتي مشيتي معاه قدد ودرتي واجباتك كماينبغي معندكش علاه تخافي
عجبو الحال عجبو معجبوش ينطح راسو في اقرب سطح صلب
أهم حاجة تجيبي حقك جيييبيه

[مصطفى_س]

للتذكير و لا تتسرعوا في تقديم النصيحة
http://www.djelfa.info/vb/showthread.php?t=1860150

[.kiki]

السلام عليكم
مبروك حملك اختي الكريمة و ربي يتمملك على خير و عافية ان شاء الله
أختي انا لست هنا لأقول اصبري او لا تصبري لأن المشاكل الزوجية امر خاص جدا و لا يمكن لاحد الفصل فيه افضل من الزوجين نفسهم، واحد ما يعرف كيفاش راكم عايشين صح باه يقدر يحكم
أنا هنا فقط لأروي لك قصة حدثت مع أنسانة اعرفها حق المعرفة و هي كالتالي
خطبها واحد سلفي و فقير فقبلت لانها تبحث على الدين و الاخلاق و كانت مدللة عند دارهم و باباها بصح ميهمهاش المستوى المادي إطلاقا
فترة حطوبتها عدات كارثة، مقدرتش تحس بحتى حاجة تجاهو كونه عصبي للغاية و غيرته تحاصرها من كل مكان كانت على وشك الفسخ لكنها كملت لأنها دارت استخارة و ارتاحت
في الأيام الأولى من حياتها الزوجية قاتلي ديما نبكي و في كل صلاة تدعي ربي يفرج عليها و يقرب قلوبهم من بعض و يرزقهم السكينة
والله يا اختي قاتلي معداش شهر عدت نشوف فيه هو المخير فالرجال
لكنها كانت فحلة و مابكاتش قدامو
العكس
كانت معاه كيما يحب هو
و ضرك راهم عندهم الأولاد و عايشين لاباس عليهم

أختي نفكرك تاني بلي العام الأول هو أصعب عام يصراو فيه المشاكل بزاف و لازم الواحد يتعلم من اخطاؤه و يحاول يفهم الطرف الثاني وش يحب وش مايحبش باش متتكررش المشاكل بزاف

ربي يوفقكم في حياتكم و يرزقكم السكينة والسعادة في الدارين

[محمد جديدي التبسي]

زوجك مثل كثير من الرجل شخص عادي لديه مزايا وعيوب
العصبية والعياط عند 90 بالمئة من رجال الجزائر
فيما يخص صلة الرحم راك تزوري بيت والديك فيها بركة
بيوت الاعمام والخالات ليست ضرورية خاصة اذا فيها شباب
فيما يخص النفقة لا نعرف امكانات زوجك المهم يوفرلك الضرورات
وبقدر دعائك صبرك وعطائك ستتحسن حياتك
فحسب كلامك زوجك فيه خير ويرجع يعتذرلك لكن ما لازمش تعيشي حياتك خايفة منو
هذه ليست حياة
انت عشت خمس اشهر وتحكي عن معاناة وكانها خمس سنوات؟؟
بالعقل على روحك وشوفي لايجابيات زوجك واصبري هذه هي الحياة
الحمد لله ان زوجك لا يضربك وموفرلك الانترنت ولا يمنعك من زيارة أهلك.
تشوفي قصص غيرك من الزوجات يحبس راسك كاين اللي تضربت في اول اسبوع زواج وترقد بطريحة وتنوض بطريحة مع زوج خائن ووو نحي عليك حكاية عروسة والدلال هذا لا يليق بك.....ربي يفتح عليك

[عثمان الجزائري.]

و الله يا أختي ما أعجبني فيك أنك وصفت زوجك و ذكرت لنا أوجه عديدة تبين أنه رجل طيب، زوجك إنسان رائع صدقيني هو فقط سريع الغضب و يشبهني كثيرا، المشاكل التي ينفعل منها لم تذكيريها لكن أنصحك بأن تحافظي على زوجك و زواجك و أبحثي عن سعادتك في قلب زوجك، 5 أشهر تعتبر لا شيئ خصوصا إذا كان الزواج تقليدي سوف تنسجمون مع مرور الوقت و ستتغلبين عليه فقلبه يبدو لي حنين بزاف...ربي يهنيك و مبروك عليك الحمل ربي يرزقك و لد صالح

[أم عبد الله السلفية]

سبحان الله لماذا ذهبتم الى النفاق الله المستعان كأنكم تعلمون ما في قلبه

أقول لصاحبة الموضوع هذا النوع المشاكل يحصل في السنة الأولى من الزواج و من منا لم يتعرض للمشكال في السنوات الأولى و نبكي و نندم.............الأمر عادي جدا ..........ابحثي في نفسك لربما العيب فيك..........نحن النساء دائما نتسرع و نرى بأننا على صواب دائما و بعد التفكير العميق نكتشف كم نحن مخطئات في حق أزواجنا...........ربي يفرج عليكم و حاولي تفرحي بمولودك..........أنا و زوجي لم نرزق بعد أرجوا أن تتذكريني بالدعاء.

ربي يرضي علينا أزواجنا و والدينا

[أم عبد الله السلفية]

الرد على الأخت ريان 7 هذا يسموه التخبيب

ربي يهديك هل إطلعت على ما في قلبه

[hodayena]

ابحثي من اين او ماهيا اسباب ازدواجيه شخصيته وحاولي تعرفي وقتاش تطرحي انشغالاتك يعني متى تطلبي منو اشياء اعرفي الوقت المناسب

[حمزه أبو مريم]

والله ما على مثل بعض الردود تبنى البيوت وما هكذا صفات المرأة الصالحة التي تجعل الرجل ولو كان أخرقا في هواها يموت ، بل هي صفات السَوْءة السوْءاء السليطة ، الصخّابة الوثّابة التي أراح الله منها بعلها ولا متّع بها أهلها ..
وليضرب أصحابها بردّي إن شاؤوا عرض الحائط ولكن عليك بقول ونصح العلماء الربّانيين في الحياة الزوجية ما لها وما عليها وكذلك الرجل هو أيضا عليه واجبات وله حقوق وحقّ الرجل على زوجه عظيم كما لا أظنه يخفى لدرجة قوله عليه الصلاة والسلام لو كنت آمرا أحدا أن يسجد لأحد لأمرت المرأة أن تسجد لزوجها .. الحديث . أو كما قال عليه السلام ، وبالمقابل قوله أيضا عليه الصلاة والسلام خيركم خيركم لأهله وأنا خيركم لأهلي . الحديث . ، فالحياة فيها بذل من الطرفين لتستمرّ فليست المرأة ملاكا ولا الرجل كذلك فما يسوغ فيه الصبر لابدّ من الصبر أمّا إذا كان هناك ما لا يطاق فمصير العلاقة إلى طلاق لا قدّر الله ..
وفق الله صاحبة المشكلة لما يحبّه ويرضاه وأصلح زوجها

[sohaibdz]

مدة 5 اشهر مازالت غير كافية لتعود كل منكما على الاخر .

مارانيش نقولك اتعودي على المشاكل تاعو و البخل ووو لازم نتي تنقصي من روحك شوية و هو تاني كيما يلقاك تبدلي معاه للاحسن يعدل روحو

والحاجة اللي ننصحك بيها ديرا حاجة مفيدة في وقت فراغك مثلا احفظي القران ولا اذا كان يسمحلك اقراي احكام الترتيل في المسجد باش تخرجي من هذا الجو اللي راكي فيه و تقدري تنظمي حياتك

وماتسمعيش لي يقولولك اضربيه و رديلو الهدرة و معلاباليش واش باش تجيبي حقك صدقيني كون ديري بالنصائح الهدامة تعهم تلقاي روحك في داركم
و بالتوفيق

[sarl02]

ما ذكرته يدل على ان زوجك انسان طيب وقلبه ابيض وحنون ...وهذه هي عادة صفات الرجل النفعالي سريع الغضب وهذا حكمة من عند الخالق...هناك من الرجال من لا ينفعل ولا يبين لك حتى اسباب غضبه لكنه يهجرك في الفراش لايام وايام ولا يكلمك لا صباحا ولا مساءا ..هل تتحملين العيش مع هذا ؟؟...بالنسبة لشراء اشياء رخيسة لم تذكري لنا مستواه المادي ممكن ما عندوش وقدو قد حالو....صراحة ا يوجد ما يدعو للقلق في حالتك اطلاقا وانت تضخمين الامور .

[first first]

والله يااختي وعلى حسب موضوعك ...................زوجك انسان عصبي وانسان ليس كامل كيفنا كامل ........ فالكمال لله ........الحل لازم تلقاو بروتوكول تعامل ولغة تفاهم بيناتكم ويتحل المشكل باذن الله

نحي فكرة انك اخطات الاختيار وتاكدي انك باذن الله وبفضل من الله اخترت افضلهم ...............وماكانش تقريبا لي ماقالتش ندمت من الزواج به عند كل ذائقة وكل ضغط .............ماتكبريهاش وحاولي اخد الامور ببساطة

ربما انت حساسة وهو عصبي ومعياط ولكن في كلاكما خير

ربي يسعدك ويالف بينكما

[amira19]

استغرب لبعض الردود العنيفة لبعض الاعضاء اتقوا الله في انفسكم
كون توخد رايكم اي مراة زوجها عصبي و بخيل كون وحدة
ماهي مزوجة حاليا
ميش هكا تتحل المشاكل هدا زواج ميش لعبة
و نقول لصاحبة المشكلة نبشرك بلي زوجك رجل حنون و قلبه مليح فقط ماعندوش خبرة في التعامل معاك و مازال خايف منك و حاب يفرض سيطرته عليك لانه مشبع بافكار تاع برا لي يحثوه انه المرا لازم تشبحها وتوريلها العين الحمرا ...الخ الخ الخ
انتي فقط المطلوب فقط
بينيلو بلي راكي مرا و نص مع الوقت راح تكسبي ثقته و راح يتبدل للاحسن باذن الله
كاينة حاجة ماتزيديش تبكي توالو كي يعيط عليك احكميها ف قلبك و ما ترجعيله حتى كلمة و خليه راح يهدى و يجيك وحده لانه زوجك من النوع لي ما يحبش المرا لي ديما تبكي و هدا باين من كلامك
كي تكونو متصالحين و سمن على عسل صارحيه بالحوايج لي غايضينك بكل هدوء و احترام صدقيني راح يوخدهم بعين الاعتبار و كملي احكي ف موضوع اخر عادي ما تنسايش بلي راهو دكي جدا
مايخليكش تروحي عادي جدا انا اربع سنين زواج ما خلانيش نروح لعراس فاميلتي من غير دارنا وعلابالي لانه يغير عليا من الشباب فقط
مع الوقت ربما يتبدل ولا ما تبدلش المهم لهنا مع زوجك هو لي يدوملك وهو جنتك و نارك
البخل الله غالب التقشف داير حالة هههههه راكي عروسة و حوايجك جدد ما تضاليش تفسدي ف الدراهم على الاقل العام الاول ما تشريش و تغاضاي على سلبياته باه تقدري تعيشي معاه
ما تنسايش بلي راكي حامل و حساسة جدا اصبري تنالي و كي يكون مريقل قولو راني حامل ساعفني راهم الرجال ما يفهموش النسا
خودي رايي اختي و اصبري العام الاول ديما صعيب هدا وين تكتشفو في بعضاكم و ربي يجيب الخير

[الصحة النفسية]

السلام عليكم و رحمة الله و بركاته ؛

أتعلمين أختِ الفاضلة أن المرأة الذكية و الفطنة تميل للإرتباط بالرجل العصبي ، المزاجي ، المتقلب ، سريع الإنفعال ، و هذا معروف عندنا في علم النفس ، أتعلمين لما ؟ لأنه أشبه بالكتاب المفتوح ، يسهل قراءته ، و التعرف على محتواه دون عناء أو مشقة ، كما نقول بالعامية ، لي في قلبو على لسانو ، الرجل العصبي وفي ، غير مخادع ، ذو قلب طيب و دافىء ، يخفي طيبة القلب وبياضه خلف تصرفاته الحادة ، لا يتعمد جرح مشاعر الآخرين أو إيذائهم ، بل هو مسلوب الإرادة أثناء الغضب ، لا يتحكم في أعصابه ،قد يكون فاقد الثقة في النفس ، فاقد للأمان ، لأسباب قد تعود لتنشئته الأولى ، أتعلمين كذلك أنه كلما ازدادت رقة القلب و عاطفيته خاصة عند الرجال إزدادت معها درجات العصبية ، إنها أشبه بحيلة دفاعية لإخفاء مشاعر تأبى الظهور ، تمهلي أختِ و أنظري للجانب الإيجابي لزوجك ،فقط حاولي فهمه ، فهذا نمط شخصيته ، فهو سريع الرضا ، سريع التأثر ، بدمعة واحدة منكِ تستطيعن الإطاحة به ، فتخيلي لو كان زوجك هادىء الطباع ، غامض ، كتوم ، بارد المشاعر ، فكيف ستتصرفين حيال ذلك ، فلا يمكنك فهمه و لو بشق الأنفس ، أختِ أنصحكِ بالصبر و التريث ، و محاولة التعامل معه بهدوء ، حاولي التعرف على مفاتيح شخصيته فهي سهلة الظهور ، صعبة الإخفاء ، حاولي إرشاده لحلول لمعالجة العصبية عنده ، و أفضلها التقرب من الله سبحانه ، بكثرة الذكر ، فلا أفضل من ذكر الله و الصلاة ومداومة الإستغفار عند كل شدة أو غضب ، لقد كتبت هنا رداً لأخت فاضلة عن التعامل مع الزوج العصبي ، لم أشأ أن أعيد ما كتبت ، تستطيعين الإطلاع عليه لو أردتِ ، حافظي على صحتك و حافظي على زوجكِ ، تستطيعن تغييره للأحسن ، فقط كوني حكيمة ، كوني واثقة بالله ثم بقدراتك ، حفظكِ الله من كل سوء و أدام عليكِ الصحة و العافية ..

[النجمة القطبية]

يا اختي صلي على النبي
اولا راكي في خمس اشهر برك علاه عليك هدا كامل راكي عروسة حاولي تعيشي حياتك الراجل انتى تبدليه كي تكون عقليتك شابة وتكونى رزينة
بالنسبة للعياط لازم تتقبلي انو كل انسان عندو عيوب وايجابيات تقبلي العيوب وتعودي تتعاملي معاها ما تبكي ما تقنطي حاولي تحوسي على الاسباب اللي تخلي راجلك عصبي ومقلق بالاك لانك حسستيه انو ناس بزاف خير منو خطبوك بالاك بدون قصد جرحتيه
بالنسبة للبخل متقدريش تحكمي على الراجل في فترة خمس اشهر وراه خارج من عرس ومصاريف الله اعلم بحاله ادا عندو ديون ام لا الفترة ليست كافية للحكم ابدااا
اما الخروج انتى شخصيا وصفتى نفسك بالجمال وعروسة جديدة والراجل غيار كيفاه تتخيلي يخليك تخرجي تشري
لكن بالمقابل يظهرلي زوجك فيه صفات حسنة منها احترامه لاهلك لدرجة انهم حبوه
وحبه لك حتى لو معتدرش راكي تحسي
ورغم انك قلتيلوا انه منافق معطاكش طريحة بالعكس بكيتي الراجل وهدا دليل انو لم يتوقع منك هدا الكلام وفاجاتيه ولو كان صح منافق راح يكون رد فعلوا مختلف
يا اختى فكرى مليح الحياة نعيشوها مرة وحدة وهدا زوجك وشريك حياتك وماشي كل يوم راح تتزوجي وزيد راكي حامل
فكري صديقتي انت فتاة شابة وجميلة بشوية دكاء تقدري ترديه كيما تحبي واكثر بشرط تتقبليه كما هو وتشوفي فيه جانبه المشرق وتدخلي لقلبوا من الباب الواسع ورديلي خبر
ماشي تفشلي امام اول اختبار راكي في بداية الحياة
خمس اشهر ليست دليل على شئ ومنقدروش نحكمو
ادا كنتى صح حابة تعيشي سعيدة ازرعي الخير باه تحصدي وخاصة انو زوجك يظهر فيه البدرة الطيبة
وربي معاك ويوفقك

[حنين حنين 8]

اصلح الله حالك. لا تتسرعي
ربي يعطيكم الصلح الدائم