الرجاء توجيهي و هل أخطأت في شيء؟

[مشكلتي]

السلام عليكم..انا حبيت نستشيركم في حاجه و اذا شفتو الشيطان دخل في راسي وجهوني...في هاد الزمان ولينا صح منعرفوش ما بين الصح و الغالط...
كاين زوجة اخ زوجي تكرهني و كانت سبب في اكبر مشاكل شوهت بها سمعتي في دار زوجي و لكن فات الزمان و الوقت محا كلش من قلبي....سامحتها...بصح نحسها متكبرة عليا...مالغري انا متواضعة جدا و سباقة للخير...انا كي كنت حامل جامي سمعت مبروك من عندها...و زيدت بالعملية و مدخلتش عليا و مهناتليش...و في فترة ولادتي كانت تعمل اشياء منكر كانها تسمع بالتلفزيون بطريقة هيستيرية غير باه تنوضلي البي بي...ولكن عجوزتي حبستها...يعني انسان شر بحت...المهم انا نسيت و الان راهي حامل...و مقاتليش غير انا والكل سمع...كي سمعت مالغري روطار..والله غاضتني..يعني حامل و سمعت انها قالت تشهات الماكله من عند وحدوخر و لكن قالت هي مادارتش الخير في الناس...قلت مادام استعرفت بالاك تبدلت...جريت في هاديك الدقيقه لي سمعت فيها ديتلها من عشايا...كي باركتلها و قتلها هادا وين سمعت....تحسبو حشمت كي تلاقيتها الف مره و ماقاتليش؟ ولا فرحت كي سبقتها بالخير لي مادارتليش منو غرام؟ لا....عاتبتني....قاتلي كيفاش نضلي نتقيا و العياط و تقولي مسمعتيش؟؟!!! ضربني و بكى سبقني و اشتكي...حرت...و حسيتها مقبلتنيش كي رحتلها و مام با ماقاتليش اقعدي...تشوف ليا بتكبر...منكذبش عليكم..ماندمتش كي ديتلها الماكله على الاقل ياكلو البي بي لي في كرشها يستاهلو بالاك ربي يتقبل مني...بصح كرهت..حسيت روحي مرخسا عمري..مطيحا بروحي...مانيش دايره قيمه لروحي...خسرتلي نيتي...و قلت نحبس خلاص...واش رايكم؟ يعني هادي راني نشكملها..هاكدا حسيتها دايره في بالها؟ ارجوكم فسرولي تسرفي..مالغري يقتلوني يرخسوني بصح غير نحس واحد محتاجي نجري ليه...حاجه تجبدني و ننسالهم كلش؟؟؟ واش انا مريضه؟ بهلوله؟ غير قولولي والله فسرولي و قولولي بالاك راني غالطه...كيفاش نتعامل معاها و كيفاش نجيب مواعني؟ كرهتها

[زبدة ذايبة]

راك غالطة على طوووووووووووووووووووووول الخط

الإنسان يشتكي من شخص يكون يحبوا ويحمل في قلبوا ليه المشاعر

اللي توجعنا بزاف من الناس اللي نحبوهم واللي عندهم احترام وتقدير في أنفسنا

لكن إنسان عارفة بلي يكرهك، ويحسدك ويغير منك و.........


علاه تتأثري ؟؟؟؟؟

ماتهمكش لامن قريب ولا من بعيد

وهذ المشاعر الزايدة اللي راكي توزعي فيها عليها ماراكيش مجبرة عليها

حتى رب العالمين مايحاسبكش عليها

المعاملة بالمعروف

صباح الخير ياجاري انت في دارك وانا في داري

وعلاش هذا التخلاط اللي ماعندو حتى معنى ؟؟؟؟؟؟

وعلاش هذ العاطفة الزايدة ؟؟؟؟؟؟؟؟

كان عندك معاها مواقف قديمة كنتي قادرة تحطي النقاط عالحروف وتجبدي روحك

انتي قد ما أذاتك نسيتي وعاودتي وليتي ليها

دروس الحياة نتعلموا منها وناخذو حذرنا

انتي دارتلك ضربة وزدتي عاودتي وليتي كيما كنتي من قبل

ماتخلطيش !!!!!!!!!!!!!!!!!!

ماراناش في عهد الصحابة

أحسن حل ليك تعامليها بالمعروف


ديري واجبك معاها وانتهى

ماتستنايش منها الإحسان والوقفة معاك

ماتزيديش تشتكي منها

نحيها من راسك تريحي

والمواعن تاوعك جيبيهم عن طريق عجوزتك طبعا قوليلها قبل وإذا مارجعتهمش قولي لعجوزتك تجيبهملك من عندها

وريحي من التخلاط اللي يجيبلك المشاكل. ديري واجبك فقط


وريحي من التوقعات ومن الانتظار أي شيء حسن أو إيجابي منها

إذا صلحها ربي وتسقمت كان بها

وإلا ماتحوسيش عليها خلاص ونحيها من راسك

[ريان 7]

ضك هي ماشي مقيماتك وماشي معبراتك نتي علاه معمرة راسك بيها , ديري كيفها اسيدي .

الخطأ تاعك نتي مقيمتها بزاف هي ماشي شايفاتك كامل ونتي توكلي فيها و تحوسي عليها , ديري قيمة لروحك .

واكبروا شوي على حكايات حامل مقالتليش ومنقولهاش ونخبي و وطاطاطي وبطاطي .

اقفلي بابك والتاي بدارك تربح

[غربة أهل السنّة]

السلام عليكم ورحمة الله وبركاته
يؤسفني أن أخبركِ أنكِ مخطئة لمّا سمحتِ لنفسكِ بالخوض في مثل هذه الحكايات التّافهة (أعتذر منكِ)
حاولي أن تتأقلمي مع كل أنواع النّاس في عائلتكم، واتركي دائما حيّز الإحترام واسع
ليس بالضّرورة أن تنتظري تهاني النّاس في المناسبات أو مد يد العون لكِ عند حاجتكِ إليهم
باختصار تعلّمي أن تتعاملي مع النّاس بأخلاقك أنتِ، وما تبقايش تقولي فلانة مادارتليش وأنا درتلها
أتركي كل شيء للخالق
والله يا أختي هذا النّوع من المشاكل مهما بدا صغيرا لكنّه يؤثر على العلاقات ويخليك دائما مهمومة
وفوق كلّ هذا ستسقطين في فخ الثرثرة ومن ثمّ الغيبة والقيل والقال
وستظهرين في صورة امرأة سطحية جدّا
اهتمّي ببيتك وزوجكِ وأولادكِ،، والأهمّ من هذا علاقتك مع الله اجعليها متينة
أمّا النّاس فلا يضرونك بشيء صدّقيني
وفقكِ الله

[#قطوفها دانية#]

متعمريش راسك بيها اكي زايدتلها في قمتها مزيدي تروحي ليها ما تدي طعلمك اجبدي روحك منها تولي هي تحللك اي اقطعي صلتك بها انتي تاني عندك كرامه او اخطيها وشوفي كيفاش ترجع تحلل