ساعدوني بافكاركم

[يسرى ياسين]

السلام عليكم
انا ربة بيت و اريد القيام بمشروعى الخاص مراهوش عندى أفكار
عندى شقة فارغة رانى حابة تكون محل ممارسة هاد النشاط
كنت حابة نفتح جمعية للأطفال لكن معنديش أي فكرة و ين نتوجه
و من غير هاد المشروع واش الحاجة إلى تقترحوها عليا و يكون رأس مالها معقول و تناسب المراة

[eudzi900]

مشروع حلويات تقليدية

[يسرى ياسين]

بارك الله فيك اخى و لكن المشكلة انى ما شى صاحبة صنعة هادى

[يسرى ياسين]

واش رأيكم فى مدرسة للدروس الخصوصية خاصة إذا كانت الشقة متوفرة على 4 غرف

[muhibbat rrasoul sws]

السلام عليكم و رحمة الله و بركاته

مدرسة خاصة فيها جري أو معاااارف بزاف و صحاح تقريبا لكل خطوة.

اقتراحي : الكراء.

على حساب وين جاية الشقة

مثلا في العاصمة، حي محترم و ماشي بعيد على المواصلات (10د) و لا عن الحوانيت ... كانت الغرفة بمليون ( على ما أذكر، ممكن أكثر) و اذا الوحدة حبت تتقاسم تكون سبعميا للوحدة يعني غرفة وحدة تقدر تجيبلك مليون و ربعميا، الكهرباء عليهم بصح الأسرّة و المطارح و الفرن عليك، الغرف كلها للكراء بما فيها الصالة.

اكريها للطالبات الجامعيات، طبيبات في التخصص أو دكتوراه، المشاكل معاهم أقل ( رأسهم في القراية أكثر من حاجة اخرى)

اعمليلهم قوانين و عسي مرة على مرة، اقصى أوقت الدخيل و الخروج، ممنوع الرجال يوصلوهم ....

و الله أحسن مشروع بأقل تعب للماكثة في البيت، و هو بداية جميلة تتوقفي وقت ما تحبي.

برك خودي منهن ضمان باش كاش ما يكسروا و الا يخسروا ( مثلا بنك مليح كسروه أو خلطوا الحيط بكأس حاجة خسروه، أو شعلت النار في المطبخ) ماشي انتي اللي تصرفي، خليها كرا شهر.

و خليهم يخلصوك مسبقا حاولي ثلاث أشهر لأنو راح يكونوا اللي يخرجوك قلبك
دائما ديري احتياطي تاع زبونات

المدخول ماشي كله ربح، خلي شوي للصيانة، أمر طبيعي، راه حمام انسدّ، أو ألما يدخل من السقف، باب ما تنغلقش...

الزبونات تلقايهم في النت.

نعرف هاد الشي لان احدى قريباتي كرات رغم أنها كانت وحيدة و مريضة و كانت تحكيلي مغامراتها.

برك الناس عدم المؤاخذة ما راحش يخلوك، و الله حسبوها بير دراهم المسكينة.

[يسرى ياسين]

بارك الله فيك اختى على الاقتراح بصح رانى حابة نخدم و فى نفس الوقت خدمة ال يكونو فيها ولادى قدام عينيا

[يسرى ياسين]

110 مشاهدات و ردود مكان. .......

[mrmilano1984]

الجمعيات فكرة مليحة بزاف وتدخلك الاموال طبعا كاين لي تحو مشاريع جمعيات وراهم لاباس بيهم الصراحة

[mrmilano1984]

اعملي جمعية مليحة بزاف المهم يكون عندك الافكار واللسان باش تجيبي الزبائن

[يسرى ياسين]

بارك الله فيك اخى رانى حابة نفتح روضة عن طريق جمعية هكدا ثبت النصائح فى المنتدى لانو فتح روضة فيه بزاف عراقيل
و لكن حتى روضة عن طريق جمعية معرفتش كيفاش تكون وين لازم نتوجه به نسبة واش هى الشروط بزاف اسءلة فى راسى ملقيتش إلى يجاوب عليها

[عاشق المسلمين]

السلام عليكم و رحمة الله و بركاته أختي في الله

بالنسبة لفتح روضة الملف يكون في مديرية التنظيم والشؤون العامة drag توجهي هناك و ستحصلين على الوثائق اللازمة و في خصوص العراقيل لا يوجد شيء في الجزائر إلا و فيه عراقيل لكن التوكل على الله و السعي ممكن توصلي المهم عدم الاستسلام
لكن للتنبيه فتح روضة لازم تكوني قد تحصلتي على شهادة مسبقا فلا يمكن لأي شخص فتح روضة ،،

أنا فكرتي هي أنك تقومي بكراء الشقة سواءا لمدرسين للدروس الخصوصية أو طبيب أو أي شيء و في نفس الوقت تحاولي التسجيل في مركز تكوين للحصول على شهادة تخول لك فتح روضة ثم تتوكلي على الله و تفتحي روضتك الخاصة.

[يسرى ياسين]

بارك الله فيكم

[edem]

ربي معاك ويرزفك الغنيمة من كل فج

[mrmilano1984]

افتحي جمعية وزدي سالي