ارجو المساعدة من لمسيليات [الأرشيف] - منتديات الجلفة لكل الجزائريين و العرب

مشاهدة النسخة كاملة : ارجو المساعدة من لمسيليات

Oum Mohamed123

2017-02-05, 20:42

السلام عليكم
كنت نحوس على وصفة الشخشوخة لمسيلية ومالقيتش اللي بغيتها
تجي مغلية وحارة وبدون خضر وماتجيش ناشفة
لقيت ام انس حطتها بدون شرح وانا حابة التفصيل الممل

sofiane2075

2017-02-05, 22:53

و غليكم السلام و رحمة الله و بركاته

هاد الرابط للاخت الفاضلة ام انس الله يجازيها مل خير و ترجع تنور المنتدى

http://www.djelfa.info/vb/showthread.php?t=1421415

benhbiless

2017-02-06, 14:12

بارك الله فيك

ام شمسو محمد

2017-02-06, 16:21

مرحبا أم محمد هاي شخشوختنا
نبداو بالعجين ...ديري دقيق مليح و شوية ملح و ادلكيها مليح حتان تولي رطبة و تطرطق ،ما تجريهاش بزاف ، ديري قرصات قد حبة المندرينة ادهنيهم بصباعك بالزيت و غطيهم بالبلاستيك و خليهم يرتاحو ...قد ما تنزل العجينة خير...حوالي عشر دقايق كحد أدنى
ديري الطاجين على نار هادية و قرّصي بخليط من الما و الزيت نص بنص ، طيبيها بحمورية حتى الحواشي ما تحرّقيش ما تخليش الكحولية ، فتتي مباشرة يعني شواطة تقرصيها و اخرى طيبيها و اخرى تفتيها .
ننتقلو للمرقة : ديري الجاج ( حواي 3فخاذ ) _ خير من اللحم _ ارحي راس بصلة كبيرة ( إذا كان ما عندكش ديري 4 من البصلة الخضرا ) ، 4-6 سنات ثوم ، مغرفة كبيرة فلفل احمر مطحون (حنا نديرو الفلفل حاااااااار )، 3 مغارف كبار طماطم مصبرة، ملح ،نص مغرف كسبر مرحي ...
ديري 2 مغارف زيت في لاكوكوت و زيديلهم المكونات السابقة خليه يتحمص حتى يدير الفقعات ( يتكتك )و مبعد زيدولو حبة طماطم مرحيةو فنجان ما و كمليلو التحماص و انتي تحركي و مبعد زيدي الما مرقي شوفي الشخشوخة المغلية تحب المرقة يعني اسرة مكونة من 6 أفراد تستعمل كوكوت 5 ل تعمريها للعروة
كيطيب الجاج نحيه و حطيه يصفى و احكمي زوج ربطات بصلة خضرا نقيهم مليح و قطعيهم رقيق و لوحيهم في المرقة و خليها تزيد طيب 20 د اخرى حتى تذوب البصلة كامل كي تهزيها بالمغرف تلقاي المرقة خاثرة و ما تبانلكش البصلة و مبعد قطعي نص ربطة كسبر اخضر لوحيها في المرقة مع 1_2 فلفل اخضر شقيه و لوحيه ثاني باش يطلقو البنة و زيدي شوية كسبر مرحي و طفي على المرقة .
نجيو لأهم مرحلة في الشخشوخة اللي هي التجمار ( التغلية ) و اللي هي سر نجاح الشخشوخة المسيلية :
الصلادي اللي فيه الفتات مايكونش معمر ( خاطر كيتغليه يزيد الحجم )، ديري الفتات في المرميطة اللي راح تغلي فيها و ديري فوقو المرقة بحيث تغمري الفتات و على نار هادية غليه مع التحريك قلّبي ملفوق لتحت مش بزاف 2_ 3 دقائق ،انتبهي لتوازن الفتات و المرقة ما يكون ناشف ما يكون جاري ،زيني بالكسبر مقطع رقيق و الفلفل مقطع رقيق وحمري الجاج في الفور و قدميهم بالصحة و العافية .
اعذريني على الإطالة بصح باش ما تضيعش التفاصيل .

فايزة1207

2017-02-06, 17:33

ام شمسو محمد شرح اكثر من كافي ربي يحفظك اختي ممكن فقط صورة لشكل الكسرة من فضلك سخفتيني

ام شمسو محمد

2017-02-06, 17:59

أم محمد الدقيق هو السميد و إيه زوج ربطات بصلة و ميش بزااف تخثرها و تبننها( بصح كاين اللي مايزيدوش البصلة ،يكثرو شوية من لول ) ، لعجينة تكون شادة روحها شوية باش ما تتحلش كيتغليها و طيبيها حمريها مش كيما الرقاق صفرا ، الكيلة تاع العجين ديري قد ما تديري الكسرة و إيه تاكلوها فورا بعدما تغلوها ما تحطيهاش تنشف و الفتات حنا نديرو كميات كبيرة و نحطوها في الكونجلاتور ما يروحلها والو كي نحبو نديرو شخشوخة نطيبو المرقة برك ، هذي شخشوخة مسيلة سونتر و نظن كيف كيف، كي نطيبها ان شاء الله نحاول نحط صورة الشواط ( الكسرة ) .

ام شمسو محمد

2017-02-07, 08:00

أم محمد الأصل انك تغربلي السميد ديري الدقيق ....ما تفاهمناش اختلاف اللهجات ههههه

ام شمسو محمد

2017-02-07, 13:53

أم محمد هكذا يجي الشواط تاع الشخشوخة المغلية .
http://up.1sw1r.com/upfiles2/bwq71921.jpg
و هذي بعد ما غليتها قبل التزيين .
http://up.1sw1r.com/upfiles2/pxk71921.jpg
و هنا بعد " التزيين " المستعجل لأني طولت عليهم و كانو راح ياكلوني
http://up.1sw1r.com/upfiles2/rn971921.jpg

ام شمسو محمد

2017-02-07, 19:51

فايزة1207

2017-02-07, 20:12

شكرا اختي كنت حاسبة الكسرة تكون يابسة على هك

fadila34

2017-02-08, 12:12

السلام عليكم
دخلت نقول لا ام شمس بارك الله فيك على الشرح
وحتى حنا نديروها فى البرج وهني جبتلكم صورة كنت دايرتها وحنا نغليوها او نجمروها فى قسعت الطين
http://b.top4top.net/p_404utrom0.jpg (http://up.top4top.net/)

http://c.top4top.net/p_404k2a2n1.jpg (http://up.top4top.net/)
ومن فوق نديرولها ام الدهان او الزبدة تاع البقري وتتكل مع اللبن

fadila34

2017-02-08, 13:15

شهيتك فى الجنة اختي
شوفي ماجيش رقيق بزاف كما هذي وتخليهاش خشينة بزاف تشربلك المرقة وجيك عجينة اجي اخشن شوية من هذي الرقيق
كما هذي رقيق بزاف نقلولها شخشوخة المفرمسة او الرقاق او الشواط
http://f.top4top.net/p_404vm6dw0.jpg (http://up.top4top.net/)

http://a.top4top.net/p_404f9djc1.jpg (http://up.top4top.net/)

fadila34

2017-02-08, 13:22

اختي ام احمد راني روحت شوفت تاع اسمهان ديريها ارق منها شوية جات خشينة

ام شمسو محمد

2017-02-08, 14:49

أهلا بيك أختي فضيلة رانا أهل و بلاد وحدة مسيلة و البرج ...و الإضافة اللي قدمتيها نفسها اللي نديروها حنا نجمرو في قصعة الطين و نحطولها الدهان و التفاصيل كثيرة و الإختيارات متنوعة ، أنا حطيت المجمل برك شكرا على التفصيل ...أم محمد قصعة الطين و الدهان يرفعو مذاق الشخشوخة اممممم بصح حنا عدنا مستعجلين قليل وين نديروهم .
حقا فضيلة تقرصوها بالما و تحرروها ؟
أم محمد حنا قد ما ترققي الشواط خير انتبهي برك كيتعودي تغلي ما تخليهش حتان يذوب ، بصح التفاخر في الشواط الرقيق راهو صعيب ترقاقو شوية مع الما مش كيما الزيت .

fadila34

2017-02-08, 15:27

اسمحولي كنت نقي فى الغرس باش ندير مقروط ام انس 96
ام شمسو ربي يخليك وبارك الله فيك على الشرح كفيتي ووفيتي
انعم نديروها حارررررر ونقرسوها بالماء والزيت
ام محمد علاه تفشلي تقدري تجمريها كما قاتلك ام شمسو فى ال****طة وتسقسها فى طبسي لاعندك تاع الفخار المهم البنة وجربي المرة الاول وامبعد اجي قسعت الطين اما الشخشوخة انعم تاعي درتها فى عرظة والله يسلمك ونتمنالك التوفيق والى الامام الاراد هي الاول ماتخافي من حتى شىء وعولي على ربي سبحانو

ام شمسو محمد

2017-02-09, 08:44

أم محمد أنا ثاني قصدي الشخشوخة المسيلية نتفاخرو بالشواط الرقيق في المسقية ولا المغلية و شواط الما صعب ترقاقو شوية مش كيما شواط الزيت .

ام شمسو محمد

2017-02-13, 09:58

ام محمد الما نديروه باش ما يتحلش الفتات كيتغليه و تجي الشخشوخة بنينة و قصعة الطين مش ضرورية معظم الناس ما يستعملوهاش ، شكلها كيما اللي حطتها فضيلة ، مبعد ان شاء الله نصورلك قصعتي .

zinna

2017-02-13, 21:52

الله يبارك على بلادنا وعلى بنات بلادنا