انصحوني يا اخوتي

[مشكلتي]

السلام عليكم
ارجو ان تنصحوني
اريد الزواج من امراة اخرى اعرفها وهي قابلة للموضوع، ظروفي المادية تسمح لي بذلك، الا انني اخاف ان اخسر زوجتي الاولى، انا بامس الحاجة الى زوجة ثانية ، لاني اكاد ان اقع في المحظور... كيف اقنعها رغم انها غيرمقصرة معي في اي شيء اطلااااااااااااااقا واعلم انها لن تقبل
انصحوني جزاكم الله خيرا

[ع.عيسى]

تزوج واعدل بينهما

[خالد عنابي2]

بئس النصيحة قالو تزوج في السر مالا يروح يزني وفضت الحكاية !

وبالنسبة للاقناع فانت لن تقنعها ابدا مهما حاولت

النصيحة فك عليك واهتم بزوجتك وتجنب كل المشاكل والمضاعفات

وليس الواحد عايش طول حياتو بعيد عن الدين وكي تولي لمصلحتو يقول الدين يحل الزواج باربع

اديك كون من لول انت سلفي وزوجتك سلفية مثلك تقدر تتفهم الموضوع بصدر رحب

[الطيب الجزائري34]

واحد مخلوقة حار فيها و لاخر يحوس عالثانية...

[زبدة ذايبة]

أنا ماعندي حتى نصيحة ليك سوى أنك تريح روحك خيرلك

رح تفتح على روحك باب مايتغلقش

ورايح تخرب دارك بيدك

زوجتك مارجش تسكت ومارح تقبل تجيب عليها وحدة ثانية يعلم الله فصلها وأصلها منين

والدليل تساهلها معك في الكلام وربما أشياء ثانية

لدرجة راك تحارب في نفسك باش ماطيحش في الحرام

يعني هذا الزواج مبني على النزوة بالتالي ماريحش يطول

بالتالي ماعندك علاه تخرب على روحك حياتك حتى ولا راك مرفه وبدراهمك

بالإضافة إلى أن هذ العلاقة إن دلت على شيء فإنما تيدل على تقبل هذ المرأة للتمادي معك سواء بالكلام أو بأشياء أخرى لايعلمها إلا الله

وفي الأخير تجيب وحدة لزوجتك لقيتها في الشارع


تظل تهدر معاها وتقصر وتضحك معاها

وهي راضيها الحال (الثانية ) في هذ العلاقة المحرمة و الآثمة

قبلت بيك في الحرام ماتقبلش بيك كي تقولها نتزوج ؟؟؟؟؟؟

خبزة وطاحت على كلب راقد ( مثل جزائري)


تروح دخلها على زوجتك كمكافأة على إخلاصها وعلى خدمتها ليك ولأولادها

صحيح حلال تتزوج بوحدة ثانية بصح ثاني حلال تكون عندك زوجتك برك

كامل النساء كيفكيف غير الشيطان يزين لحرام

[first first]

على حسب علمي وحدة ماتقبل؟................نصيحتي لك خد احتياطاتك وانت تفاتحها بالموضوع وتجنب مصارحتها وهي في ا المطبخ لان به ادوات خطيرة كالسكين والمقلات وو و ؟؟

ربي يكون في عونها وفي عونك وربي يقدر الخير للجميع.

[جنى الجنتين]

لا حول و لا قوة الا بالله هاذا جزاء سنمار حرام عليك مكاش مرا تقبل خاصة قلتها بلسانك مشي مقصرة معاك و تاني المراة لي تقبل بالراجل لي متزوج بالنسبة ليا مشي

مرا حرام عليها تهدم دار مراة وحد اخرى و ليام تدور كما تدين تدان وهذي مجرد نزوة راك تعيش فيها نصيحتي ليك روح جدد ايامك مع مرتك شهر العسل ما فيها والو

روح سافر راسك و راسها و حرز روحك من كيد النساء هذي لي دخلت في حياتك مغديش تخليك ترونكيل الله يهنيك

[النجمة القطبية]

سبحان الله الحاجة اللي تحيرني يعني زوجتك مثلا ماشي مرا كي خلاص راك راح تطيح في المحظور
راك متزوج مع عسكري مثلا ولا كل ما تتزوجو واحدة بعد بضعة اشهر تولي كيفها كيف غيرها
يعني حتى الثانية مراكش تبان تحبها مجرد حاب تجرب وتزيدها للقائمة يا صابت يا خابت !!!!!!! وممبعد تزيد تتعرف على اخرى والا تقع في المحظور
يا اخي شئ منطقي انك لما تختلط بامراة لا تحل لك يزينها لك الشيطان حتى لو كانت زوجتك سندريلا وكانت الاخرى من الشارع
لان الانسان انسان معرض للفتنة وانت روحت ليها برجليك واديت وجبت بالكلام والله اعلم بالحديث اللي كان يدور بيناتكم
درك انت درتها حلها بيديك
الحل الوحيد انك تواجه اسرتك وزوجتك واشك انهم يقبلوا بواحدة اصلا تخرج مع رجل متزوج فالله اعلم من اي طينة هي
انت راك راشد وتعرف مصلحتك وعلابالنا انو ادا قررت تتزوجها واحد مراح يمنعك فقط نصيحة حكم عقلك وشوف ادا صح المراة هادي تع دار ولا لمجرد انك منجرف في علاقة وعقلك مغيب
ربي يهديك ويصلح حالك

[ام رضوان]

السلام عليكم
يااخي فكر مليح واحسبها ملييييييح ملييييح
انت مع زوجتك ماخاصك والو هاني متهني والزوجة قلتها بفمك ماهي مقصرة حاى في حاجة
علاه رايح الدير راسك منصبة تاع طجين
اولا زوجتك مستحيييل تقبل بوحدة اخرى
اذا تنازلت وماتزوجتش راح تعيشك زوجتك في دمار حمر
تقولك اخلصتلك وحبيتك وفي الاخير بغيت تتزوج عليا وحدة اخرى
ارواح تشوف لمعيشة اللي تستهلها
والله حياتك ترجع ناااار جهنامة
ونرجعو للمراة الاخرى اللي راك تقول راهي قابلة بالزواج
بسيف عليها تقبل
البلاد معمرة بالنساء
هي تقول جاب ربي راجل نعيش معاه وكاش مانجيب معاه ولاد
وخاصة كي قلت راك لاباس بيك ماديا
يعني خبزة سخونة
امالا يااخي اخطيك من هذي المراة راهي تخربلك في بيتك وحياتك وتجر فيك للهاوية واصلا لاكان راك تتكلم وتتلاقا معاها راهي خيانة وراه حرام عليك
ودير عقلك في راسك تعرف خلاصك
ماتعقد عقدة بيديك ماتحلها بسنيك
والسلام

[softech]

لو كان ذلك امر سهل لتزوجنا مثتى و ثلاث و رباع

لو كان في التعدد شر واحد لما حضنا عليه رب العالمين

و لكن يا اخي في عصرنا المفعوص كل الموازين مقلوبة

صارت المراة تسمع بزوجها يخونها و تسكت و اما ان يتزوج بالحلال فذاك حرام!!!

اخي ما تطلبه شرع و حلال و لكن ستجد صعوبات و ربما مشاكل كبيرة سواء من زوجتك او من المجتمع

لو كان النساء حقا على الدين و الشرع فما العيب ان يتزوج الرجل ليستر امراة اخرى خاصة ان توفرت له الامكانيات و العدل بينهن

اقول للنساء مبروك عليكم العنوسة لانكن ببساطة انانيات

[حمزه أبو مريم]

وعليكم السلام ورحمة الله ..
ما دمت تقول أنّك بأمسّ الحاجة إلى زوج ثانية فالقاعدة تقول الضرورة تبيح المحظورة فإذا كان المحظور مباحا في الأصل فهو بالنتيجة يستحبّ إن لم يجب " على حدّ وصفك لحالك " ، غير أنّك تقول أيضا أنّها غير مقصرة معك في أيّ شيء إطلاقا فالشيء الذي يدفعك للوقوع في المحظور بزعمك إذن غير مقصرة فيه " أليس في هذا تضارب ؟ " ، إن كنت تريد إقناعها لتتزوج فانس الأمر .

[توحيد الجزائرية]

مؤخرا ..قال للشيخ لزهر حفظه الله
ان الاصل هو التعدد..
والرضى بواحدة هو مذهب الخوافين (وان خفتم الا تعدلوا فواحدة .. )الاية
او كما قال..
الأجدر الاكتفاء بواحدة ..ويا ليت كل رجل يصدق مع الله ويخلص ولا داعي لذكر التعدد وسنيته ..فالرجل الان من كثرة تتبعه للمتبرجات و ادمانه على النت ..صار مهووسا بالنساء.
فصرن نجد السلفي يطلب اشياء غريبة ..

[قدور بن عاشور]

أغلب نساء اليوم تقدر تسمح لك إذا زنيت و تبقى معك، لكن إياك ثم إياك تجيب زوجة ثانية، رايحة تهرب و تطلب الطلاق و تمرمدك في المحاكم و هذا كله بفضل المسلسلات، و بركات الحكم العلماني الخبيث.

رغم ذلك فأنا أنصحك بالإبتعاد عن هذه المرأة لأنك راح تخسر الكثير الكثير، و هذي لي راهي مشبعاتك دلال و حنان الآن هدفها طرد الأولى و بعدها رايحة توريلك وجه الأفعى الحقيقي.
و في الأخير كل النساء كيف كيف.

[خالد عنابي2]

توحيد الجزائرية (http://djelfa.info/vb/member.php?u=591418)

شكون شيخك لزهر هذا لي ما يعرف فيها والو ؟

الاصل هو التعدد والاكتفاء بواحدة مذهب الخوافين ؟ هههههههههههههه

وعلاه العدل جاك مسألة سهلة او هينة ؟

الاصل هو الاكتفاء بواحدة والتعدد مشروع وجائز شرعا بطبيعة الحال

انما فقط الواحد لازم يكون ملتزم بالدين وباني اسرة على هذا الاساس وعندها يسهل له هذا الامر

وليس لما تتحرك نزواته ياخذ من الكتاب ما يناسبه ويتستر بالدين وهو فقط يرغب في تلبية شهوته ولو كان للدين قول عكس ذلك لما اتبعه

[عثمان الجزائري.]

أولا أريد أن أوضح شيئ و هو أن التعدد لا علاقة له بالزوجة الأولى يعني مثلا إن كانت قايمة بيك و متهلية فيك هذا ليس سببا لعدم التعدد كما يحاول الإخوة إفهامك.
ثانيا إن كانت الثانية أكثر تدينا من الأولى فهنا يكون دافعك أقوى أما مجرد تضاريس و غيرها فالمثل يقول " إذا إنطفأت الشموع كل النساء تتشابه".
ثالثا ليس كل زوجة أولى صالحة و ليس كل زوجة ثانية ما تصلحش و الواقع أفضل دليل.
رابعا أنصحك بأن تجعل تدين المرأة هو المعيار، و إن كرهت من زوجتك فحاول أن تجعلها تثقف نفسها فالنساء في هذا الزمن تجدها إذا أبدعت في الطبخ و التنظيف تظن نفسها أنها أعطتك حقك كله.
خامسا المرأة الثانية تبدو من سياق كلامك و كأنك تعرفها جيدا و يا أخي أنا أعزب و لكن أتجنب النساء كي لا أفتن و أنت رايحلها برجليك، لست أطعن في المرأة و لكن خذ حذرك صديقي.
خامسا الأخ خالد عنابي كلام توحيد الجزائرية صحيح و الشيخ لزهر سنيقرة هو دكتور في الشريعة و هذا ليس كلامه و لم يتفرد به.

[نورسين.داية]

السلام عليكم


نورسين داية إمرأة و عاطفيا نقولك ما نقبلش راجي يتزوج عليا ............لكن الشرع حلل 4 سبحان الله و لا إجتهاد مع النص التعدد أحله الله عز وجل و لا نقاش مع كلام و حكم الله عز وجل ، مثلا لو راجلي يقولي حاب نعاود الزواج ....(الله لا يبلي و لا يقدر ههه )........و إذا حبني أنا نخطبهالو و الله غير نديرها ........................مع حكم الله عز وجل لا مجال للعواطف و الفلسفة ............

و أصلا التعدد له حكمة أرادها الله عز وجل من بينها المشكل الذي انت فيه اليوم .......فرضا نعملو مقارنة تجيب إبن زنا خير و لى إبن في إطار شرعي بزوجة ثانية خير ؟؟؟؟؟؟ أكيد سوف نختار الإبن الشرعي من الزوجة الثانية ...........الله إسهل .....

تقبل ما تقبلش الله إسهل ..............قالك درئ المغارم أولى بجلب المغانم ................

تزوج أخي و لا تنتظر موافقتها و نعطيك الطريقة تاني بدون ما تكسر راسك مع وثيقة موافقتها .....روح أعقد في ولاية أخرى ... و من بعد اعلمها بالزواج

و الله كفانا أبناء غير شرعيين و الله راهم ضحايا ...............و ليس لهم أي دنب

بالتوفيق اخي

[خالد عنابي2]

للاسف البعض مصر على تدمير البيوت بحجج نظرية لا تصلح للتطبيق على الواقع

اولا السائل لا يمكن تصنيفه في خانة التدين طالما هو يعرف المرأة الثانية وهو محصن

يعني هل تعرف عليها في اطار شرعي مثلا ؟ مستبعد

اذن فالامر لا يعدو سوى اشباع نزوة واي هدف نبيل هو هذا !

ثانيا قلنا بان الشرع اقر التعدد وسمح للرجل ان يتزوج حتى الى اربع نساء لكن لا ناخذ من الشرع ما يوافق اهوائنا الطارئة لازم من لول نكونو حسب الشرع

ثالثا انه يقول انه لن ينجح في اقناعها ابدا واذن يفتح على نفسه باب شر كبير من جهة زوجته الاولى

كي يعود الواحد سلفي ومتزوج بوحدة سلفية ويظهر له ان يتزوج بثانية هنا الامور تكون مفهومة ومقبولة من الزوجة الاولى

ليس واحد يعرف الدين كسائح ومعبد يتفكر حقا حقا كاين وحد الزاوية في الذين تساعدني مالا تنمسك بيها على قد ما نقدر والباقي سحقا له !