اذا كان صاحبك عسل ملتحسوش الكل

[مشكلتي]

السلام ليكم خاوتي
عندي مشكلة ... راني ساكت نسي في روحي بصح العرب ماتفهمش بالقدر ,,,
انا انسان عندي سوبرات حليتها تقريبا نهاية اكتوبر العام الماضي .. كي حليتها اول مرة جوني افراد المن العائلة نقصت ليهم شوي في السعر وو الفرحة تاع اول ايامات .. وتمت الحكاية فم
باه نرجع نخدم عادي كيما التجار الكل ...
اسيدي عندي زوجة خويا هادي تجي تدخل تهز حوايج غاليين وتخرج ببلاش؟؟؟؟ تمادت كثيرا تحساب السوبرات تاعها ...
رحت قلت لراجلها ( خويا ) احكم في المراة هاذي وراهي كي تجيني تخلص كيما الناس الكل - زبونة كي غيرها-
قالي واش بيكم سقاط وبخلاء حتى الماكلة بخلتونا ( وهو فرنك مايخرجوش بخل في بخل ) حتى بعد تنبيهاتي لاخي بقت المخلوقة تجي تهز وتخرج تهز قضيات تاع الشهر وتخرج بلوشي - شكون لي خاسر انا .. حتى الخدام لي معاك قالي واش هاذي مانخلصوش عليها ..
قلت كون نهدر معيها في وجهها يقولو عارك مرة خوه قدام الناس مايجيش .. مايغيرش على عرضو و و و و .. مع اني وزيدت كلمت خويا لي معادش يهز عليا في التيلفون .. بعدها ررحت لوالدتي قاتلي ماعندي مامدخلني ... وجهها صحيح عادوت جت - شفتها حكيت معيها على الجنب - قلت ليها هذا ماشو حانوت اباك وراكي هنا زبونة واحترمينا باه نحترموك ... زعما زعما طيشت السلعة في تلك اللحظة,,, بعد اسبوع رجعت عادي .... ( ما فهمتش يعني حابة نخرجوها بعركة وبلبلة ) وشكون خاسر ماني انا راس مالي وارباحي .. لهذا قلت اخر محطلة نستثير هنا ..

[karimtito]

سلام عليكم
لا املك اي اجابة المفروض انهم هوما يفهمو رواحهم
ربي يفرج عليك

[ع.عيسى]

يا اخي الغلطة فيك ، فتحت سوبيرات رحت بشرت الغاشي ، اكيد راح يجوا الافامي والاحباب يكردوا وما يخلصوش وويبعثوا ولادتهم باش يدوا واش يحبوا ، كان من المفروض انك تجحد اي تقول انك مجرد وكبل على هذي السوبيرات وماهوش رزقك ، ساعتها يفهموا رواحكم ، امالا نقلك واش دير ، قلهم بلي راك بعت السوبيرات او انك بعت 70% منه ودير خدام تثيق فيه واذا ما قدرتش نتا تبقى فيه وبصح كي يجوا الافامي قلهم بلي الرزق مولاش رزقك كامل ولازم يخلصوا باش ما يدرولكش المشاكل مع الشريك ، وزيد جيب معاك صديق وحطو في اللاكيس ووصيه اذا جاو الافامي بقلهم بلي يخلصوا وان السوبيرات راهم ليه وممنوع الكريدي وانت دير روحك خاطي والحكمة ما هيش فيدك ، يا اخي تعلم حاجة وهي الجحدة في هذه الامور وما تمدش الصح ولوكان لخوك ، لازم يكون عندك تخطيط استراتيجي وتسلك روحك ، وبالتوفبق

[محمد جديدي التبسي]

كي جات من الاقارب وما جاتش من الاصدقاء فالحمد لله
لازم تصحح وجهك وتوريلهم العين الحمرا اما الحشمة راح يفهموها ضعف ويتمادو خاصة اللئام من الناس.. ربي يهديهم

[أم درين]

يعني لازم تبعثلهم الفاتورة للدار...حسبنا الله في هاذا النوع
وهوما ماعندهم والو يخسروه بالنسبة ليهم الكرامة وعزة النفس والانفة مش شيء يتخسر
مالا هوما اللي رابحين ..دعي ربي يهنيك من فعايلهم

الصراحة سلفي عندو حانوت تاع الخضرة مرات الزوج ديالي يحب يشري من عندو -موثوق-
الاخر مايحبش يقولو ادي برك

حتى يزعفو من بعض كل واحد يقول 'لا'

صفحْنا عَنْ بَنِي ذُهْلٍ *** وَقُلْنا الْقَوْمُ إخْوَانُ
وعَسَى الأَيَّامُ أنْ يَرْجعْنَ *** قَوْمًا كَالَّذِي كَانُوا
فلَمَّا صَرَّحَ الشَّر *** فَأَمْسَى وَهْوَ عُرْيانُ
ولَمْ يَبَقَ سِوَى العُدْوَانِ *** دِنَّاهُمْ كَمَا دَانُوا
مَشَيْنا مِشْيَةَ اللَّيْثِ *** غَدَا واللَّيْثُ غَضْبَانُ
بِضَرْبٍ فِيهِ تَوْهِينٌ *** وَتَخْضِيعُ وإقْرَانُ
وَطَعْنٍ كَفَمِ الزِّقِّ *** غَذَا وَالزِّقُّ مَلاْنُ
وَبَعْضُ الْحِلْمِ عِنْدَ الْجَهْلِ *** لِلذِّلَّةِ إذْعَانُ
وَفِي الشَّرِّ نَجَاةٌ حِينَ *** لاَ يُنْجِيكَ إِحْسَانُ

[زبدة ذايبة]

أنا من رأيي والله أعلم شوف وش يناسبك

هذ السيدة تتقصد وتتعمد هذ التصرفات لأسباب لايعلمها إلا الله

ماكاين حتى واحد في الدنيا مايعرفش أن السلع اللي موجودة في المحلات هي سلع مشرية

يعني صاحب المحل يشريها بالمال

وكل زبون يحصل على السلعة مقابل مبلغ من المال

وهذ السيدة تعتبر إمرأة سارقة

لأنها تأخذ الحاجات من غير أن تدفع المقابل

والظاهر والله أعلم أنها حابة دير مشكلة معاك

او مشكلة بينك وبين خوك

المهم عندها دافع خفي لهذا التصرف

مرة ثانية إذا جات للمحل انت اخرج وماتبقاش فيه

ووصي الخدامين اللي عندك أنها ماتاخذش السلعة بدون مقابل

خلي المشكلة بينهم وبينها. لو كان يحشموها قدام الناس ماتزيدش تعاود تولي

وحتى ولا عاودت رجعت يزيدو يعاودولها نفس السناريو

المهم كي تكون هي انت اخرج حتى تتأكد من أنها راحت

هي تدخل تدي تاكلة على معرفتك بيها وعلاقتك بخوك

اقطعلها هذا الخيط ماتزيدش تولي

ممكن الأعضاء الاخرين يعطيولك آراء مفيدة

ربي يباركلك في مالك ويوفقك

[عثمان الجزائري.]

يؤسفني أن أعلم سيادتكم الموقرة أن أخوك ماش راجل، و يشرفني أن أعلمكم أنكم تملكون صبر أيوب و رزانة كبيرة، قضيتك بيد أخوك و ليس بيد المرأة لأنه لو كانت القضية بيدها تقدر تعطيها 2 كفوف ترجع للطريق

[مياسم الصمت]

السلام عليكم ورحمة الله وبركاته
ما أُخذ بسيف الحياء فهو حرام
كما قالت لك الاخت زبدة ذايبة
حلك أنه لما تدخل السيدة هذه تخرج انت وتترك العامل يتصرف معها
وصيه تخلص السلعة او ترجعها
ربي يعينك على هذه النوعية من لئام الناس

[مايسترو عمران]

نعرف واحد حال سوبرات كيما انت العايلة تاعو و يخلص عليهم عادي كيما الناس كامل حتى الام تاعو تروح تشري من عندو يحاسبها كأي زبون
الخدمة خدمة صديقي لا مجاملة لاهم يحزنون

[لمسة ابداع]

يالطيف السلام
ربي يصبرك ا خويااااا و اللع وجعني قلبي
مرت خوك هادي وجهها صحيح بزاااااااف لازمك تحبسها عند حدها

[خالد عنابي2]

الحل حط خدام يخلص وكي تدخل هي انت اخرج ووصيه ميستعرف بحتى واحد

لعل تفهم روحها

عجيبة هذه المخلوقة

[ام رضوان]

السلام عليكم
يااخي هاذي اللي لقاها مايقولش لالا
كاين واحد من العايلة تاع زوجي اقسم بالله صاشي الملح يسلك عليها على اخوتو
وهما مقدرين الضروف يقولو يخدم على وليداتو مسكين
وانت قاعد تخدم على لغواشي
هاذي صحانية الوجه تاعها ولازمك توقفها عند حدها
المثل واش يقول
حرش نابك الناس تهابك
ربي يجيب الخير امين

[mrmilano1984]

هكدا الجزائريين شعب اناني جدا جدا لايضرك ولاينفعك ابدا يحبون الا مصالحهم الداتية ولو علي حساب احد يعني نتا تتعب والسوبرات والمواد كلها بالدراهم يجو بني عربون ولو اخوك يدي باطل ومايخلصسش هكدا هم الجزائريين كالفرنسيين لئام جدا جدا وخبثاء هو ماعلابالوش بيك كامل يجي يقضي ويشري بدون ان يدفع اي سنتيم وهم باينين لاباس بيهم كامل ماديا وكل شيء ويخلصو ملح الخ ويخدمو عند الدولة هادو اكبر مسامر في حياتهم فهامة زايدة فوق اللازم اهمالا ماكاش حشمة ابدا في القلب مليح يكن قلبك حديد وفولادي مع الجزائريين طبعا في حقك خصوك ماعليش احيان نغمض عيني ونتسامح خصوصا ادا انسان يقضي عليا كثيرا مش مشكل بصح تدي باطل علاه اني نشري باطل حتي لو دلك وتدي بدراهم ومشكلة هو نهار تقصدو دينار مايمدهولك كامل كف كف يخبو دراهم ويديرو تاويلات كي الديابة ونتا والله مااعلابالو بيك ويجي في منفعتو يضحكلك فقط باش يفري امورو ضحك النفاق والخبث كالفرنسي تماما معلروفين بالانانية والبخل الشديد وحب الا منافعه
اهمالا نعطك حل قلها نتي عائلتي ماعليش بصح امور التجارة الخ لايوجد عائلة
فكرتني في احد الاقارب طلب مني دات يوم ان اوصله وهي قريبة جدا لي ا اوصلها الي قاعة الحفلات وهي عندهم من ياخدهم طبعا انا لم اخدها اطلاقا ونجيبلها اسباب السيارة معطلة السيارة عند الطوليي السيارة سلفتها السيارة راها عند الكهربائي الخ وشخص اخر من نفس عائلة سادج مسكين شبعوه تمرميدة كل كايسحقو اشغالهم يتصلو بيه ياخدهم ون يحبو هم قاعة حفلات جنازات ولائم صالون حلاقة الخ ومايخلصوهش ابدا ويبلعطوه دايمن وهو مسكين بلا عمل ولم شفقو عليه ابدا وكي يسحق هو اي شيء يخصو يتمسخرو بيه ويهفوه ويكدبو عليه يعني اقطعلهم كل شيء في حقط طبعا العربي كويه ولاداويه

[نورسين.داية]

الحل حط خدام يخلص وكي تدخل هي انت اخرج ووصيه ميستعرف بحتى واحد

لعل تفهم روحها

عجيبة هذه المخلوقة

السلام عليكم

رد الأخ خالد بالنسبة لي هو أحسن حل .....لكن لا تنسى أن تركب كمرات في المحل ،لأن بتصرف الموظف أو العامل الذي يستخلفك ممكن يكبر و تتهمه هذا الصنف من الناس بأنه نم التعدي عليها سواء جسديا أو لفظيا

بالتوفيق

[mrmilano1984]

الله يلطف حتي في الماكلة وماتسلكش معاهم نعرف واحد مسكين عندو براكة وشبعوه كريدي يدو عليه الا الكريديات وولفلهم وهو يحشم بزاف بزاف وانسان يتعامل بزاف بقلبو كلاوه كم مرة وكاين لي راح كاين لي مات كاين لي رحل كاين لي صحرو وووو اك تشوف لازم من لول تخرج عينيك معاهم علاش هوما شوفهم كي يكونو في بلاصتك كف يقسحو خزرتهم ويبينو شطارتهم لازم تكون صارم جدا انت تعرف شخصيتك جيدا وتعرف روحك الا كنت من نوع خجول وحشام صعيب عليك الا كنت من نوع قبيح وفايق الخ ماتخافش وماعلابالك بحتي جزائري الا والديك لانهم مش هوم لي راح يفيدوك وينفعوك من بعد ويخلصو الكراء والضرائب وكهرباء

[sohaibdz]

بما انهم مافهموش روحم وانت انسان ماش تاع عيب خليلها هدرة مع الخدام قولو يبهدلها

[الرميصاءْ]

وعليكم السلام ورحمة الله
في وقتنا هذا لي يشوفوه نية ويخاف ربي يحقروه
تقريبا عندي نفس المشكل ولكن انا مع جميع معارفي تقريبا يجو يعالجو عندي وينزعو ضروسهم باطل كينقلهم على الدراهم يقولولي مبعد نجيبولك ومايخلصونيش هذو عربنا يحقرو القريب
ولي يكون معاهم قبيح يخافوه

[hanan7]

هاي تصرفات استفزازية من مرت أخوك انت لا تسكت عن حقك واحكيلها يا بتدفعي يا بتلعطي براا

[hanan7]

لا تسكت عن حقك ولا تخجل انك تطلب حقك الحق حق

[FELLA BIO]

شر البلية ما يضحك ... الحل يكون كتالي : عند دخول زوجة أخيك المحل أخرج أنت منه و دع العامل يتولى الأمر فإن حملت مقتنياتها و جاءت خارجة دون دفع الثمن اوقفها وطلب منها الدفع و لا تركت ما تحمل فإن تحججت بمعرفتها لك اجابها العامل أنها أوامر صاحب المحل و لا يمكن خرقها .. هكذا دائما إلى أن تمل دون أن تكون لك مواجهة مباشرة معها ... موفق