انا برت بكامل ارادتي

[مشكلتي]

سؤالي للمرأة كثيرة الخطاب
انا كثيرة الخطاب يعني اكيد اي مكان نروحو يجو يخطبوني وهدا يظهر نعمة لكن في باطنه نقمة
عييت نقتنع بشخص واحد كل ما يظهرلي انسان مليح نقول وبالاك يجيني احسن منو ضيعت عشرات الفرص وراحو و قبلو بيهم بنات اخرين وعايشين كالسلطانات
اما انا كبرت في السن حتى جمالي مبقاش كيما قبل ومازال رايي تالف

سؤالي هل لبنات كي تقبلو بواحد (زواج تقليدي) لاني ضد العلاقات هل يجيكم الندم تاع وبالاك كون ستنيت يجيني احسن منو مع العلم اللي جاوني كامل متخلقين ومتدينين واصحاب مراكز

اتقبل النقد النصيحة المهم فيقوني راني ضايعة والله نشف العايلة كي يشوفوني واحد يقول اي مسحورة وواحد يتحسر يقول هاد الزين والعقالة و معندهاش الزهر ووالديا فقدو مني الامل عمري 24

[*أم كوثر*]

هو كل شيئ بالمكتوب
لكن 24 سنة ....لي في سنك مازالوا ماتخرجوش من الجامعة

[محمد جديدي التبسي]

نظن راك غالطة كتبت 24 وهي 42؟؟
اذا راك 24 مازالك في سن مناسب جدا
ريقلي روحك واقبلي باللي يجيك مستقبلا ان توفرت فيه الأخلاق ويكون خدام ولاباس بيه..
ما تعقديش روحك مما سبق مكانش مكتوب برك ..ربي يرزقك بالزوج الصالح.

[صمت الرجوله]

و الله يا انسة حيرتيني..من الوهلة الاولى اعتقدت انك صاحبة اربعين سنة, مازلكي صغيرة..راكي في عمر الزهور
جيد انك عرفت افة بنات العصر...حاولي تصلحي نفسك ,و الوقت راه مازال بيدك و راحين يجوك خطاب في المستقبل ان شاء الله و ماعليك غير تقبلي مبدئيا اذا كان الرجل صالح بعض النظر عن احواله المادية او الاجتماعية او الفزيولوجية بدون ان تنسي الحل السحري و البسيط الا و هو صلاة الاستخارة
و الله الموفق

[ابو ارسلان]

يا آنسة علاش متشاءمة و مظلمة على روحك الدنيا؟
الزواج التقليدي كيما سميتيه هو الزواج الشرعي الذي يبارك فيه ربي لان الحجرة الاولى تاعو حلال.
ديري في بالك بأن الزوج ليس ذلك الرجل الطويل الممشوق ذو العيون الساحرة و الكلام المعسول
الزواج يا بنت الناس هو أمانة و صدق و رجولةو حنان و تحمل مسؤولية و تضحية.
لان الحب تاع الافلام علاقات عابرة و نهايتو الزنا لا غير و العياذ بالله.

اذن ادعي ربي بكل اخلاص يرزقك ولد الحلال و هذا المرة اذا دق عليكم واحد على الباب و ليس النافذة اتوكلي على ربي و اقبلي بشرط يكون "راجل" و متخلق و فحل...بالتوفيق ان شاء الله.

[سحابة مسافرة]

لما قرات العنوان و بداية الموضوع حسبت في عمرك 40او على الاقل 38 سنة
عمرك 24 سنة مازلت صغيرة و العمر قدامك و مزالت تجيك فرص لكن كي يجيك خطاب حاولي تفكري مليح و لا ترفضي بحجة انو راح يجيك خير منو

[مريم العدراء]

ما زلت صغيرة بصح يلا كملتي بهذي العقلية غادي تندمي بزااااف المهم الحمد الله راكي عارفة روحك بلي راكي غالطة وننصحك نصيحة اخت لاختها قبل ما تقرري تقبلي او ترفضي صلي صلاة استخارة وسالي على الشخص مليييييح ماخاب من استشار وما ندم من استخار
ثم ان زواج ليس تجارة ستدمين بعدها وتقولين لو انتظرت لتقدم لي شخص احسن منه المهم ان يكون الشريك ذو دين وخلق والماديات لا اعتبار لها صدقيني فانا عن نفسي تزوجت مع زوجي وكان لا يعمل بالرغم من انني من عائلة غنية وتقدم لي الكثير من الاشخاص الميسورين ولكن ما جعلني اقبل بزوجي اخلاقه الراقية التي كنت متاكدة منها لانه من العائلة وزواجنا كان تقليدي فانا كذلك ضد العلاقات والحمد لله صبرت معه واحببت العيش معه رغم كل الظروف الصعبة المهم معاملته لي واخلاصه والحمد لله الان توظف ولم اندم يوما على قبولي به
لذا عليك اولا ان تسالي جيدا على الشخص الذي سترتبطين به
عفوا على الاطالة ولكني احسست بك وبخوفك من الارتباط لاني كنت في يوما من الايام مثلك وفقك الله ورزقك الزوج الصالح

[منصفاف]

استخيري الله وهو يعينك ولا ياس مع الحياة ربي يفرج

[فاطمة شلف]

السلام عليكم ورحمة الله وبركاته
شكرا على طرح الموضوع
ياابنتي الرجل مافيه حتى حاجة تتعيب عيبو جيبوولا الاخلاق اذا ماكانت عندو
صلي صلاة الاستخارة وتوكلي على الله وربي مافيه غير الخير
سلام

[ام رضوان]

السلام عليكم
يابنتي خلعتيني
كي قريت العنوان حطيتك فوتي ال40
لقيتك مزلتي بنت البارح
ربي ورحمتو انا نعرف بنات تزوجو في سن40 والحمد لله دارو اولاد ودار وربي يتم نعمتو عليهم
راه مافاتش الحال مازال ماكتبش ربي برك وعلاه راكي متشائمة وقلبتي روحك مسكينة وتغيضي وراح ونقص الجماااااال وووو
لاه هذا
وحاولي تبدلي العقلية برك
كي يجيك خاطب صلي صلاة الاستخارة واتكلي على ربي واللي فيه الخير يقدمو ربي سبحانو
ربي يكتبلك الخير والهناء امين

[منى27]

اختي مازالك صغيرة من كنت قدك مخممت في زواج و لا قلت القطار فاتني انا عمري 31 مازال عندي أمل نزوج و نعيش حياتي بزواج تقليدي ربي يجببلك فيه الخير

[mohamedreg]

اللهم احفظ بناتنا و أبناءنا .

[لمسة ابداع]

و الله يا اختي محسوبك قاعدة تحكي في القصة تاعي انا تاني عمري 24 سنة و تخطبت بزاااف حتى المرة هادي بابا قلق مني و قالي اللي يجي يخطبك المرة الجاية نمدك ليه قابلة و لا ماشي قابلة
مشكلتي نفس مشكلتك الفرق برك انو انا صح عندي سحر
المهم ربي يفرج عليا و يرزقنا الزوج الصالح

[karimtito]

ادعي ربي. ففساد الراي التردد

[ام مسلم محمد]

يا اختي ربي يهديك ويوفقك الى مايحب ويرضي ولاز تعرفي بلي الزواج مكتوب وصلاة الاستخارة فيها راحة البال

[عثمان الجزائري.]

كي شفت عمرك 24 جاتني كلي نكتة، أنصحك بأن لا تجعلي جمالك يزيدك تكبرا و تعجرفا، إستخيري و توكلي على الله

[mariana1]

أين صلاة الاستخارة في كل ما حكيتيه؟ باذن الله مرة جاية صلاة الاستخارة هي الاولى
كي جاء الذي ترضين دينه وخلقه واش راك تستناي خير منو ؟
وفي الاخير ما زال ما جاش المكتوب لما يجي مكتوبك تجي تقولي لا رايحة تقولي نعم

[نذير السحمادي]

كمايقال :"العصفور في اليد والعشرة في الشجرة"
عليك بالتأمل في الواقع جيدا. ..
الواقع غير مايبث في المسلسلات ...رومانسية ومغامرات. ...
عودي نفسك على الواقع واستمعي للمجربات. ......

[نذير السحمادي]

العصفور في اليد والعشرة في الشجرة.

[salamsi]

ربي يرزقك بالزوج الصالح.

[خالد عنابي2]

ابقاي قولي يجيني لي خير منو حتان تلقاي روحك بايرة صح

الطفلة كي تعود شابة ويجوها الخطاب تحلالها اللعبة لانها مطلوبة on demande ومبعد يفيقو بلي راهي تتملعب بيهم ويدور عليها الفيلم

تولى تتمنى واحد يعاكسها في الشارع ولا تجد

وتندم بعد فوات الاوان

[أم سلوى]

لديك قلب متقلب يحب نفسه فقط
لذا...لا تستطعين ان تركزي من هو الأحسن اترك الاختيار لعائلتك
لانك لست اهل للاختيار
تستهلين أحسن دائما في نظرك وربما هم الخاسرين. لكنه العكس.....لا تغضبي..

[البريئة]

يا بنت الناس عيشي حياتك مازلتي صغيرة ياو انا كي كان في عمري 24 كنت نقرا و خليك من التوسويس
صدق من قال لي الزوج ندم و لي قعد عزم