هل خطيبي بخيل

[مشكلتي]

السلام عليكم
صراحة الموضوع دون اطالة اليوم خطبني اخ متدين الحمد لله وهو استاذ متوسط والابن الكبير لاسرته هو فقير وانا قبلت لاجل دينه المهم اليوم جاوا دارولي الخاتم وجابولي فليزة فيها : لباس دار وصباط دار وريحة وديودورون وحناء قابسة وثلاث حبات صابون وكوفر مصحف ماجابوا لا قفطان لا بوشات مع اللباس الخروج يعني اليوم كامل نساء يحكوا على صوالحي حتى بديت نبكي انا شرطت الهناء فقط لكن هبلوني بهدرتهم هو سلفي وخلوق الحمد لله لكن هبلوني

[محمد جديدي التبسي]

وعليكم السلام ورحمة الله وبركاته
بما أنه سلفي فلن يكون مثل غيره ويجلب لك أشياء لتلبسيها خارج البيت لأن لباسك الوحيد خارج البيت هو الجلباب.
فهوني عليك وليكن لديك الوعي الكافي لتجاوز ما يقوله النساء لأن كلامهم مجرد ثرثرة فارغة ونظرتهم سطحية للأمور يؤمنون بالمظاهر الجوفاء يريدون الذهب واللباس ولن تسلمي من كلامهم مهما كانت الحال
فاسعي لرضى الله وسهلي على هذا الشاب وعلى نفسك هذا الزواج ليبارك الله لك
ودعك من الوساوس المهم هي أخلاق الرجل وسمعته بين الناس.. ربي ييسر أموركم.

[ثلجَة]

أختي لا تعيشي لأحد بما أنك تبحثين عن السعادة في حياتكِ الزوجية، الباقي مجرد مضاهر زائفة.
وفقك الله

[زبدة ذايبة]

وكي يجيبلك كاميون تاع اللبسة وهو مايصلحش وش ديري بالقش ؟؟؟؟؟

وكي يديرلك الذهب من راسك لساسك وهو نهار كامل في الشوارع

وكي يوزنك بالذهب ويضرب عليك البارود والناس يقولوا كامل كيما راهم زواج بنت السلطان

كل هذا ماعندوا حتى معنى

الشيء الرخيص اللي يقدر بالمال مهما كان غالي فهو رخيص لأنه عندو قيمة مادية

الأخلاق والدين والتربية والأصل كل هذا مايتشراش بالمال

النهار اللي تتزوجي وتولي تروحي لداركم ولا هو يغيب عليك تحطي راسك على لمخدة وتقولي راني عارفة وين راه ، او واش راه يدير

وكي يجي الليل وينوض هو من لفراش ويخليك

تقولي هذا الوقت اللي ناض يقوم فيه الليل يصلي ويدعي مايدخلكش الشك ولو لثانية أنه راح يهدر مع وحدة في التيليفون ولا راح للفيسبوك يتفرج في الواقع الإباحية

من المفروض المرأة الصالحة كي يجيها راجل صالح تسمح في كلش على جالوا

راكي تشري في راحة بالك ولهنى تاعك بقية حياتك

الرجل الصالح لايقدر بثمن

الرجل الصالح يوصلك للجنة

الرجل الصالح يحافظ عليك ويخاف عليك

الرجل الفاجر يفتنك في دينك

الرجل الفاجر يجيبلك المرض ويدرلك الهم ويطلقك ويرميك بيك بأولادك على جال وحدة فاجرة

انتي اصبري

لعل راه يجرب فيك

والأمور تجي بالشوية

ممكن هذا مايعرفوا

كاين ناس مايعرفوش وش يديروا في جهاز العروسة

وكيما فلتي هو لكبير، ممكن راه يخبي للعرس

انتي شوفي للراجل ماتشوفيش لحاجة ثانية

وهذا رزق ربي هو اللي يقسم الأرزاق

وكي تولي في داروا لعل الله يكون مخبيلك أحسن من الشي اللي جابوهولك

كوني فحلة واعرفي كيفاش تتصرفي برك

[zari18]

الأخت أنت تبحثين عن الهناء و تشتكين من كلام النسوة إذن ليس لديك عقل و لا تفكيير
كشاب و أبحث عن بنت الحلال نصيحة مني إبحثي عن الأخلاق و أولها الدين و الكمال لله وحده وتعالى
لكن حسب هو مثقف ويمكن التفاهم بينكما
بالتوفيق

[زيان.]

بعد بسم الله الرحمان الرحيم أما بعد:
أختي الكريمة بما أننا إخوة في هذا المنتدى ويهمنا شأن بعضنا البعض فإني سمحت لنفسي أن أتدخل في هذا الموضوع وأخاطبك كأخت لي لو تسمحين والله كأختي.
إنك محظوظة بإذن الله تعالى في أن تقدم لك خطيب ولاسيما وأنه متق الله كما ذكرت..ولكنك لست محظوظة بإفشاء أول سر من حياتكم الزوجية إن وفقك الله فيها..فلا يجوز ذكر مثل ما سردت ..لماذا؟
بغض النظر عن الشكليات من ألبسة و أكسسواراتكم انتم النساء فكلنا نعلم أن الزوجة لاتلبس مثل هذا بعد دخولها عش الزوجية..ويعتبر فقط بريستيج و تفاخر..فإني أنصحك بأن تتوكلي على الله وتدخلي عش الزوجية من بابه العريض كفرحك مع زوجك وتوفيقك في الزواج لا من بابه الضيق من تذمر وشكيات و اعتقادات ما أنزل الله بها من سلطان..
يا أختي إننا في وقت سحر ودجل وحسد و بغضاء مافائدة الحرير والديباج لامرأة سحرت فدمرت حياتها بالمرض والسعي وراء الرقات من بلد لآخر ..أجيبي اختي مافائدة القفطان و التصديرات و و و
اتقي الله في نفسك وخطيبك و اعلمي ان ليس كل مايلمع ذهبا ...فليس كل من يقترح عليك امرا فهو لمصلحتك..
توكلي على الله وادعي ربك ان يعيذك وزوجك من السحر والعين والحسد..اما ماوراء ذلك فهو هين وحلو في وقته.ربي يهنيك..واستسمحك عذرا اختي

[----------]

اختي الناس يهدروا يهدروا حتى و لو لا ينقص شيء راح يلقاو حاجة يهدروا عليها
مالا اذا راكي حابة نععيشي ما تسمعيلهمش ..
الصح في الهناء و السعادة و التفاهم بينك و بين خطيبك ماشي في الحوايج و المادة

[تصفية وتربية]

وعليكم السلام ورحمة الله
أولا أختي إذا أردت أن تعيشي حياة هنيئة فضعي قطعتي قطن في كلتا أذنيْكِ .. الناس العحب وما يعجبهمش وأكيد سيجدون ما ينتقدونه حتى لو أتى لك هذا الرجل بكنوز كِسرى ..
ثم أنت ذكرتِ أن هذا الأخ فقير وأنت تعلمين وضعه المادي فلِمَ يُكلّف نفسه مالا يُطيق؟؟!!
كذلك اختيارك كان على أساس الدين والخُلق فلتثبتي على ذلك ولا تلتفتي إلى سفاسف الأمور .. صدقيني هي بهرجة فقط لن ينفعك لا القفطان ولا البوشات ولا غيرها الصح في دين الزوج وأخلاقه لأنها هي الباقية أما وش جاب ووش ماحابش كلها أمور زائلة . والناس التي تتكلم اليوم بعد يومين سيصمتون لذا فلا تأبهي ..
كلامي هذا أقوله لكِ عن تحربة شخصية ..
ربي يكملك بالخير ويهنيك ويباركلك زواجك أختنا ..

[first first]

يعني السعادة مربوطة في هذاك القفطان لي ماحطوهش في الفليزة
؟



ربي يهنيك ويسعدك والفايدة في حوايج اخرين

[الحنون الجزائري]

حتى السلفيات الزهيدات القنوعات ورجعو يشكو ويبكو من الرجل الفقير
ههههههه الجزائريات ربي يحفظكم عقلية وحدة وتفكير واحد

وبصراحة راكي حبستيلي المخ نتاعي
من جهة تقولي في العنوان : - هل خطيبي بخيل - ؟
ومن جهة اخرى تقول - خطيبي فقير - !

وتزيدي فوق هدا تحطي قائمة الهدايا لي جابهملك , قندورة وصباط وثلاث صابونات
شغل ماعجبوكش وماراكيش راضية وحشمتي بيهم قدام بنات خالاتك
لدرجة غلقتي على روحك في الغرفة وبديتي تبكي !

يا اختي السيد جاء يخطبك وصارحك وحكالك على الظروف نتاعو وماكدبش عليك
والقرار يعود لك .. شوفي نتيا واش راكي حابة
زوج غني ام زوج فقير

ادا السيد هدا شفتيه ناس ملاح وعجبك وعجبتك عقليته وراكي قانعة بيه واش راحلك في كلام الناس ؟
ودا ماراكيش قانعة وتحوسي على رجل مرفه غني او ميسور وهدا ليس عيب
قوليها بصراحة

الموضوع هدا يخصك وحدك لانك صاحبة الشأن
انت صاحبة القرار
اتمنى لك التوفيق

[wardatona]

اختي اني حاسة بالمشكل تعك وبواش راكي تحسي اعلبالي فلول الأمور صعيبة والأحاسيس تتخلط اعليك تكوني لاباس اعليك يبداو يهدرو النسا تتخلط الأمور تبداي تقولي راجلي بخيل ما قيمنيش ما جبليش كيما يجيبو الناس اختي رايحة نحكيلك على تجربتي انا نهار جاو عندي أهل راجلي أول مرة في نفس النهار درنا الفاتحة والله ياختي جابولي غير الخاتم وخاتم عادي انا فرحت بيه لانو من عند الراجل لي خيرني وخيرتو وعايلة زوجي مرتاحين ماديا امي انا شفت لزوجي ولمدخولو وما طلبت منو والو صح عماتي ما عجبهومش لحال وعلقو امي مادرتش اعليهم ولي جي يبارك نعتلو الخاتم وانا فرحانة وراضية المهم الرضى والقناعة وافرحي لي بعتلك ربي راجل كيما حابة ويجي النهار ويشريلك راجلك القفطان ولي خير منو ما تقلقيش وما تفسديش فرحتك بهدرة الناس

[karimtito]

اقعدي تبعي هدرت الناس راها تنفعك او ربي يهديك
ارضاء الناس غاية لا تدرك وخيركم اقلكم مؤونة
لا حول ولا قوة الا بالله ربي يهديك يهدي الي هبلوك

[الداعية لربها]

السلام عليكم

اختي انا ننصحك ما ديريش على حكاتايهم شوفي اذا كان متدين ويخاف ربي وماهوش ناويلك الشر ويحترمك ويخاف عليك اقبلي بيه وارضاي باللي قادر عليه هو ما تسمعيش هدرتهم

وما الحياة الدنيا الا متاع الغرور

على خاطر هذا الحوايج ( المال واللبسة والحدايد ) تروح وترجع ممكن يرزقك ربي معاه وتعيشي احسن عيشة مدريتيش تديه فقير يغنيكم ربي والعكس يعني قادر يكون واحد غني ويبتليه ربي في مالو

قداه من بنات نعرفهم والله العالي شاهد على كلامي ركضو موراء المال و الحديدة وصح داو رجال لاباس بيهم بصح دورك راهم رجعو لبيت بوهم مع اولاد ماشي وحدهم
ولقاو هاك المال كلو بالحرام


أختي استخيري لربك وتجاهلي كلامهم

وربي يوفقك في اختيارك ويسهلك في الاحسن

[الواثق]

لو نعرفو .....لو كان رحت ليه باش يبطل منك......وانت استناي امير او ملك يجيبلك فليزة تاع ذهب................راني سمعت بلي الجهاز ولاو يجيبو معاه قط غالي الثمن ومحني ومسشور ههههههه...............وقيلة نفتح حانوت لتجهيز العراءس بالقطط راهم عرام عندي هههههه..............الله المستعان

[lachiche]

بالاك مسكين معندوش الناس راهي تعيش في ظروف صعبة هذه الايام ربي يجيب الخير ويهنيك معاه ان شاء الله
انت بنت اصل ولي كيفك قليل هذه الايام النساء تقريبا معضمهن يبحثن عن رجل غني ولا يهم ان كان متدين او خلوق
اتمنى لك حياة سعيدة وذرية صالحة

[mohamed ett]

ان كان هذا الشخص سلفي ......
فأنا افهمك طريقة و عقلية تفكير الانسان السلفي.......
هذا الشخص رأى فيك صفات الفتاة المتخلقة و المتدينة فتقدم اليك من الباب الواسع الحلال ارادك زوجة تسيرين معه على طريق الحق المستقيم.....
وهذا الطريق سيفوت عليك كثيرا من ملذات الدنيا المحرمة و الزائلة و ستفوتين كثير من حظوظ النفس على نفسك ...رغبة في ارضاء الله تعالى و عبودية له......
فان كنت ترين في نفسك هذه الفتاة و ترسمين لنفسك هذا الطريق فواصلي معه و اسألي الله أن يبارك لكما و يعينما على ذلك.و ان كنت غير ذلك فقطعي الأمر من الأول ولا تتحملي أمرا يصعب حله مستقبلا...
أما عن حقيقة تصرفه فهو من وجهة نظره سيأمرك باللباس الشرعي بعد الزواج و لا داعي لهذا الباس مستقبلا اذن هذا من التبذير المنهي عنه شرعا ثانيا هذا اللباس تلبسه العروس لحضور الحفلات و الأعراس بعد زفافها تزينا و هو من وجهة نظره لن يتركك تحضرين الحفلات الماجنة المختلطة التي يعصى فيها الله جهارا نهارا .........
ان اردت حلا لمشكلتك تكلمي معه بخصوص هذا الأمر و حاولا أن تتفاهما على كراء هذا اللباس لأجل حفلة زفافك من أجل التصديرة وووو غير ذلك لكن أن تكسبي مثل هذه اللباس المكلف فهذا أمر لا فائدة منه لا فائدة منه

أرجو أن أكون قد أفدتك ووفقك الله و بارك الله لك في زواجك و اعلمي أن هناك فتيات يشتكين من عدم تقدم الرجال لهن و تتمنى أن يتقدم اليها رجل فضلا أن يكون صالحا و الله اعلم

[غربة أهل السنّة]

وعليكم السّلام ورحمة الله وبركاته
أسأل الله تعالى أن يبارك لكِ في خطبتكِ وأن تتمّ الأمور على خير
--------------------------
أختي الفاضلة، أنتِ قلتِ بأنّك اشترطتِ الهناء فقط وأنا لن أشكّك في نيتكِ وأحسبكِ إن شاء الله من الصّالحات
لكن،،، من أين أتيت بهذه الفكرة تع (ماجابوا لا قفطان لا بوشات)
من كثرة ما تردّدت هذه الكلمة على مسامعكِ أثّرت فيكِ أعلم ذلك، فهناك من النّساء من هنّ مثل الشياطين والعياذ بالله، لا يهنأ لهم بال حتّى يرونكِ غارقة في أحزانكِ بدل أن تكوني سعيدة ...
نصيحتي لكِ: أنظري إلى الحياة المستقبلية، الملابس لا تهمّ ثمّ إنّ الهدايا والله رائعة جدّا يعني ما شاء الله كسوة تع دار و عطور وصابون وفوق ذلك مصحف والخاتم أيضا، من المفروض تكوني فرحانة وسعيدة لأنّ الهدايا ما شاء الله ليست بالقليلة
وإذا خاطبوكِ تجاهليهم تماما وإلّا ردّي عليهم بالكلمة الطّيبة و بطريقة تبيّن أنّك سعيدة لأني أعلم أنكِ سعيدة وهم من نغّصوا عليك سعادتكِ
فلا سعادة والله أكثر من العيش مع زوج سلفي، هذا الذّي سيعينكِ على دينك وعلى غربتكِ حتّى وسط أهله
ما تخليش عينك تشوف بعيد بزاف، هناك من أهداها زوجها 30 مليون كمهر! اشترت به طقم ذهب والآن هي في بيت أهلها مع ابنها (وهذه قصّة حقيقيّة)
لا تجعلي نظرتكِ للحياة قاصرة لأنّك ستصيرن تافهة مثل اللواتي يتكلّمن عنكِ
النّاس في كل الأحوال يتكلّمون وكلنا نعلم أن اللّسان من مفاتيح جهنّم والعياذ بالله،، وإن كنتِ لستِ سلفية واقتنعتِ بعد الزواج بارتداء الجلباب والنّقاب ايضا سيتكلّمون عنكِ،، عندما تصلّين سيقولون منافقة، وعندما لا تذهبين لأعراسهم البدائية وحماماتهم الفاضحة سيقولون معقّدة، عندما لا تضعين المساحيق على وجهك -عن قناعة- وتكتفين بجمالك الذي وهبك الله والذي هو أحسن من مساحيق الدنيا سيقولون -غابنة روحها!!!- عندما تضعين حدودا بينكِ وبين إخوة زوجك سيقولون متكبّرة، عندما لا تغتابين معهم سيقولون منافقة إلخ...ممّا نسمعه يوميّا من كلام
وأقول لكِ هذا عن تجربة، إذا بكيتي أمامهم أو تظاهرتِ بالضّعف سيستغلّون الفرصة لإهانتك وإهانة خطيبك وجعله موضوعا في كلّ مجلس
إذن الحل هوأن ترفعي رأسكِ ومنذ هذه اللّحظة لأنّه إذا بكيتِ قد يأتي يوم لا تستطيعين فيه رفع رأسكِ مرة أخرى، صدّقيني النساء غيورات جدّا حتى لو كانت أقرب النّاس لكِ ولو خالتكِ
لذلك اعتزّي بنفسك واعلمي أن الإرتباط برجل صالح راح يخليك تثبتي إذا كنتِ ملتزمة وراح يخليك ممكن تلتزمي أكثر إذا لم تكوني ملتزمة
انسي فقره وامض في طريقك وتذكّري أن هذه صفقة مع ربّ العالمين لن تخسري فيها أبدا وترجع عليك بالفائدة دنيا وآخرة. وفّقكِ الله
أرجو عدم اقتباس ردّي بارك الله فيكم

[مومي23]

المشكل ليس في الماديات
لا يغرنك قولك متدين
تاكدي انه صاحب قلب طيب حنون رؤوف عطوف و لا تحكمي على المظاهر

الماديات تدهب و تبقي انت و هو تعيشان مع بعضكما

[ام كنوز]

انا جابولي طرف كتان وبشماق والحمد لله راني متهنيا معاه هدوك لحوايج ميهموش اقلكن مهراا اكثركم بركة احمدي ربي يامخلوقة البنات راهي تحوس علا ظفر راجل فحل هدوك لحوايج يجيو وروحوا

[nouri.tg]

يالعقل النساء يالعقل النساء يالعقل النساء

[salamsi]

المهم هي أخلاق الرجل وسمعته بين الناس.