انقذوني بنتي في طريق الضياع

[مشكلتي]

ساعدوني بنصايح ربي يحفظكم
بنتي 13 سنة اكتشفت من مدة انها على علاقة بزميل لكنها انكرت ودرت روحي صدقتها وانبتها وحكيت وحكيت وحلفتلي انها ماتزيد تخبي عليا ولاتغلط
اليوم اكتشفت انها مازالت معاه وتتلاقاه وتكلمت معاه في المسنجر
بنتي ربيتها وتعبت عليها علمتها تصلي وتصوم لبستها الحجاب
بنتي متربية وتعرف ربي كفاه غلطت؟؟منعرف رح نهبل
المشكل علبالي كون نواجهها رح تلقى الف كذبة وتبقى في نفس الطريق
نقول لباباها؟؟مايفهم والو وبلاك يقتلها وهي ماتخاف غير منو واول حاجة رح يقلي تبطل قراية
نهدر مع الطفل نهدو؟ وش نقلو
والله يااخواني رح نهبل
كنت مانعة عليها كلش لا نت لا مواقع تواصل لا والو حللتني ودرتلها فيس م صحبتها وكل برقابتي من بعد قلت الضغط يولد الانفجار وسن مراهقة مالازمش نزير لادير حاجة مورايا وصاحبتها وانا في كل مرة نتجسس عليها
ومزالها معاه يعني الموشحات لي درتها والخطب لي قلتها راحت هباء الريح
دبروا عليا وش ندير ؟؟ ماعرفتش
نحكمها نضربها؟منيش ساكنة وحدي يسقسوني علاه؟
نحكي لباباها؟
نسكت ...وهذي مانقدرلهاش
ارجوكم عاونوني ولو بالدعاء
تمنين نربي ولادي على الخلق والدين ونتباهى بيهم عمري ماحطيت نتحط في هذا الموقف

[صـالـح]

قومي بتربيتها على المنهج السلفي وسترين النتائج الطيبة والمحمودة
استعيني بإحدى السلفيات المتعلمات المعروفة بأخلاقها الطيبة
وكان الله في عونكم

[sokalitnin]

قومي بتربيتها على المنهج السلفي وسترين النتائج الطيبة والمحمودة
استعيني بإحدى السلفيات المتعلمات المعروفة بأخلاقها الطيبة
وكان الله في عونكم

اسمحلي اخي راح نرد عليك اولا منهج السلف انشالله نتبعوه كامل لكن المراة تريد حل لمشكلة انية وزيد تجي في نظرك تروح لمراة اخرى تقولها روحي ربيلي ابنتي راني ما عرفتش نربيها.

اختي الكريمة رفع الله عنك ما انت فيه واعلمي ان هناك خطا ارتكبتيه في تربيتك لابنتك فطريقة الضغط على الاولاد دون ما حوار في بعض الحالات لا تاتي ثمار يجب ان يصاحب الشدة حوار وصداقة يجب ان تكونين بمثابة صديقة لها فتاخذ منك الاخلاق والتربية فهما لا حفظا اما فيما بخص الانترنات فانا كبير وواعي لكن لا اامن نفسي في ارتكاب اخطاء.
وفقك الله

[حضنية28]

السلام عليكم
حاولي تقطعي عليها الفايسبوك
كأول خطوة

وهدديها بأبيها لعلها ترتدع
وانصحيها للمرة الاخيرة وحاولي تكوني مرنة شوي في النصح لان الضغط ميجيبش نتيجة
فان لم تستجب فعليك اخبار الوالد

[صـالـح]

اسمحلي اخي راح نرد عليك اولا منهج السلف إن شاء الله نتبعوه كامل لكن المراة تريد حل لمشكلة انية وزيد تجي في نظرك تروح لمراة اخرى تقولها روحي ربيلي ابنتي راني ما عرفتش نربيها.


أحسنت القول أخي الكريم
ولكن لمَ لا تستعين وتشاور غيرها فها هي حفظها الله ووفقها تستعين بكم وبنا لحل مشكلتها فالاستشارة أمرها محمود وطيب
صحيح أن مشكلتها المطروحة آنية كما تقول أخي الكريم ولكن أنا حسب اعتقادي أعطيتها الدواء النهائي لهذه المشكلة ولغيرها من المشاكل التربوية
وكما تقدم من جوابك للأخت الكريمة نعم فالضغط كما قيل يولد الإنفجار
المهم حل المشكلة الحالية يكون بالترغيب والترهيب بالترغيب في طاعة الله والترهيب من معصيته مع ذكر الفوائد والأضرار ونظرة المجتمع وذكر سير السلف الصالح من النساء
وخطوة ... خطوة وبالتدرج وباللين وبالتي هي أحسن
قال صلى الله عليه وسلم : «ما كان الرفق في شيء إلا زانه ولا نزع من شيء إلا شانه »
رواه الإمام أحمد وصححه الإمام الألباني في صحيح الجامع الصغير

[سوسو الطموحة]

ما تخافيش لهذه الدرجة وما تخوفيهاش بالاب ....تولي تقولك عادت ما تقدرليش.....احكميها في وقت تكون مرتاحة نفسيا وابقاي تحكي معاها على كشما طفلة سمعتي بلي راهي تمشي مع طفل و شوفي رايها وقوليلها كون هكذا وامها تفيق بها ...قوليلها انا لمزية بنتي تعرف صلاحها ...و علبالي كون كشما يكون راح تحكيلي ...بصح هذه الام الغلطة فيها ما علمتش بنتها تحكيلها...تولي لاعود بنتك تحكيلك وتحس بيك وتنصحيها...فهميها بلي راه اعجاب ..راه زميل برك ...وان شاء الله نسمع غير اخبار الخير

[ايمان4]

اممم في هذا السن ستحاول اخفاء الامر عنك و هي فترة مراهقة يعني تعتقد انها تحبه و و و
المهم لا مسلسلات و لا نت اصلا اقطعي النت و الهاتف كيف كيف .. و راجعي صداقاتها ادخليها لمدرسة قرانية حتى تحفظ و كثفي برنامجها حتى لا تجد وقتا للهو مثلا بالدراسة و ادخليها لمدراس تعليم الللغات مثل الفرنسية و الانجليزية فهي مفيدة و تحدثي معها و كانها كبيرة لانها في مثل هذا العمر تحس انها صارت امراة المراهقة .. اشتري لها كتبا للتمنمية البشرية و كتبا باللغتين الفرنسية و الانجليزبة و اجبريها على تلخيصهم حتى تتعود

[softech]

سبحان الله نتعجب من آباء و امهات يرمون اولادهم في النار ثم ينتظرون ان لا تحرقهم؟!!!
اختنا الكريمة الخطأ العظيم الذي يقع فيه الاباء هو ترك ابنائهم على هواهم خاصة التلفاز الانترنت و الصداقات
فهذه اكبر اسباب الضياع
اتعلمون انه في الوقت الحالي اطفال يمارسون عبادة الشيطان و يشركون بالله بسبب رسوم متحركة تعرض في احدى القنوات؟
الحل الوحيد الان هو ان تصلي و تدعي بكل اخلاص ان يبعد عن بنيتك شر الاشرار ثم حاولي مع ابيها ان تخصصوا وقتا اكبر لها و تحاوروها وتخرجوها شيئا فشيئا....في بعض الاحيان استعملوا القوة و مرة اخرى اللين و الحوار..ربي يصلح اولادنا اجمعين.

[sarraamina]

السلام عليكم
اختي كان الله في عونك و من وجهة نظري و من خلال تربيتي ارى :
- لو انك واجهتها يمكن راح تستحي و تبعد عن صديقها ايام و متاكدة انها ستعود و لكن تعود بحذر شديد كي لا تكتشفيها .
- لو اخبرتي ابيها هنا طامة بعض اباء جد عصبيين وقد يفعل مالا يحمد عقباه
- من احسن انك تصمتي و تتعاملي معها بحكمة كأن تحاولي ان تمنعيها من مواقع تواصل اجتماعي بحجة الدراسة وليس بحجة عدم الثقة ، حاولي التقرب منها و محاولة فهمها اكثر و انساءها الحب الوهمي الذي هي ضائعة فيه كأن تتفسحي معها و تحكي لها بعض اشياءك الخاصة لانها بهذا شيئ تحس بصداقتك اكثر ، حاولي ان تجعليها تقرا قصص حب فاشلة و قصص خداع و مكر الشباب من غير ان تدري انك تريدين انتي ذلك كأن تدخلي قصة من على منتدى و تتركيها مفتوحة على شاشة كومبيتر لكي تراها ، لان معظم هذه قصص ستجعلها تخاف من الخوض في علاقة غرامية و الاهم اجعليها تخاف من الله اولا و قبل كل شيئ ، و عليك بالدعاء لنفسك حتى تستطيعي انقاذها مما هي فيه و الدعاء لها بالهداية و صلاح قلب و العقل .

[الرحالة المغامر]

أختي الخطوة الأولى مواجهتها بأنك عرفت بأنها لم تقطع تلك العلاقة و أنها خانت ثقتك فيها وأن أول قرار تتخدنيه هو قطع الأنترنت نهائيا يعني حتى ولو الأنترنث موجودة في المنزل لا إستعمال للحاسوب وخاصة ونحن في العطلة لأنها ليست أهلا للثقة وأياك أن تسمحي لها بالدخول له ولو لثانية واحدة والخطوة الثانية هو أمرها بقطع العلاقة نهائيا مع ذلك الشخص وأن أي محاولة للتواصل معه خلفك يعني إخبار الأب وهو من سيتصرف وهي حتما تعرف تبعات إخبار الأب أخبريها أن العلم بلا أخلاق لا تحتاجينه في بيتك لأنها ستشوه سمعتك وستصبحين حديث العامة وأخبريها أن سمعة العائلة خط أحمر وعليك أن تكوني حازمة وأخبريها أنك بمجرد الشك فيها ستقومين بإخبار الأب فورا وبدون أي تردد

[زبدة ذايبة]

أعارض جميع الأعضاء اللي قالولك اقطعي النت واقطعي الصديقات والفيسبوك ووو

الإنسان لما يربي الأبناء يربيهم جتى هوما بنفسهم يتجنبوا هذ الموبقات وهذ الغلطات

وش ديري بتربية بنت أو ولد وتخبيه في قرعة بمجرد مايخرج مايعرف لا حلال ولا حرام

المشكلة في التصرف تاع بنتك أن تربيتكم لم تثمر وماجابت حتى نتيجة

وتصرفاتها هذي هي بوادر سوء التربية

ماتزعفيش مارانيش نسب فيك ولا في باباها معاذ الله

ولكني حابة نبهك لحاجات ممكن ماتكونيش انتبهتي ليهم وانتي تربي

أهم شيء يتربى عليه الأبناء هو مراقبة الله عزوجل وتعظيمه في القلب وإجلاله ومراقبته وأنه مطلع على كل شيئ

بعدها يجي كلش ساهل

التوحيد وما أدراك مالتوحيد

بعد مايتحقق التوحيد بنتك وكل بنت وين ماراحت تبقى على أصولها

حتى وإن تصارعت مع تغيرات مرحلة المراهقة

نجيك للحل بإذن الله

بما أنها على علاقة مع ولد إحتمال كبير تكون تعاند في لبنات

مازالت صغيرة على أمور الحب ومازال ماتعرفش وش هو

90% معاندة بنات وهذا مايعنيش ماشي مشكلة

لما تكوني معاها خليها تشوف لبنات اللي معمرين في الشوارع وهاملين (إلا مارحم ربي) بسبب علاقات مع الذكور

أقنعيها أن نهاية أي علاقة آثمة هي الدمار للفتاة

صاحبيها واقتربي منها مستحيل وانتي بعيد عليها تعطيك سرها

إسأليها عن صديقاتها وعن أقرب وحدة ليها لأنها هي اللي تكون أثرت فيها وشجعتها على هذا

بنتك حابة تجرب وحابة تكون كيما لبنات (صديقاتها)

إذا كانوا صديقاتها سيئات أقنعيها تبدلهم لا بالضرب ولا بالعياط ولا بالتهديد

هي مرحلة تحتاج منك تبصريها بعواقب الأمور

خليها تحط يدها على الحقيقة وعلى نهاية هذا العلاقات

لازم تعرف أنه مامن طريق للرجل سوى الزواج

أنك تغلقي عليها أشياء كنتي فاتحتهم ومسامحة فيهم ماتقدريش الآن دوري عليها لأنها رايحة تبحث على منفذ ثاني وثالث

وممكن تعاقبكم (انت والأب) بطريقة يندى لها الجبين لهذا انتبهي مليح في معالجة المشكلة

حاولي وانتي معاها تعرفي الولد هذا وش يحب من بنتك

ماعندك ماداك لوليد الناس ، تهدري معاه يجي باباه لعندك ويشيع خبر بنتك على حاجة تافهة و مشكلة ماعرفتيش تحليها

وتولي ماراكي بعرضك ولا عرض بنتك

أدخلي معاها في هذا القصة ومنها تعرفي بنتك علاش دارت هكذا

وكيفاش ماخافتش لامن ربي !!!!!!!!!!!!! ثم لا منك ولا من الأب !!!!!!!!!!!!!!!!!!!!!!!!!!

؟؟؟؟؟؟؟؟

كل هذا الجهود اللي درتوها للتربية على الدين لم تثمر = الطريقة اللي اتبعتوها في التربية الدينية ماكانتش ناجعة



لازم تتقربي منها مليح وتعطيها لامان في حكايتها ماتخليهاش وحدها بينها بين هذ لوليد الصغير

وانت حابة تسترجعي بنتك وتحفظيها من الفتن اللي رجال كبار ومتزوجين ونساء لم يستطعن الوقوف أمامها - والمعصوم من عصمه الله-

بعد العطلة رايح يخليها ويكسرلها قلبها الصغير. ماتخليهاش وحدها اقتربي منها وكوني أقرب من صديقتها


من نعمة رب العالمين عليك أن الحادثة جاتك مبكرا جدا حتى تنتبهي

ماتغلقي الفيسبوك ولا النت في هذه اللحظة لأنها ماراحش تجيب حتى نتيجة

وكيما قلتلك ادخلي معاها في حكايتها وشوفي وش كاين. وانت من بعيد رايحة تخسريها

حتى تقدري تعالجي المشكلة من جذورها

ورايحة تقتنع بنتك برأيك إذا عرفتي كيفاش تقنعيها

ملازمش تنساي الجانب البشري فيها وتغيرات المراهقة ودواعيها

لازم تعرفي من المتسبب في هذ المشكلة 13 سنة صغيرة بزااااف على هذا الشيء

ماننكروش عليها الميل العاطفي للولد لأنه طبيعي في هذه السن

اللي ننكروا عليها هو المرور نحو الفعل والأداء العملي لتحقيق رغبة في داخلها لازم انت كأم تعرفيها وشنو هي

ياهل ترى معاندة ؟؟؟؟؟؟؟، أو اقتناع بأنه عادي جدا أن يكون هناك صديق ؟؟؟؟؟؟؟

والإجابة اللي رايحة تتحصلي عليها هي اللي رايحة تحددلك الحل

بعدها انتقلي تدريجيا في ضبط قنوات الإعلام والاتصال في داخل بيتك

وضبط نوعية الصديقات، وهذا بإقناعها بنوعيتهن السيئة واتركيها تغيرهن بمحض إرادتها

لأنك كلما شددتي في الضغط كلما زاد تمسكها بهن

وعاودي ربيها على الدين وعلى التوحيد ومراقبة الله عزوجل في السر والعلانية لأنها تفتقر إلى كل هذا

الدين لايقتصر على ممارسات العبادة والجزأ الأهم فيه هو الأعمال القلبية

ربي يوفقك ويهديك لصلاح أبنائك

[sarraamina]

ربي المستعان اختي و حاولي تقربي والدها منها من غير مايعرف سبب قوليلو هي تحتاجنا في هذا سن و لازم تحتاوها بحبكم و تغرقوها بحنانتكم و ان شاء الله خير

[باحث يتألم]

لم تحسني صحبتها..... جددي علاقتك معا بالصحبة لا غير.... ومع الوقت ستتحدث هي معك حول هذا الموضوع ... وتطلب نصيحتك....
انتهى زمن الضرب والتهديد ووو من العقوبات المعلبة ...... الصحبة بان تجعليها صاحبة لك ومقربة جدا لك.....
يسر الله امرك ...... ووفقكم لكل خير.....

[sarl02]

من كلامك ظهر انك كنتي قاسية معاها في السابق ...واكيد اخنقتيها منذ الصغر حتى انفجرت في هاته السن المبكرة...هي الان 13 سنة متى البستيها الحجاب؟؟اظن انك فرضتيه عليها وهي مازالت ضغيرة جدا ...يعني اغلقتي عليها عالبكري وهاته هي النتيجة ...وابوها يتحمل جزء من المسؤولية انت قلتي انها تهابه لماذا؟؟اكيد انه امبعدها عليه وضاغط عليها ...والواقع اثبت ان البنات في هاته السن عند تعلقهن بابائهن يكون مسارهن التعليمي والسلوكي ناجح جدا....عموما راجعي حسابتك وادخلي اباها في الموضوع لكن بطريقة غير مباشرة ...صاحبي هاته البنت واهتمو بها نفسيا راح اتكون نتائج ايجابية ووفقكم الله

[امة الله5]

هوني عليك اخيتي من سردك للحادثة يبدو جليا انك مفجوعة اخيتي الميل العاطفي غريزي ومن الفطرة لكن ممارسته في اطار غير شرعي هنا الخلل والبنت 13 سنة فالاطار الشرعي غير وارد بتاتا
انا اقول عادي ميولها وليس سلوكها
مند الازل الفتاة تميل للشاب والفرق الان ان وسائل تجسيد العلاقة وتوطيدها اصبحت في المتناول الفيس المسنجر وووو لا اظن ان منع هده الوسائل هو الحل لانها ستجدها في مكان اخر
اختلف عن كل الاراء واقول لك استعيني بالله فوحدنا لن ننجز شيئا
الدعاء والصدقة والاستغفار قد تقولين خرجت عن المشكلة لكن لاحظي معي
الاستغفار قد يكون سلوك بنتك بسبب دنب لك او لزوجك واستغفارك سيرفعه
الدعاء وهو عبادة واستعانة بالله فنحن ناخد بالاسباب والتوفيق من الله
الصدقة فيها فضل وخير كبير
ثم اقول لك اخيتي كوني حكيمة حليمة ولا تهولي الامر فيصعب عليك التحكم فيه ومعالجته
لا للضرب بل الحزم وهو بين الين والشدة فتكوني حازمة معها في الامور الاصلية كالاختلاط والجلوس على النث لساعات والصحبة السيئة واوقات الخروج الى اين ومع من ومتى
صاحبيها واختلقي اسبابا لتجلسي وتتحادثي معها تفرغي لها احضنيها وامدحيها
نحن بشر اخيتي ولا حول لنا ولا قوة الا بالله
وما توفيقي الا بالله لا يكفي الاخد بالاسباب
ربي يهديلك بنتك ويقر عينك بها ويصلحها ويكبرها على الطاعة
ربنا هب لنا من ازواجنا ودرياتنا قرة عين واجعلنا للمتقين اماما

[labed bisen]

اتخليهاش وحدها اقتربي منها وكوني أقرب من صديقتها

[mohamed ett]

كلام الأعضاء كله منصب في اتجاه واحد و هي التربية الحسنة على الدين و المصارحة و اللين في تعليمها المسائل الحساسة و الخطيرة في نفس الوقت...
فلا ينبغي مواجهة هذه المرحلة و هي مرحلة مليئة ببالشهوات و الفتن و صغر العقل باستغباء أنفسنا فأنا مثلا استغرب كيف يسمح للبنت بلبس الضيق و الشفاف و القصير و في وسط مع شباب كذلك كل يستعرض عضلاته و يلبس أحسن الماركان و يتزين بكل الطرق...
السؤال ماذا ننتظر من ابنائنا ...غير الانغماس في براثن المعاصي و الهوى
و أزيدك علما أن ما لم تتطلعي عليه اعظم فهناك مواقع اباحبية و هناك عادة سرية ممكن تؤدي بها الى فقد عذريتها ان لم تفهميها هذا الامر و هناك علاقات شاذة فممكن تسمعي مما هو أعظم من علاقة فطرية ين ولد و بنت ممكن تصير شاذة جنسية وووالى غيرها من الشهوات المتوفرة اليوم على الساحة...
لا يجب ان تخجلي و ان تتغاضي عن هذه الامور كلها بحجة الثقة و ان بنتي و ولدي ليسوا من هذا الصنف....

بالمختصر المفيد...........
حاولي تجربي طريقة عكسية بمحاول جعل بنتك انسانة ذات اخلاق و دين و ذلك أمرها بالمحافظة على الصلاة و ذلك بتنبيهها في كل مرة على صلاتها في وقتها كذلك مسألة اللباس حاولي ان تجعلي لباسها محتشما و ساترا
و حاولي غرس فيها الاخلاق الطيبة و الصفات الحميدة
و هنا مكمن الجرح حاولي الخوض معها في هذه المشاكل التي تعترضها و فهميها بدون استحياء أو حرج...

و اعلمك بتجربة خاصة مررت بها و و الله و تالله و بالله كانت مؤثرة و نافعة بالنسبة لي في حياتي كلها و كانت نصيحة أبوية غالية ساهمت في حفظ مراهقتي و شبابي من الوقوع في الافات
مرة في عمر 14 او 15 سنة وقع لي مشكل في الثانوية ومن تم استلزم تدخل الوالد فأجلسني في البيت و قدم لي نصائح كما يقدمها الصديق في مثل سني و قال لي بالحرف الواحد " يا وليدي لا تتبلى بنات الناس راني مربيك احسن تربية و مانحبش تتعدى على عرض و شرف الناس اذا عجباتك وحدة اتصل بيا أنا نتكلملك مع والديها و ما تيبجليش المشاكل "
صراحة صراحة أثرت فيا هذه النصيحة و الحمد لله لم ادخل في علاقة مع بنت قط بالرغم من اني درست في الثانوية و الجامعة و الحمد لله
بيت القصيد هو أن تحرصي على التربية الدينية و أصلها التوحيد بأن تعلقي ابنتك بالله و تجعلينها تخاف من الله سبحانه لا منك او ابيها او المجتمع و احرص على أداء صلاتها في وقتها و نشئيها على الاخلاق الفاضلة و ذلك بأن يكون الوسط العائلي ملتزما كوضع الكتب الدينية و المطويات في البيت حتى تستفيد مها تلقائيا ادخليها الى مدرسة قرانية الى غير دلك..ولا تنسي أهم سلاح و هو الدعاء
وفقك الله و حفظ لك ابنائك

[وَحْـــ القلَمْ ـــيُ]

راقبيها في الانثرنت والفايسبوك ماتخليهاش دون مراقبة هذا أكبر غلطة درتيها
واحسن شيء انك تعمريلها وقت الفراغ ماتخليهاش وحدها حلي معاها الواجبات وقراي معاها القران ووعيها
الصحبة السيئة لا حول ولا قوة الا بالله
علميها تسعى لامور الاخرة هي اللي تنفعها وعيها بلي رايحة تكون خير من البنات كي تتفوق عليهم في الدين ماشي ف هاذ الامور
يا اختي دعي ربي يردلك بنتك لسواء السبيل
هذا والله اعلم دليل انكم رخفتولها الخيط بزااف حتى وصلت لاهن
لأنو 13 سنة والله دراري كيفاه جاها كل هاذ التفكير؟

علميها تتسابق على الاخرة
ربي يحفظها وايانا من كل سووء

[Yeah]

راي الخاص خلصي عليها فطور و احكي معاها يكل عقلانية

واش الفايدة من كل هاذ الشئ و كل مرة احكيلها على جهنم

يعني لازم وحدها تعرف بلي الشي خطأ زيادة على ذلك ديريها صحبتك ماشي بنتك

[اكرم akram]

شوفي جيبيهالها من اللخر تقوليلها راني رح نقول لباباك وزيدي قوليلها راني رح نهدر مع هاذ طفل ضرك تهدن