داري وحدي ولا طلق

[مشكلتي]

السلام عليكم بعد تخرجي من الجامعة عملت مدة سنتين في التجارة ليل نهار بعد تعب وجهد كبير جمعت حوالي 100 مليون فكرت بالزواج قمت باعادة ترميم منزلنا باكثر من 50 مليون + حوايج الدار اجهزة كهرومنزلية بقيمة 20 مليون واخيرا فكت بالزواج تقليدي وجدت البنت التي كنت ابحث عنها سالت عنها درت الخطبة الفتاحة العرس مقيوم في 50 مليون بعد ان درت في روحي كريدي ب 20 مليون والحمد لله رجعتها بعد عمل كبير قمت به 6 اشهر زواج كانت عاقلة ما شاء الله قبل يومين رفدت الحمل ديتها لدارهم روحت نجيبها قاتلي مانوليش

علاه ؟؟؟؟ دلي داري وحدي

للعلم انا ساكن مع اب وام واخت صغرى فقط ماخصها والو منواض على 9 الماكلة بلا حساب اللبسة كلشي متوفر

الام حنونة لاقصى درجة الاب متقاعد ويضلي برا

قاتلي مانوليش باباها وامها مساندينها في الموقف تاعها باباها بانلي بلي مشي راجل نهائيا ماعندو حتى كلمة

دركا راني نخمم غدوا نتوجه للمحكمة ونطلق ونتهنا باسكو عييت قالك الكرس كي تشبع تقول للراس غني

وفي اليوم التالي ذهبت انا والام والاب تاعي ادخلنا ابوها للمنزل بعد نصف ساعة من الانتظار جات الزوجة تاعي مع امها وابوها باباها فاه نطق قالي كما تقول بنتي قتلو كيفاه انا راجل ولا هي نطقت الزوجة تاعي قالت للام تاعي لازم ديري معايا النوبة في العمل تاع الدار والام تاعي مريضة بالسكر والامراض الاخرى قتلها ياك انتي تنوضي على 9 تاع الصباح والام تاعي دير كلشي انطق باباها قالي المرة الاخيرة راك زيرت عليها قتلو فاه زيرت عليها قالي مراكش تفليكسيلها بزاف ومر اكش تشريهلها لباس بزاف قتلو الله غالب مكانش كيفاه الظروف الاجتماعية صعيبة+ عندها 5 اشهر زواج نورمالمو هي جيب معاها لباس قالي دبر بسيف الله يساهل عليك ايا انا تقلقت قتلو امالا ماعنديش دراهم نروح نسرق قالي واه قتلو بالحرام مراهي داخلة عليا وخرجت مع اهلها وطردونا بعدها راح عمي مع مرتو باه يرجعوها رفضت انها تطلب دارها وحدها ولا ماترجعش ممبعد راح خالي مع مرتو قاتلهم نرجع قالها خالي وجدي روحك غدوا نجي ديك كي راح قاتلو بطلت انا هنا هبلت تمسخير كبير قالي عمي راهي تتوحم اتصلت بها قتلها نعلي الشيطان قاتلي اذا نرجع بشرط قاتلي انا نخدم نهار وامك نهار يعني تخدم نهار وتريح نها قتلها سونطراك راهي عندي ديري نوبة مع اما ايا حلفت عليها مرة ثانية بلي ماهيش داخلة للدار وهددتها بطلاق رجعت في قراراها قاتلي نولي غدوا بعتلها عمي قاتلو بطلت باباها قال لعمي هو يجي يديها ويطلب السماح

روحت انا مع عمي قتلها واش حابة قاتلي نوبة مع يماك قاتلي يما قلها ماعليش قتلها يما راهي قابلة دير معاك النوبة قاتلي اواه لالا داري وحدي ولا طلقني اخاوتي شانقلكم راني كرهت جد الزواج و البنات كامل كرهوني في اول تجربة ليا وزايد بني في كرشها 3 اشهر كرهت انا راجل واحب نبني داري مانيش حاب لعب الذراري هذا وزايد قاتلي اذا ماكش قادر دير الدار انا نخدم ونكري معاك ولا نرجع لداركم مي نخدم المهم نولي نخرج وندخل من الدار ايا قولولي شا ندير والله صابر في خاطر ابني الي مزال ماشفتوش والله ماهي هكا الحياة بنات دركا سمحولي مشي هكا

[afrimat]

سلا اخي
ليس لديك مشكل هذه اشياء بسيطة تكون في اول الزواج راني لاحظة انها تتصرف با تعجرف اصبر عليها اخي و عندك عندك لا تخمم في باب الطلاق لانها مزالت صغيرة حسب ما فهمت من طرحك حاول تبتعد عليها مدة وربي يجيب الخير
اخي انا صراتلي مع والديا عندي بابا طلق امي بعد عشرة تاع 39عام انا الكبير في الدار صدقني اخي تعقدت في هذا الطلاق لانو واحد ما دخل في الفاميلا تاعنا و درك عائلتنا تشتت و تفرقنا
مانزيدكش اخي و نقلك اصبر عليها و الله فيها الخير اصبر.

[مراد سابقا]

انا 35 سنة ومستحيل نخمم نزوج في الجزائر مع الأشكال هذو

نصيحتي لك طلق مادام كلش متوفر وهي تقولك بغيت نخدم صافي فيها بزاف المعاني

الطفل مازال مشفوتش طلق خير ما تولي يولد وتشوفوا وتولي حاصل اكثر

[الرميصاءْ]

ربي يفرج عليك ان شاء الله

[حضنية28]

السلام عليكم
نصيحة اخي زيد حاول معاها
واخر حل تفكر فيه هو الطلاق
للاسف بعض الوالدين ربي يهديهم يكونو سبب في هدم البيوت

[omayoub2]

نصيحتي لك طلق

[حسان عبد الرزاق]

إن أبغض الحلال عند الله الطلاق ونصيحتي لك بكل صدق طلق

[ثلجَة]

أصبر يا خويا

حاول معاها بالتي هي أحسن ولا تدري لعل الله يحدث بعد ذلك أمرا

فكر في ابنك قبل كل شيء

و العجلة من الشيطان

رب يكون في عونك

[aymen01]

انت لي راك عاطيها قيمه كل دقيقه تبعثلها واحد و تحاول فيها

خليها ماتسقسي عليها ماوالو

قولها رايح نطلقك درك ترجع وحدها و بلا شروط

[vanity]

اصبر عليها أخي ولا تتسرع الطلاق ليس لعبة و آخر الدواء الكي كما يقال.
ولا تنسى أخي أنها حامل في 3 اشهر الأولى و تصبح المرأة الحامل خلال أول فترة من الحمل أكثر حساسيّة؛
بسبب التغيّرات الهرمونيّة في جسدها،
فيمكن أن تغضب و تتأثر من أمور بسيطة تواجهها، وتزداد رغبتها في البكاء
هناك نساء عند الحمل يكرهن أزواجهن ولا يتحملن النظر أو الجلوس معهم وهناك نساء يشعرن بالاكتئاب و أمور اخرى كثيرة
هذه الامور تحدث بسبب التغيرات الكبيرة التي تحدث في جسد المرأة خلال فترة الحمل
نصيحتي لك أن تتركها بعض الوقت عند اهلها والله اعلم

[ام شفيق]

ابغض الحلال عند الله الطلاق ما تتسرعش يا اخي الوحم هبال و يدير كلش خاصة الاشهر الاولى و كاين الي يستمر معاها 9 اشهر انت ابتعد عليها هذه الفترة و ابعثلها واش تحتاج الضروريات فقط باش ما يقولوش فرط فيها و في وليدو خليها تكمل وحمها في دارهم و عزز روحك شوي حتى تعيطلك انشاء الله و تقولك ارواح تديني بدون اي شروط

[نار الشوق]

علاه كل العنف هذا؟؟؟

الحياة الزوجية لازمها صبر خاصة في السنوات الأولى

أنصحك بالتحدث مع زوجتك على انفراد بهدوء، ماشي مباشرة تخممو في الطلاق

حوس تعرف وش مضايقها، وراعي فترة الوحم، بالاك تجوز هاد الفترة ترجع لطبيعتها

(اقرا على فترة الوحم والتغيرات لي تحدث فيها)

[نار الشوق]

السلام عليكم
نصيحة اخي زيد حاول معاها
واخر حل تفكر فيه هو الطلاق
للاسف بعض الوالدين ربي يهديهم يكونو سبب في هدم البيوت


عليكم السلام ورحمة الله

أوافقك الرأي تماما

أنا شخصيا ضد تدخل أي طرف بين الزوجين

التدخل يكون من شخص حكيم ، وإذا كانت مشكلة جدية ماشي أمر بسيط كيما هادا دخلو الوالدين والعم والخال ووو

ربي يجيب الخير

[كنزة88]

ظاهرا تتوحم عليك خويا راحا تجيب زيك هههه . على كل خويا متتسرعش فالطلاق بعد روحك شوي وشوف تراه ادا ملقيتلهاش حل تما وخمم فالطلاق لانو صعيب خاصة علاجال وليدك لي مزال حتى مشتوش حرام يعاني قبل حتى ميزيد . وتقبلو مروري . وسايرها بلاعقل لانو على حساب هدرتك مزالها صغيرة ومتعرفش صلاحها.

[فاطمة ياسين لخضر]

شوف خويا خليلها الوقت برك خليها تتوحم وتكمل الحمل وماتعيط ماوالو
وعندما يحين وقت الولادة او قبله بوقت سوف تأتي لوحدها رغما عنها ستاتتي لتلد في بيتها
واذا بقيت على حالتها في العصيان قادر تطلق وتهددها ان حقها بعض الطلاق ماتديهش لأنها تركت دار الزوجية هددها انها ماتأخذحتى فلس وانك ستأخذمنها الولد وسوف ترجع
الله يجعل بينكما المودة والرحمة وربي يخزي الشيطان لي راه بيناتكم

[salamsi]

انت لي راك عاطيها قيمه كل دقيقه تبعثلها واحد و تحاول فيها

خليها ماتسقسي عليها ماوالو

قولها رايح نطلقك درك ترجع وحدها و بلا شروط
meilleur réponse bravoooooooooo

[محمد جديدي التبسي]

اسمحلى ان الومك أخي انت اخترت فتاة لجمالها ربما ولم تنظر لوعيها ونضجها وغاب عنك ان تعرف ابنة من تكون هل ابوها رجل حقيقي يقف مع الحق ام هو رهن كلام النساء في بيته؟؟
هذه أمور لابد ان تعرفها قبل الخطبة لكن هذا الكلام فات وقته وهو مجرد لوم
أتعجب ممن ينصحك بالطلاق ويكتبها هكذا بسهولة وكأنه يعرفك عن قرب
الطلاق هو آخر ما يمكن ان ينصح به في مثل حالتك لأن زوجتك حامل
واكيد هي في فترة وحم ولا يمكن ان يكون معقولا الطلاق في هذه المرحلة
انتظر حتى يأتي ابنك ربما يكون هو السبب في لم الشمل وعلاج المشكل
وبما انها بعيدة عنك ستفكر كثيرا وتعيد حساباتها ولن تجدها الا خاضعة لشروطك وموافقة على العيش مع اهلك
حتى موضوع العمل هو مجرد ثرثرة ستنساها بمجرد ان ترى مولودها وهو بحاجة لرعاية فائقة في عامه الأول
المطلوب من والدتك ان تكون عونا لزوجتك في هذه المرحلة ولا تصب الزيت على النار
ربي يصلح احوالكم.

[amira19]

اسمحلى ان الومك أخي انت اخترت فتاة لجمالها ربما ولم تنظر لوعيها ونضجها وغاب عنك ان تعرف ابنة من تكون هل ابوها رجل حقيقي يقف مع الحق ام هو رهن كلام النساء في بيته؟؟
هذه أمور لابد ان تعرفها قبل الخطبة لكن هذا الكلام فات وقته وهو مجرد لوم
أتعجب ممن ينصحك بالطلاق ويكتبها هكذا بسهولة وكأنه يعرفك عن قرب
الطلاق هو آخر ما يمكن ان ينصح به في مثل حالتك لأن زوجتك حامل
واكيد هي في فترة وحم ولا يمكن ان يكون معقولا الطلاق في هذه المرحلة
انتظر حتى يأتي ابنك ربما يكون هو السبب في لم الشمل وعلاج المشكل
وبما انها بعيدة عنك ستفكر كثيرا وتعيد حساباتها ولن تجدها الا خاضعة لشروطك وموافقة على العيش مع اهلك
حتى موضوع العمل هو مجرد ثرثرة ستنساها بمجرد ان ترى مولودها وهو بحاجة لرعاية فائقة في عامه الأول
المطلوب من والدتك ان تكون عونا لزوجتك في هذه المرحلة ولا تصب الزيت على النار
ربي يصلح احوالكم.

ونعم الرد .....بارك الله فيك

[ALHIKMA]

يا اخي زيد تحمل شوية وديرلها دارها وحدها
اذا كنت تحبها فلا تفرط فيها
ربي يجيب الخير

[hodayena]

ايه يا جزائر روحي بالسلامه علابيها نقول واش راه صاري اول نصيحه طلق بوه
اخي انت نفق عليها عادي وخليها تفوت 9 اشهر في دارهم بلاك الوحم ومكلاه الهدرة الزايده تع مكانش منها
مور ال9 اشهر وتبرد الدودة ديالها تم تحكو بعقلانيه
اما تسمع لهدرة طلاق نقول الي ماشي موالف المسؤوليه هو يقول طلق
اعتبر هدا ابتلاء وادعي ربي وربي يفرج عليك
متبقاش تحلل فيهتا وتبعت ليهاا الناس خليها ومور الولاده حكي تاني
والي قالك طلق قبل مايجي الطفل نقولو زهينا بسكاتك قل خيرا او اصمت
ادي ايمام صالح وقول يهدر هدرا الي تخوفها اويقولها بلي ادا بقيتي ناشز الدين يسمحلو يتزوج عليك وربي يغضب عليك وووووووو
المرة تسمع الراجل راح يتزوج تجي تجي وكي تولي لدارك عود اديها انت ورجعا
وربي يكون في عونك ومتحكيش لمن جات حكايتك ماشي كامل يحبو الخير انت درت الي عليك وادا مو هدا الشي ومجاتش خليها في دارهم ابعتلها مصروف في البوسطا وخليها ترجف

[kada20097]

صلي صلاه االاستخااارة و اكثر من الدعاااء .. وش نقلك اهل مكه ادري بشعبها انت قيس فكر خمم مليح ربي يجيب لي فيه الخير

[hich1988]

قوللها نتزوج بمرا ثانية و ديري معاها النوبة 'نهار بنهار

[afrimat]

هدا هو القصف العسكري و رد صائب