اريد الحل

[مشكلتي]

السلام عليكم بعد تخرجي من الجامعة عملت مدة سنتين في التجارة ليل نهار بعد تعب وجهد كبير جمعت حوالي 100 مليون فكرت بالزواج قمت باعادة ترميم منزلنا باكثر من 50 مليون + حوايج الدار اجهزة كهرومنزلية بقيمة 20 مليون واخيرا فكت بالزواج تقليدي وجدت البنت التي كنت ابحث عنها سالت عنها درت الخطبة الفتاحة العرس مقيوم في 50 مليون بعد ان درت في روحي كريدي ب 20 مليون والحمد لله رجعتها بعد عمل كبير قمت به 6 اشهر زواج كانت عاقلة ما شاء الله قبل يومين رفدت الحمل ديتها لدارهم روحت نجيبها قاتلي مانوليش :confused::confused::confused::confused:

علاه ؟؟؟؟ دلي داري وحدي :mad::mad::mad::mad::mad::mad:

للعلم انا ساكن مع اب وام واخت صغرى فقط ماخصها والو منواض على 9 الماكلة بلا حساب اللبسة كلشي متوفر

الام حنونة لاقصى درجة الاب متقاعد ويضلي برا

قاتلي مانوليش باباها وامها مساندينها في الموقف تاعها باباها بانلي بلي مشي راجل نهائيا ماعندو حتى كلمة

دركا راني نخمم غدوا نتوجه للمحكمة ونطلق ونتهنا باسكو عييت قالك الكرس كي تشبع تقول للراس غني

[nihade off]

ياااا بالعقل كيفاه من المشكل الاول تطلق؟ الناس تصبر بالاعوام
و انت قلت بلي 6 اشهر و هي عاقلة يعني ماهيش تاع مشاكل
الناس كامل تحب تستقل و هي راهي تجرب في حظها صلحت صلحت ماصلحتش تحاول المرة الجاية
انت ماعليك غير تروح و تهدر معاها و تقولها واش قلتنا بلي كلش متوفر و الاوضاع مريحة و شوف الاسباب اللي خلاوها تطلب هاد الطلب الغريب في نظرك
ماتنساش بلي انت الرجل يعني عقلك كبير و بالك اوسع و قراراتك لازم تتسم بالحكمة
موفق
سلام

[- بصمة خير -]

هذه حابة تحكمك بالحمل
تقولك الحمل يخليه يديرلي واش نحب

ما طلقهاش
مش من اول مشكل و حتى لو تعاود الزواج تكون في مشكل اخر

لالا لكن لازملها العين الحمرا
تفهمها
قول لباباها دار بنتك تعرفها
و اذا تحب صلاح بنتك رجعها لدارها

لكن ما تفكرش في الطلاق
مش حل
راك تهرب من المشكل
مش تحل فيه

هذه هي الفرصة تاعك حتى تفرض نفسك عليها
و حتى هي تخاف في المستقبل من التصرفات الهمجية تاعها و تتعلم ما تسمعش للناس

الله يوفقك
و الله يسخرلك زوجتك
و يصلحك عائلتك

[*سندوسة*]

خويا نصيحة ليك ساعف شوية مدام قلت انها عاقلة يعني مرتك وتعرفها حاول تحكي معاها بالعقل وحاول تفهم منها واش راه مقلقها من بيت اهلك

وهاد الفترة نتاع الحمل شوية صعيبة

وادا اصرت على موقفها خليها تريح يامات تولي هي تعيطلك باش تديها

وخلي امر المحكمة

صبرو شوية على بعضاكم

علاه راهي تجيكم كلمة طلاق ساهلة
ربي يهدي سركم ويجمعكم فالخير وان شاء الله مايكون غي لخير

[karimtito]

ربي يجيب الخير لا تتعجل في الطلاق لعلها ترجع الى رشدها
بنات هادا الوقت تحوس على الدار برك ميهمهاش الراجل الي يخمم
في والديه الي تعبو عليه وةرباوه وكبروه ثم تاتي هاته لتقول
اريد مسكني الخاص لاا حول ولا قوة إ‘لا بالله ولمحزن
في ذلك انا ابويها يساندنها على ذلك وش نقلك حبيبنا
اصبر لعلها تراجع نفسها ذكرها بالله سبحانه وتعالى
ذكرها ان الله امرنا ان نهتم بالوالدين ونرجع فضلهما
لا ان نتركهما يعانيان مع الكبر
متتسرعش - فكر مليح --- ولال تفرط في الوالدين


ربي يجيبلك الخير خويا

[المهاجرة لربها]

لا حول و لا قوة الا بالله العلي العظيم و الله يا اخي ربما انت من الرجال الذين تفخر والديهم بهم نعم التربية اعجبني احساسك بانك مسؤول عن اباك وامك و اختك و لن تتركهم مادمت غلى قيد الحياة اعجبني فيك شجاعتك و تمسكك بهم هم من سهروا على تربيتك احسن تربية و الدليل على قولي فعلك هذا هم من جعلوا منك رجلا من خير الرجال على ما اظن و يبدو لي انك ابدا لن تكافأهم عكس ما قدموه لك
احيي فيك اخي حبك لوالديك و اختك و عدم تخليك عنهم بارك الله فيك و انار دربك والديك و الله و هم كبار السن الان احوج اليك من اي فترة مضت من حياتهم لا تتركهم ارجوك و افعل المستحيل كذلك حتى ترضي زوجتك و ان تحل المشكلة ففي المقابل سترزق بطفل ان شاء الله و لا نرضى له ان يعش حياته من دون اب
انا محتارة بشأنها مادام كما قلت متوفر كل شيء عندها ووالداك لطيفان و اختك صغرى اي انها في وسط عائلة محترمة لما كل هذه المشاكل

الطلاق ليس الحل الامثل و النهائي ربما توجد هناك الكثير من الحلول و ذلك حسب تفكير و منطلقات زوجتك تفاهم معها اكثر و ضعها في صورة ما اذا رزقها الله بولد و كبر و تزوج هل بامكانها ان تتركه يغادرمع زوجته و هل ستسطع العيش من دونه كذلك ساقترح عليك حلا اخر اذا كان ممكن و توفر طابق اخر في بيت اهلك اجعل هذا الطابق لها اي انها ستكون مستقلة عن اهلك و هذه كانت رغبتها اليس كذلك المهم ان لا تخرج عن اهلك انا لا اشجعك على ذلك صراحة لا اريدك ان تفارقهم و الله لانني احس بهم و بشعورهم كذلك انت احق بان تطلب من زوجتك الرجوع الى المنزل و ان تمهلها وقتا ربما من الضغط بسبب الحمل تتصرف تصرفا ليس واعيا اعلمها بالامر ان كنت حقا لا ترغب في ترك والديك انك غير راضي عن هذا التصرف و اجزم في الامر بانك لن تتخلى عن اهلك و اوضح لها جيدا رايك بخصوص هذا الامر
على ما اظن ان هذا كله ابتزاز يا اخي فهناك من النساء من يتعمدن فعل هذا خاصة و ان تقدم لك حملها نقطة قوة لها و نقطة ضعف منك هي فقط ارادت ان تعلم برايك اظن انها لن تستطيع ان تتطلق منك فقط ارادت اخافتك فاستعملت الحمل غاية و سببا و حجة لا اكثر

انصحك بالتفاهم فبل ان تفعل اي شيء و تندم عليه قرارك سيصنع مصيرك لا تتعجل و صلي صلاة الاستخارة ما خاب من استخار لله و فوض امرك كله لله توكل على الله و ادعو له لعلى الله ينظر في امرك يا اخي وفقك الله اخي كل التوفيق و ثبتك على الحق و سدد خطاك و انار دربك و ازال عنك الهم و الغم و ارشدك طريق الحق

[الأصيــل]

كلمها على اساس تعطيها مهلة معينة يوم او يومين او ثلاثة ولا تزيد واذا لم ترجع فهددها بالطلاق لكن لا انصحك به وانما تهديد ولا تعاود الاتصال بها وشوف النتيجة

[Om mimi]

ربي يسترنا و يستر بناتنا حقيقة الأحوال تبدلت كانت البنت تصبر من اجل زوجها والآن الكل يشكي منهم لاتفه الأسباب تبدأ الفتاة بطلب البيت المستقل دون الخوف من الطلاق نصيحتي زيد اصبر و زير و شوف و أيضا قدر فترة الحمل تتغير فيها طبيعة المرأة ماتحكمش عليها الان

[قدور بن عاشور]

هذي باينة يماها تحرش فيها، تكلم معها راس راس و هددها بالطلاق و أنك من غدوة تعاود الزواج وأنك تبني حياتك من جديد و أن الطفل سيعيش يتيما بسبب حماقتها.
فقط هدد و لا تنفذ، و لا تحدد أجلا حتى ماتحكمكش به، و لا تسأل عنها بعدها، خليها هي تعيطلك

[amira19]

ههههههه واحد فيكم ما خمم ف الوحم يا اخي المرا كي تعود تتوحم تقدر تكره راجلها و دارها و تتصرف بهستيرية ههههه

المهم نعطيك حل بسيط و سهل و نتمنى من النسا يسمحولي لاني كشفت سر انثوي هههو ربي يعلم بلي غايتي انو هادي الاسرة الصغيرة ما تتفككش
المهم خليها ف دارهم حتى تشبع بيهم و ما تعيطلهاش اطلاقا يعني تجاهلها لانو نقطة ضعف اي مراة هي الاهمال
صدقني بعد مرور عدة ايام راح تتوحش دارها و تكره من دارهم و تعيطلك ههههه
بالتوفيق اخي و ربي يلم شملكم
كاينة حاجة اخرى ربما كاين سبب مضايقها بزززاف خمم ف الاسباب و حاول تعالجو بينك و بين داركم

[beybey]

السلام عليكم الله اولا احييك على حبك و احترامك لاهلك وارجو ان تتمسك بهدا الموقف و الله يعينك علي هدو انساب لي تلاقيت بهم و اصعب نقطة في حالتك كون ابوها عديم الشخصية و المسوولية لكن تمسك بفكرة المحكمة كتهديد ولا تطبقه هده الزوجة راها تسي في روحها .و ماننساوش اخي باه نعطوها حقها ممكن انه مرحلة الوحم جاتها صعيبة وانت زير روحك معها ما تحللهاش العين خليها ايام او شهور ما تعيطلهاش تولي هي تجري موراك

[first first]

المحكمة والطلاق اااااااااااااااااااااااااااااااااااخر الحلول وماشي من اول مشكل وبعد ايامات زواج تهرولو للمحاكم؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ربما مسالة تاقلم وحسب
منك شوية شبح شوية تفهم وربما ترجع المياه لمجاريها.
ربما صغر سنها ربما فترة الحمل ربما هي انسانة لاتتاقلم بسرعة .......................الله اعلم اسبب .............يعني يبقى شيء ايجابي في الموضوع انها لم تطلب الانفصال بل طلبت الاستقلال ببيت
رغم ان الطريقة ومساندة اهلها لها لم تتقبلها وكثيرون لايتقبلونها ................لانلومك في ردة فعلك

ربي يهدي النفوس ويبعد وساوس الشيطان
خلي عقلك كبير ...................والطلاق من اول مشكل حل يريحك سريعا راحة مزيفة وعقباته وخيمة .............براي احدفه نهائيا من مخططاتك

[zalamite]

اخطيك من الهدرة هدى اصبر و لا تتسرع في الطلاق ربما هناك من دفعها لهدا التفكير او اعراض الحمل اترث على تخمامها روح بلعقل ...و تحلى بالمسؤلية و خمم في المولود الدي سياتي لهده الدنيا اليس له الحق في العيش قى كنف ابويه ..دعكم من الانانية تفكروا غير في روحكم...

[جنى الجنتين]

سلام يا اخي الكريم من الواضح انها تريد ان تمارس الضغط عليك كونها حامل مسكينة ههههه

اما قضية نسابك لي جاو ضدك راني معاك بوها مشي تاع كلمة ياحسراه على التراريس بكري كان الراجل يحكم مي درك الا ما رحم ربي النهار 1 يحوس يليكيدي و دوك دير دار

لا لا يا اخي خصوصا انك صرفت على داركم 50 مليون ترميم انت شد ف الموقف تاعك واذا خشنت راسها كاين المحكمة و كاين الف وحدة خير هاذي راهي تتقلش على

النعمة لي راهي فيها بنات الفاميلية طاحو ف l équipe nationale و صبرو الله يعينك

[زبدة ذايبة]

جابلك ربي فرصة تبين روحك قدام نسابك أنك راجل

وأعتقد أنك كذلك -ماتتصورش شحال فرحت كي كنت نقى في إنجازاتك ماشاء الله تبارك الله- ربي يوفقك

ومثل ماقالتلك العضوة بنفسجية

أنا نوافقها الرأي

ماطلقهاش

هي تحوس تعفسلها على راسها باش تولي للطريق

هذا وش راهي تحوس

كي ضمنت الحمل قالت مايطلقنيش ويديرلي وش نحب

وإذا ححلنا تصرفها هذا تلقى أنه ضمنيا هي خايفة من انفصالها عنك الدليل تظن أنها ممكن أن تنجو من الطلاق بواسطة حملها

أنت ماتكترش الهدرة معاها ومع باباها قوللهم الدار تعرفوها كي تحب بنتكم ترجع. الدار كاين وحدة ماشي زوج

وماتسقسيش عليها نهائيا خليها. معندها مادير كي شبعت طمعت في أكثر مماهي فيه

ثانيا

حتى إذا فكرت طلقها راك رايح تبحث على زوجة ثانية ماتعرفش روحك فاش الطيح

الصبر وكون حازم بالاك تتراجع على موقفك

وحدها هي رايحة تضغط على دارهم باش تولي ليك

مايطولش الوقت ويسقسيوها الناس علاش مارجعتيش لدارك

ويبدى القيل والقال

ونظن هي مارهيش رايحة تصبر عليك فترة طويلة

يبان الأمر هذا طمع من أهلها مع سوء أخلاقهم

عوض ماتضغط هي عليك. انت أضغط عليها وعلى أهلها بتركها

حاجة وحدة برك ماتوليش للوراء إذا قررت تخليها

يعني لااتصال ولا سؤال وكأنك غير موجود وماتردش على اتصالاتها

حتى يجو أهلهايحللوك. وراهم رايحين يجو ماعندهم مايديروا بيها بعد مازوجوها

الطلاق يا أخي عمرو ماكان حل

الطلاق مشكلة جديدة وياريتها كانت بسيطة

إذا تزوجت بـ100مليون

الطلاق راح تدفع ثمنو حياتك كامل

كون راجل وكون حازم في قراراتك

ماتديكش العاطفة للرضوخ لمطالبهم وماتديكش العاطفة للرضوخ لفكرة الطلاق

تسحق تزيرها برك باش تحكم بلاصتها

ومن جهة ثانية دارهم يعرفوا شكون راجل بنتهم

من هذي مايزيدوش يدخلوا نهائيا

نتمنالك كل التوفيق

[أم سلوى]

اضن ان الاعضاء..وفوا وكفوا
المهاجرة الى الله اولهم

[خالد عنابي2]

الطلاق هو اخر حل تلجأ اليه في الحالات الاضطرارية والقصوى بعد فشل كافة الحلول الاخرى الاخف منه

لعلها تعتقد انها لما بالحمل حكماتك من يدك لي توجع ما تبينلهاش بلي راهي ماثرة فيك ومخوفاتك

وفي نفس الوقت حاول ان تفهمها باللين والحكمة ان هذا الشيئ ليس في مستطاعك حاليا وقد يتغير مستقبلا

وخليها تريح ايامات في دار والديها ترتاح منها راحة وعطلة ومنها تعاود حساباتها وحدها وتفهم روحها

[طيور الجنان]

اخي الطلاق ماشي من اول مشكل واصلا مشكلتكم ماشي تاع طلاق.
اولا ممكن تكون من الحمل لان المرحلة الاولى من الحمل ( الوحم) صعيبة شوية ساعفها.
ثانيا لازم تبينلها بللي انت اللي تتحكم ماشي هي روح لدارهم و احكي مع باباها رجل لرجل قولو بنتك ماشفت حتى سوء في دارنا حتى تطلب دارها وحدها ووالديا مانخليهمش هذي هي هدرتك الاخيرة و روح وخليها تخمم مع روحها اكيييييد راح يجي نهار وتلقى باباها جابها او تعيطلك و تقولك ارواح ديني نروح.

[عثمان الجزائري.]

السلام عليكم، و أهلا بالرجالة، واش نقولك صاحبي كي قريت حكايتك قلقت و طلعلي الضغط بعد ما الإنسان يتعب و يطيح و ينوض باه يزوج يعتقد بلي النعيم سيكون في باقي حياتو لكن هيهات فسنة الحياة هكذا نبقاو نطيحو و نجاهدوا حتى للأخير، المهم التفاهم من الأول يعتبر مهم جدا لتفادي المشاكل، من الواضح أنها كانت تعلم انك ستسكن مع والديك منذ البداية و قبلت، يعني ضمنت راجل و من بعد بدات تضغط عليك، سيناريو يدور في رأسي و هو حوار دار بينها و بين أمها مثلا لازمك ما تعبيش روحك آبنتي و ما تخدميش عليهم كون جيتي بدارك وحدك نجي نعاونك مي الله غالب ما نقدرش نجيك....مجرد سيناريو و ليس إتهاما للأم ، المهم أنت دير روحك مهبول و خليها تريح عند باباها بين القوسين ماماها لانو لوكان جا باباها او شرفنا برجولتوا ، المهم لي يهمك هي زوجتك حاول بأي طريقة ترجعها للطريق، لا اريد ان ارعبك لكن يجب عليك ايجاد طريقة لردعها و اتمنى ان لا تكون صغيرة في السن فمثل هذه الافعال لا تصدر من بنت واعية، قد أكون صريح زيادة لكن قضية الوحم لا تمر عليك فكلنا يعلم أن زوجتك هي الحامل و ليس أبوها أو أمها فلو سلمنا جدلا أن البنت تأثرت بالحمل فهذا لا يؤثر على الأب أو الأم، أردت فقط وضع النقاط على الحروف إذا إستعصت عليك الأمور فإستنجد بكبار العائلة من الطرفين يقولوا ناس بكري لي ما عندوش كبيروا ما عندوش تدبيروا.

[النجمة القطبية]

شوف يا اخي المراة ترقد وتنوض وفجاة تفكر داري وحدي رغم كل الاتفاق امر غير ممكن وميدخلش للراس !!!
اكيد عندها افكار في راسها وعندها اسباب من وجهة نظرها منطقية
الافضل يا اخي انو تناقش زوجتك وتحاول توصل لافضل الحلول حتى لو كلفك الامر تتنازل شويا
يعني مثلا ادا كان مبررها انها تحب تلبس وتتدلل وتحس براحتها في الداراو انها تحب تطبخ لزوجها ما لد وطاب يكفي في اصعب الاحوال وان عجزت على اقناعها انك توعدها تبنيلها بيت ومطبخ وحمام وتكون حرة كما تريد
لانو المنطق يقول انو في حالتك مستحيل تخلي الام والاب وحدهم ولازم تفهمها هدا الشئ !!
وخلينا من ابوها وامها لان هادوك الفتاة تقدر تقنعهم باي شئ فلا تتسرع
مرة صديقة لي قدمت لي نصيحة قبل زواجي قالت لي اياكي ثم اياكي تحكي لداركم لحظات الغضب بينك وبين زوجك لانو في لحظات الغضب المراة بطبعها تبالغ في السرد والتضخيم والاهل لانهم عاطفيين ويميلون بحكم العاطفة الابوية للبنت ممكن يكرهو الزوج ويحقدو عليه لانو من وجهة نظرهم ادى بنتهم والبنت تنسى وترجع لزوجها والاهل مينساوش !!!!
مالا النقاش مع البنت وليس اهلها
ثم متنساش نقطة مهمة انها حامل واكيد تتوحم والله اعلم كيفاش يجيها الوحم
انا شخصيا مريت بتجربة صعبة مع الوحم اني نكره نقعد في الدار ونحس بالنفس يضيااااق ويكاد ينقطع ونحب نقعد برا قدر الاستطاعة وزوجي مفهمنيش وحسبني ندلل !!!!!
ومرة التقيت امراة حامل وعروس جديدة قاتلي نحس روحي كرهت ناس داري ومنحبش نشوفهم !!!!!
وكاين اللي تقول كرهت راجلي شخصيا
هده الامور ممكن تبانلك غير منطقية بصح الحقيقة انو الحمل ترتفع فيه نسبة الاكتئاب والوسواس والقلق بسبب هرمون الحمل وطبيعي انو تصرفات المراة تتغير وتولي حساااااااسة وتغضب لاتفه الاسباب ويقل عندها الصبر
مالا ساعف مرتك واصبر عليها واوقف معاها في محنتها
روح شوفها وناقشها وتحكم في اعصابك واخطيك من العنف لانو حتى لو تزوجت الف مرة ستواجه نفس النتيجة وستسمع نفس الكلمة يوما ما == ديرلي داري وحدي == وستواجه نفس الشبح وهو الوحم
ابحث عن حل وسط وخلي فترة الوحم تمر بسلام وهي عموما لا تتجاوز ثلاث اشهر عند الاغلبية
ربي يوفقك ويلم الشمل

[النجمة القطبية]

السلام عليكم، و أهلا بالرجالة، واش نقولك صاحبي كي قريت حكايتك قلقت و طلعلي الضغط بعد ما الإنسان يتعب و يطيح و ينوض باه يزوج يعتقد بلي النعيم سيكون في باقي حياتو لكن هيهات فسنة الحياة هكذا نبقاو نطيحو و نجاهدوا حتى للأخير، المهم التفاهم من الأول يعتبر مهم جدا لتفادي المشاكل، من الواضح أنها كانت تعلم انك ستسكن مع والديك منذ البداية و قبلت، يعني ضمنت راجل و من بعد بدات تضغط عليك، سيناريو يدور في رأسي و هو حوار دار بينها و بين أمها مثلا لازمك ما تعبيش روحك آبنتي و ما تخدميش عليهم كون جيتي بدارك وحدك نجي نعاونك مي الله غالب ما نقدرش نجيك....مجرد سيناريو و ليس إتهاما للأم ، المهم أنت دير روحك مهبول و خليها تريح عند باباها بين القوسين ماماها لانو لوكان جا باباها او شرفنا برجولتوا ، المهم لي يهمك هي زوجتك حاول بأي طريقة ترجعها للطريق، لا اريد ان ارعبك لكن يجب عليك ايجاد طريقة لردعها و اتمنى ان لا تكون صغيرة في السن فمثل هذه الافعال لا تصدر من بنت واعية، قد أكون صريح زيادة لكن قضية الوحم لا تمر عليك فكلنا يعلم أن زوجتك هي الحامل و ليس أبوها أو أمها فلو سلمنا جدلا أن البنت تأثرت بالحمل فهذا لا يؤثر على الأب أو الأم، أردت فقط وضع النقاط على الحروف إذا إستعصت عليك الأمور فإستنجد بكبار العائلة من الطرفين يقولوا ناس بكري لي ما عندوش كبيروا ما عندوش تدبيروا.

وادا سلمنا جدلا بالسيناريو المدكور متقوليش مثلا انو امراة حامل ضعيفة تخدم على اسرة متكونة من اربع افراد !!!!!!!
ومتقوليش هدا الامر عادي واجدادنا كانو يرفدو الحجرة والشجرة ويطلعو الجبال ووو هدا كلام فارغ لانو هداك جيل وهدا جيل ودرك الحمل اصبح اضعف بكثير من السابق بسبب الادوية والهرمونات وطبيعة التغدية
بدليل انو الاجداد كانو يولدوا 10 و20 وتلقاهم عادي ودرك حتى يروحو للطبيب ويداويو وزيد يجيبوا واحد زوج ثلاثة ويقولك الطبيب اصبح الحمل خطر عليها !!!!!!!!
نكونوا منطقيين شوية المراة في مرحلة الحمل تحتاج راحة حتى تحافظ على الجنين وتحافظ على نفسها