و تستمر المعاناة🌵🌵🌵🌵🌵🌵🌵

[أم *عائشة*]

السلام عليكم حبيباتي
بدون اطلة درت لبارح المسمن جا يههههبل و الصباح صبح ثقيل و معجن و خشين مع انو البارح جا يتورق وحدة يتقطع و البنة بنين
ثانيا زعما رحت نشطار درت مطاوع بالفرينة في الكوشة المهم هادي المرةالثامنة اللي ما ينجحلبش نقول مانزيدش تعاود ياكلوني يديا جا من برى يااابس و مخليتوش طول فلكوشة
عندي مشكل مع المعجنات راني ندير فغلطة معرفتها نطبق الوصفات بالحرف الخبز هادا درتو فرينة وحدة و بلحظة بالحليب وخمارة الحلوى الزبدة الزيت قريب درت الخل درت قع الطرق و زوجي يحب الخبز تع الدار يحب التقليدي بزااااف و انا اللعنة متبعتني فالتقليدي
مورالي راهو ارض ارض
السلام عليكم حبيباتي

[مياسم الصمت]

وعليكم السلام ورحمة الله وبركاته
اختي انت قلت في موضوعك تسمعملي خميرة الحلوى في الخبز ؟؟
وما تحطي خميرة الخبز
هناك وصفة ام اماني ناجحة وانا شخصيا جربتها
من بعد نحط لك الرابط ان شاء الله

[nihal159]

السلام عليكم؛ علاه تعاودي في الطريقة بنفس الخطوات 8 مرات كاملين؟؟؟؟؟ مادام ماصلحش المرة الأولى يعني درت غلطة في مرحلة من مراحل التحضير؛ كي تعاودي الوصفة إنتبهي مليح للخطوات و تقيّدي بجميع النصئح و الإرشادات؛ عادي أختي ماتقلقيش روحك؛ أصلا بالتكرار و المداومة تعودي محترفة في المعجنات؛ بالتوفيق

[زينب 83]

ههههه عجبني العنوان

لا معاناة لا والو حبيبتي ماكانش لي زاد متعلم رانا كامل درنا موارث باه تعلمنا

شوفي حنونة اذا ممكن تقوليلي الطريقة لي ديريها الخبز و في المسمنات
و قوليلي ماركة الفرن لي عندك و الفرسنة لي تستعملي و الخميرة و باذن الله نعاونك

[أم *عائشة*]

ندير فرينة سيم ولا سفينة السميد كيفكيف الخميرة القورية europienne مرسوم فيها زاوش زرق و الاخت اللي قاتلي خميرة الحلوى فلخبز هه لالاندير خميرة الخبز و نزيدلها الحلوى
ف 8مرات ندير كل طريقة مخالفة مش نفس الوصفة
عندي كوشة كوندور
المهم هبطليالمورال صح صح راني تحت الانقاذ
الا ماجابتكمش راني مع المفقودينتحت الارض سلام

[*سندوسة*]

وعليكم السلام اختي
المسمن كي يصبح قطعيه وفوريه يجي سخون ويهبل وزينيه بالعسل

[nihal159]

أنا لمسمن كي يبقالي لتاني يوم نسخنو في المقلاة يجي يقرمش روعة كأنو من الطاجين

[ام نور الهدى 2014]

السلام عليكم
شوفي اختي فالخبز ﻻزم الدليك و العجين يكون طري رخو مش يابس لنجاح الوصفة
الما استعملي دافييي مش سخوون
انتي قولينا الطريقة لي ديريها و ان شاء الله تعاوديه و ينجحلك و راجلك يشكرك بزاااف كامل صراتلنا و عادي المهم العزيمة انا نشوف فيك فقدتي العزيمة

[أم *عائشة*]

ماشي فقدت العزيمة ..��������âککâککâککâککâککâککâکک فشلت خاطر ملفجر و انا ندير فيه و تبعت الخطوات
الوصفة
فرينة وخميرة خبز و سكر و ملح و ماء دافئ
غاظتني عمري و الله

[أم *عائشة*]

يقولو خبز الفرينة ساهل بصح جربت تع الفرينة السميد دلكت حتى يديا وجعوني و الفرينة ماتتدلكش لميتها جات رطبة طرية ملساء
اففففففففففففففففففف استغفر الله
هادا واش درت جااامي صلحلي جااااااااااااااااااااااااااااامي خبز عادي قع النسا يديروه و يفرحو رجالهم و عائلاتهم انا يديا تقول ماهمش خواتات كيما يقولو ������������

[ام نور الهدى 2014]

شوقي اختي ديري يوتيوب و شوفي خبز ام وليد او مطلوع الكوشة لميليسا كهينة ﻻزم تشوفي فيديو هكداك احسن و رجهيلي بالخبر

[أم *عائشة*]

هادي زعما بالفيديو بايتة نشووف حتى حفظتو صوت وصوره

[ام الاشبال]

اختي كي تبداي تخدمي سمي باسم الله وانت تعجني سبحي وتوكلي على ربي وعجني وانت مرتاحة البال وليس عل اعصابك وتبعي جميع المقادير وبادن الله رايحة تنجحي

[زينب 83]

هههههه و الله عجبتيني
شوفي حنونة
الوصفات كامل يتشابهو اكيد عندك خطأ في حاجة
شوفي بدلي الفرينة ديري لابال و اشري خميرة صاف

اولا الخميرة طلعيها مه ملعقة سكر و حليب دافئ احسن من الماء و الخليب لازم يكون دااافئ اياك يكون سخون لاشتة شوي
كي تطلع الخميرة ضيفي الفرينة و باقي المكونات و الملح خليه للاخير
بعدها غطي العجينة بساشي و خليها تتاح بلادليك ربع ساعة و امباعد اعجنيها و قطعي حتى تولي ملساء و طرية و لازم تكون تلص في اليد لااااااازم خليها تخمر شوي غير تضاف الحجم اطرحيها تقريبا 1 سم و شوي خليها تخمر مرة اخرى و دخليها للفرن
الفرن لازم يكون سخووووووون من قبل مليح و اذا عندك مروحة شغليها
و قبل ما تبداي هاذ الشيء كااامل قولي بسم الله و اسألي الله السداد و التوفيق
و اياك تكرهي مستحيل ماتنجحيش فقط الصبر و كاشما تحتاجي اي مساعدة نحن في الخدمة

[فردوس الرحمان]

من المفروض هاد الحوايج تتعلميهم في داركم قبل الزواج، حنا في منطقتنا يركزوا بزاف على العجين للفتاة المقبلة على الزواج، لكن اذا مصلحتلكش حاجة ورآه المشكل ، استغفري الله حاجة ما تستدعي هاد القلق، دعي عنك القلق، واثبتي روحك ، واحد مازاد متعلم، حاولي تعتمدي الوصفات المضمونة كيما تاع ام اماني انا عن نفسي عمري ما طبقت وصفة من وصفاتها الا وجاتني روعة، اخيراً باه تكوني طباخه ماهرة لازم تحبي الكوزينة وكي تدخليها حطي في رأسك بلي لازم ننجح، لان حياتنا من صنع افكارنا، ماتركزيش على الفشل اذا فكرتي فيه راح يتغلب عليك

[أم *عائشة*]

و انت يا فردوس الرحمان تعلمتيهم فداركم!؟؟

[ام رضوان]

السلام عليكم
شوفي اختي يمكن راكي ماتخليهش يخمر
التخمار يلعب دور كبير في نجاح المعجنات
اما بالنسبة لفطير ان كنتي تقصدي الفطير اللي في بالي
نقولك اختي لازم كي تكوني تعجني فيه لازم ماتقطعيهش وماتكثري الماء بزاف
وتخليه يستراح باه تبداي الطيبي
وباه ماييبسش لازمك تخطيه بقطعة قماش وملفوفة بطرف نيلو او كيس بلاستيكي
وماتياسيش راه ماكانش من زاد متعلم
وربي يجازيك بالخير لانك نيتك تفرحي زوجك
نتمنى نكون افدتك

[versace13]

راكي كييييييييفي!بصح الفرق بيناتنا اني حابة نتعلم فدارنا !والله غير راني حاسة بيك!ربي يوفقنا

[انا هي رزيقة]

يا خاه على ام عائشة هذا كامل خاطر مزال معرفتيش تعجني كسرة ...... صدقيني هذ مشكل ميستهلش خلاص يهبط مورالك حنونتي ... شوفي حبيبتي خلي ثقتك بنفسك احسن و خلي البساط احمدي في كل شيئ.... انا شخصيا عندي و الله نفس مشكلتك عمري منجحلي مطلوع االطاجين او الفرن مع اني نقول باسم الله و نحبو موووت و نحب كوزينتي موووت.... بصح والله كل مرة نشوف النتيجة المحزنة نشبع ضحك و نقول لزوجي اكيد مولات الوصفة كلخاتلي ...... خخخخ و هو يضحك مسكين معايا و يقول شفتي هذ النسا مفيهمش لامان ....... خخخخ و عمري مقللت من شاني او من شان يديا مساكن ...... خخخخخ ماكان والو حنونة تبعي نصائح البنات و عاودي الكرة و اذا منجحتيش اضحكي حنونة ... ايه حقا انا نتصدق بها على اصحاب المواشي ....... خخخخخ يعني متروحش خسارة...... خخخخخ صدقيني حنونة هناك اشياء اخرى كثيرة في الحياة اكثر جدية من مطلوع غير ناجح تستاهل انك تحزني عليها ....اما امور الطبخ فهي مقدور عليها ..اختي جربي و فشلي و شبعي ضحك على روحك ثم عاودي الكرة اكيد في النهاية ستنجحي ... هذ القول عن تجربة تقبلي تحياتي اختي و نقولك الصح ضحكتيني ...... خخخخخ

[أم *عائشة*]

هههههههه اختي انا هي رزيقة طلعتيلي المورال و الله هههههه و زتيرضحكتيني و فرحتني
عندك الحق حنونة الدنيا ماهيش مطاوع ولا كسرة بارك الله فيك اختي

[nanoua7]

حنونة المسمن شوفي موضوع ام كاميليا هنا في المنتدى هايل و راهي حاطا تاني ام وليد مسمن هادا وقت هايل وناجح طيب وحدة في وصت وحده بالفرينة نجح وردي لنا الخبر و راه تاني نوعية السميد و الفرينة تلعب دور وتاني النار تاع الطابونة