يريدون أخذ ابني

[مشكلتي]

السلام عليكم

عاونوني راح نهبل , انا امراة متزوجة عندي 3 ابناء و ولدت مؤخرا الرابع من اسبوع , و عندي سلفتي (اخت زوجي ) اكبر مني و متولدش و متزوجة ربي يعينها كلشي بمكتوب ربي و نحبها و نتهلى فيها , بصح يماها لي هي حماتي قبل ما نولد كانت تقولي كي تولدي مدي بنك لبنتي ,انا حسبتها تهدر برك و مهزيتش على كلامها و منبعد كي ولدت كلاولي راسي حبو يدو وليدي بالسيف عليا , انا مريضة منقدرش للحركة بزف و العياط و القباض لاني ولدت من اسبوع و هوما يضالو عندي و بني من لي ولدتو مشبعتش منو ديما سلفتي هازاتو و تقولو ماما و حماتي تعس عليها بش اذا كشما ندير دافع هي على بنتها . راح تقولولي راجلك وينو ؟؟ راجلي قابل يمد بنو قالي ختي ديرو بين عينيها خاطرها مرفهة و مناقصها والو , حنا ثاني مرفهين و بني يتربا احسن تربية في حضني , المهم انا ما سكتتش و دافعت على روحي حكيت معاهم بلعقل ليومين لوليين محبوش يفهمو زدت حكيت ثاني كيفكيف محبوش يفهمو , قلت لراجلي يشوفلي حل قالي ختي و عزيزة عليا اذا حبت الطفل نمدوهولها و راكي تبقاي تشوفيه !!! المهم منبعد عيطت لخويا يجي يديني لدار بابا و راني فيها من لبارح . خويا ضابط قالي قوليلي برك نخلطها عليهم , أنا محبيتش قتلو خلي الامور على حالها , المهم قبيل جاتني حماتي و بنتها لدار بابا مشنفين و قاتلي حماتي الطفل راه باباه مدهولنا نتي ما عندك ما دخلك و حبو يدوه ذراع عليا ناضتلهم ماما و خواتاتي و حاوزوهم . و ضك جا راجلي كي ثور لهايج قالي هاتي الطفل نديه معايا انا باباه و من حقي نشوفو قتلو معليش شوفو هنا و اقعد معاه اذا حبيت بصح منمدهولكش تديه . المهم تقابضنا و راح زعفان .

فهموني شكون الغالط ياك هذا وليدي خرج من كرشي ولا من كروشهم راهم تلفوهالي .
بابا و خويا قالولي هذا مش راجل و حابين يطلقوني منو .
و راجلي يحبني و نحبو بصح متوقعتش رايو يكون هك فاجأني .
انا راني حاسة بسلفتي كي معندهاش ولاد و متفهمة وضعها و لوكان تطلب وش تطلب نمدلها بالصح مشي بني .
اعطولي حل راح نهبل مفرحتش كامل كي الناس بوليدي .

[ندى الصبح]

السلام عليكم
اولا مبارك عليك المولود وان شاء الله يكون من الصالحين
ثانيا ليس ن عادتي الادلاء برأيي في هذا القسم لكن مشكلتك صراحه اثرت في كثيرا
ثالثا لا يمكن لاي قوه على وجه الارض ان تاخذ منك ابنك فاطمئني لا يمكنهم فعل شيئ
حاولي تتكلمي مع زوجك وتفهميه بلي حتى وتجيبي عشره اولاد ما تقدريش تتخلاي على اي واحد وقوليلو يروح يقرا على الامومه واش معناها وفهميه بلي راكي حاسه بختو بصح الله غالب ما عندك ما تديريلها اكيد مادامو يحبك راه يتفهم ويروح عليه الزعاف
وقولي لختو تروح تجيب طفل من مركز الطفوله المسعفه راهم كاينين حتى حتى الرضع
اخيرا ما تزعفيش ونتي في فتره النفاس قيسي موراك وما تعمريش راسك بيهم قاع لاخطرش تمرضي وتتفر فيك وحدك ومن الاحسن. اقعدي في داركم حتى تبراي وبالاكي تعطي الطفل لباباه ولا جداتو يدوه وخلي الي حب يشوفو يجي عندكم
وخلي خوك بعيد عن الموضوع لانك راح تخسري عايلتك لوكان ترفعي عليهم شكوى
الله يفرج عليك

[>>أثر الفراشة~~]

لا حول ولا قوة الا بالله العظيم

الله المستعان


اختي هذا ابنك ومن حقك ان ترفضي ان تعطي ابنك

اعجبني تمسكك بابنك الحمد لله


صدقيني ان اعطيته لها سيحاسبك غدا ابنك ويقول لك ماما علاش سمحتي فيا


حاولي التفاهم مع زوجك على حدا يعني راسك وراسه وافهيميه ان مايطلبونه مستحيل


واهلك حاولي مادخليهم في الموضوع الا اذا تازم الامر


واهم شيئ ماتقلقيش روحك راكي نافس ولازلمك الرعاية


اكثري من الدعاء والاستغفار


ربي يوفقك ويحفظك ويديم المحبة بين زوجك واولادك

[زبدة ذايبة]

بكل بساطة ماتعطيهولهاش

وراجلك لحيوط كاينين

وعجوزتك نفس الشيء

مايهمك حتى واحد

إذ تنازلتي ماراكيش امراة حرة

[أثيلة]

السلام عليكم و رحمة الله و بركاته
صدقيني يا اختي ان قلت انني اقرأ و ابكي لحالك
لدي ابنة خالتي و ابنة عمي قدمو أبنائهم لأخوات أوةاجهن لأنهم عقيمات
نعم الأمر خير و هو لوجه الأرض
و لكني انا مثلك لو ولدت عشرين أبنا لن استطيع ابعاد احد عني و هم يجب ان يتفهمو الامر يعني كيف يقررو يدوه والله قلبي وجعني
جسبي الله و نعم الوكيل في كل شخص يبعد ابن على امو غضب

[منى6019]

السلام
اعرف كثيرات اعطين ابناءهن عن طيب خاطر
المشكلة حساسة جدا
و انت ترين تلهفها على ولدك
تخيلي لو كنت مكانها.......اما حماتك فهي و تشفق على ابنتها
انشاء الله تجدون حل يرضي الجميع

[ام يوسف2]

لا اله الا الله محمد رسول الله صلى الله عليه وسلم
ملئ قريت وش كتبتبي تخيلت روحي مكانك هذا شي غير معقول وش هو الزمن لي رانا فيه حتى ويكون الاب قابل والام لالا خلاص علاه يكبروا الامور. شكون يقبل يمد وليدو الا اذا كان الرضى هاداك امر اخر لاتيأسي اختي وحاذري على روحك راكي نافس واحد مايقدر ينحيلك وليدك الابرضاك بلعقل باذن الله تعالى تتسقم الامور

[Lydia istanboul]

راني نقرى ونغلي ياخاه وش هذا يخطفو الطفل من يماه هاذي انانية بحته..انا تان ماعنديش ولاد بعد تقريب 4 سنين زواج ومع ذلك محال نتخيل نفسي نحرم ابن من امه لارضي نفسي وانانيتي لي يحب يربي يجيب الايتام ولي خايف من النسب مش شرط يجيب مجهول الوالدين...سبحان الله وش بيهم هادو وزاد اذا قبلتي نقولو معليش لكن مش قابلة وحابين بالسيف عذو مجرمين.

[sunshine2013]

السلام عليكم
هدا الطفل عندو يماه كيفاه يحرموها منو علاه ما تتبناش طفل يتيم محروم من جهة تقضي على مشكل الامومة و من جهة تدي اجر بصح تطمع في طفل عندو والديه لا و بالسيف!!! لا حول و لا قوة إلا بالله

[دنيا الامل 18]

يا الهي ما هدا لا تقبلي مهما حدث هدا ابنك لا تسمحي فيه هي قادرة تجيب ولد يتيم وتربيه مع كل الحق انا مستغربة من موقف زوجك كيف يقبل بهدا اطلعينا على التطورات فقد اثرت في هده المشكلة

[eltorrero]

لا حول ولا قوة الا بالله العظيم

الله المستعان

أختي هذا رأيي ويعبر عن مبادئي انت تقولين انك لا تحبين العياط وووو أنا لا أقول لك ديري العياط ولكن كوني قوية وصاحبة شخصية صدّقيني إن وجدوك صاحبة شخصية ضعيفة سيأكلونك وانساي ابنك والله يهبلوك في المستقبل لو أخذوه هذا مزال رضيع دارولك هكذ من بعد كيف؟؟؟؟؟

الحل في رأيي بسيط إن كانت تريد ولدا فلماذا لا ترعى الأيتام ؟؟؟؟ اقترحي وربما تجد رضيعا في حاجة إلى رعاية خاصة أختي هذا ابنك وأنت أمه ستنقلب حياتك وسيدفع اخوته الثمن لانك ستصبحين حزينة تذكري قولي كوني صاحبة شخصية قوية واقترحي عليهم ما قلته لك ولا تنسي هذو بداوها هكذ فكيف اذا أخذوه قولي سلام عليه وإياك إيّاك فقد يغادرون أرض البلاد ومعهم الطفل وتصبح معيشتك وقلبك منقسما بينه واحد بعيد واخوته الذين سيرون أما حزينة على ابنها كل يوم هذا رأيي ور[ّي يفرّج عليكم كامل آمين ولا حول ولا قوة الا بالله العظيم

والله المستعان والسّلام عليكم ورحمة الله وبركاته

[eltorrero]

راني نقرى ونغلي ياخاه وش هذا يخطفو الطفل من يماه هاذي انانية بحته..انا تان ماعنديش ولاد بعد تقريب 4 سنين زواج ومع ذلك محال نتخيل نفسي نحرم ابن من امه لارضي نفسي وانانيتي لي يحب يربي يجيب الايتام ولي خايف من النسب مش شرط يجيب مجهول الوالدين...سبحان الله وش بيهم هادو وزاد اذا قبلتي نقولو معليش لكن مش قابلة وحابين بالسيف عذو مجرمين.



ربّي يرزقك بذرّية صالحة تقرّ بها عينك آمين أكثري من هذا الدّعاء ربّي لا تذرني فردا وأنت خير الوارثين وفٌّقك الله لكلّ خير دعواتك

[Lydia istanboul]

ربّي يرزقك بذرّية صالحة تقرّ بها عينك آمين أكثري من هذا الدّعاء ربّي لا تذرني فردا وأنت خير الوارثين وفٌّقك الله لكلّ خير دعواتك

بارك الله فيكم وجزاكم الله كل خير....والله قلبي انقسم كيف يحرمو طفل من أمه فقط لتشبع غريزتها في الأمومة اراه أنانية...شكرا مجداا وربي يسعدكم يا رب

[أم سلوى]

خلي خوك يقلب الدنيا......
كاين حيوط....كما قالوا
هو يقول كلمة واحدة تفري الخالة
هذاابن اختى وليس ابن بنتك ..واحد من لهيه

[karimtito]

في بلدي الحبيب تسمع بامور تحبسك من راسك
بأي حق يمد ولدك لاختو ه\ي ماأنزل الله بها من سلطان
هذا لوكان جا يعرف ربي ويخاف منو ما اجبرك على شيء ليس من حقه أصلا
ولله غير تحير في بلادنا تسمع العجب فقط
الله المستعان إدعي ربي لعلهم يعقلون

[غزلانْ]

السلام عليكم


لماذا لا يطلب زوجها من احدى أخواته و طلبت والدتها بموافقة ابنتها طبعا من زوجك
ثم ما هي ردت فعل زوج سلفتك عن الأمر. قولي له أن يجعل من زوجته أي سلفتك تتراجع عن فكرة
في بيت أهلك و يضغطون عليك فما بالك لو ذهبت لبيتك .
ان كان زوجك مسر على أن يتنازل عن ابنه و لا يريد التراجع و أنتِ تريدين الاحتفاظ بابنك فمالكِ الا الاختيار بينه و بين ابنك
و منه خذي قرارك كان الله في عونك أختي و الله يحفظلك ابنك

[ام رضوان]

ربي يكون في عونك ويقويك عليهم
تعرفي نقرا في مشكلتك ونرجف
ياربي وين وصلنا
ماتمديش ولدك وكون حتى توكلي التراب على جال ولادك
اما سلفتك قولها روحي اتكفلي ولد وديري فيه الاجر وراكي عارفة منين جيبه
اما على عجوزك قولها وينا جهنامة تقبلك
وزوجك هذا اللي راكي تقولي يحبني
قلو خليلي وليدي والله لاحبيت
اختي ردي بالك تتنازلي وتتخلاي على واحد من اولادك
قلهم مانقدرش نعيش بكبدة مقطعة
وادعي ربي وقولي
اللهم اكفنيهم بما شأت اميييييين

[وردة مـن ذهـب]

قوليلو أختو إذا حبت تدير الخير تجيب كاش يتيم من المركز و تربيه تدي أجر عظيم و تكون برفقة النبي صلى الله عليه و سلم في الجنة، و تعيش شعور الأمومة في الدنيا و مادامها مرفهة تقدرلو ماشي مشكل.
وانتي ماتخافيش واحد مايقدر يديلك وليدك، إذا ماحبوش يفهمو بالعقلية كاينة القوة. الدنيا ماهيش غابة.

[- بصمة خير -]

كاين اللي يحملو و يعطيو الولد لاخت الزوج او اخ الزوج
و كاين وحدة صدقيني اول حمل ليها اعطاتو لاخت زوجها
اول حمل
ماشي عندها الاولاد من قبل و هذا اعطاتو لالا اول حمل
و قاسات و تعذبت و لكن تقول الحمد لله كل يوم
و انها كانت سبب في فرح عائلة
و انتي يا اختي كتبتي الموضوع تحوسي على التشجيع
تحوسي شكون اللي يوقف معاك في رأيك و يقولك اه عندك الحق
لانك راكي تشوفي عائلتك راهي رايحة تفترق
راهي رايحة تدمر
كانه خايفة من نتيجة قرارك
و في العادة الاولاد يكونو سبب في لم شمل العائلة
و انتي ابنك رايحة ديريه سبب في تفريق العائلة
كل واحد حر في طريقة تفكيره
و كيفاه يحب يفكر
و كيفاه يشوف الامور
انتي مش حابة تتنازلي على ابنك حقك
لكن رايحة تخسري اب اولادك كامل
ماشي ابنك فقط اللي رايحة تبقاي تشوفي فيه
رايحة تخسري عائلتك
رايحة تخسري عائلة ابنك الي راكي تتهاوشي عليه
فرضا ابنك راه عندك
و خوك يوقلك نقلبها عليهم
و انتما تخرجو بابات راجلك و اختو من داركم
فهميني كيفاه رايحة تكون عائلة ابنك اللي راكي تتهاوشي عليه؟
تقدري تفكري انها تزكية نفس
تفكري ان سبحانو رزقك الحمل و الاولاد و هي لالا
و كما اعطاك و ما اعطهاش
تفرحيها بالطفل
صح صعيبة و بزاااااااااااااااااااااف
الطفل الي في كرشك 9 اشهر و المرض و الولادة و المصاريف ووووو من بعد يروح بعيد عليك صعيبة
لكن تقدري تكوني قوية
تقدري تزيدي تحملي و جيبي اخر
باذن الله
الدنيا حتى واحد ما يدير الثقة فيها
و ما تعرفيش واش يكون غدوة
راكي رايحة دمري عائلتك و عائلة اولادك

فكري في المستقبل
و عاودي حساباتك
و مش نهاية العالم
و ماراكيش الاولى و لا الاخيرة اللي تتنازل على ابنها
سبحانو حابك تكوني سبب في فرح عائلة
الالم اللي تعاني منو الان
و الصبر
الله سبحانو يرجعولك
و يجازيك كل الخير
اولادك يكونو زينة الاولاد
الذرية الصالحة

الله ينور طريقك و يهديك للطريق الصحيح
و تقدري تصلي الاستخارة الله سبحانو يخيرلك
و الاستخارة مش احساس و احلام ووو
لالا
ديري قرار و صلي الاستخارة و امشي في قرارك
و خليها على ربي
راكي في النفاس ما تقدريش تصلي
لكن تقدري ديري الدعاء وحدو بدون صلاة

[zakia ak]

معذرة اختي البنفسجية استغرب هذا الرد منك شخصيا لو كنت مكانها ادافع عن ابني ولااتركه يغيب عن عيني دقيقة واحدة مهما كلفني الامر
وحقيقة استغرب موقف الاب اختي كوني فحلة ودافعي عن ابنك ولايهمك احد لانه عندما يكبر سيطرح عليك السؤال عن سبب تخليك عنه وان ذاك لن تقنعه
تفسراتك وتبريراتك حذااااااااااااااااااااااااري .

[- بصمة خير -]

رأيي في الموقف و كل واحد يفكر كما يحب و يدير كما يحب
ماهيش غير هي اللي مدت اولادها
خصوصا اذا الزوج طلب منها
و مش نهاية العالم
و كما يبدى يكبر يفهموه كل شيء
و ماشي شرط يقدر و يفهم الموقف
و لاه امه دارت هكذا
حتى الاب راه ابنه و راه من صلبه و النسب ليه و و الاب و الام كيفكيف
ماهيش غير الام اللي تحس بالكبدة حتى الاب قلبه راه يوجعو و كبدة تقطعت
راني نقوللها شوفي الامور للمستقبل البعيد
القصة باينة كبيرة بزااااااااااااااااااااااااف
و غلطت كما راحت لدار باباها كبرت القصة
اكثر من اللازم و عقدتها
و هي حابة ما تمدش ابنها تتحمل العواقب
على عشر سنين تتفكر كلامي و تقول يا ندامتي
ما ديريش الثقة في الدنيا
واش يجيك غدوة
و الخير ما تعرفيش وين راه
و اللي شافها ربي حنا ما شوفناهاش
سبحانو راه مداير الخير للطفل و العائلة يتربى في دار السلفة عند عمتو
نعرفو حنا الخير؟ نعرفو واش رايح يدير كما يكبر؟
نعرفو واش رايح يكون مع العائلة على غدوة؟
عطيتها رأيي فقط
و هي تقرر كما تحت واش تحب
و لو من الداخل راهي مش متردد في قرارها لو ما محطتش موضوع حتى الاعضاء يشجعوها على قرارها و يقوللها راكي صحيحة كملي غير ابنك
زعمة هذاك مش باباه؟
جابو من الطريق زعمة
الاساس هو الزوج
و الاولاد هما الفرع من الزوج
الاساس تحافظي على زوجك
و الباقي على ربي
ربي ما فيه غير الخير اختي العزيزة
الاولاد يكبرو و يروحو يعيشو حياتهم و ينساوك
يبقالك غير زوجك
حالة راني نشوف فيها قدامي
مريضة و في حالة ربي اللي عالم
غير زوجها اللي واقف معاها
بناتها و اولادها عايشين حايتهم
حتى وين يبقالهم وقت يجو يطلو عليها

[فاصلة]

لا حول ولا قوة إلا بالله. ربي يفرج عليك. ما هي ساهلة على الأم أنه ولدها بعد عليها. وهذا الإحساس تعرفوا الأم فقط. ثم هوما ما احترموش قرارك وما شافوش فيك كامل وين راهي حريتك. أختي تمسكي بوليدك وحتى ولو اخسىتي عائلتك ماكيش السبب زوجك هو السبب . حاولي تفهميه وتأكدي أنه ربي يمهل ولا يهمل.

[abdelkader1996]

السلام عليكم
اولا انا لا ارد عادة على مواضيع المنتدى ولكن لحالة خاصة اردت ان ارد وهي ان عائلتي ربما نفس حالتك تماما
سابدا انا الابن الاكبر و بعدها ولد لي اخ لدي خالة اكبر من امى لا تنجب الاولاد عالجت وشقت تبكي كل عيد عندما ترى الاطفال ...
اكنا 2 دكور امى كانت تريد بنتا لان لديها ولدين .. ولكن عندما رات خالتي في تلك الحالة قالت ان المولود التالي سيكون لكي و قال لها الاطباء انه دكر ..
لكن شاء القدر ان تكون انثى ..مع دالك امي وقت بوعدها لخالتي و اعطننها لها ... امى حملت بعدها ثلات مرات فقط لتنجب انثى لكن كلها كانت دكور ... يعني نحن الان 5 دكور في البيبت . االمهم امي و مع حبها الكبير ان تكون لها بنت اعكتها لاختها ..و لن تصدقي فرحت الااخت بها ..تعاملها احسن معاملة لا ينقصها شيء
اكل لباس ..ادوات يعني كل ما يتمناه الانسان مند كانت صغيرة ... و بطبيعة الحال هي تحمل اسم ابي .. وتعرف اننا اخوتها -لكي يكون كل شيء واضح-
الشيء الاخر الدي اردت ان اقوله لكي .. ان اختى عندما كانت صغيرة يعني سنة او سنتين كانت من بين جميع الحضور تدهب فقط و تجلس عند امي في مشعد يدهل الحضور . حاليا عمرى 20 سنة و اختي 17 .. ولكن عادي يعني نتزاور و تدهب معنا للبحر عادي . لا تتصوري انها ستمنهك من ابنك
صدقيني عمته لن تفرط فيه و لن تاحد منكي ابنكي .. و سيعيش مكرما معززا ولن تنسى لكي سلفتك هدا الجميل
الشيء الاخر الدي لفت انتباهي هو ان سلفتك طمعت في المولود كثيرا ..يعني المسكينة ربما انتظرت ميلاد ابنك اكثر منك ..
كما قلت انها تحمله ..الخ .......تصرف العجوز بديهي فبطبيعة الحال هي ترى ابنتها تتعدب بدون اولاد و كدا زوجك ..

الشيء الاخير هو ان اهل زوجك لا يبدون سيئين معك لانك لم تشتك منهم و كدا زوجك كونك قلت انه يحبك ..
نصيحة .. لاتهدمي بيتك و اخوك و ابوك لما يطلقانك من زوحك لن يدوما لك ..اخوط ضابط و سيبني حياته و يتزوج و ربما بكون في مكان بعيد بطبيعة العمل. و ابوك لن يدوم.. ستربين اربعة اطفال وحدك ... اظنه صعب يا اختى ..
القرار لك و لا احد يمكنه اجبارك .. بقوة القانون و العقل هم ابناوك ..فقط لا تتسرعي لان اي تصرف طائش ستندمين عليه
يوم يكبر اولادك و لن يجدو من يدافع عليهم .