تسجيل الدخول

مشاهدة النسخة كاملة : ماذا أصنع بالشوفلور

ناصرة الرسول
2016-10-12, 11:47
السلام عليكم أخواتي إن شاء الله تكونوا بخير
أنا وحدي في البيت ولما بحثت لم أجد شيئ غير الشوفلور
تذكرت مرة رحت ضيفة للجامعة عند صحبتي...فطيبت لي الشوفلور لكنها طحناته وعملاته مثل المعقودة...وخرج بنيييييين بزاااف ومافيهش ريحت الشوفلور مطلقا
أرجوكم إذا وحدة تعرف هذي الوصفة تقولهالي أو إذا عندكم وصفة أخرى رجاءااا

( طبعا غير حساء الشوفلور لأني جربته من وصفةالاأخت ألهام )
ام طيري الجنة
2016-10-12, 11:57
جربي هذي اختي ادا حبيتي

الوصفة شفتها في اليوتيوب دارتها يو تيوبوز جزائرية اسمها كهينة مليسا بلاك تعرفوها عجبتني.
نبداو بالشوفلور انديروه في ماء وملح على النار
نروحونوجدو الصوص مورني نفس صوص بيشاميل لكن كي تبدا تتقال نزيدو ملح او احسن جومبو دجاج و فلفل اسود و فص ثوم تنقيه و ترميه كيما هو
و تزيدي صفار بيضة مع الخلط المتواصل على النار دائما ثم نضيفو كمية من الفرماج رابي ثم اضيفيلها بصل مقلّي في شوي زيت و مقطر هدي الخطوة الاخيرة هي اضافة و اذا حبيتي ايضا تزيدي شوي معدنوس ثم نحيها من النار خدي البلا نتاع الفور ادهنيه و رتبي فيه زهرات الشوفلور اللي طابو في الماء و الملح و قطرتيهم اذا حبيتي ادهنيهم بشوي زبدة او لا و رشيهم بكمية قليلة نتاع لاشابلور ثم فرغي فوقهم لاصوص مورني اللذيذة اللي تجي شوي تقيلة و زيدي فوقهم شوي فرماج رابي و دخليهم الفرن يتقراتيناو فقط تتحمر كلش طايب و شهية طيبة .
ام طيري الجنة
2016-10-12, 12:09
او خدي الشوفلور و فوريه و من جهة اخرى خدي بيض على حساب كمية الشوفلور و زيديله التوابل و شوي فرينة و شوي طماطم مصبرة وخلطي مليح ثم غمسي حبات الشوفلور بعد ما فورتيهم في هذ الخليط و قليه في زيت سخونة
ليلى الجزائرية1
2016-10-12, 12:12
شوفي اْختي نعطيك وصفة نديروها فالدار بالشيفلور
نغليوه عادي فالماء والملح
وبعدها نهرسوه بالشرفيطة ،ونكرفجو عليه البصل ،ونزيدولو شوي معدنوس مقطع رقيق ،نزيدولو حبة نتاع بيض وفلفل أسود.
واذا تحبي زيدي الطونة والهريسة ،وزيدي فالخليط خبز يابس مرحي باه تتلم الخلطة شوي،
وشكليهم كويرات تقدري تحشيهم بالفرماج واقليهم.
*بيتي مملكتي*
2016-10-12, 13:00
السلام1

كريات الشفلور على طريقة أم إياد أحمد أمين

فوري الشفلور نتاعك مع حبة كبيرة نتاع بطاطا كي يبدا يدخلو الطياب ملحيه و ديريلو فلفل أسود و رجعيه يكمل طيابو
ثم تكوني وجدتي شوية بصل مرحي و ثوم قليهم على النار مليح مع رشة كسبر يابس مرحي و فلفل أسود
بعد ما يطيب الشفلور خليه يبرد و اعصريه من الماء بين يديك ثم ارحيه بالشوكة مع حبة البطاطا
ثم ضفيلهم خليط البصل و الثوم اللي قليتيه من قبل
ضيفيلهم شوية معدنوس مقطع و كسبرة خضرا مقطعة و فرماج مرابي اللي تحبيه قرويار أو شيدار أو روج المهم المتوفر و المحبب
تقدري تضيفيلهم واش تحبي مثلا زيتون مقطع (فقط انتبهي لكمية الملح) ، اسكالوب أو صدر دجاج مقلي و مفتت ، لحم م رحي طايب.....
اعملي منهم كويرات متوسطة الحجم حاولي تضغطي عليهم جيدا باش ما يتحلوش و إذا خفتي يتحلو ديري مع الخليط شوية بيض و جوزيهم على الفرينة ثم البيض ثم الشابلير و ضعيهم في زيت غزير و ساخن يتحمرو ...
قدميهم مع صوص روج و حلقات ليمون أو بطاطا مقلية
وبصحتك
ناصرة الرسول
2016-10-12, 14:31
ام طيري الجنة شكراااا ربي يحفظك ويبارك فيك عجبتني وصفتك لكن مطابقتها لأن الوقت تاع فطور كان ضيق بزاف.... لكن بقالي الشوفلور وراح نديرها في ليوم للعشاء
ناصرة الرسول
2016-10-12, 14:33
ليلى الجزائرية بارك الله فيك حنونة تقريبا درته مثل ماقلت... بارك الله فيك
ناصرة الرسول
2016-10-12, 14:35
ام إياد ربي يخليك ويبارك فيك... يم يم تبدو وصفة شهية نوعدك نطبقها مستقبلا فقط كان ينقصني بعض مكونات مثل كسبر يابس وو... ربي يحفظك
ام طيري الجنة
2016-10-12, 14:40
بصحتكم اختي
همس المطبخ
2016-10-12, 19:48
مشكورين على الشرح
ليلى الجزائرية1
2016-10-13, 09:37
ليلى الجزائرية بارك الله فيك حنونة تقريبا درته مثل ماقلت... بارك الله فيك

وفيك بارك الله أختي ناصرة الرسول ،،نتمنى تكون عجباتك
samya7
2016-10-16, 11:39
بصحتك أختي و شكرا لكم على الشرح