كيفاش نغير زوجي

[مشكلتي]

السلام عليكم ورحمة الله تعالى وبركاته مشكلتي تكمن في ان خطيبي انسان جد هادئ لديه عمل مستقر هو غير وسيم لكنه حنون ورومنسي ويحبني كثيرا المشكل تكمن في أنه يحب اهلو بزاف وهوما ايضا متعلقين بيه والمشكل الاكبر انو حاب يربطني بيهم طول حياتو قالي منديرش داري وحدي تعيشي مع يمة وكذا ..معرفتش كفاش ندير باش نغيرلو افكارو علاه يربطني بامو طول حياتو حابة ندير كوزنتي وحدي كيم قع لبنات بصح معرفتش الحل كفاه نخرجلو للعيب ونشرط داري مجياش نروح لثم ونبدا ندير فلمشاكل نخاف متخرجش عليا نسكت ونعيش حياتي قع في خدمة العيال والعجايز مجياش والله ران حايرة وكارهة دبرو عليا بدون تجريح .متقولوليش الظروف والسكنة انا قابلة باش شمبرتي نقسمها على زوج نص كوزينة ونص شمبرة كوشي والديه يعطيهم حقهم مالمصروف ونخدم عليهم وقت العجز فقط منخدمش عليهم و هوما لاباس بيهم لان عندهم بناتهم انا حابة نستقل بذاتي ومنعيشش مربوطة بقيودهم كفاه ندير رايحة نموت مالقلق والتخمام عاونوني بلا تجريح وانشاله متنقولش القسم للدردشة باش نعرف علاه بعض الرجال يحبو يبقاو ديما شادينولاسقين في والديهم وميحبوش بنت الناس يعطوها حريتها وراحتها؟

[- بصمة خير -]

الراجل اذا حبت تغيرو المراة ثم اللي مستحيل يتغير

و نقولك زوجك من النوع اللي حاب يسكن مع اهله
و كان صريح معاك في الاول

انت كوني صريحة مع نفسك
تحوسي عليه
و الا على الكوزينة

تحوسي عليه تقبليه كما راه
و هو يقبلك كما راكي

تحوسي على الكوزينة فكري مليح
الان قبل غدوة

الله يجيب الخير

و ييسر امورك

و يفرحك

[خالد عنابي2]

عنوان موضوعك خطير جدا ( نغير زوجي)
وقصدك تغيري تعلقه بعائلته وامه وابعاده عنها
هذا مطلب غير شرعي ومعاونتك تعد معاونة على الاثم والعدوان

اما مطلبك بالاستقلال ببيتك فهذا مطلب مشروع ولازم تتفاهمو من البداية
خاطي تروحي لعندهم وتبداي تعملي فالمشاكل وتلدعي كالافعى

اذا تفاهمتو فنعم والا كل واحد في طريقو التفاهم والتراضي هو الاساس

[intel-i7]

اعجبتني تحوسي عليه والا على الكوزينة هههههه
حاولي ان تشترطي عليه ان تبقي مدة مع اهله واذا مقدرتيش طالبي بكوزينة وحدك
يمكن اهلو طيبين وفي عوض ان تخدميهم هم من يخدموك

وفيما يخص تعلق الرجال بأهلهم
فهذا امر عادي خاصة مغ الام
وانت لكي الاختيار ان تقبلي بالشروط او تبحثي عن زوج اخر

[حياتي نبع امل]

ماشي شرط عليك تخدمي دارهم .اذا حبيتي يكثر خيرك واذا ماحبيتيش ربي يسهل
السكن حقك علاه راكي خايفة وتحوسي كيفاش تطلبيه .عادي قوليلو حابة سكن انفرادي يقدر اللهم بارك مايقدرش اتعاونو واكريو .واذا ماحبش هو حر

ملاحظة فقط .قلتي هو غير وسيم .....يعني درتي فيه بليزير ك قبلتي بيه متلا ؟؟؟؟وحبيتي يكافئك بالسكن وحدك ؟؟؟اذا بديتي حساباتك بهاد الطريقة غير عاودي رتبي افكارك .ديجا نواياك ربي يجيب الخير بما انك مازال مادخلتيش عندهم وراكي تخمي تتبلايهم وخفتي ماتجيبش نتيجة .
الله يهدينا ويهديك

[*أم كوثر*]

مازلتي في بداية الطريق
الصراحة هي الحل
صارحيه بمطالبك
بعدها قرري

[Om mimi]

خطيبك مش زوجك اذا مش مقتنعة بالأمر رغم انه صراحك انت ايضا صارحتيه حبسي هنا اذا كنت نستناي تروحي و ديري مشكل من اجل السكن وحدك ماتشكيش مرة اخرى تقولي عيشوني في ضيق هو واضح من الاول و ايضا انه حقك تقبلي او ترفضي او ممكن السبب اذا خليتي هذا الخطيب ماتلقايش لي يقبل بشرطك

[Rima24k]

خمي مع روحك خير هو هذا شرطو ونت ماكش قابلة بيه وماتقوليش اني نقبل درك ومن بعدنبدلو او باين بعد مايتبدلش

[nihal159]

نصيحتي ليك فكري مليح؛ لأنك مش متقبلة فكرة العيش مع أهله ولو مبدئيا؛ و الزواج ماهوش مغامرة تاع أسبوع أو شهر و تنتهي راهو عمر كامل بكل ضغوطاته و مشاكله و روتينه؛وفي حالتك زيديلهم حلمك في بيت مستقل الذي لن يتحقق و ضغط عائلة الزوج؛ شوفي أنت إذا قادرة تتحملي.

[فاطمة شلف]

السلام عليكم ورحمة الله وبركاته
اختي الكريمة لي يتفاهموا في الصيف ما يداق في الشتاء
وهذي حياة كاملة
زواج ليلة تدبرو عام
ماذبيك تصرحيه لانو هو راه صريح معاك
والزين يااحتي زين العقلية واليدين المهم هو راه شريك
اكيد ماتصبيش زيو
حاولي تفهميه وتصرحيه بلا ما تخسريه
وربي يكون معاك ويسهل في اموركم ان شاء الله

[sonia.morchid]

نعطيك هدرة عن تجربة او مادابيا تفهميها مليح الراجل لي يحب يماه ويسهر على راحتها ويمشي معاها كما قال ربي والله غير هداك هو الراجل الحقيقي ما يسخفكش هداك لي يرمي يماه على جالت مرا الى كان ماشفعولهاش تسع شهور وهو في كرشها وسهر الليالي والتبكار على قرايتو وحرستها على واش يحب ويكره والله غدو انت مايشفع لك والو عندو والحياة عشرة ويجي النهار لي يبدلك بدون مايخمم كي يلقى لي تقبل به بشروط حتى لو كان عندكم عشر ولاد الي كان شفتي روحك ما يخرجش عليك شرط صارحيه وربي ينوب عليك وعليه

[زبدة ذايبة]

اللي سبقو في الرد كفاو ووفاو مانشقاش نزيد عليك

كاينة حاجة وحدة

انت حابة راجل بلا أهل

ثانيا شوفي ظروف هذا الخاطب إذا تسمحلو يديرلك دار وحدك

ولا ناوية على براكة ديريها

ماتزعفيش

حنايا نسميو الأشياء بأسمائها حتى تكوني على بينة مابينا وبينك غير الخير ونحبولك الصلاح

ماتكونيش أنانية الزواج أخذ وعطاء وتضحية

واجهي هذا الزوج ولا الخاطب بحقيقة تفكيرك والهواجس اللي عندك

خير من لي راكي تفكري وحدك

دايرة حساب المشاكل قبل من حساب الخير

ماكاش خير من المصارحة

إذا عجبو وعجبك الحال كملتوا كيفكيف

ماعجبكمش الحال الرجال قلال والنساء بزاف

[**د لا ل**]

السلام عليكم

ربي يسلهك أختي على كل حال

سؤال فقط

ماذا لو كان هذا الزوج أخاك وزوجته هي التي تريد دار وحدها وماتسحقكمش وماتسحقش والديه وأهله

أكيد ماراحش يعجبك الحال وتغيضك أمك وأبوك بعد ماتعبوا عليه وكبروه وزوجوه ...الان يتخلى عنهم

يا أختي الكريمة ....الي مافيهش الخير في والديه مافيهش خير في أي أحد حتى زوجته و أولاده

ربي يصلح الاحوال

[zakia ak]

الخص لك رايي في المثل المصري اللي مالوش خير في اهلو ما لوش خير في الناس اعلمي جيدا ان الراجل اللي يتخلى على اهلو ويتبع مرتو واهلها ماهوش راجل ويجي الوقت اللي يرميها هي تاني .

[Davidcena]

الهربة لمن استطاع

[قدور بن عاشور]

أنا تبانلي تدخلي لدار أهله كالحمل الوديع و بعدها خرجي الڤرون و تحولي إلى أفعى كوبرا من أجل الكوزينة، قد تنجحين في تلغيم بيت أهله أو تفشلين و تعودي مطلقة إلى بيت أبيك، و راح الزواج و راحت الكوزينة.

[أ م ساجد وسيم]

صحا ختي نسقسيك علاه نية ناقصة من درك بالاك يماه تكون حنينة معاك كيما يماك وكثر صفي نيتك وحطي نقاط على الحروف من درك خير من طيح القدرة فوق راسك الوضوح وصراحة مليحة وراجل لي يحب يماه وحاطها فوق راسو نديرو تاج فوق راسي هذاك جامي يغبنك معاه

[nihal159]

مافهمتش علاه تربطو بين البر بالوالدين و العيش في منزل مستقل؟؟؟؟ هي قالتلو ديرلي دار مش عايب والديك أو قاطعهم؟؟ وعلى حسابكم لي يستقل بزوجته و أولاده في

بيت لوحده ماعندوش الخير في والديه؟ لازم يعيشو في الضيق؛ هو وزوجته و أولاده محشورين في غرفة واحدة؛ ونهار يجو الضياف عندهم يبعت مرتو لدار باباها باش

تخلي لبلاصة للضياف؛هكذا باش تبانلكم بلي يحب والديه؟؟؟؟؟

[ع.عيسى]

همك هو الكوزينة ؟؟؟ وخدمة العجائز؟؟؟ ، فيسع رجعتي يماه عبئ عليك وعلى بنها وهي لي جابتوا للدنيا ورباته ودارتوا راجل ، وكل همك هو كوزينة ما يشركك فيها حتى واحد علواش جاية خاوية من دار بباك ، ؟؟؟وتقولي هو بلي ماهوش وسيم علواش نتي ملكة جمال الكون ؟؟ انا انصحك لوجه الله انك تبطلي وتفسخي العقد ، لان هذه العلاقة حتما ستنتهي بالطلاق ، ديري في بالك هو ماراح يتخلى على يماه وانتي ماطيرلك كوزينة وحدك .

[hadjer english]

اختي مدامك مازال ماتزوجتي من حقك تشرطي واش تحبي كيما هو شرط اصلا راكي تأخرتي كان لازم تقوليهالو بصراحة من قبل وهاذا حقك ماتحشميش بيه عادي فهميه بلعقل قوليلو ماشي معناها نقطعوهم نروحولهم دايمن برك نكون مستقلة راح يزعف ويدير مشكل اكيد لكن هادي حياتك وكي تكوني نتي تسوفري هو يكون برة يخدم وواحد مايحس بيك ونزيد نقوللك هاد النوع من الرجال يعطي الحق لامو حتى ولو غالطة مانيش نقوللك بطلي ولا ديري مشكل ممكن تعيشي معاهم ويدللوك وتكوني ملكة على حساب العقلية المهم ماتخرجيش للعيب. والخيرة فيما اختاره الله

[*أم سجى*]

وعليكم السلام اختي الحل هو المصارحة عمرك لتخمي باش تروحي لتم وديري مشاكل هذي مكاش منها اصلا اشرطي دارك وفرات مفيهاش عيب